Sigui pa e contenido

Sigui pa e index

 E CAMINDA CU TA HIBA NA FELICIDAD

Amor

Amor

HENDE TIN MESTER DI AMOR. Sin amor, ningun matrimonio, famia of amistad por dura. Pues, no tin duda cu amor ta sumamente importante pa nos salud mental y pa nos ta feliz. Pero kico e palabra “amor” ta nifica?

E amor cu nos ta papiando di dje no ta amor romantico, cu naturalmente tambe ta importante. Mas bien, nos ta papiando di un tipo di amor cu ta superior. E amor ey ta pone un hende mustra un interes sincero den bienestar di otro hende y hasta ta pone e hende ey prome cu su mes. E amor aki ta basa riba principionan di Dios, pero esey no kiermen cu no tin cariño of sintimento.

Bijbel ta duna un bunita descripcion di amor: “Amor tin pasenshi y ta bondadoso. Amor no ta jaloers, e no ta broma, e no ta halsa su mes, e no ta comport’e indecentemente, e no ta busca su mes interes, e no ta rabia lihe. E no ta keda corda e malo cu hende a hacie. E no ta alegra cu inhusticia, ma ta alegra cu loke ta berdad. E ta wanta tur cos, ... spera tur cos, soporta tur cos. Amor no ta caba nunca.”—1 Corintionan 13:4-8.

E tipo di amor aki “no ta caba nunca” den e sentido cu nunca lo e stop di existi. Si, hasta e por bira mas fuerte cu tempo. Y como cu amor tin pasenshi, ta bondadoso y ta pordona, e ta “e laso perfecto di union.” (Colosensenan 3:14) Pesey, tur hende cu ta ser uni pa e tipo di amor ey ta sinti nan safe y feliz a pesar cu nan ta imperfecto. Por ehempel, ban analisa e union matrimonial.

 UNI MEDIANTE “E LASO PERFECTO DI UNION”

Hesucristo a siña hende varios principio importante pa matrimonio. Por ehempel, Hesus a bisa: “‘Un homber lo bandona su tata y su mama y lo pega na su esposa, y nan dos lo ta un carni’ ... Pues, no laga ningun hende separa loke Dios a uni bou di un yugo.” (Mateo 19:5, 6) Por lo menos dos principio ta destaca.

“NAN DOS LO TA UN CARNI.” Matrimonio ta e laso di mas fuerte cu hende por tin, y amor por proteha e pareha pa nan no bira infiel na otro, esta cu sea e esposo of esposa ta bira “un carni” cu un hende cu no ta su casa. (1 Corintionan 6:16; Hebreonan 13:4) Si esey sosode, e victima ta perde confianza den su pareha y hasta e matrimonio por kibra. Anto si nan tin yiu, e daño por ta hasta mas grandi. Nan yiunan por sinti nan insigur, cu ningun hende no ta stima nan y hasta nan por sinti nan mes amarga.

“NO LAGA NINGUN HENDE SEPARA LOKE DIOS A UNI.” E union matrimonial ta sagrado. Parehanan cu tin e punto di bista ey di matrimonio ta haci esfuerso pa fortalece nan matrimonio. Ora nan tin problema cu otro, nan no ta busca manera pa kibra e matrimonio. Nan amor ta fuerte. E tipo di amor ey ta “soporta tur cos”, y ta yuda e pareha pa resolve nan problemanan pa nan por tin paz y harmonia den famia.

Ora mayornan ta demostra cu nan ta stima otro door di haci sacrificio propio, nan yiunan por beneficia masha hopi mes di esey. Un mucha muher di 20 aña cu yama Jessica a bisa: “Mi mama cu mi tata ta echt stima y respeta otro. Ora mi mira e respet cu mi mama ta mustra pa mi tata, mi kier ta manera mi mama.”

Amor ta e cualidad di mas importante di Dios. Pesey Bijbel ta bisa: “Dios ta amor.” (1 Juan 4:8) Y no ta nada straño cu Bijbel ta yama Jehova “e Dios feliz.” (1 Timoteo 1:11) Nos tambe lo ta feliz si nos imita e cualidadnan di nos Creador, principalmente su amor. Efesionan 5:1 y 2 ta bisa: “Imita Dios, como yiunan stima, y sigui cana den amor.”