1, 2. Unda nos por haya un refugio sigur awe?

 IMAGINA cu bo ta canando riba un dia cu tin mal tempo. Shelo ta bira mas y mas scur. Lamper ta cuminsa corta, strena ta dal, anto awa ta cuminsa yobe masha duro mes. Bo ta cuminsa core, buscando desesperadamente un caminda di sconde. Ata bo ta mira un refugio canto di caminda. E ta solido, seco y ta atrae bo pa drenta. Esta gradicido bo ta pa e luga di siguridad ei!

² Nos ta bibando den tempo turbulento. Condicionnan mundial ta bayendo di malo pa piyo. Pero tin un luga di siguridad, un refugio cu por proteha nos di daño permanente. Kico e ta? Tuma nota di loke Bijbel ta siña: “Lo mi bisa [Yehova]: ‘Mi refugio y mi baluarte, mi Dios, den kende mi ta confia!’”—Salmo 91:2.

3. Con nos por haci Yehova nos refugio?

³ Imagina bo! Yehova, e Creador y Soberano di universo, por ta nos refugio protectivo. E por proteha nos pasobra e ta hopi mas poderoso cu ken of kico cu lo por bin contra  nos. Asta si nos ricibi daño, Yehova por drecha tur su mal efectonan. Con nos por haci Yehova nos refugio? Nos tin cu confia den dje. Ademas, e Palabra di Dios ta urgi nos: “Conserva boso mes den e amor di Dios.” (Hudas 21) Si, nos tin cu keda den e amor di Dios, manteniendo un banchi of laso amoroso cu nos Tata celestial. E ora ei nos por tin e confiansa cu e ta nos refugio. Pero con nos por forma un laso asina?

4, 5. Menciona algun manera cu Yehova a expresa amor pa nos.

⁴ Pa keda den e amor di Dios, nos tin cu compronde con Yehova a demostra su amor pa nos. Pensa riba algun di e siñansanan di Bijbel cu bo a siña cu yudansa di e buki aki. Como e Creador, Yehova a duna nos planeta Tera como nos dushi hogar. El a yena e tera cu un abundancia di cuminda y awa, recursonan natural, bida animal fasinante y paisahe bunita. Como Autor di Bijbel, Dios a revela su nomber y su cualidadnan na nos. Ademas, su Palabra ta revela cu el a manda su propio Yiu stima na tera, y a permiti Hesus sufri y muri pa nos. (Huan 3:16) Y con nos ta beneficia di e regalo aki? E ta duna nos speransa pa un futuro maraviyoso.

⁵ Nos speransa pa futuro ta depende tambe di un otro cos cu Dios a haci. Yehova a establece un gobierno celestial, e Reino Mesianico. Pronto e gobierno aki lo pone un fin na tur sufrimento y lo haci e tera un paradijs. Djis pensa! Nos por biba den un paradijs den pas y felicidad pa semper. (Salmo 37:29) Mientrastanto, Dios a duna nos guia con pa biba di e mihor manera posibel aworaki. El a duna nos e regalo di oracion y di e manera ei nos por comunica cu ne ki ora cu ta y na unda cu ta. Esakinan ta djis algun di e maneranan cu Yehova a demostra amor pa humanidad en general y pa abo como persona.

6. Con lo bo por reacciona riba e amor cu Yehova a mustra na bo?

 ⁶ E pregunta sumamente importante pa bo considera ta esaki: Con lo mi reacciona riba Yehova su amor? Hopi hende lo bisa: “Wel, a cambio ta ami tin cu stima Yehova.” Ta asina abo ta sinti? Hesus a bisa cu esaki ta e mandamento di mas grandi di tur: “Stima SEÑOR bo Dios cu henter bo curason, y cu henter bo alma, y cu henter bo mente.” (Mateo 22:37) Un cos ta sigur, bo tin hopi motibo pa stima Yehova Dios. Pero djis sinti cu bo tin e amor ei ta tur loke bo mester pa bisa cu bo ta stima Yehova cu henter bo curason, alma y mente?

