UN PAR di aña pasa, Roald y Elsebeth, un pareha cu e tempo ey tabatin casi 50 aña, tabata hiba un bida comodo na Bergen, e di dos stad mas grandi di Noruega. Hunto cu nan yiu homber y yiu muher, Fabian y Isabel, nan tabata sirbi fielmente den nan congregacion. Roald tabata anciano y Elsebeth tabata un pionero, y Fabian y Isabel tabata publicadornan activo den congregacion.

Sinembargo, na september 2009 e famia a dicidi di haci algo diferente. Nan a bay predica pa un siman na un area aisla. Roald y Elsebeth, hunto cu Fabian, kende e tempo ey tabatin 18 aña, a bay Nordkyn, un peninsula situa den e region di Finnmark, mas ariba di e circulo polar. Eynan, den e pueblito di Kjøllefjord, nan a predica hunto cu otro ruman cu tambe a bin na e area aisla ey pa yuda cu e trabou di predica. Roald a bisa: “Na cuminsamento di e siman ey, mi tabata sinti mi hopi contento cu mi a logra regla mi asuntonan di tal manera cu mi por a participa den e actividad special aki pa henter un siman.” Pero, den e mesun siman ey, Roald a cuminsa sinti su mes incomodo. Kico a pasa?

Roald a conta: “Inespera, Mario, un pionero cu ta sirbi na Finnmark, a puntra nos si nos lo tabata dispuesto pa muda bay un stad cu yama Lakselv pa yuda e congregacion eynan cu tabata consisti di 23 publicador.” E pregunta a coge Roald completamente for di base. El a splica: “Ami cu Elsebeth a pensa riba e posibilidad di sirbi caminda tabatin mas necesidad di publicador—pero esey lo tabata despues cu nos yiunan lo a bay biba riba nan mes.” Pero durante e par di dianan cu Roald a predica den e area isola aki, e por a mira cu e hendenan tabatin masha deseo pa siña tocante Jehova. Nan tabatin mester di yudansa awor, no despues. El a bisa: “E pregunta di Mario a molestia mi consenshi y a pone hasta cu mi no por a drumi pa varios anochi.” Anto Mario a hiba Roald cu su famia Lakselv, rond di 240 kilometer zuid di Kjøllefjord. Mario tabata kier pa e bishitantenan mes wak e congregacion chikito ey.

Na Lakselv, Andreas, un di e dos ancianonan local, a mustra e bishitantenan e area y e Salon di Reino. E rumannan di e congregacion a duna nan un caluroso bonbini y a bisa Roald y Elsebeth cu nan tabatin masha gana pa nan bin biba eynan pa yuda cu e obra di Reino. Cu un sonrisa, Andreas a bisa Roald cu ya el a traha un afspraak pa un entrevista pa un trabou p’e y pa Fabian! Kico Roald cu su famia lo a haci awor?

Fabian su prome reaccion tabata: “Ami si no tin gana di bin biba akinan.” E solo idea cu e tabatin cu bay laga su bon amigonan cu el a lanta cu ne den su congregacion y bin biba den un stad chikito no a atra’e dje hopi ey. Ademas, e no a caba su curso pa bira electricien. Sinembargo, ora nan a puntra Isabel (cu e tempo ey tabatin 21 aña) kico el a pensa di e idea di muda, el a bisa: “Esey ta net loke semper mi kier a haci!” Pero despues Isabel a bisa: “Ora mi a sigui pensa riba e asunto, mi a puntra mi mes si esaki realmente tabata un bon idea. ‘Lo mi haya falta di mi amigonan? No ta mihor mi keda den mi congregacion caminda cosnan ta mas cumbiniente y mas sigur?’” Con Elsebeth a reacciona riba e invitacion? El a bisa: “Mi a sinti cu ta comosifuera Jehova a duna nos famia un asignacion. Pero mi a pensa tambe riba nos cas recien renoba y tur e cosnan cu nos tabatin den nos cas y cu nos a yega na dje den e ultimo 25 añanan.”

