Sigui pa e contenido

Sigui pa e index

Acaso manipulacion genetica ta yuda nos biba mas largo?

Hende Ta Busca Manera pa Biba Mas Largo

Hende Ta Busca Manera pa Biba Mas Largo

“Mi a mira e tarea cu Dios a duna e yiunan di hende pa ocupa nan mes cu ne. El a traha tur cos apropia na su tempo. Tambe el a pone eternidad den nan curason.”Eclesiastes 3:10, 11.

E PALABRANAN ey, cu e Rey sabi Salomon a skirbi hopi tempo pasa, ta describi bon loke hende ta desea. Bida ta cortico, pesey kisas hende semper a busca manera pa biba mas largo. Tin yen di storia y leyenda cu ta mustra cu hende a busca manera pa biba mas largo.

Tuma por ehempel, Gilgamesh, un Rey Sumerio. Tin varios leyenda tocante dje. Un di e leyendanan cu ta ser conta den e Poema Epico di Gilgamesh ta bisa cu el a cuminsa un biahe peligroso pa busca inmortalidad, pero e no a logra hay’e.

Un cientifico di Edad Medio den su laboratorio

Den siglo 4 prome cu Cristo, cientificonan na China a purba traha un bibida magico pa biba pa semper. E bibida aki tabatin un cantidad chikito di mercurio y arsenico. Ta parce cu algun emperador Chines a tuma e bibida aki y a muri. Na Europa, durante Edad Medio, algun cientifico a purba haci oro comibel. Dicon? Wel, nan a pensa cu como cu oro no ta daña lo e por alarga bida di hende.

Mescos cu den pasado, awendia algun biologo y experto riba tereno di genetica ta sigui investiga ta dicon hende ta bira bieu. E echo cu nan ta haci investigacion ta mustra cu hende ta sigui kere cu algun dia nan por stop hende di bira bieu y muri. Pero kico nan a descubri?

DIOS A “PONE ETERNIDAD DEN NAN CURASON.”​—ECLESIASTES 3:10, 11

BUSCANDO E MOTIBO DICON NOS TA BIRA BIEU

Cientificonan cu ta studia cel di hende a bin cu mas cu 300 teoria pa splica dicon nos ta bira bieu y muri. Durante e ultimo añanan, biologonan cu ta experto riba tereno di molecule a logra manipula e genenan y proteinanan pa asina celnan di bestia y di hende por biba mas largo. Esey a conmove algun hende rico pa financia e tipo di investigacionnan ey. Den ki rumbo e investigacionnan ey a bay?

Buscando manera pa biba mas largo. Algun biologo ta kere cu nos ta bira bieu debi na loke ta pasa den e telomeernan, cu ta keda den e parti final di e chromosoomnan. E telomeernan ta proteha e informacion genetico den nos celnan ora nan ta reproduci. Pero cada bes cu e celnan dividi, e telomeernan ta bira mas cortico. Cu tempo e celnan ta stop di reproduci y nos ta cuminsa bira bieu.

 Elizabeth Blackburn, kende a gana premio Nobel na aña 2009, y su team a identifica un enzym cu ta yuda pa e telomeernan no bira cortico lihe, como resultado, e celnan no ta bira bieu lihe. Pero nan informe ta reconoce cu e telomeernan “no ta prolonga bida na un manera magico; nan no ta pone hende biba mas cu 70 of 80 aña.”

Reprogramacion di cel ta un otro manera pa purba combati enbiehesimento di cel. Ora nos celnan ta bira bieu, nan no ta reproduci mas, y nan ta cuminsa manda señal robes na nos sistema inmunologico, como consecuencia, nos ta haya inflamacion, dolor y maleza. Recientemente, un par di cientifico Frances a reprograma celnan cu nan a tuma di hende di edad avansa, algun di nan tabatin mas cu 100 aña. E hefe di e investigacion, profesor Jean-Marc Lemaître, a bisa cu nan investigacion ta demostra cu “por reverse enbiehesimento” di cel.

ACASO CIENCIA POR PONE NOS BIBA MAS LARGO?

No ta tur cientifico ta kere cu tratamentonan pa preveni enbiehesimento lo yuda hende biba mas largo. Ta berdad si cu desde siglo 19 hende su speransa pa biba mas largo a aumenta gradualmente. Esaki ta principalmente pa motibo di antibiotica, vacuna, remedi cu ta preveni hende di bira malo y door cu higiena a mehora. Pero toch, algun experto riba tereno di genetica ta kere cu e largura di bida di hende a yega su limite.

Un 3.500 aña pasa, e escritor di Bijbel Moises a bisa: “E dianan di nos bida ta setenta aña, of si hende tin hopi forsa, ochenta aña; toch nan orguyo no ta nada otro cu molester y pena, pasobra un djis el a pasa, y nos ta bula bay.” (Salmo 90:10) A pesar cu hende ta haci hopi esfuerso pa logra biba mas largo, nan bida practicamente a keda mes largo, esta 70 of 80 aña.

Pero compara cu e bida cortico di hende, algun bestia manera bushi cora di lama y un especie di quahog clam por biba mas cu 200 aña. Y tin palo manera e gigante secoya cu por biba miles di aña. Ora bo compara e largura di nos bida cu e largura di bida di otro sernan viviente, bo no ta haya cu e pregunta cu logicamente ta lanta ta, e bida aki, di 70 of 80 aña, so tin?