7. Stima Dios ta simplemente sinti un cierto emocion? Splica.

⁷ Manera Bijbel ta splica, stima Dios ta encera mucho mas cu djis un sintimento. De echo, aunke ta esencial pa nos sinti amor pa Yehova, e sintimento ei ta djis e comienso di berdadero amor p’e. Por ehempel: Un simiña di apel ta esencial pa bo haya un palo di apel cu ta produci fruta, pero e ta djis e comienso di un palo asina. Si bo tawata kier un apel, lo bo keda contento si un hende duna bo djis un simiña di apel? No! Asina tambe, un sintimento di amor pa Yehova Dios ta apenas e comienso. Bijbel ta siña: “Esaki ta e amor di Dios, cu nos ta warda su mandamentonan; y su mandamentonan no ta pisa.” (1 Huan 5:3) Berdadero amor pa Dios mester duna bon fruta. E mester wordo expresa den accion.—Mateo 7:16-20.

8, 9. Con nos por expresa nos amor y aprecio pa Dios?

⁸ Nos ta demostra nos amor pa Dios ora cu nos ta warda su mandamentonan y aplica su principionan. Esei no ta un cos mucho duro pa haci. En bes di ta un carga pisa, e leinan di Yehova ta diseña pa yuda nos hiba un bida placentero, felis y cu ta duna satisfaccion. (Isaias 48:17, 18) Door di biba na harmonia cu e guia di Yehova, nos ta mustra nos Tata celestial  cu en berdad nos ta aprecia tur loke el a haci pa nos. Lamentablemente, masha tiki hende den e mundo djawe ta mustra tal aprecio. Nos no kier ta malagradecido manera algun hende cu a biba tempo cu Hesus tawata riba tera. Hesus a cura dies leproso, pero ta un so a bolbe bek pa gradicie. (Lucas 17:12-17) Nos definitivamente kier ta manera esun gradicido ei, no manera e nuebenan malagradecido!

⁹ Kico anto ta e mandamentonan di Yehova cu nos tin cu warda? Nos a considera varios di nan den e buki aki, pero laga nos repasa un par. Warda Dios su mandamentonan lo yuda nos keda den e amor di Dios.

10. Splica dicon ta importante pa sigui adkiri conocemento di Yehova Dios.

¹⁰ Siña tocante Yehova ta un paso sumamente importante pa hala mas serca di dje. Esei ta un proceso cu no mester stop nunca. Si un anochi hopi hopi friu bo ta pafo den aire liber banda di un candela pa bo haya poco calor, lo bo laga e candela paga? No. Bo ta sigui buta  palo pa e candela keda bon cayente y briyante. Bo bida lo por ta depende di esei! Mescos cu palo ta laga e candela sigui kima, asina “e conocemento di Dios” ta mantene nos amor pa Yehova ferviente.—Proverbionan 2:1-5.

11. Ki efecto Hesus su siñansa tawatin riba su siguidonan?

¹¹ Hesus tawata kier pa su siguidonan mantene nan amor pa Yehova y pa Su Palabra precioso di e berdad, bibo y ferviente. Despues di Hesus su resureccion, el a siña dos di su disipelnan tocante algun di e profecianan den e Scritura Hebreo cu a cumpli riba dje. Kico tawata e efecto? Despues e disipelnan a bisa: “Nos curason no tawata kima den nos mientras cu e tawata papia cu nos na caminda, mientras cu e tawata splica nos e Scrituranan?”—Lucas 24:32.

12, 13. (a) Kico a pasa cu amor pa Dios y pa Bijbel di mayoria di hende djawe? (b) Con nos por evita cu nos amor ta fria?

¹² Ora cu abo a haya sa pa prome bes loke Bijbel realmente ta siña, bo a ripara cu den bo curason a lanta un sintimento ferviente di goso, entusiasmo y amor pa Dios? Sin duda bo a sinti esei. Hopi hende a sinti mescos. Pero awor e reto ta pa mantene e amor intenso ei bibo y yud’e crece. Nos no kier sigui e tendencia di e mundo djawe. Hesus a predeci: “Amor di hopi hende lo fria.” (Mateo 24:12) Con bo por evita cu bo amor pa Yehova y pa berdadnan biblico ta fria?

¹³ Sigui adkiri conocemento di Yehova Dios y Hesucristo. (Huan 17:3) Medita, es decir, pensa profundamente riba loke bo ta siña for di e Palabra di Dios, door di puntra bo mes: ‘Kico esaki ta siña mi tocante Yehova Dios? Ki motibo adicional e ta duna mi pa stim’e cu henter mi curason, mente y alma?’ (Salmo 77:12) Door di medita asina bo amor pa Yehova lo keda bibo y ferviente.

