HABRI cualkier corant. Wak television of scucha radio. Tin tantisimo noticia tocante criminalidad, guera y terorismo! Pensa awor riba bo propio problemanan. Podise malesa of morto di un ser keri ta causando bo hopi angustia. Kisas bo ta sinti mescos cu e bon homber Job, kende a bisa cu e tawata ‘hoga den afliccion.’—Job 10:15, BPK.

Puntra bo mes:

• Ta esaki tawata Dios su proposito pa mi y pa e resto di humanidad?

• Unda mi por haya yudansa pa trata cu mi problemanan?

• Tin speransa cu algun dia nos lo mira pas riba tera?

Bijbel ta contesta e preguntanan aki na un manera cu ta laga bo keda satisfecho.

“E lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolor.”—Revelacion 21:4

“E cohonan lo bula manera bina.”—Isaias 35:6

 “Wowo di e ciegonan lo mira.”—Isaias 35:5

“Tur cu ta den graf lo . . . sali.”—Huan 5:28, 29

“Ningun habitante lo no bisa: ‘Mi ta malo.’”—Isaias 33:24

“Lo tin abundancia di maishi den e tera.”—Salmo 72:16

No core rechasa loke tin para skirbi riba e paginanan anterior como puro ilusion. Dios a priminti di cumpli cu e cosnan aki, y Bijbel ta splica con lo e hacie.

Pero Bijbel ta haci mas cu esei. E ta duna bo e yabi pa bo disfruta di un bida di berdadero satisfaccion for di awor. Pensa un rato riba bo precupacionnan y problemanan. Kisas ta falta di placa, problema di famia, salud cu ta bai atras of morto di un ser keri. Bijbel por yuda bo trata cu problemanan di awendia, y e por duna bo alivio door di contesta preguntanan manera lo siguiente:

• Dicon nos ta sufri?

• Con nos por trata cu e precupacionnan di bida?

• Con nos por haci nos bida di famia mas felis?

• Kico ta pasa cu nos ora nos muri?

• Nos lo bolbe mira nos defuntonan stima algun dia?

• Con nos por ta sigur cu Dios lo cumpli cu su promesanan pa futuro?

 E echo cu bo ta lesando e buki aki ta mustra cu lo bo tin deseo di haya sa kico Bijbel ta siña. E buki aki lo yuda bo. Tuma nota cu tin pregunta cu ta coresponde cu e paragrafnan. Miyones di hende a gusta e metodo aki di pregunta y contesta pa analisa Bijbel cu Testigonan di Yehova. Nos ta spera cu abo tambe lo disfruta di dje. Dios bendiciona bo awor cu bo ta bai experencia e emocion y satisfaccion di haya sa loke Bijbel ta siña realmente!