Sigui pa e contenido

Sigui pa e index

 E CAMINDA CU TA HIBA NA FELICIDAD

Salud y e Capacidad di Supera

Salud y e Capacidad di Supera

UN MALEZA CRONICO OF UN INCAPACIDAD POR AFECTA UN HENDE SU BIDA MASHA HOPI MES. Despues cu Ulf, un homber cu tabata masha activo y bon di salud, a bira lam, el a bisa: “Mi a cay den depresion. Mi a perde forsa, curashi y energia ... Mi a sinti mi ‘destrosa.’”

Loke a pasa cu Ulf ta corda nos cu ningun di nos no tin control total riba nos salud. Toch nos por haci tur loke ta posibel pa nos evita di bira malo. Pero kico si nos salud bay atras? Esey ta nifica automaticamente cu nos no por ta feliz? Manera nos lo bay mira, e contesta ta no. Pero prome laga nos ban wak algun principio cu ta contribui na un bon salud.

SEA BALANSA. (1 Timoteo 3:2, 11) Si constantemente nos ta come y bebe di mas, sin duda esey lo afecta nos salud y lo costa nos hopi placa. “No anda cu esnan cu ta gusta dal nan biña, ni cu esnan cu ta golos pa come carni. Pasobra e burache y e hende golos lo bira pober.”—Proverbionan 23:20, 21.

NO CONTAMINA BO CURPA. “Laga nos limpia nos mes di tur impureza di carni y di spirito.” (2 Corintionan 7:1) Hende ta contamina nan curpa ora nan ta kauw of huma tabaco, bebe di mas of droga. E Centro pa Control y Prevencion di Enfermedad na Merca ta bisa cu humamento “ta causa maleza y problema cu salud cu ta haci daño na casi tur organo den e curpa di hende.”

MIRA BO CURPA Y BO BIDA COMO UN REGALO HOPI VALIOSO. “Pasobra ta pa medio di [Dios] nos tin bida y ta move y ta existi.” (Echonan 17:28) Ora nos ta compronde esey, nos lo no risca nos bida innecesariamente, ni na trabou, ni ora nos ta core auto, ni ora nos ta recrea. No ta bale la pena pa bira invalido pa resto di bo bida djis pa un par di minuut di placer.

DOMINA EMOCIONNAN NEGATIVO. Bo mente y salud tin influencia riba otro. Pesey evita ansiedad innecesario, rabia desenfrena, envidia y otro emocionnan cu por causa bo daño. Salmo 37:8 ta bisa: “Stop di rabia y laga furia para.” Bijbel ta bisa tambe: “No sea nunca ansha pa e dia di mañan, pasobra e dia di mañan lo tin su mes inkietudnan.”—Mateo 6:34.

 PURBA PENSA RIBA COSNAN POSITIVO. Proverbionan 14:30 ta bisa: “Un curason trankil ta bida pa e curpa.” Bijbel ta bisa tambe: “Un curason contento ta un bon remedi.” (Proverbionan 17:22) Esey ta un declaracion cientificamente exacto. Dr. Derek Cox, un funcionario di salubridad publico di Scotland, a bisa: “Si bo ta feliz, bo tin menos chens di bira malo compara cu esnan cu ta infeliz.”

LOGRA SUPERA SITUACIONNAN DIFICIL. Mescos cu Ulf, kende nos a menciona caba, kisas nos tin cu enfrenta un problema di salud cu no ta kita. A pesar di esey, nos por busca manera pa deal cu e situacion. Tin hende ta laga depresion caba cu nan, locual ta haci e situacion bira mas pio. Proverbionan 24:10 ta bisa: “Si bo desmaya den e dia di angustia, bo forsa ta keda limita.”

Y tin hende ta sinti nan desespera na prome instante, pero ta logra recupera y ta adapta. Nan ta busca manera pa deal cu e situacion. Esey ta loke Ulf a haci. Ulf a bisa cu despues cu el a haci hopi oracion y a medita riba e bunita mensahe di Bijbel, el a “cuminsa mira loke e por haci en bes di loke e no por haci.” Ademas, mescos cu hopi hende cu pasa den duro, el a siña mustra compasion y pone su mes den sapato di otro hende; esey ta loke a conmov’e pa comparti e mensahe animante di Bijbel cu otro hende.

Un otro hende homber cu a sufri hopi ta Steve. Tempo cu Steve tabatin 15 aña, el a cay for di un palo y a keda lam for di su plant’i pia te na su nek. Ora e tabatin 18 aña, e por a move su brasanan atrobe. Despues el a bay universidad, caminda el a cay hopi lihe den droga, bebemento di alcohol y inmoralidad sexual. E no tabatin ningun speransa. Ta te ora el a cuminsa studia Bijbel, el a cuminsa mira bida na un manera positivo y esey a yud’e vence su bicionan. Steve a bisa: “Mi no ta sinti e bashi mas cu mi a sinti pa asina tanto tempo. Awor si mi tin paz, felicidad y satisfaccion den bida.”

Locual cu Steve y Ulf a bisa ta pone nos corda riba e palabranan di Salmo 19:7 y 8: “E lei di SEÑOR ta perfecto, e ta restaura alma ... E preceptonan di SEÑOR ta corecto, nan ta alegra curason; e mandamentonan di SEÑOR ta puro, nan ta ilumina wowo.”