Nos Creador ta hopi mas sabi cu nos. Como un Tata amoroso, e ta interesa den nos. No tabata su intencion pa nos biba sin su guia. (Jeremias 10:23) Pues, mescos cu un mucha chikito tin mester di e guia di su mayornan, nos tur mester di e guia di Dios. (Isaias 48:17, 18) El a duna nos esaki den forma di principionan cu nos por haya den su Palabra.—Lesa 2 Timoteo 3:16.

 E ley- y principionan di Jehova ta siña nos e mihor manera di biba awor y ta mustra nos con nos por haya bendicion eterno den futuro. Ya cu ta Dios a crea nos, ta na su luga pa nos obedec’e di curason.—Lesa Salmo 19:7, 11; Revelacion 4:11.

 Un principio di Bijbel ta un berdad fundamental. Di otro banda, un ley ta diseña pa un situacion specifico. (Deuteronomio 22:8) Nos tin cu uza nos capacidad di pensa pa compronde con un principio ta yuda nos den cierto situacion. (Proverbionan 2:10-12) Por ehempel, Bijbel ta siña nos cu bida ta un regalo di Dios. E principio fundamental aki por sirbi como guia pa nos ora nos ta na trabou, na cas y ora nos ta bay di un luga pa otro. Tambe e ta yuda nos tuma medida di precaucion pa evita di pone nos bida y bida di otro hende na peliger.—Lesa Echonan 17:28.

 Hesus a papia di dos principio cu ta masha importante.  E prome tin di haber cu Dios su proposito pa hende; e kier pa nos siña conoc’e, stim’e y sirbie fielmente. Nos mester tene cuenta cu e principio aki den tur decision cu nos ta tuma. (Proverbionan 3:6) Hende cu ta biba na harmonia cu e principio aki lo tin un bon relacion cu Dios, lo haya berdadero felicidad y bida eterno.—Lesa Mateo 22:36-38.

 E di dos principio por guia nos pa biba na paz cu otro hende. (1 Corintionan 13:4-7) Ora nos aplica e principio aki, nos ta imitando Dios su manera di trata hende.—Lesa Mateo 7:12; 22:39, 40.

 Principionan di Bijbel ta siña miembronan di famia stima otro y biba uni cu otro. (Colosensenan 3:12-14) Ademas, e Palabra di Dios ta mustra cu matrimonio mester ta un union permanente, loke ta un proteccion pa e famia.—Lesa Genesis 2:24.

 Siñansanan di Bijbel por beneficia nos den sentido material y yuda nos hiba un bida mas trankil. Por ehempel, hopi biaha un doño di trabou ta prefera trahado cu ta biba na harmonia cu principionan di Bijbel. Por lo general, e personanan aki ta honesto y diligente. (Proverbionan 10:4, 26; Hebreonan 13:18) E Palabra di Dios ta siña nos tambe cu nos tin cu keda satisfecho cu loke nos tin y cu nos amistad cu Dios ta bal mucho mas cu cos material.—Lesa Mateo 6:24, 25, 33; 1 Timoteo 6:8-10.

 Hende cu ta biba segun principio di Bijbel ta hiba un bida mas saludabel. (Proverbionan 14:30; 22:24, 25) Por ehempel, Bijbel ta prohibi buracheria, y hende cu ta evita esey ta proteha nan mes contra maleza mortal y lo no causa accidente fatal facilmente. (Proverbionan 23:20) Jehova ta permiti nos bebe bibida alcoholico, pero cu moderacion. (Salmo 104:15; 1 Corintionan 6:10) Ademas, principionan divino ta beneficia nos pasobra nan ta siña nos controla no solamente nos accionnan sino tambe nos manera di pensa. (Salmo 119:97-100) Pero cristiannan berdadero ta respeta Dios su normanan, no djis pa nan propio beneficio, sino pa honra Jehova.—Lesa Mateo 5:14-16.