Sigui pa e contenido

Sigui pa e index

 LES 6

Norma y Balor Ta Importante

Norma y Balor Ta Importante

KICO TA NORMA Y BALOR?

Hende cu norma y balor halto tin un comprondemento cla tocante loke ta bon y loke ta malo. Nan norma y balor no ta cambia debi na circunstancia, sino e ta basa riba principionan cu ta guia nan conducta hasta ora ningun hende ta wak nan.

DICON NORMA Y BALOR TA IMPORTANTE?

Awendia compañeronan di scol, musica, pelicula y programanan di television ta bombardia muchanan cu diferente idea robes tocante kico ta bon y kico ta malo. E ideanan aki por pone nan cuminsa duda tocante e norma- y balornan cu nan a siña.

Esaki ta un problema grandi pa teenager. Segun e buki Beyond the Big Talk, na e edad ey, teenagernan “mester compronde cu medionan di comunicacion y nan pareunan lo presiona nan pa comporta nan mes na un cierto manera pa otro hende gusta nan. Y nan mester siña tuma decision di acuerdo cu loke nan a siña, hasta si nan amigonan no gusta esey.” Claro, mayornan mester siña nan yiunan esaki prome cu nan bira teenager.

KICO POR YUDA BO YIU HAYA NORMA Y BALOR?

Siña bo yiu bon cla kico ta bon y kico ta malo.

PRINCIPIO DI BIJBEL: “Hende madura ... a entrena [nan capacidad di compronde] pa distingui loke ta bon for di loke ta malo.”—Hebreonan 5:14.

  • Bis’e claramente kico ta bon y kico ta malo. Uza situacion den bida di tur dia pa e mira e diferencia entre loke ta bon y loke ta malo. Por ehempel, bo por bisa bo yiu: “Esey ta honesto; esey no ta honesto.” “Esey ta bon; esey ta malo.” “Esey ta lief; esey no ta lief.” Cu tempo, bo yiu lo siña kico ta bon pa haci y kico no ta bon pa haci.

  • Splica dicon algo ta bon of malo. Por ehempel, haci pregunta manera: Dicon ta mihor pa ta honesto? Con gañamento por kibra amistad? Dicon ta malo pa horta? Splica bo yiu dicon algo ta bon of malo pa esey yud’e siña tuma bon decision.

  • Enfatisa dicon ta bon pa tin norma y balor. Bo por bisa bo yiu: “Si bo ta honesto, otro hende lo confia bo” of “Si bo ta lief, otro hende lo kier ta bo amigo.”

Haci sigur cu bo famia ta bon conoci pa su norma- y balornan.

PRINCIPIO DI BIJBEL: “Sigui pone boso mes na prueba pa demostra ki tipo di hende boso ta.”—2 Corintionan 13:5.

  •   Bo famia mester ta bon conoci pa su norma y balor halto, pa asina bo por bisa cu tur sinceridad:

    • “Nos famia no ta gaña.”

    • “Nos no ta dal of zundra otro.”

    • “Nos no ta insulta otro.”

Bo yiu lo ripara cu boso norma- y balornan halto no ta simplemente regla cu nan mester sigui, sino cu esakinan ta identifica boso famia.

  • Uza situacionnan di tur dia pa papia cu bo yiu tocante boso norma- y balornan. Bo por compara boso norma- y balornan cu situacionnan cu ta presenta na television of na scol. Puntra bo yiu: “Kico abo lo haci den e situacion ey?” of “Con nos famia lo tin cu deal cu e situacion aki?”

Yuda bo yiunan pa nan ta determina pa haci loke ta bon.

PRINCIPIO DI BIJBEL: “Mantene un consenshi limpi.”—1 Pedro 3:16.

  • Elogia nan. Si bo yiu ta comporta su mes na un manera corecto, lag’e sa cu el a haci bon y dicon el a haci bon. Por ehempel, bo por bis’e: “Bo tabata honesto. Mi ta orguyoso di bo.” Y si bo yiu confesa cu el a haci algo malo, gradicie sinceramente pa su honestidad prome cu bo corigie.

  • Corigi nan. Yuda bo yiu acepta cu su comportacion no tabata bon. Yiunan mester sa kico nan a haci malo y dicon den boso famia no ta tolera conducta asina. Algun mayor no kier corigi nan yiu pa nan no sinti malo. Pero ora cu bo corigi un mal conducta, esey por yuda bo yiu educa su consenshi y distingui kico ta bon y kico ta malo.