Onlad karga

Anto so Watch Tower Bible and Tract Society?

Anto so Watch Tower Bible and Tract Society?

Say Watch Tower Bible and Tract Society of Pennsylvania et sakey ya korporasyon ya aliwan parad negosyo a pinorma nen 1884 diad ley na Commonwealth of Pennsylvania, U.S.A. Uusaren itan na saray Tasi nen Jehova pian suportaan so sankamundoan ya kimey da, kaibay panangi-publish na saray Biblia tan base ed Biblia iran literatura.

Unong ed charter na korporasyon, saray gagala to et “parad relihyon, edukasyon, tan parad charity,” lalo lay “panagpulong tan panagbangat na ebanghelyo na Panarian na Dios diad uley nen Kristo Jesus.” Say pagmaliw a membro na korporasyon et diad panamegley na imbitasyon aliwan diad kabaleg na donasyon. Saray membro tan direktor na korporasyon et ontutulong ed Mananguley ya Ulop na Saray Tasi nen Jehova.

Onsusuportan Legal Iran Korporasyon

Likud ed Watch Tower Bible and Tract Society of Pennsylvania, saray Tasi nen Jehova et manguusar na dakel nin legal a korporasyon diad nanduruman bansa. Say ngaran na arum ed sarayan korporasyon et kaiba so “Watch Tower,” “Watchtower,” odino patalos na sakey ed saratan.

Manlapud inkiletneg na sarayan nanduruman legal ya korporasyon, akatulong iratan pian dakel so nagawaan mi, a singa saraya:

  • Writing tan publishing. Wala lay im-publish min manga 220 milyon a Biblia tan manga 40 bilyon a nibased Biblia iran literatura, diad masulok ya 900 a lenguahe. Diad website ya jw.org et sarag na totoo so manbasa na Biblia online ya anggapoy bayar diad masulok ya 160 a lenguahe tan naromog da ditan iray ebat ed saray tepet ed Biblia, a singa say “Anto so Panarian na Dios?

  • Edukasyon. Wala ray nanduruman eskuelaan mi pian aralen so Biblia. Alimbawa, manlapud 1943, ngalngali 9,000 ya Tasi nen Jehova so impasal a maong diad Watchtower Bible School of Gilead, pian makapanlingkor ira bilang misionero odino pian makatulong ed iyaligwas na sankamundoan a kimey mi. Tan kada simba, minilyon a totoo, kaiba iray aliwan Tasi so nibabangat ed saray pantitipon ya gagawaen ed kada kongregasyon mi. Wala met iray totoon ibabangat min manbasa tan mansulat tan walay libron uusaren mid saya ed masulok ya 120 a lenguahe.

  • Charity. Mangiiter kami na tulong ed saray biktima na trahedya—balanglan lapud too, singa say impamatey ed dakel a totoo ed Rwanda nen 1994, odino lapud kalamidad, singa say yegyeg ya agawad Haiti nen 2010.

Anggaman dakel so nagagawaan mi lapud sarayan korporasyon tan arum nin onsusuportan korporasyon, ag-akadepende ed saraya so kimey mi. Responsabilidad na kada Kristiano ya gawaen so ganggan na Dios ya ipulong tan ibangat so maong a balita. (Mateo 24:14; 28:19, 20) Manisia kamin susuportaan na Dios so kimey mi tan sikato so “mamapabaleg ed satan.”​—1 Corinto 3:6, 7.