Dios a bisa Adam: “E dia cu bo come di [e palo], lo bo muri sigur.” (Genesis 2:17) Si Dios a crea Adam pa bira bieu y muri, no tabatin niun motibo pa dun’e e spiertamento ey. Adam tabata sa cu si e no come for di e palo, e lo no muri nunca.

Adam cu Eva no tabatin nodi come for di e palo pa keda na bida pasobra tabatin hopi palo di fruta den e hofi. (Genesis 2:9) Si nan no a come di e fruta, e prome pareha lo a mustra obediencia na Esun cu a duna nan bida. Ademas, nan lo a demostra cu nan ta reconoce cu ta Dios tin derecho di bisa nan kico pa haci.

Nos tin cu analisa un combersacion cu a afecta nos tur pa nos compronde dicon Adam cu Eva a muri. Satanas e Diabel a uza un colebra pa conta un mentira malicioso. Bijbel ta bisa: “Awor e colebra tabata mas astuto cu tur otro bestia di sabana cu SEÑOR Dios a traha. Y el a bisa e muher: ‘Di berdad Dios a bisa: “Bo no mag come di ningun palo di e hofi”?’”—Genesis 3:1.

Eva a contest’e: “Di fruta di e palonan di e hofi nos por come, ma di fruta di e palo cu ta keda meymey di e hofi, Dios a bisa: ‘Boso no mester come di dje ni mishi cu ne, pa boso no muri.’” Despues e colebra a bis’e: “Siguramente boso lo no muri! Pasobra Dios sa cu e dia cu boso come di dje, boso wowo lo habri y boso lo ta manera Dios, conociendo bon y malo.” Pues, Satanas a bisa cu Jehova ta un mentiroso cu no tabata kier pa Adam cu Eva haya algo bon.—Genesis 3:2-5.

Eva a kere e mentira ey. El a keda observa e palo y el a wak cu e fruta tabata mustra asina bon cu el a piki e fruta y a com’e. Bijbel ta sigui bisa: “Y el a duna su esposo tambe cu tabata hunto cu ne, y el a come.”—Genesis 3:6.

Ki un tristeza Dios mester a sinti ora el a wak cu su yiunan, kendenan el a stima, a desobedec’e deliberadamente! Kico Dios a haci? Jehova a bisa Adam: “Lo bo ... bolbe na tera, pasobra for di dje bo a wordo tuma; pasobra stof bo ta, y na stof lo bo bolbe.” (Genesis 3:17-19) Pa motibo di esaki, “tur e dianan cu Adam a biba tabata 930 aña, y el a muri.” (Genesis 5:5) Adam no a bay cielo ni ningun otro caminda. E no a existi prome cu Jehova a cre’e di stof. Pues ora el a muri, el a perde su bida y su curpa a bolbe bira stof. El a stop di existi. Esta tristo!

Pa motibo cu nan a desobedece Jehova deliberadamente, Adam cu Eva a perde nan perfeccion y e posibilidad di biba pa semper. Nan a pasa den un transformacion fisico; nan a bira imperfecto y pecador. Pero ora Adam cu Eva a peca y a desobedece Dios, nan no a afecta nan mes so. Djey padilanti, tur nan yiunan lo a nace imperfecto y pecador. Romanonan 5:12 ta bisa: “Pa medio di un hende [Adam] pica a drenta mundo, y morto pa medio di pica, y asina morto a pasa pa tur hende pasobra nan tur a peca.”

Bijbel ta describi pica y morto como “e velo cu ta tapa tur pueblo, si, e mantel cu ta habri over di tur nacion.” (Isaias 25:7) E velo ey ta tapa hende mescos cu serena venenoso cu nos lo no por scapa for di dje. Pesey “den Adam tur ta muri.” (1 Corintionan 15:22) E pregunta cu ta lanta awor ta e mesun pregunta cu apostel Pablo a haci: “Ken lo libra mi di e curpa cu ta hiba mi na e morto aki?” Tin un persona cu por libra nos?—Romanonan 7:24.