Onlad karga

No Walay Kalamidad, Ontutulong Kami Lapud Panangaro

No Walay Kalamidad, Ontutulong Kami Lapud Panangaro

Tutulongan na Saray Tasi nen Jehova iray kapananisiaan da tan arum ni no wala ray kalamidad. Gagawaen da itan lapud panangaro, say pakabidbiran na saray tuan Kristiano.​—Juan 13:35.

Say nabasa yo dia et pigara labat ed saray tulong ya ginawa mi ed loob na 12 ya bulan manlapud 2011 anggad kapegleyay 2012. Agla inlista dia so espiritual tan emosyonal ya panangasikaso ya kaiban naynay ed itutulong mi. Say angorganisa ed saraya et say Disaster Relief Committee ya inyasain na saray branch office mi. Likud ed satan, tinmulong met iray kongregasyon ed nanduruman lugar.

Japan

Japan: Nen Marso 11, 2011, walay agawan yegyeg tan tsunami tan apektadoy nilibon totoo ed northern Japan. Saray Tasi nen Jehova ed interon mundo et mabulos ya angidonasyon na kuarta tan inusar da ray abilidad tan kaykayarian da pian ontulong.

Brazil: Lapud delap, landslide, tan mudslide et nilasus so inatey. Saray Tasi nen Jehova et angipawit a tampol ed apektadon rehyon na 42 tonelada ya abaston kakanen, 20,000 ya bote na danum, 10 tonelada na kawes, tan 5 tonelada na panaglinis, tan wala met iray tambal tan arum nin nakaukolan.

Congo (Brazzaville): Nen walay sinmabog ya bodega na armas tan granada, 4 ya abung na saray Tasi nen Jehova so agaygay tan 28 ya abung na Tasi so aderal. Inikdan na naakan tan kawes iray apektado tan pinan-ayam na saray Tasi ed abung da iray pamilyan apektado.

Congo (Kinshasa): Inikdan na tambal iray biktima na cholera. Inikdan na kawes iray adelap lapud makmaksil tan agmanundan uran. Saray walad refugee camp et akaawat na medikal a tulong, bini, tan tonelada na kawes.

Venezuela: Lapud mabalasubos ya uran et dinmelap tan wala ray mudslide. Saramay 288 ya apektadon Tasi et tinulongan na saray disaster relief committee. Masulok ya 50 ya abung so impaalagey. Tan tinulongan na saray relief committee iramay apektado na ileleppua na Lake Valencia.

Pilipinas

Pilipinas: Lapud bagyo et dakel ya lugar so adelap. Angipawit so branch office na naakan tan kawes parad saray biktima, tan tinmulong iray asingger ya Tasi diad impanlinis nen inmekat lay danum.

Canada: Nen walay agawan baleg ya pool ed katakelan diad Alberta, akaawat so Slave Lake Congregation na baleg ya donasyon ya nanlapud saray kakaabay ya kongregasyon pian usaren ed panlinis. Lapud agda met nausar ya amin so kuartan naawat da, indonasyon na kongregasyon so masulok ya kapaldua pian makatulong ed saray biktima na kalamidad ed arum a bansa.

Côte d’Ivoire: Wala ray intaryan naakan, pampundoan, tan tambal antis, legan, tan kayari na guerra ed bansa.

Fiji: Lapud graben delap ya resulta na maksil ya uran, maslak ed 192 ya Tasin pamilya et aderal so dalus da, kanian anggapoy naakan tan kuarta da. Impawitan ira na naakan.

Ghana: Saray biktima na delap ed bandad bukig ya parte na bansa et inikdan na naakan, bini, tan impaalageyan na abung.

United States: Lapud alimbusabos et aderal so 66 ya abung na saray Tasi ed taloran state tan agaygay so 12 ya abung na saray Tasi. Anggano walay insurance na maslak ed sikara, inikdan iray pundo pian walay nausar da.

Argentina: Saray kongregasyon na saray Tasi nen Jehova et tinulongan da ray walad southern ya parte na bansa ya aderal so abung da lapud insabog na bolkan.

Mozambique: Impawitan na naakan so masulok ya 1,000 ya apektado na eras lapud anggapoy uran.

Nigeria: Duamplo tan apat ya Tasi ya na-injured lapud aksidente ed bus so inikdan na pinansyal a tulong. Tinulongan met iray dakel ya totoo ed bandad norte na bansa ya naandian na ayaman lapud panlalaban na saray nanduruman lahi tan relihyon.

Benin: Saray abiktima na graben delap et inikdan na tambal, kawes, moskitiro, nainum ya danum, tan napampundoan.

Dominican Republic

Dominican Republic: Kayari na bagyon Irene, tinmulong iray kongregasyon ed impangapiger na kaabungan tan angidonasyon iray kuarta.

Ethiopia: Diad duaran lugar ya anggapoy uran tan diad sakey ya pasen ya adelap, angipawit na pundo pian niiter so pankaukolan na saray apektado.

Kenya: Angipawit na pundo parad saramay walad lugar ya anggapoy uran.

Malawi: Tinulongan iramay manaayam ed Dzaleka refugee camp.

Nepal: Lapud landslide et aderal so abung na sakey ya Tasi. Sikatoy impaalageyan na temporaryon panayaman, tan tinulongan na kongregasyon.

Papua New Guinea: Pinoolan so waloran abung na saray Tasi. Inorganisa so pangipaalagey na abung da.

Romania: Wala ray Tasi ya aderal so abung da lapud delap. Tinulongan ira ed pangipaalagey na abung da.

Mali: Angidonasyon iray Tasi ed Senegal na pundo parad saramay anggapoy naakan da lapud daiset so inani da ta anggapoy uran.

Sierra Leone: Saray Tasin doktor ed France et linma pian mangiter na medikal ya tulong ed saray Tasi nen Jehova ya manaayam ed lugar ya walay guerra.

Thailand: Lapud graben delap et amayamay so aderal ed pigaran probinsya. Tinmulong iray relief team ed pangapiger tan panlinis ed 100 ya abung tan 6 ya Kingdom Hall.

Czech Republic: Kayari delap ya aneral ed pigaran kaabungan ed Czech Republic, saray Tasi ed Slovakia et linma pian ontulong.

Sri Lanka: Asumpal lay disaster-relief work parad saray biktima na tsunami.

Sudan: Saray Tasi nen Jehova ya naandian na ayaman lapud panlalaban ed bansa et impawitan na naakan, kawes, sapatos, tan angkabaleg iran plastic ya nayarin pantarong.

Tanzania: Lapud graben delap, anggapoy akeran gamit na 14 ya pamilya. Saray kongregasyon et angidonasyon na kawes tan gamit ed abung. Inapiger so sakey ya abung.

Zimbabwe: Lapud anggapoy uran, anggapoy naakan diad sakey ya lugar ed sayan bansa. Inikdan na naakan tan kuarta iramay apektado.

Burundi: Saray refugee et inikdan na relief, kaiba lay medikal a tulong.