Onlad karga

Siopay Manpupundod Kimey na Saray Tasi nen Jehova?

Siopay Manpupundod Kimey na Saray Tasi nen Jehova?

Say gagawaen min panagpulong et pupundoan na saray boluntaryon donasyon na Saray Tasi nen Jehova. Agkami mankokolektay kuarta ed saray aral mi tan agmi oobligaen iray membro min mangiter na kakaplo odino tithe. (Mateo 10:7, 8) Imbes, wala ray contribution box ed saray Kingdom Hall mi parad saramay malabay a mandonasyon. Agla kaukolan ya ibagay ngaran na saray nandonasyon.

Say pundon naaawat mi et duga labat ed saray gastos mi lapud anggapoy babayaran min lider mi. Ontan met, saray Tasi ya oonlad kaabungan et anggapoy sueldo da, tan simpli labat iray Kingdom Hall mi.

Saray donasyon ya ipapawit ed saray branch office na Saray Tasi nen Jehova et uusaren pian tulongan iray biktima na kalamidad, pian suportaan iray misionero tan ombiabiahen ministro mi, uusaren pian mangipaalagey na saray Kingdom Hall ed mairap iran bansa, tan pangimprinta tan pangipawit na saray Biblia tan arum ni ran nibase ed Biblian publikasyon.

Mandesisyon so balang sakey no say donasyon to et parad kongregasyon da, kimey ed interon mundo, odino parad satan a dua. Kada kongregasyon et regular a manggagaway report pian naamtaan na saray membro iray panggagastosan.