Onlad karga

UUMANEN NA BIBLIA SO BILAY

Anggapoy Direksion na Bilay Ko

Anggapoy Direksion na Bilay Ko
  • Taon na Inkiyanak: 1971

  • Bansa: Tonga

  • Apalabas: Adik ed druga, apriso

ISTORYAY BILAY KO

Say pamilyak et tagad Tonga, sakey a bansa ya walay manga 170 ya isla, diad southwestern Pacific. Simpli labat so bilay mi diad Tonga, anggapoy koryenti odino luluganan. Balet anggapoy problema mid danum, tan walay pigaran manok mi. Kada bakasyon, iibaan mi di kuyak tan agik so Tatay mi ya mantanem na ponti, kamoti, aba, tan kahoy. Akatulong iyan simplin anapan nen Tatay ko pian nasuportaan so pankaukolan na pamilya mi. Singa met ed arum ya tagad isla, baleg so respeto na pamilya mi ed Biblia, tan lanang kamin mimimisa. Balet, siansian manisia kami ya say paraan labat pian onasensoy bilay mi et no onalis kami pian mantrabaho ed sakey ya mayaman a bansa.

Nen 16 años ko, nanggaway paraan si Uncle ko pian makaonla tan manayam so pamilya mi ed California, U.S.A. Agaylay irap min nan-adjust ed kultura diman! Anggano inminawa lay bilay mi, mairap so bilay ed lugar ya nanayaman mi tan grabe iray nagagawan krimen tan kasmak so panagdruga. Lanang ya walay paltogan no labi, tan maslak ya kakaabay mi et natatakot ed saray gang. Maslak ya totoo et mangaawit na paltog pian protektaan so sarili da tan pian resolbien iray kolkolan. Anggad natan et wala ni atilak ya bala ed pagew ko lapud sakey ya kolkolan nensaman.

Nen high school ak, labay kon aligen iray arum ya kabataan. Kalkalna ya naaralan koy onlad saray magulon party, manbuanges, magmaliw ya bayolenti, tan mangusar na ilegal iran druga, ya anggad nagmaliw ak lan adik ed cocaine. Mantatakew ak pian makasaliw ak na druga. Anggano relihyoso iray kapamilyak, agda ak balot binilin ya paliisan so mauges iran kaulop pian agak makagaway mauges. Aminpiga ak ya inaresto lapud bayolenti iran ginawak. Anggapoy direksion na bilay ko! Ag-abayag, apriso ak.

NO PANON YA INUMAN NA BIBLIA SO BILAY KO

Sakey agew, nen 1997, legan ak ya walad prisoan, naimano na sakey nin priso ya walay awit kon Biblia. Krismas ed saman, maslak ya taga Tonga et ipapasen da itan ya sagrado. Tinepetan to ak no amtak so ibabaga na Biblia nipaakar ed inkiyanak nen Kristo, balet agko amta. Impanengneng to ed siak so simplin salaysay na Biblia nipaakar ed inkiyanak nen Jesus, tan anengneng ko ya dakdakel manayay tradisyon ya gagawaen no Krismas ya ag-abitlad Biblia. (Mateo 2:1-12; Lucas 2:5-14) Talagan abigla ak, tan inisip ko no anto ni ray arum ya ibabaga na Biblia. Sinimban onaatendi iman ya laki ed saray aral na Saray Tasi nen Jehova diad prisoan, kanian nandesisyon ak ya onatendi. Diad saman et pantotongtongan da so libro na Biblia ya Apocalipsis. Anggano daiset labat so natatalosan ko, amtak ya amin ya ibabangat da et nanlapud Biblia.

Nen inyopresi na saray Tasi ya iyaralan ak na Biblia, malikeliket kon inawat. Diad unonan pankanawnawa, naaralan kod Biblia so nipaakar ed promisa na Dios ya paraison dalin diad arapen. (Isaias 35:5-8) Alinewan ko ya pian napaliket koy Dios, kaukolan koy manggaway baleg iran pananguman ed bilay ko. Atalosan ko ya agak abuloyan nen Jehova a Dios ya manayam ed impromisa ton Paraiso no agko itunda iray bisyok. (1 Corinto 6:9, 10) Kanian determinado ak ya kontrolen ko lay sarilik pian agmipepetang so ulok, nitundak lay pansisigarilyok, tan agak lan balot manbuanges tan man-druga.

