Si, nan ta existi. Di unda nan a bin? Corda cu Dios a crea angel cu e libertad pa scoge pa nan mes. Poco despues cu Dios a crea e prome homber y muher, Adam cu Eva, un angel perfecto a haci mal uzo di e libertad ey y a instiga un rebelion riba Tera. El a logra pone Adam cu Eva rebeldia contra Dios. (Genesis 3:1-7; Revelacion 12:9) Bijbel no ta menciona nomber di e angel ey ni ki posicion e tabatin den cielo prome cu el a rebeldia. Pero despues di su rebelion, cu rason Bijbel ta yam’e Satanas, cu ta nifica “Resistidor”, y Diabel, cu ta nifica “Calumniador.”—Mateo 4:8-11.

Lamentablemente, e rebelion ey contra Dios no a caba eynan. Den tempo di Noe, un cantidad incontabel di angel a “bandona nan propio luga di biba” den e famia celestial di Dios. Nan a baha bin na Tera y a tuma curpa di hende pa hiba un bida inmoral y malbado, y asina nan a bay contra e proposito pa cua Dios a crea nan.—Judas 6; Genesis 6:1-4; 1 Pedro 3:19, 20.

Kico a para di e angelnan malbado ey? Ora Dios a trece un diluvio pa limpia henter e Tera, nan a bandona nan curpa humano, a bolbe bira spirito y a drenta den e region di spirito. Pero Dios no a permiti e angelnan rebelde ey bay bek na nan “puesto original.” En bes di esey, el a condena nan na un estado di “scuridad [spiritual] profundo” cu yama Tartaro. (Judas 6; 2 Pedro 2:4) E demoñonan aki a pone nan mes bou di control di Satanas e Diabel, e “gobernante di demoño”, kende “ta sigui disfrasa su mes na un angel di luz.”—Mateo 12:24; 2 Corintionan 11:14.

Bijbel ta siña cu e Reino Mesianico di Dios, un gobierno den cielo, a ser estableci na 1914. a Despues di e momento importante ey, Satanas y su demoñonan a ser saca for di cielo y benta riba Tera. E maldad y inmoralidad sumamente baho cu ta reina tur caminda awe riba Tera ta duna prueba di nan influencia vengativo y destructivo.—Revelacion 12:9-12.

Pero e aumento di violencia y cosnan degrada ta confirma cu e fin di nan reinado di teror ta cerca. Pronto, e Reino di Dios lo stroba e spiritonan malbado ey di tuma accion. E Reino aki lo transforma e Tera den un paradijs y lo reina pa mil aña. Despues di esey, pa ultimo biaha e spiritonan malbado ey lo bolbe haya un chens cortico pa pone humanidad na prueba. Anto finalmente, nan lo ser destrui pa semper.—Mateo 25:41; Revelacion 20:1-3, 7-10.