Onlad karga

Panon Ak ya Magmaliw a Tasi nen Jehova?

Panon Ak ya Magmaliw a Tasi nen Jehova?

Saray kaukolan ya gawaen pian magmaliw ya Tasi nen Jehova et indeskribe nen Jesus diad Mateo 28:19, 20. Nabasa ed sayan duaran bersikulo iray kaukolan ya gawaen pian magmaliw ya disipulo nen Kristo so sakey, kaibad saya so pangibaga o pantasi tungkol ed si Jehova.

Unonan gawaen: Aralen so ibabangat na Biblia. Ingganggan nen Jesus iray papatumbok to ya ‘ibangat iray totoo pian magmaliw iran disipulo.’ (Mateo 28:19, 20) Say literal ya kabaliksan na “disipulo” et “manaaral” o babangatan. Diad Biblia, lalo la diad saray bangat nen Jesus ya wadtan, so pakaamtaan moy impormasyon ed kaukolan mon gawaen pian nawalaan kay maliket ya bilay. (2 Timoteo 3:​16, 17) Maliket kamin ontulong ed sika pian naaralan moy ibabangat na Biblia panamegley na gagawaen min libren panagaral na Biblia.​—Mateo 10:​7, 8; 1 Tesalonica 2:​13.

Komaduan gawaen: Iyaplikam so nanaaralan mo. Imbaga nen Jesus ya saramay manaaral o babangatan et kaukolan ya “mangunor ed amin ya ingganggan [to].” (Mateo 28:20) Kanian say panaral na Biblia et aliwa labat ya basta pangamta—kaibad saya so panguman ed panagnonot tan kagagawa. (Gawa 10:42; Efeso 4:​22-​29; Hebreo 10:24, 25) Saramay labay dan unoren so ganggan nen Jesus et napapakiwas ya mandesisyon ya unoren day Jesus diad pangidedika day bilay da ed si Jehova a Dios.​—Mateo 16:24.

Komatlon gawaen: Manpabautismo. (Mateo 28:19) Diad Biblia, say bautismo et nikompara ed pangiponpon. (Ikompara so Roma 6:​2-4) Singa itan ipatey ed apalabas ya kabibilay tan igapo so balon bilay. Kanian say labay ya ibaga na pampabautismom et ipapakabat mod publiko ya asumpal mo imay duaran ipapagawa nen Jesus tan onkekerew kad Dios na malinis a konsiensia.​—Hebreo 9:​14; 1 Pedro 3:​21.

Panon kon naamtaan no akaparaan ak lan manpabautismo?

Asinggeran mo ray elder ed kongregasyon. Katongtongen da ka pian nasegurado ya natatalosan mo no anto ray kaibad sayan desisyon mo, iyaaplikam so nanaaralan mo, tan mabulos mo lan indedika so bilay mod si Jehova.​—Gawa 20:28; 1 Pedro 5:​1-3.

Kasin onaplika met iya ed ugugaw nin anak na Tasi?

On. Papabalegen mi ray anak mi “diad disiplina tan panamilin nen Jehova.” (Efeso 6:4) Balet, legan iran ombabaleg, kaukolan day mandesisyon ya bukor no kasin aralen, awaten, tan iyaplika da iray ibabangat na Biblia pian onkualipika iran manpabautismo. (Roma 12:2) Kanian, mandesisyon so kada sakey ed panlingkor tod Dios.​—Roma 14:12; Galacia 6:5.