LES 5
Kico Ta Dios Su Proposito pa Tera?
1. Dicon Dios a crea tera?
Jehova a duna hende e planeta Tera. Esey ta nos hogar. Pues, Dios no a crea e prome pareha humano, Adam cu Eva, pa biba den cielo; el a crea angel pa biba den cielo. (Job 38:4, 7) Mas bien, Jehova a pone e prome homber den un bunita paradijs cu tabata yama Eden. (Genesis 2:15-17) El a duna Adam y su futuro descendientenan e speransa di biba pa semper riba tera.—Lesa Salmo 37:29; 115:16.
Na principio, ta e hofi di Eden so tabata un paradijs. E prome pareha lo mester a yena tera cu nan descendientenan. Cu tempo, nan lo mester a domina tera completo y hacie un paradijs. (Genesis 1:28) Hamas tera lo ser destrui. Lo e keda como hende su luga di biba pa semper.—Lesa Salmo 104:5.
2. Dicon tera no ta un paradijs actualmente?
Debi cu Adam cu Eva a desobedece Dios, el a saca nan for di e hofi di Eden. Asina nan a perde Paradijs, y niun hende no a logra hay’e bek. Bijbel ta bisa: “Tera ta keda entrega den man di e malbadonan.”—Job 9:24.—Lesa Genesis 3:23, 24.
Acaso Jehova a faya cu su proposito original pa humanidad? No! E ta todopoderoso; e no por faya. (Isaias 45:18) Pronto lo e percura pa humanidad biba manera tabata su proposito.—Lesa Salmo 37:11, 34.
3. Con Dios lo restaura Paradijs?
Tera lo bira un paradijs bou di e gobernacion di Hesus como Rey nombra di Dios. Den e bataya cu Bijbel ta yama Armagedon, bou di direccion di Hesus, e angelnan di Dios lo destrui tur hende cu ta opone Dios. Despues, Hesus lo mara Satanas pa 1.000 aña. E pueblo di Dios lo sobrevivi e destruccion pasobra Hesus lo guia nan y proteha nan. Nan lo haya bida eterno den Paradijs riba tera.—Lesa Revelacion 20:1-3; 21:3, 4.
4. Na ki tempo sufrimento lo caba?
Na ki tempo Dios lo pone fin na maldad riba tera? Hesus a duna un “señal” pa indica ki ora e fin ta cerca. E cosnan cu ta pasando actualmente ta forma un peliger pa existencia di humanidad y ta mustra cu nos ta bibando den “conclusion di e era aki.”—Lesa Mateo 24:3, 7-14, 21, 22.
Durante e periodo di 1.000 aña cu Hesus lo goberna tera for di cielo, e lo pone fin na tur sufrimento. (Isaias 9:6, 7; 11:9) Ademas di sirbi como Rey, Hesus lo sirbi tambe como Sumo Sacerdote y lo kita pica di hende cu ta stima Dios. Pues, Dios lo uza Hesus pa elimina maleza, biehes y morto.—Lesa Isaias 25:8; 33:24.
5. Ken lo bay biba den Paradijs?
Na Salon di Reino lo bo asocia cu hende cu ta stima Dios y cu kier siña con pa agrad’e
Hende cu ta obedece Dios lo biba den Paradijs riba tera. (1 Juan 2:17) Hesus a instrui su siguidornan pa busca hende humilde y siña nan con nan por haya Dios su aprobacion. Awe, Jehova ta preparando miyones di hende pa biba den e binidero Paradijs. (Sofonias 2:3) Na Salon di Reino di Testigonan di Jehova, nan ta siña con nan por ta un mihor esposo y tata y un mihor esposa y mama. Mayornan y yiunan ta adora Dios hunto y ta siña con conocemento di Bijbel por yuda nan hiba un mihor bida.—Lesa Mikeas 4:1-4.
