Onlad karga

Say Libron Saray Istorya ed Biblia et Wala Lad Eskuelaan

Say Libron Saray Istorya ed Biblia et Wala Lad Eskuelaan

Say Pangasinan ya translation na My Book of Bible Stories ya in-release nen 2012 et ontutulong ed ugugaw ya maneeskuela diad Pilipinas ya Pangasinan so salita da. Dugaruga itan ya libro ed instruksion na Philippines Department of Education ya usaren so mismon binalegan ya salita na ugugaw ed pambangat diad elementarya.

Masulok ya 100 so lenguahe ed Pilipinas, tan abayag lan pandedebatian no antoy nepeg ya usaren ed eskuelaan. Nen 2012, binirbir na Department of Education ya no say “lenguahen uusaren ed abung” so usaren met ed eskuelaan, “mas maples ya makaaral iray estudyante.” Bilang resulta, inggapo so programan “Mother Tongue-Based Multi-Lingual Education.”

Say Pangasinan so sakey ed saray lenguahen apili ya usaren. Balet walay problema. Imbaga na sakey ya prinsipal ya dagdaiset so libro tan magasin ya Pangasinan. Kanian dugaruga so impangi-release na Saray Tasi nen Jehova na libron Saray Istorya ed Biblia diad saray distriton kombension da nen Nobyembre 2012.

Manga 10,000 ya kopya so inimprinta ya ibunog ed saray kombension. Malikeliket iray ugugaw tan saray atateng da ed sayan libro ya nipatalos ed mismon lenguahe ra. Oniay imbaga na sakey ya sanasawa: “Labalabay itan na ananak mi ta natalo-talosan da.”

Kayarin tampol na kombension, wala ray Tasi ya linmad eskuelaan diad Dagupan City tan wala ray awit dan Saray Istorya ed Biblia. Saray maestro tan maestra et malikeliket ed satan a libro ta nanairapan iran mananap na libron Pangasinan ya nausar dad pambangat da. Masulok ya 340 libro so nibunog. Inusar itan ya tampol na saray maestro tan maestra ed pambangat dad ugugaw ya manbasay mismon lenguahe ra.

Malikeliket iray Tasi nen Jehova ya walay nitulong to yan libro ed edukasyon na saray ugugaw. Oniay imbaga na sakey ed saray translator ya tinmulong ed pangipatalos ed satan: “Abayag mi lan bibirbiren ya importante so pamawalay publikasyon ed sarilin lenguahe na totoo pian nasabi puso ra. Atan so rason no akin ya pansasagpotan na saray Tasi ya ipatalos ed nilasus iran lenguahe so Biblia tan arum nin literatura ya base ed Biblia.”