Sigui pa e contenido

Sigui pa e index

 YUDANSA ORA BO PERDE UN SER KERI

E Mihor Yudansa ora Bo Perde un Ser Keri

E Mihor Yudansa ora Bo Perde un Ser Keri

DURANTE E ULTIMO AÑANAN, HENDE A HACI HOPI INVESTIGACION TOCANTE E DOLOR CU UN HENDE TA SINTI ORA E PERDE UN SER KERI. Sinembargo, manera nos a caba di wak den e articulonan anterior, e mihor conseho di expertonan hopi biaha ta cuadra cu loke tin den Bijbel, un buki di sabiduria cu ta hopi bieu. Esaki ta mustra cu Bijbel su consehonan nunca ta bira ouderwets. Pero Bijbel ta contene mas cu djis consehonan confiabel, e ta contene informacion cu bo no por haya ningun otro caminda y cu por duna consuelo na esnan cu ta tristo. Ban wak algun ehempel:

  • Nos sernan keri cu a muri no ta sufriendo

    Eclesiastes 9:5 ta bisa cu “e mortonan no sa nada”, y Salmo 146:4 ta bisa cu nan “pensamentonan ta perece.” Pesey Bijbel ta compara morto cu un soño profundo.—Juan 11:11.

  • Dios su amor pa nos ta consola nos

    Prome Pedro 3:12 ta bisa: “Pasobra Jehova * su  wowo ta riba e hustonan, y su horea ta habri pa nan suplica.” Ora nos expresa nos sintimentonan den oracion, esey ta mas cu djis un bon terapia of un manera pa ordena nos pensamentonan. Oracion ta yuda nos haya un bon relacion cu nos Creador, kende por uza su poder pa consola nos ora nos ta tristo.

  • E speransa pa un mihor futuro

    Imagina e tempo ora cu esnan cu ta den graf lo ser resucita aki riba Tera. Bijbel ta papia hopi biaha di e tempo ey y ta describi con bida lo ta riba Tera. Bijbel ta bisa cu Dios lo “seca tur lagrima for di [nos] wowo, y lo no tin morto mas; ni tristeza ni sclamacion ni dolor lo no tin mas.”—Revelacion 21:3, 4.

Hopi di esnan cu ta kere den Jehova, e Dios di Bijbel, ta haya e forsa cu nan tin mester pa deal cu nan tristeza pasobra nan tin e speransa cu nan lo wak nan sernan keri atrobe. Por ehempel, Ann, kende a perde su esposo despues di 65 aña casa, a bisa: “Bijbel a sigura mi cu nos sernan keri cu a muri no ta sufriendo y cu Dios lo resucita tur esnan cu ta den su memoria. Cada biaha cu mi pensa riba mi casa, mi ta corda riba Dios su promesa. Esey ta yuda mi deal cu e cos di mas pio cu a yega di pasa cu mi.”

Tina, kende nos a menciona caba, a bisa: “Desde e dia cu Timo a muri, mi a sinti con hopi Dios a sostene mi. Mi a sinti con Jehova su man poderoso a yuda mi durante mi angustia. Y Bijbel su promesa di resureccion ta hopi real pa mi. Esey ta fortalece mi y yuda mi sigui padilanti te dia cu mi wak Timo atrobe.”

Miyones di hende cu ta convenci cu loke Bijbel ta bisa ta berdad tambe ta sinti mescos. Kisas bo ta pensa cu loke Bijbel ta bisa ta parce mucho bunita pa kere of ta solamente un soño. Pero toch ta bon pa bo investiga pa bo mes si Bijbel su promesa- y consehonan ta confiabel. Lo bo haya sa cu Bijbel ta e mihor yudansa pa esnan cu a perde un ser keri.

HAYA SA MAS DI E SPERANSA CU TIN PA ESNAN CU A MURI

Wak mas video riba nos website, jw.org

Bijbel ta priminti cu den futuro nos lo yama nos sernan keri cu a muri un bonbini

 KICO TA PASA CU NOS ORA NOS MURI?

Kico ta pasa cu nos ora nos muri? Bijbel ta duna nos un contesta cla cu ta consola nos

Bay na PUBLICACION > VIDEO (Seccion di Video: Bijbel)

BO KIER SCUCHA BON NOTICIA?

Unda cu nos bira, nos ta topa mal noticia, pero na unda nos por haya bon noticia? E video aki ta introduci e foyeto Dios Tin Bon Noticia pa Nos!

Bay na PUBLICACION > VIDEO (Seccion di Video: Nos Reunionnan y Predicacion)

^ par. 7 Bijbel ta bisa cu Dios su nomber ta Jehova.