Sigui pa e contenido

Sigui pa e index

Pa un remedi por ta eficaz, no mester trata e sintomanan so, mester yega na raiz di e problema

 E RETO

Con pa Yega na Raiz di e Problema

Con pa Yega na Raiz di e Problema

Abo ta kere cu hende por resolve e tantisimo problemanan cu ta kita nos paz y siguridad y cu ta pone nos futuro na peliger? Pa un remedi por ta eficaz, no mester trata e sintomanan so, mester yega na raiz di e problema.

Laga nos wak un ehempel: Un pashent cu yama Tom tabata malo y despues a fayece. Dicon el a muri? E dokter cu a atende Tom na e hospital cu Tom a bay prome cu el a fayece a bisa: “Ora e prome sintomanan a presenta, ningun hende a check ta kico tabata e causa principal.” Ta parce cu esnan cu a atende Tom prome a djis dun’e remedi pa alivia su dolor.

Acaso esey ta e manera cu hende ta atende e problemanan di e mundo aki? Por ehempel, pa combati crimen, gobiernonan ta bin cu leynan, instala sistema di camera y reforsa cuerpo policial. Aunke e medidanan aki ta efectivo te na cierto grado, nan no ta yega na raiz di e problema. E problema ta den hende su mente y curason, esta su actitud-, su creencia- y su deseonan. Esey ta pon’e actua na cierto manera.

Daniel, kende ta biba den un pais na Sur America cu tin un crisis economico, a bisa: “Un tempo nos tabata hiba un bida normal. Nos no tabatin miedo cu nos lo ser atraca. Pero awor bo no por biba trankil ningun caminda mas. E crisis economico a saca na cla cu hopi hende ta golos pa placa y pa cos material y cu nan no tin respet pa bida ni pa pertenencia di otro hende.”

Un meneer cu nos lo yama Elias a huy for di Medio Oriente pa motibo di guera. Despues el a cuminsa studia Bijbel. El a conta: “Hopi mucha homber hoben di e stad caminda mi tabata biba, tabata ser presiona pa bay guera y bira heroe door di nan famia, e sistema politico y religioso. Y e partido contrario tabata haci mescos. Tur esaki a yuda mi mira cu no ta bale la pena pa pone confianza den gobernantenan humano.”

Wak kico un buki yen di sabiduria ta bisa:

  • “E intencion di curason di hende ta malo for di su hubentud.”—Genesis 8:21.

  • “E curason ta mas engañoso cu tur cos y ta totalmente corupto; ken por comprond’e?”—Jeremias 17:9.

  • “For di curason ta sali pensamento malicioso, matamento, ... fornicacion, ladronicia [y] testimonio falso.”—Mateo 15:19.

Hende no a logra haya un solucion pa e maldad cu tin den nos mente y curason. Al contrario, manera nos por a mira den e articulo anterior, dia pa dia e problemanan ta bira mas pio. (2 Timoteo 3:1-5) Ni e gran cantidad di informacion ni e avance riba tereno di comunicacion no a yuda soluciona e situacion. Ta pakico anto nos no por haci e mundo aki un luga trankil y sigur? Nos ta pidiendo mucho di nos mes? Nos ta purbando di haci algo cu ta imposibel?

ACASO NOS TA PURBA HACI ALGO IMPOSIBEL?

Hasta si nos por a haci milager y caba cu tur e maldad cu tin den mente y curason di hende, toch nos lo no por haci e mundo aki un luga safe. Dicon no? Pasobra hende tin su limitacionnan.

 E berdad ta cu “no ta keda na hende pa dirigi su pasonan.” (Jeremias 10:23) Si, Dios no a crea nos pa nos goberna nos mes. Mescos cu nos no a ser crea pa biba bou di awa of biba den espacio, nos no a ser crea pa goberna.

Mescos cu nos no a ser crea pa biba bou di awa, nos no a ser crea pa goberna

Pensa un rato riba lo siguiente: Acaso hende ta gusta pa otro hende bisa nan con nan tin cu hiba nan bida of ki norma y balor nan tin cu sigui? Of, con nan tin cu mira abortus, castigo di morto of con nan tin cu lanta nan yiunan? Esaki ta djis algun di e topiconan cu ta dividi hende. Y maske loke Bijbel ta bisa kisas no ta facil pa acepta, e ta comprendibel si. Simplemente, nos no tin e capacidad ni derecho pa goberna riba otro hende. Pues, ken por yuda nos anto?

E contesta mas logico ta nos Creador. Dicon? Pasobra ta e a traha nos. Y contrario na loke hopi hende ta pensa, e no a lubida riba nos. Tur e bon consehonan cu tin den Bijbel ta mustra bon cla cu e ta stima nos. Y ora nos compronde e buki unico ey mas mihor, nos ta compronde nos mes mas mihor tambe. Ademas, nos por compronde dicon historia di hende ta asina tragico. Manera un filosofo Aleman a yega di skirbi: “E nacionnan y gobiernonan no a siña nada for di historia, pesey nan no ta cambia nan comportacion.”

SABIDURIA DI BIJBEL TA PROTEHA NOS

Un homber sabi a yega di bisa: “Sabiduria ta demostra pa medio di tur su obranan cu e ta husto.” (Lucas 7:35) Laga nos wak un ehempel. Salmo 146:3 ta bisa: “No confia den prinsnan, den yiu di hende, den kende no tin salbacion.” Esey ta un excelente conseho cu ta proteha nos pa nos no carga speransa falso of pone confianza den algo cu nunca lo sosode. Kenneth, kende ta biba den un stad hopi violento na Noord America, a bisa: “Politiconan ta priminti cu nan lo mehora e situacion, pero nan no por. Cada bes cu nan keda sin cumpli cu nan promesanan, esey ta un recordatorio cu Bijbel tin rason.”

Daniel, kende nos a menciona caba, a skirbi: “Tur dia mi ta mas convenci cu hende no por goberna bon ... Placa na banco of un bon pensioen no ta un garantia cu lo bo tin un futuro sigur. Mi a mira hende cu a keda hopi decepciona pa e motibo ey.”

Fuera di yuda nos pa no carga speransa falso, Bijbel ta duna nos un berdadero speransa pa futuro, manera nos lo mira den e siguiente articulo.