Sigui pa e contenido

Sigui pa e index

 LESNAN CU NOS TA SIÑA DI PASADO

Alhazen

Alhazen

BO A yega di tende di Abū ‘Alī al-Ḥasan ibn al-Haytham? Casi sigur cu no. Na Europa y Merca e ta mihor conoci como Alhazen, un forma Latin di su nomber Arabier, al-Hasan. Pero casi sigur bo ta beneficia di e trabou cu el a haci si. E ta ser describi como “un di e figuranan mas importante y influyente den historia di ciencia.”

Alhazen a nace mas o menos na aña 965 despues di Cristo na Basra, cu awor ta Irak. E tabata interesa den astronomia, scheikunde, wiskunde, medicina, musica, optica, natuurkunde y poesia. Pakico asina nos tin cu gradici e cientifico aki?

UN DAM DEN RIU NILO

Tin un storia cu Alhazen tabatin un plan pa regula e awa di Riu Nilo. E tabatin e plan ey casi 1.000 aña prome cu a ehecuta e proyecto na Aswân na aña 1902.

Segun e storia, Alhazen a diseña un plan ambicioso pa mengua inundacion y secura na Egipto. Pa logra esey, e kier a traha un dam den Riu Nilo. Ora cu califa al-Hakim, lider di Cairo, a tende di su idea, el a invita Alhazen pa bin Egipto pa traha e dam. Pero ora Alhazen a mira e riu cu su propio wowo, e tabata sa cu e proyecto ta mucho grandi p’e. Como cu e tabatin miedo cu califa al-Hakim, kende tabata un gobernante instabil, lo castig’e, Alhazen a gaña loco te dia cu e califa a muri na 1021, un 11 aña despues. Como cu Alhazen tabata cera den un instituto, e tabatin hopi tempo liber pa investiga otro topiconan di interes.

E OBRA BOOK OF OPTICS

Ora Alhazen a sali for di e luga, ya el a skirbi un gran parti di e shete tomonan di su obra Book of Optics. E buki aki kisas ta “un di e bukinan mas importante den historia di natuurkunde.” Den e buki ey el a describi experimentonan encuanto caracteristicanan di luz. El a splica entre otro cu luz ta parti den diferente color, cu luz ta refleha den spiel y cu luz ta cambia di direccion ora e pasa door di un substancia pa otro. Tambe el a studia bista di hende, y e anatomia y mecanismo di wowo.

 Den siglo 13, a traduci Alhazen su obra for di Arabier pa Latin. Y for di e tempo ey y durante hopi siglo, expertonan Europeo tabata cita su obra como autoridad. Loke Alhazen a skirbi tocante caracteristicanan di lens a pone un fundeshi importante pa fabricantenan di bril na Europa por a inventa telescop y microscop door di pone mas glas riba otro.

E CAMERA OBSCURA

Alhazen a descubri e principio basico di fotografia ora el a traha e prome camera obscura, probablemente e prome cu ta ser menciona den historia. E camera obscura eigenlijk ta un camber scur. Luz tabata drenta den e camber scur ey via di un buraco hopi chikito. Luz tabata proyecta riba e muraya di e camber un imagen cabes abou di loke tabatin parti pafo.

Alhazen probablemente a traha e prome camera obscura

Den siglo 19, a cuminsa uza plachi di glas fotografico den e camera obscura pa captura imagennan di un manera permanente. Como resultado, e camera fotografico a ser traha. Tur camera moderno, y nos wowo tambe, ta funciona segun e mesun principionan di natuurkunde cu e camera obscura. *

E METODO CIENTIFICO

Un aspecto sobresaliente di Alhazen su labor tabata e manera precies y sistematico cu e tabata investiga fenomenonan natural. Esey tabata algo completamente desconoci den su tempo. E tabata un di e prome investigadornan cu tabata haci experimento pa test teoria. Ademas, Alhazen no tabatin miedo di cuestiona un teoria bon conoci si no tabatin prueba pa sostene e teoria ey.

Un principio basico di ciencia moderno ta cu un hende mester proba loke e ta kere. Tin hende ta haya cu Alhazen ta “e tata di e metodo cientifico moderno.” Pesey nos por bisa cu nos tin hopi pa gradici Alhazen.

^ par. 13 Na America y Europa, hende no tabata compronde e similaridadnan entre e camera obscura y e wowo dje bon ey te ora Johannes Kepler a aclara esey den siglo 17.