Sigui pa e contenido

Sigui pa e index

 LES 2

Humildad

Humildad

KICO TA HUMILDAD?

Hende humilde ta mustra respet pa otro persona. Nan no ta arogante ni nan no ta spera pa otro hende trata nan na un manera special. Al contrario, un hende humilde ta mustra interes den otro hende y ta dispuesto pa siña for di nan.

Tin hende ta pensa cu un hende humilde ta debil. Pero esey no ta berdad, pasobra un hende humilde mester tin curashi pa admiti su foutnan y acepta cu tin cos cu e no por haci.

DICON HUMILDAD TA IMPORTANTE?

  • Un yiu humilde lo tin mas amigo. E buki The Narcissism Epidemic ta bisa: “Por lo general, hende humilde ta bay bon cu otro hende” y “tin mas sintimento pa otro hende.”

  • Un yiu humilde lo tin un mihor futuro. Si bo yiu siña pa ta humilde for di chikito, esey lo benefici’e den futuro, por ehempel, ora e tin cu busca trabou. Dr. Leonard Sax a skirbi: “Un hoben cu ta pensa cu ta masha cos e ta y no ta mira su defectonan, lo duna un mal impresion ora e ser entrevista pa un trabou.” El a bisa tambe: “Pero un hoben cu ta realmente interesa den loke ta importante pa e persona cu ta entrevist’e, tin mas chens di haya trabou.” *

KICO POR YUDA BO YIU PA E TA HUMILDE?

Yuda bo yiu pa e por tin un punto di bista balansa di su mes.

PRINCIPIO DI BIJBEL: “Si un hende ta kere cu e ta masha cos siendo cu e no ta nada, ta su mes e ta gaña.”—Galationan 6:3.

  • Tene cuidou pa no duna bo yiu speransa falso. Frasenan manera “Tur bo soñonan por bira realidad” y “Abo por bira kico cu bo kier” por zona motivador, pero hopi biaha esey no ta e caso den bida real. Bo yiu tin mas chens di bay bon den bida si e tin metanan rasonabel y ta traha duro pa logra esakinan.

  • Elogia bo yiu pa algo specifico. Djis bisa bo yiu cu e ta esun mihor no ta anim’e pa ta humilde. Pesey ta mihor pa elogi’e pa algo specifico cu el a haci bon.

  • Pone un limite na e cantidad di tempo cu bo yiu tin mag di dedica na rednan social. Hopi biaha, hende ta uza rednan social pa gaba tocante nan talentonan y nan logronan, esey ta net contrario cu humildad.

  • Anima bo yiu pa pidi despensa mas pronto posibel. Yuda bo yiu mira kico el a haci robes y yud’e admiti su eror.

 Anima bo yiu pa mustra aprecio.

PRINCIPIO DI BIJBEL: “Mustra cu boso ta agradecido.”—Colosensenan 3:15.

  • Aprecio pa creacion. Yiunan mester observa naturaleza pa nan por compronde cu nos tin mester di aire pa hala rosea, awa pa bebe y cuminda pa come. Uza e ehempelnan aki pa yuda bo yiu balora y haya aprecio pa Dios su creacion.

  • Aprecio pa hende. Corda bo yiu cu semper lo tin un hende cu ta mihor cu ne den algo y cu ta bon pa e admira habilidad di otro hende y siña for di nan en bes di bira jaloers riba nan.

  • Mustra aprecio. Siña bo yiu pa bisa danki di curason. Siñ’e tambe cu ora nos mustra aprecio, esey ta yuda nos keda humilde.

Siña bo yiu cu ta bon pa yuda otro hende.

PRINCIPIO DI BIJBEL: “Cu humildad, considera cu otro hende ta superior na boso. No busca boso mes interes so, ma tambe interes di otro hende.”—Filipensenan 2:3, 4.

  • Siña bo yiu pa haci trabou di cas. Si bo no laga bo yiu haci trabou di cas, bo ta bisando bo yiu: “Abo ta mucho importante pa haci e tipo di trabounan ey.” E mester compronde cu e mester cumpli cu trabounan di cas prome, anto cu despues e por hunga. Lag’e mira cu trabou di cas ta bon pa henter e famia y cu nan tur lo apreci’e y respet’e si e haci trabou di cas.

  • Siña bo yiu cu ta un honor pa sirbi otro hende. Ora bo yiu ta sirbi otro hende, esey lo yud’e bira maduro. Pesey analisa cu bo yiu ken tin mester di yudansa y kico e por haci pa yuda nan. Anto ora e yuda otro hende, elogi’e y apoy’e.

^ par. 8 Di e buki The Collapse of Parenting.