14. Con oracion por yuda nos mantene nos amor pa Yehova bibo?

¹⁴ Un otro manera pa laga bo amor pa Yehova keda bibo y ferviente ta door di haci oracion cu regularidad. (1 Tesalonicensenan 5:17) Den Capitulo 17 di e buki aki, nos a siña cu  oracion ta un regalo precioso di Dios. Mescos cu relacionnan humano ta prospera ora cu tin comunicacion habri y regular, asina tambe nos relacion cu Yehova ta keda bibo y caluroso ora cu nos ta haci oracion na dje cu regularidad. Ta sumamente importante pa nos nunca laga nos oracionnan bira mecanico, esta, djis un rutina di palabranan cu nos ta ripiti bes tras bes sin berdadero sintimento of nificacion. Nos tin cu papia cu Yehova manera un yiu lo a papia cu su tata stima. Claro cu nos kier papia cu respet, pero abiertamente, honestamente y di curason. (Salmo 62:8) Si, estudio personal di Bijbel y oracion di curason ta aspectonan sumamente importante di nos adoracion, y nan ta yuda nos keda den e amor di Dios.

15, 16. Dicon corectamente nos por mira e trabou di predica e Reino como un honor y un tesoro?

¹⁵ Estudio personal di Bijbel y oracion ta actonan di adoracion cu nos kisas ta haci den priva. Sinembargo, laga nos considera awor un aspecto di adoracion cu nos ta haci publicamente: papia cu otro hende tocante nos creencianan. Bo a comparti caba algun berdad biblico cu otro hende? Esaki ta un oportunidad maraviyoso di sirbi Yehova cu el a concede nos. (Lucas 1:74) Ora nos ta comparti cu otro hende e berdadnan cu nos a siña tocante Yehova Dios, nos ta cumpliendo cu un asignacion masha importante duna na tur cristian berdadero: e tarea di predica e bon noticia di e Reino di Dios.—Mateo 24:14; 28:19, 20.

¹⁶ Apostel Pablo a mira su sirbishi como algo precioso y a yam’e un tesoro. (2 Corintionan 4:7) Papia cu hende tocante Yehova Dios y su proposito ta e mihor trabou cu lo bo por haci. Pasobra asina nos ta sirbi of traha pa e mihor Shon cu tin, y tambe e ta produci e mihor beneficionan cu ta posibel. Door di participa den e actividad di predica aki, bo  ta yuda hende di curason honrado hala serca nos Tata celestial y cuminsa cana riba e caminda cu ta hiba na bida eterno! Cua otro trabou por duna bo mas satisfaccion? Ademas, dunando testimonio tocante Yehova y su Palabra ta aumenta bo propio fe y ta fortalece bo amor pa Yehova. Anto Yehova  ta aprecia bo esfuerso. (Hebreonan 6:10) Kedando ocupa den e trabou ei ta yuda bo keda den e amor di Dios.—1 Corintionan 15:58.

17. Dicon e sirbishi cristian ta urgente awe?

¹⁷ Ta importante pa nos corda cu e trabou di predica e Reino ta urgente. Bijbel ta bisa: “Predica e palabra, ocupa bo den dje urgentemente.” (2 Timoteo 4:2, NW) Dicon ta asina urgente pa haci esei awe? E Palabra di Dios ta bisa nos: “E gran dia di [Yehova] ta serca; e ta serca y e ta bin masha lihe mes.” (Sofonias 1:14) Si, e tempo cu Yehova lo trece henter e sistema di cosnan aki na su fin ta acercando rapidamente. Pues, mester spierta e hendenan! Nan tin cu sa cu awor ta tempo pa scohe Yehova como nan Soberano. E fin “lo no tarda.”—Habacuk 2:3.

18. Dicon nos mester adora Yehova publicamente den asociacion cu cristiannan berdadero?

¹⁸ Yehova kier pa nos ador’e publicamente den asociacion cu cristiannan berdadero. Ta pesei su Palabra ta bisa: “Laga nos considera con pa stimula otro pa stima y haci bon obra, y no laga di asisti na nos mes reunionnan, manera ta custumber di algun, ma curasha otro; y mucho mas ainda, ora boso ta mira cu e dia ta yegando serca.” (Hebreonan 10:24, 25) Ora nos ta reuni hunto cu rumannan den fe na reunionnan cristian, nos tin un oportunidad maraviyoso pa alaba y adora nos Dios stima. Tambe nos ta edifica y anima otro.