Nen 1999, antis ya nasumpal so sentensiak, inyalis ak na saray walad autoridad diad sananey nin prisoan ya parad saray immigrant. Masulok ya sakey taon ya anggapoy akatongtong kon Tasi. Balet determinado ak ya tuloytuloy ya manguman. Nen 2000, kinansela na gobierno so papeles ko ya mangiyaabuloy ed siak ya mansiansia diad United States, insan da ak pinasempet ed Tonga.

Kapawil kod Tonga, maseet kon inanap iray Tasi nen Jehova tan intuloy koy panaaral koy Biblia. Labalabay ko ray nanaaralan ko, tan pandinayewan ko iray Tasi ed isla ta ibabase da ed Biblia so amin ya ibabangat da, singa gagawaen met na saray Tasi ed United States.

Kabkabat si Tatay ko ed lugar mi ta atagey so posisyon to ed simbaan da. Kanian nen unaan et agnatalosan tan mansyodot iray kapamilyak lapud mimiulop ak ed Saray Tasi nen Jehova. Balet ag-abayag, manliket lanlamang iray atateng ko ta nanenengneng dan manguuman ak lapud iyaaplikak iray prinsipyo na Biblia.

Singa saray lalaki ed Tonga, sinimban dakel ya oras so uupoten ko ed kakainum na kava

Sakey ed saray sankairapan ya inuman kod sarilik et say kakainum ko na iinumen ya labalabay na saray totoo ed lugar mi. Sinimba ya dakel ya oras so uupoten na saray lalakin taga Tonga pian oninum na kava, sakey ya iinumen ya pampakalma ya nanlapud inlambong ya lamut na tanaman ya paminta. Natan ta akapawil ak lad bansa mi, apasalan koy nilabilabi lawarin onlad club ya paniinuman na kava, tan oniinum ak diman ya anggad naelew ak la. Say sakey nin makakaarum ed problema et say pipiulop kod saray kakaaron agda papablien iray estandarte na Biblia. Sinmabi panaon, atulongan ak ya natalosan ya nasasakitan koy Dios ed saray gagawaen ko. Pian bendisyonan tan abobonan ak na Dios, nanggawa ak na saray pananguman.

Ginapoan kon atendian so amin ya aral na Saray Tasi nen Jehova. Akatulong iyan pipiulop kod saray totoon gagawaen day anggaay nayarian dan paliketen so Dios pian nalabanan ko iray tukso. Nen 2002, abautismoan ak bilang sakey ed Saray Tasi nen Jehova.

MARAKEP IRAN RESULTA

Agunggonaan ak ed impan-anos na Dios a singa ibabaga na Biblia: “Si Jehova et . . . maan-anos ed sikayo ta agto labay a walay siopaman a naderal noagta labay to ya amin et naikday pankanawnawan magbabawi.” (2 Pedro 3:9) Diad tua, nensaman ni et sarasarag to pa lan panganggaen iyan mauges a daan ya sistema, balet inabuloyan to nin onlabas so panaon pian makapikaaro ed sikato iray totoon singa siak. Labalabay kon isipen ya diad tulong nen Jehova et sarag ko met ya tulongan so arum ya nakabat da.

Tinulongan ak nen Jehova ya nawalaan na direksion so bilay ko. Agak la mantatakew pian labat nagawaan koy makapatey ya bisyok. Imbes, tutulongan koy arum ya magmaliw met a kaaro nen Jehova. Diad pipiulop kod saray Tasi nen Jehova, akabat koy inar-arok ya asawa, si Tea. Walay melag nin anak min laki tan malikeliket so pamilya mi. Saniiba min ibabangat so arum nipaakar ed ibabaga na Biblia ya ilalo tayo ed arapen ya manbilay ya andi-anggaan diad mareen ya paraiso.