Sigui pa e contenido

Sigui pa e index

Di Berdad Mundo Ta Bay Caba?

Di Berdad Mundo Ta Bay Caba?

Kisas bo a yega di tende cu Bijbel ta papia di fin di mundo. (1 Juan 2:17) Esey ta nifica cu hende lo stop di existi? Y kico di nos planeta, lo e bira un luga desola sin bida riba dje? Of lo e ser destrui completamente?

BIJBEL SU CONTESTA PA TUR E PREGUNTANAN AKI TA NO!

Kico Lo Sigui Existi?

HENDE

Loke Bijbel ta bisa: Dios “no a crea [Tera] pa e keda bashi, ma el a form’e pa e wordo habita.”—ISAIAS 45:18.

NOS PLANETA

Loke Bijbel ta bisa: “Un generacion ta bay y un generacion ta bin, ma Tera ta permanece pa semper.”—ECLESIASTES 1:4.

KICO ESAKI TA NIFICA? Bijbel ta mustra bon cla cu nos planeta nunca lo ser destrui y cu semper lo tin hende riba dje. Pues, kico fin di mundo ta nifica anto?

PENSA RIBA ESAKI: Bijbel ta compara fin di e mundo aki cu loke a sosode den tempo di Noe. E tempo ey, nos planeta tabata “yen di violencia.” (Genesis 6:13) Ma Noe tabata un hende husto, pesey Dios a salba Noe y su famia. Pero, Dios a manda un diluvio y a destrui tur e hendenan malbado. Bijbel ta conta loke a pasa: “E mundo di e tempo ey a ser destrui ora el a keda inunda cu awa.” (2 Pedro 3:6) Asina e mundo di e tempo ey a yega na su fin. Bo a ripara kico a ser destrui? No nos planeta, sino e hendenan malbado. Pues, ora Bijbel ta papia di fin di mundo, e no kiermen cu nos planeta lo ser destrui. Mas bien, e ta referi na fin di hende malbado riba Tera y di henter e sistema di cosnan cu nan a establece.

Kico Lo Stop di Existi?

PROBLEMA Y MALDAD

Loke Bijbel ta bisa: “Aki poco tempo e malbado lo no t’ey mas; maske cuanto bo busca su luga, e lo no t’ey. Ma e humildenan lo hereda e Tera, y lo deleita nan mes den paz abundante.”—SALMO 37:10, 11.

KICO ESEY TA NIFICA? E diluvio den tempo di Noe no a caba cu maldad pa semper. Despues di e diluvio, hende malbado a bolbe cuminsa haci bida di hende dificil. Pero un djis aki, Dios lo caba cu maldad unabes y pa semper. Manera e salmista a bisa: “E malbado lo no t’ey mas.” Dios lo caba cu tur maldad mediante su Reino—un gobierno mundial cu lo goberna for di cielo riba hende husto aki riba Tera.

PENSA RIBA ESAKI: Kico ta bay pasa cu e gobiernonan riba mundo? Nan lo apoya Dios su Reino? Bijbel ta bisa cu no. Nan lo ta asina bobo di bay contra e Reino di Dios. (Salmo 2:2) Anto kico lo pasa despues? Dios su Reino lo reemplasa tur e gobiernonan ey y “lo dura pa semper.” (Daniel 2:44) Pero, dicon mester caba cu gobiernonan humano?

 Gobernacion Humano TIN CU BAY

Loke Bijbel ta bisa: “No ta keda na hende pa dirigi su pasonan.”—JEREMIAS 10:23.

KICO ESEY TA NIFICA? Dios no a crea hende pa goberna. Ni maske cuanto nan purba, nan no por goberna otro hende ni soluciona nan problemanan.

PENSA RIBA ESAKI: Britannica Academic ta bisa cu cada gobierno riba su mes no por “soluciona problemanan comun, manera pobreza, hamber, maleza, desaster natural, guera y otro tipo di violencia.” Anto wak kico e ta sigui bisa: “Algun hende ... ta pensa cu ta un tipo di gobierno mundial so por trece berdadero solucion pa tur e problemanan ey.” Pero hasta si tur gobierno humano cera cabes, mundo toch lo ta den man di hende imperfecto cu no por soluciona tur e problemanan cu nos a menciona. Dios su Reino ta e unico gobierno cu tin poder pa soluciona tur problema mundial unabes y pa semper.

Pesey, segun Bijbel, fin di mundo no ta algo cu bon hende mester tin miedo di dje. Manera bo a mira, fin di mundo ta nifica fin di hende malbado y di henter e sistema estableci corupto. Pues, e ta algo cu nos ta anhela, pasobra Dios lo reemplasa e mundo yen di problema aki cu un mundo nobo maraviyoso!

Awor, ki dia esey ta bay pasa? Den e siguiente articulo, lo bo haya Bijbel su contesta.