Onlad karga

UUMANEN NA BIBLIA SO BILAY

“Say Karsada so Nagmaliw ya Abung Ko”

“Say Karsada so Nagmaliw ya Abung Ko”
  • Taon na Inkiyanak: 1955

  • Bansa: Spain

  • Apalabas: Adik ed Druga, Buanges, tan Bayolenti

ISTORYAY BILAY KO

Wala ray totoon mabayag ni insan ira makaaral ed aliwliwan eksperiensya ra. Ontan ak. Niyanak ak tan binmaleg ak ed Barcelona, say komaduan sankabalegan ya syudad ed Spain. Nanayam so pamilyak ed lugar ya tatawagen ya Somorrostro, ya say kawalaan to et diad baleg a kabiangan na syudad diad gilig na dayat. Kabkabat so Somorrostro lapud krimen tan panaglako na druga.

Siamera kamin sanaagi tan siak so panguloan. Lapud agaylay irap na bilay mi, impantrabaho ak nen tatay ko bilang managdokdok na bola diad sakey a tennis club ed lugar mi. Samploy taon kod saman tan samploran oras so trabahok kada agew. Lapud satan, agak akapanaral, aliwan singa arum ya ugugaw ya kaedad ko. Nen 14 so taon ko, nantrabaho ak bilang manag-apiger na makina diad sakey ya metal shop.

Nen 1975, akila ak ed Spanish Foreign Legion diad North Africa tan akasulong ak na nikaduman unipormi

Nen 1975, atawag ak ya mansundalo, ya diad saman et kakaukolanen ed Spain. Labay kon walay balon naeksperiensyak kanian namboluntaryo ak ya mila ed Spanish Foreign Legion diad Melilla, a kabiangan na teritoryay Spain diad North Africa. Diad saman a panaon, nagmaliw ak ya adik ed druga tan buanges.

Nen tinaynan koy Legion, pinmawil ak ed Barcelona tan nambuo na gang. Tatakewen min amin so nabembenan mi. Insan mi ilako iratan pian walay isaliw mi na druga. Ginapoan koy oninum na LSD tan amphetamine, tan ontetelek so bilay ko ed sex, alak, tan sugal. Lapud satan, mas lalo ak ya nagmaliw ya bayolenti. Naynay ya walay awit kon yuro, wasay, o barang, tan agak antakot ya usaren iratan no kaukolan.

Aminsan, nantakew kami na kotse tan inusilan kami na pulis. Singa iman eksena ed pelikula. Inmaneho mi may kotse tan nen akaarawi kami lay manga 30 kilometro, pinapaltog kami na saray pulis. Imbangga na drayber mi so kotse, insan kami batik. Nen akabatan itan nen tatay ko, pinalayas to ak ed abung mi.

Diad tinmumbok ya limay taon, say karsada so nagmaliw ya abung ko. Onuugip ak ed paway na saray puerta, trak, yurongan ed parke, tan sementeryo. Asalik ni ingen so nanayam ed kuweba. Anggapoy direksion na bilay ko, tan ag-importante ed siak no manbilay odino ompatey ak. Atandaan ko ya nen aka-druga ak et nanlaslas ak na pulso tan sinugat-sugat koy taklay ko. Anggad natan et wala nin siansiay piglat ko.

NO PANON YA INUMAN NA BIBLIA SO BILAY KO

Nen 28 so taon ko, inanap ak nen nanay ko tan pinasempet to ak ed abung mi. Pinmayag ak tan imbagak ya manguman ak la, pero abayag ni insan ko atoor itan ya imbagak.

Sakey ya ngarem, walay duaran Tasi nen Jehova ya tinmoktok ed puerta mi. Legan ko ran dedengelen, inmeyag si tatay ko manlapud loob na abung tan imbaga to ya ikapotan ko ray puerta. Lapud agko labay so iganggan, agko inimanoy tatay ko. Inikdan da ak na taloran angkelag ya libro, ya maliket kon inawat. Tinepet ko no iner ira mantitipon, tan kayari pigaran agew, linma ak ed Kingdom Hall.

