ORA un hende smile cu bo di horea pa horea, con bo ta reacciona? Casi sigur abo tambe lo smile cu ne y lo bo sinti bo mas contento. Si, un sonrisa sincero, sea di un amigo of di un hende cu bo no conoce, ta contagioso y ta pone bo sinti bon. Un señora cu yama Magdalena a bisa: “Georg, mi difunto esposo, tabatin un sonrisa cu ta pone bo sinti bon. Ora nos tabata wak otro, mi tabata sinti un trankilidad y siguridad.”

Un smile sincero ta mustra cu un hende tin sintimentonan masha bunita manera por ehempel, alegria, felicidad y goso. Si, nos “smile ... ta parti di nos naturaleza”, segun un articulo cu a sali den e corant online Observer di e Association for Psychological Science. E articulo a bisa cu hasta un baby recien naci por “compronde bon ki mensahe un expresion di cara ta transmiti.” E articulo a bisa tambe: “No ta informacion practico so un hende por saca for un smile, sino tambe nan por laga e informacion aki influencia nan propio comportacion.”

Investigadornan na e Universidad di Harvard na Merca a studia un grupo di pashent di edad avansa y nan reaccion na e expresion di cara di esnan cu ta duna nan cuido. Investigadornan a bisa cu ora e pashentnan tabata sinti cu e expresion di cara di e dunadonan di cuido “tabata transmiti cariño, interes y empatia”, e pashentnan tabata sinti nan mas satisfecho  y nan salud mental y fisico tabata mehora. Pero si e dunadonan di cuido no tabata cariñoso, e salud di e pashentnan tabata bay atras.

Ora bo smile, bo ta haci bo mes un fabor tambe. Dicon? Pasobra algun estudio ta indica cu e beneficionan ta, por ehempel, cu bo ta haya mas confianza, felicidad y menos stress. Pero un cara rabia por tin un efecto net contrario.

Magdalena, kende nos a menciona na principio di e articulo aki, tabata un testigo di Jehova. Durante Segunda Guera Mundial e nazinan a manda e cu varios otro miembro di su famia na e campo di concentracion di Ravensbrück na Alemania pasobra nan no kier a acepta e ideologia nazi. Magdalena a bisa: “Dado momento e wardadornan di preso no tabata laga nos papia cu otro prizonero. Pero nan no tabatin control riba nos expresion di cara. Pues ora mi mama of mi ruman muher tabata smile cu mi, esey tabata lanta mi animo y duna mi forsa pa sigui persevera.”

Podise e presion di bida ta pone bo sinti cu casi bo no tin motibo pa smile. Pero corda cu bo sintimentonan tin influencia riba bo pensamentonan. (Proverbionan 15:15; Filipensenan 4:8, 9) Pues, a pesar cu esey kisas no ta facil, purba focus riba cosnan positivo y agradabel ora cu ta posibel. a Kico por yuda? Lesamento di Bijbel y oracion a yuda hopi hende pa logra esey. (Mateo 5:3; Filipensenan 4:6, 7) Bo tabata sa cu bo ta haya e palabra “feliz” y “goso” y nan derivacionnan cientos di biaha den Bijbel? Pues, lo ta bon pa lesa un of dos pagina pa dia. Ken sa, kisas esey lo yuda bo smile mas.

Ademas, no warda te ora un hende smile cu bo. Tuma iniciativa, smile cu otro hende y drecha nan dia. Si, mira bo smile como un regalo di Dios cu por haci tanto abo mes como otro hende mas feliz.