19. Con nos por traha pa fortalece e lasonan di amor den e congregacion cristian?

¹⁹ Segun cu nos ta asocia cu otro adoradonan di Yehova, nos ta fortalece e lasonan di amor y amistad den congregacion. Ta importante pa nos purba mira e bon cualidadnan den otro, mescos cu Yehova ta busca e bon cualidadnan cu tin den nos. No spera perfeccion for di bo rumannan den fe. Corda cu nan tur ta na diferente etapa di crecemento spiritual y cu nos tur ta comete eror. (Colosensenan 3:13)  Trata na cultiva amistad pega cu esnan cu ta stima Yehova intensamente, y lo bo ripara cu bo mes lo crece spiritualmente. Si, adora Yehova hunto cu bo rumannan spiritual lo yuda bo keda den e amor di Dios. Con Yehova ta recompensa esnan cu ta ador’e fielmente y asina ta keda den su amor?

20, 21. Kico ta e “bida berdadero”, y dicon e ta un speransa maraviyoso?

²⁰ Yehova ta recompensa su fiel sirbidonan cu bida, pero ki clase di bida? Wel, bo ta realmente na bida aworaki? Mayoria di nos lo bisa cu ta mas cu claro cu nos ta na bida. Ata nos ta hala rosea, ta come y ta bebe. Definitivamente nos mester ta na bida. Y ora nos ta pasa den e momentonan di mas felis, kisas asta nos ta bisa: “Esaki si ta bida!” Sinembargo, Bijbel ta indica cu den un sentido importante, ningun hende awe realmente ta na bida.

²¹ E Palabra di Dios ta urgi nos pa “gara loke ta bida berdadero.” (1 Timoteo 6:19) E palabranan ei ta indica cu e “bida berdadero” ta algo cu nos ta spera di alcansa den futuro. Si, ora nos bira perfecto, nos lo ta na bida den e pleno sentido di e palabra, pasobra e ora ei nos lo ta bibando manera tawata originalmente Dios su intencion pa nos biba. Den futuro ora nos ta biba den un tera transforma den un paradijs cu pleno salud, pas y felicidad, nos lo disfruta porfin di e “bida berdadero”, esta, bida eterno. (1 Timoteo 6:12) Esei no ta un speransa maraviyoso?

22. Con bo por ‘gara loke ta e bida berdadero’?

²² Con nos por ‘gara loke ta e bida berdadero’? Den e mesun contexto, Pablo a urgi cristiannan “pa haci bon” y “pa nan ta rico den bon obra.” (1 Timoteo 6:18) Ta bisto anto cu esei ta depende pa gran parti di e manera cu nos ta aplica e berdadnan cu nos a siña for di Bijbel. Pero acaso Pablo tawata kiermen cu nos lo merece e “bida berdadero” door di haci bon obra? No, pasobra e perspectivanan maraviyoso ei en  realidad ta depende di si nos ta haya “gracia”, esta bondad inmereci, for di Dios. (Romanonan 5:15) Sinembargo, Yehova tin delicia den recompensa esnan cu ta sirbie fielmente. E kier mira bo biba e “bida berdadero.” Tal bida eterno den felicidad y pas ta spera esnan cu keda den e amor di Dios.

23. Dicon ta esencial pa keda den e amor di Dios?

²³ Cada un di nos ta haci bon di puntra su mes: ‘Mi ta adorando Dios den e manera cu el a describi den Bijbel?’ Si tur dia nos ta haci sigur di cu e contesta ta si, e ora ei nos ta riba e caminda corecto. Nos por tin e confiansa cu Yehova ta nos refugio. Lo e proteha su pueblo fiel durante e ultimo dianan turbulento di e sistema bieu di cosnan aki. Yehova lo laga nos drenta sano y salvo den e glorioso sistema nobo cu awor ta asina serca. Lo ta masha emocionante pa nos experencia e tempo ei! Y ki contento nos lo ta cu nos a tuma e decisionnan corecto durante e ultimo dianan aki! Si bo scohe bon aworaki, lo bo disfruta di e “bida berdadero” pa tur eternidad, bida manera tawata Yehova Dios su proposito for di principio!