Na final di e siman special, Roald cu su famia a regresa Bergen, pero nan no por a stop di pensa riba nan rumannan cristian na Lakselv, un 2.100 kilometer leu. Elsebeth a bisa: “Mi a haci hopi oracion na Jehova, y mi a keda den contacto cu e rumannan cu nos a conoce. Nos tabata manda potret pa otro y conta otro nos experencianan.” Roald a bisa: “Ami tabatin mester di tempo pa custumbra cu e idea di muda. Tambe mi tabatin cu puntra mi mes si esaki lo tabata posibel. Con nos lo a mantene nos mes? Mi a haci hopi oracion na Jehova y a papia cu mi famia y cu e rumannan cu tabatin mas experencia.” Fabian a conta: “Mas mi a pensa riba dje, mas mi a realisa cu mi no tabatin un motibo valido pa bisa no. Hopi biaha mi tabata haci oracion na Jehova, y pocopoco pero sigur e deseo pa muda bay eynan a bira mas grandi.” Y kico di Isabel? A fin di prepara su mes pa e posibel mudanza, el a cuminsa traha pionero den e stad caminda nan tabata biba. Despues di a traha pionero pa seis luna, durante cua el a dedica hopi tempo tambe na estudio personal di Bijbel, el a sinti cu e tabata cla pa haci e cambio grandi ey.

Segun cu e deseo pa sirbi caminda tin mas necesidad di publicador a bira mas grandi, e famia a dal paso pa logra nan meta. Roald tabatin un trabou cu tabata paga bon y cu e tabata gusta hopi, pero el a pidi su doño di trabou si e por a laga su trabou (tuma buiten bezwaar) pa un aña. Pero su doño di trabou a pidie pa e keda traha part-time—siguiendo un schedule di traha dos siman y haya liber seis siman. Roald a bisa: “Financieramente, mi a bay hopi atras, pero tur cos a sali bon si.”

Elsebeth a conta: “Mi esposo a pidi mi pa purba di haya un cas na Lakselv y huur esun di nos na Bergen. A tuma mi hopi tempo y esfuerso, pero nos a logra. Despues di un tempo, nos yiunan a haya trabou part-time y nan ta yuda nos cubri e gastonan di cuminda y transport.”

 Isabel a bisa: “Caminda nos a bay biba ta un stad chikito. Pues, como pionero, mi reto di mas grandi tabata pa haya un trabou cu mi por a sostene mi mes cu ne. Tin biaha cosnan no tabata pinta bon.” Toch el a logra cubri su gastonan, ya cu e tabata dispuesto pa tuma cualkier trabou part-time cu e por a haya, pa chikito cu esey por tabata (el a haya nuebe durante e prome aña). Y con a bay cu Fabian? Fabian a bisa: “Pa mi por a caba e curso pa bira electricien, mi tabatin cu core stage. Esey ta loke mi a haci na Lakselv. Mas despues, mi a pasa mi examen y a haya un trabou part-time como electricien.”

Marelius y su esposa Kesia tambe kier a sirbi caminda tabatin mas necesidad di publicador. Marelius, kende awor tin 29 aña, a bisa: “E discursonan y entrevistanan cu mi a scucha na congreso tocante e trabou di pionero a motiva mi pa pensa riba e posibilidad pa amplia mi sirbishi.” Sinembargo, pa Kesia, kende awor tin 26 aña, e idea di muda bay for di su famia tabata un obstaculo. El a bisa: “Mi tabatin miedo di e idea di bay laga mi sernan keri.” Ademas, Marelius tabata traha full-time pa paga e hypotheek riba nan cas. El a bisa: “Cu yudansa di Jehova y hopi oracion, den cua nos tabata pidie yuda nos haci cambio, nos por a muda bay.” Na prome luga, nan a cuminsa dedica mas tempo na estudio personal di Bijbel. Despues, e pareha a bende nan cas y a kita for di trabou. Na augustus 2011, nan a muda pa Alta, un stad den parti noord di Noruega. Eynan, pa nan gana nan pan di cada dia como pionero, Marelius ta traha como accountant y Kesia ta traha den un pacus.

Knut y Lisbeth, un pareha cu aworaki tin 30 y pico aña di edad, a sinti nan conmovi ora nan a lesa e relatonan den Anuario tocante rumannan cu a bay sirbi caminda tin mas necesidad di publicador di Reino. Lisbeth a bisa: “E experencianan aki sigur sigur a lanta den nos e deseo pa sirbi den un otro pais, pero mi a vacila pa tuma un decision pasobra mi a duda si un hende gewoon manera ami lo por a haci un cos asina.” Toch nan a dal paso pa logra nan meta. Knut a bisa: “Nos a bende nos apartamento, y pa spaar placa, nos a muda bay biba cerca mi mama. Mas despues, pa haya un idea kico kiermen sirbi den un otro pais, nos a muda bay un congregacion di habla Ingles na Bergen pa un aña, caminda nos a keda cerca mama di Lisbeth.” No a tarda mucho pa Knut y Lisbeth sinti cu nan tabata cla pa dal e ultimo paso, anto uno basta grandi, esta, di muda bay Uganda. Tur aña nan ta bay Noruega bek pa traha dos luna. Asina nan ta haya suficiente fondo pa por biba y predica full-time na Uganda pa resto di e aña.