Say unaan ya naimanok et say maayos ya panangawes dan amin. Aliwa ran singa siak ya andukey so buek ko, makapakapal so balbas ko, tan akulastay so kawes ko. Mapatnag ya agak bagay diman, kanian wadman ak labat ed paway. Pero abigla ak ta abirbir ko may datin kaarok tan membro na gang ya si Juan, ya aka-amerikana. Ag-abayag et naamtaan kon nagmaliw ya Tasi nen Jehova sakey taon ni labat so apalabas. Binmiskeg so liknaan ko nen anengneng ko, kanian linmoob ak tan akiaral ak. Saman so gapoan na impanguman ko.

Nampaiyaral ak na Biblia tan naisip kon tampol ya no labay kon napaliket so Dios, kaukolan kon umanen so agresibon ugalik tan imoral ya kabibilay ko. Aliwan mainomay iman. Naaralan ko ya no labay kon paliketen si Jehova a Dios, kaukolan koy ‘manpasimbalo diad panguman ko ed panagnonot ko.’ (Roma 12:2) Talagan mapangasi so Dios. Anggano dakel so agawaan kon lingo, aliknak ya iikdan to ak na pankanawnawan manguman. Sinmabid pusok iray naaralan ko nipaakar ed si Jehova a Dios. Atalosan ko ya walay Amalsa ya manmamalasakit ed siak.—1 Pedro 5:6, 7.

Satan so amakiwas ed siak ya manguman. Singa bilang, nen naaralan ko so nipaakar ed sigarilyo, naisip ko, ‘No labay nen Jehova a Dios ya mansiansia ak ya malinis tan agnadutakan, nepeg ko sirin ya itunday panagsigarilyok!’ (2 Corinto 7:1) Kanian imbantak ko iratan!

Nepeg ko met ya itunday panguusar tan panlalakok na druga. Kaukolan so panaon tan sagpot ed satan. Pian nagawaan ko itan, nepeg kon paliisan iray datin kakaarok. Ag-ira makakatulong ed iyaaligwas kod espiritual. Asabi panaon, mas nanmatalek ak ed Dios tan ed tulong na balon kakaarok ed kongregasyon. Natan ko labat alikna so ontan ya panangaro tan personal ya interes. Kalabas na pigaran bulan, nitundak ya siansia so panag-druga tan ‘nansulong ak na balon personalidad,’ ya tinmulong ed siak pian napaliket koy Dios. (Efeso 4:24) Nen Agosto 1985, abautismoan ak bilang Tasi nen Jehova.

MARAKEP IRAN RESULTA

Lapud Biblia et nagmaliw ya balibali so bilay ko. Nibulos ak ed marutak ya kabibilay ya manederal ed laman tan dignidad ko. Diad tua, masulok ya 30 ed saray datin kakaarok so asakbay ya inatey lapud AIDS odino arum nin sakit ya nanaalad druga. Maong labat ta apaliisan ko ray ontan ya mauges ya resulta lapud inyaplikak iray prinsipyo na Biblia.

Agak la mangaawit natan na saray yuro tan wasay, aliwan singa nen bayolenti ak nin kabataan. Agkon balot naisip ya sakey agew et say Biblia lay sankaawit ko tan uusaren ko pian tulongan iray totoo. Natan, sikamin sanasawa et manlilingkor bilang full-time ya ministro na Saray Tasi nen Jehova.

Agnagmaliw ya Tasi nen Jehova iray ateng ko, pero aapresyaen da ray marakep ya resulta na impanaral koy Biblia. Diad tua, idedepensa ni ingen nen tatay ko iray Tasi nen Jehova ed arap na kakaaro to. Amta to ya lapud pananisiak et baleg so angumanan na bilay ko. Mabetbet ya ibabaga nen nanay kod siak ya mas asakbay ak la komon ya nanaral na Biblia. Duga si nanay ko!

Naaralan ko ed saray eksperiensyak ya anggapoy maabig ya niiter na druga tan arum nin bisyo. Natan et talagan maliket ak lapud nipapaamtak ed arum iray bangat ya walad Salita na Dios—saray bangat ya angiliktar ed bilay ko.