Sigui pa e contenido

Sigui pa e index

Profecianan Cu Si A Cumpli

Profecianan Cu Si A Cumpli

Den e leyenda cu nos a menciona den un articulo anterior, Creso a ser engaña pa e oraculo di Delfos, y como resultado, e Rey di Persia a derot’e. Pero di otro banda, Bijbel tin profecianan remarcabel tocante e Rey di Persia cu si a cumpli, hasta e detayenan di mas chikito.

Mas o menos 200 aña di antemano, hopi tempo prome cu Rey Ciro su nacemento, e profeta Hebreo Isaias a menciona Ciro pa nomber y a bisa con e lo conkista e poderoso stad Babilonia.

Isaias 44:24, 27 y 28: “Asina SEÑOR ... ta bisa e profundidad di lama: ‘Bira seco!’ Y lo mi haci bo riunan seca. Ta ami ta bisa di Ciro: ‘E ta mi wardador! E lo cumpli cu tur loke mi ta desea.’ Di Jerusalem e ta declara: ‘Lo bo wordo construi’, y di e tempel: ‘Bo fundeshi lo wordo poni.’”

Segun e historiador Herodoto, e ehercito di Ciro a desvia e awa di Riu Eufrates cu tabata pasa door di e stad di Babilonia. Danki na e strategia di Ciro e awa a baha y su ehercito por a pasa na pia door di e riu pa drenta e stad. Despues cu Ciro a conkista Babilonia, el a libera e Hudiunan prizonero y a laga nan bolbe Jerusalem pa reconstrui e stad, cu a ser destrui 70 aña prome.

Isaias 45:1: “Asina SEÑOR ta bisa Ciro, su ungi, esun cu mi a coge na su man drechi, pa haci nacionnan somete nan mes su dilanti, y pa kita arma for di reynan, pa habri portanan su dilanti, asina cu e portanan di stad lo no wordo cera.”

E Personan a drenta e stad via di e portanan inmenso di dos blad cu a keda habri pa descuido. Si e Babilonionan tabata sa kico Ciro tabatin pensa di haci, nan lo por a cera tur e portanan di entrada cu ta keda cara pa e riu. Pero como cu nan no a cera e portanan, e stad a keda sin defensa.

E profecia remarcabel aki ta djis un di e tantisimo profecianan biblico cu a cumpli precies. * Contrario na pronostico di hende, cu segun nan hopi biaha ta origina di diosnan falso, profecianan di Bijbel ta bin di Esun “kende ta declara e fin for di principio, y for di temponan antiguo, cosnan cu no a wordo haci ainda.”—Isaias 46:10.

Ta e Dios berdadero, kende su nomber ta Jehova, so por bisa esey. Su nomber evidentemente ta nifica: “E Ta Causa pa Bira.” Esaki kiermen cu e tin e capacidad di wak futuro y cumpli cu su boluntad.  Esey ta un garantia cu e lo cumpli cu tur loke el a priminti.

PROFECIANAN CU TA CUMPLIENDO

Abo tin gana di haya sa kico Bijbel ta profetisa tocante nos tempo? Mas o menos 2.000 aña pasa, Bijbel a bisa cu den “e ultimo dianan lo bini temponan critico, dificil pa trata cu ne.” Ta e ultimo dianan di kico e ta papiando di dje? Wel, ni di planeta Tera ni di humanidad, pero di problema, opresion y angustia cu ta pone hende sufri pa miles di aña caba. Laga nos considera djis algun profecia cu ta mustra cu nos ta bibando den “e ultimo dianan.”

2 Timoteo 3:1 pa 5: “Den e ultimo dianan ... hende lo stima nan mes, stima placa; nan lo ta bromado, arogante, blasfemado, desobediente na mayornan, malagradecido, desleal, sin cariño; nan lo no ta dispuesto pa cera ningun acuerdo; nan lo ta calumniador, sin dominio propio, feroz, sin amor pa loke ta bon, traidor, cabesura, hincha di orguyo, cu ta stima placer en bes di stima Dios, cu tin apariencia di ta devoto na Dios, ma cu no ta demostra e devocion ey den nan bida.”

No ta asina cu dia pa dia bo por mira e comportacion ey mas y mas? Unda cu bo bira hende ta stima nan mes, nan ta stima placa y ta pensa riba nan so. Nan ta mas exigente y menos dispuesto pa bay di acuerdo cu otro hende. Y yiunan no ta tende di nan mayornan y, por lo general, hende ta stima placer mas cu Dios. Anto dia pa dia e situacion ta bira mas pio.

Mateo 24:6 y 7: “Boso lo tende di guera den varios luga ... Nacion lo lanta contra nacion y reino contra reino.”

Segun algun calculo, e cantidad di morto cu guera- y conflictonan arma a causa desde 1914 ta mas cu 100 miyon; e cifra ey ta surpasa poblacion di hopi nacion. Pensa un rato cuanto lagrima, tristeza y dolor esey lo mester a causa. Pero e nacionnan a siña di nan foutnan y pone un fin na guera?

Mateo 24:7: “Lo tin scarsedad di cuminda.”

E Programa Mundial di Alimentacion ta bisa: “Den e mundo aki cu ta produci suficiente cuminda pa tur hende come, 815 miyon hende, esey ta un di cada nuebe hende, te ainda ta bay drumi stoma bashi. Loke ta pio ainda ta cu un di cada tres hende ta sufri di un forma di desnutricion.” Nan ta calcula cu tur aña mas o menos tres miyon mucha ta muri di hamber.

Lucas 21:11: “Lo tin temblor grandi.”

Tur aña, hende ta sinti un 50.000 temblor. Mas o menos 100 ta causa daño considerabel na edificionan y un temblor grandi ta sosode cada pasa aña. Segun un calculo, entre aña 1975 y aña 2000, temblor a cobra bida di 471.000 hende.

Mateo 24:14: “E bon noticia aki di e Reino lo ser predica den henter e Tera habita, como testimonio pa tur nacion, anto e fin lo yega.”

Actualmente tin mas cu ocho miyon testigo di Jehova ta predica e bon noticia di e Reino di Dios den mas cu 240 pais rond mundo. Nan ta predica den stadnan inmenso, den pueblonan aisla, den selvanan y riba seronan halto. E profecia ta predeci cu ora Dios keda satisfecho cu e trabou: “E fin lo yega.” Kico esey kiermen? Wel, cu gobernacion di hende lo yega na su fin y cu e Reino di Dios lo cuminsa goberna. Ki promesanan lo cumpli e tempo ey? Haya sa mas den e siguiente articulo.