Con a sigui cu e rumannan aki cu a ofrece nan mes pa sirbi di buena gana otro caminda? Roald a bisa: “Nos ta pasa mucho mas tanto tempo hunto como famia den e area isola aki cu tempo nos tabata biba na Bergen. Awor nos famia ta mas pega cu otro. Ta un  bendicion pa mira con nos yiunan a progresa spiritualmente.” El a agrega: “Ademas, awor nos no ta dje preocupa ey mas cu cos material. Nos no ta duna asina tanto balor mas na nan.”

Elsebeth a mira e necesidad pa siña un otro idioma. Dicon? E teritorio di Congregacion Lakselv ta inclui e pueblo di Karasjok, den e area central di e Saminan, un pueblo indigena di e regionnan parti noord di Noruega, Suecia, Finlandia y Rusia. Pues pa Elsebeth por a alcansa e hendenan di e pueblo aki mas facil, el a sigui un curso den e idioma Sami. Awor e por hiba un combersacion simpel den e idioma ey. Con ta bayendo cu ne, e ta disfruta di e trabou den su teritorio nobo? Elsebeth a bisa cu un cara radiante: “Mi ta dirigi seis estudio di Bijbel. Lo mi no kier ta ningun otro caminda cu no ta aki!”

Fabian, kende awor ta traha pionero y ta un sirbidor ministerial, a bisa cu e cu Isabel a yuda tres hoben di nan congregacion nobo cu tabatin mester di animacion pa ta mas envolvi den actividadnan di e congregacion. Awor tur e tres hobennan aki ta activo den sirbishi. Y dos di nan a batisa y a traha pionero auxiliar na maart 2012. Un di nan, un ruman muher cu a cuminsa drif bay for di e berdad, a gradici Fabian cu Isabel cu nan a yud’e bira fuerte atrobe. Fabian a bisa: “Loke el a bisa mi a conmove mi. Ta un goso di por yuda un ruman!” Isabel a remarca: “Den e asignacion aki, mi por a echt ‘purba y mira cu Jehova ta bon.’” (Sal. 34:8) Anto el a agrega: “Y riba tur esey, nos ta echt disfruta di nos sirbishi akinan!”

Awor Marelius cu Kesia ta hiba un bida mas simpel, pero cu mas satisfaccion. E congregacion na Alta, na unda nan a muda bay, awor tin 41 publicador. Marelius a bisa: “Ora mi wak bek y mira cuanto nos bida a cambia, mi ta sinti mi hopi anima. Nos ta gradici Jehova cu nos por sirbie como pionero akinan. No tin nada mas dushi cu esey.” Kesia a agrega: “Mi a siña confia mas den Jehova, y el a cuida nos bon. Tambe mi a ripara cu e echo cu mi ta biba mas leu for di mi famianan ta yuda mi aprecia e momentonan cu nos ta pasa hunto cu nan mas ainda. Nunca a duel mi cu nos a tuma e decision ey.”

Y con ta bayendo cu Knut y Lisbeth na Uganda? Knut a bisa: “A tuma un poco tempo pa ahusta na un pais y un cultura nobo. Awa y coriente ta bay cada rato, y tambe nos sa haya dolor di stoma, pero nos por tin cuanto estudio di Bijbel cu nos kier!” Lisbeth a bisa: “Apenas mei ora for di caminda nos ta biba tin teritorio caminda hende nunca a yega di tende e bon noticia. Pero ora nos bay eynan, nos ta haya hende ta lesa nan Bijbel y ta pidi nos pa siña nan comprond’e. E goso cu bo ta sinti di por siña hende humilde asina e mensahe di Bijbel ta incomparabel!”

Esta feliz nos Lider, Cristo Hesus, mester ta ora e mira for di cielo con e obra di predicacion cu el a inicia ta yega na mas y mas region na mundo! Si, pa tur sirbidor di Dios ta un goso di por ofrece nan mes di buena gana pa cumpli cu e mandato di Hesus pa ‘haci hende di tur nacion su discipel.’—Mat. 28:19, 20.