Sigui pa e contenido

Sigui pa e index

 LES 4

Bira Responsabel

Bira Responsabel

KICO SER RESPONSABEL TA NIFICA?

Hende responsabel ta confiabel. Ora bo pidi un hende responsabel pa haci algo, bo sa cu nan lo haci e tarea ey bon y cu nan lo cab’e na tempo.

For di chikito un mucha por cuminsa siña bira responsabel. E buki Parenting Without Borders ta bisa: “Ora un mucha haci un aña y tres luna, ya e por cuminsa yuda cu algun trabou di cas, y ora e haci un aña y mei, e ta cuminsa haya deseo pa haci trabou di cas. Den hopi cultura, ora e mucha tin entre cinco cu shete aña, nan mayornan ta cuminsa mustra nan con nan por yuda cu trabounan di cas. Aunke nan ta hopi chikito ainda, nan por siña haci varios trabou bon.”

DICON TA IMPORTANTE PA SER RESPONSABEL?

Den algun pais, hopi adulto hoben ta purba biba riba nan mes, pero hopi bes cos ta bira duro pa nan y nan ta bay biba bek cerca nan mama cu nan tata. Den algun caso esaki ta sosode pasobra e hoben nunca no a siña maneha placa, haci trabou di cas ni cumpli cu responsabilidadnan di tur dia.

Pesey, ta bon pa siña bo yiunan for chikito pa nan por bira responsabel, ya asina nan por para riba nan pia ora nan bira adulto. E buki How to Raise an Adult ta bisa: “Sigur lo bo no kier pa bo yiunan depende di bo te ora nan haci diesocho aña, anto despues laga nan enfrenta mundo real di golpi.”

KICO POR YUDA BO YIU PA E POR BIRA RESPONSABEL?

Duna nan trabou di cas pa haci.

PRINCIPIO DI BIJBEL: “Den tur trabou tin ganashi [of, “bentaha”, NW].” —Proverbionan 14:23.

Mucha semper ta desea di haci loke nan mayornan ta haci. Probecha di e deseo ey cu nan tin y laga nan haci algun trabou di cas.

Tin mayor no kier laga nan yiunan haci trabou di cas pasobra nan ta pensa cu nan tin hopi huiswerk y nan no kier pone mas carga riba nan.

Pero mucha cu ta haci trabou di cas lo bay mihor na scol pasobra nan ta siña cuminsa y caba cualkier tarea cu nan haya pa haci. Ademas, e buki Parenting Without Borders ta bisa: “Si nos ignora e deseo cu yiunan tin pa yuda ora nan ta chikito, nan ta cuminsa pensa cu yuda otro hende no ta importante ... Nan ta cuminsa spera tambe cu nos tin cu haci tur cos pa nan.”

 Manera e buki ey ta mustra, ora nos yiunan haci trabou di cas riba un base regular, nan ta siña yuda otro hende y pa no ta egoista. Ora nan cumpli cu tareanan di cas, nan lo sinti cu nan ta un parti importante di e famia y lo compronde cu nan tin cu cumpli cu nan responsabilidadnan di famia.

Yuda bo yiu mira cu tin consecuencia ora e haci fout.

PRINCIPIO DI BIJBEL: “Scucha conseho y acepta disciplina, pa bo por ta sabi pa resto di bo bida.”—Proverbionan 19:20.

Ora bo yiu haci algo robes, manera por ehempel si e kibra algo di un otro hende, no tapa p’e. Nan por carga e consecuencia. Den e caso aki, nan por pidi despensa y kisas hasta compensa e doño pa e daño cu nan a causa.

Ki beneficio bo yiunan ta ricibi ora nan siña carga consecuencia di nan foutnan?

  • Nan ta siña cu nan mester ta honesto y admiti nan foutnan.

  • Nan lo no culpa otro hende.

  • Nan lo no bin cu excuus.

  • Nan lo pidi pordon ora ta necesario.