Setting ed pan-access

Manpili na Lenguahe

Onlad secondary menu

Onlad saray karga

Onlad karga

Saray Tasi nen Jehova

Pangasinan

Anto so Peteg ya Ibabangat na Biblia?

 KAPITULO 14

No Panon a Magmaliw ya Maliket so Pamilyam

No Panon a Magmaliw ya Maliket so Pamilyam
  • Panon ya say sakey et magmaliw a maong ya asawan laki?

  • Panon a nagawaan na asawan bii so betang to?

  • Panon ya say sakey et magmaliw a maong ya ateng?

  • Antoy nagawaan na ananak pian magmaliw a maliket so pamilya?

1. Antoy sekreto pian magmaliw a maliket so pamilya?

LABAY nen Jehova a Dios ya magmaliw a maliket so pamilyam. Mangiiter so Salita to, say Biblia, na saray giya parad amin ya membro na pamilya. Akadetalye ditan iray inter na Dios ya betang na kada sakey. No gawaen na kada membro na pamilya iray betang da base ed simbawa na Dios, seguradon maong so pansumpalan da. Imbaga nen Jesus: “Mas maliket iramay onderengel tan manusumpal ed salita na Dios!”Lucas 11:28.

2. Antoy manunan makatulong pian magmaliw ya maliket so pamilya?

2 Say manunan makatulong pian maliket so pamilya et no bidbiren tayon say pamilya et nanlapud si Jehova, samay tinawag nen Jesus ya “Ama” tayo. (Mateo 6:9) Amin a pamilya diad dalin et nanlapud Ama tayo, kanian seguradon amta to no panon ya magmaliw a maliket so pamilya. (Efeso 3:14, 15) Antoy ibabangat na Biblia nipaakar ed betang na kada membro na pamilya?

 SAY PAMILYA ET NANLAPUD DIOS

3. Antoy imbaga na Biblia nipaakar ed inggapo na pamilya, tan akin et segurado tayon tua so ibabaga na satan?

3 Ginawa nen Jehova so inmunan totoo, si Adan tan Eva, tan impankasakey to ra bilang asawan laki tan bii. Insan impanayam to rad marakdakep a paraiso diad dalin—say hardin na Eden—tan ingganggan to ra ya manpamilya. Imbaga nen Jehova: “Manbunga kayo tan manparakel kayo, pano yoy dalin.” (Genesis 1:26-28; 2:18, 21-24) Aliwa labat iyan is-istorya odino alamat, ta impanengneng nen Jesus ya tua so nabasad Genesis nipaakar ed inggapo na pamilya. (Mateo 19:4, 5) Anggano dakel so dadalanen tayon problema tan say bilay tayo natan et duma ed samay labay na Dios ya nagawa, nengnengen tayo no akin ya posible nin siansia ya magmaliw a maliket so pamilya.

4. (a) Pian magmaliw ya maliket so pamilya tayo, antoy nagawaan na kada sakey ed sikatayo? (b) Akin et magmaliw ya maliket so pamilya tayo no aligen tayoy impanbilay nen Jesus?

4 Makatulong so kada membro na pamilya ya magmaliw a maliket so pamilya ra no aligen day panangaro ya ipapanengneng na Dios. (Efeso 5:1, 2) Balet, panon tayon naalig so Dios anta agtayo nanengneng? Naaralan tayoy nipaakar ed si Jehova panamegley na panguloan ya Anak to ya imbaki to diad dalin. (Juan 1:14, 18) Nen wadiad dalin si Jesu-Kristo, inalig toy Ama to, kanian no say sakey et anengneng tan arengel toy Jesus, singa to met la anengneng tan arengel si Jehova. (Juan 14:9) No aralen tayo sirin so impanengneng nen Jesus ya panangaro tan aligen tayoy alimbawa to, walay nagawaan na kada sakey ed sikatayo pian lalon maliket so pamilya tayo.

PANGALIGAN NA ASAWAN LALAKI

5, 6. (a) Panon ya naalig na asawan lalaki so impantrato nen Jesus ed kongregasyon? (b) Antoy nepeg a gawaen pian naperdona iray kasalanan tayo?

5 Ibabaga na Biblia ya nepeg a tratoen na asawan lalaki so asawa da ya singa impantrato nen Jesus ed saray disipulo to. Imanom pa ‘yan bilin na Biblia: “Asawan lalaki, itultuloy yon aroen so kaasawaan yo, no panon a say Kristo et inaro to met so  kongregasyon tan inter toy sarili to parad satan . . . Diad ontan a paraan et nepeg ya aroen na saray asawan lalaki so kaasawaan da a singa ed dilin laman da. Say lakin mangaaro ed asawa to et mangaaro ed sarili to, ta anggapoy toon bubusolen toy dilin laman to, noag ingen papakanen tan papablien to itan, a singa gagawaen na Kristo ed kongregasyon.”Efeso 5:23, 25-29.

6 Say panangaro nen Jesus ed kongregasyon odino saray disipulo to et perpekton pangaligan na asawan lalaki. ‘Impanengneng nen Jesus so panangaro tod sikara anggad kasampotan,’ ya inter toy bilay to parad sikara, anggano aliwa ran perpekto. (Juan 13:1; 15:13) Mipadpara, oniay bilin ed asawan lalaki: “Itultuloy yon aroen so kaasawaan yo tan agkayo magmamaliw a mapaspasnok ed sikara.” (Colosas 3:19) Antoy makatulong ed asawan laki pian niyaplika to itan ya bilin, lalo la ta no maminsan et nalilingo met so asawa to? Kaukolan ton tandaan ya anggan sikato et nalilingo met. Tan kaukolan ton isipen ya pian sikatoy perdonaen na Dios, nepeg ton perdonaen iray nankasalanan ed sikato, kaiba lay asawa to. Siempre, ontan met so nepeg a gawaen na asawan bii. (Basaen so Mateo 6:12, 14, 15.) Kanian duga may ibabaga na arum ya pian magmaliw ya maliket so sanasawa, kaukolan ya akaparaan iran mamerdona ed sakey tan sakey.

7. Panon ya impanengneng nen Jesus so konsiderasyon, tan antoy naaralan na asawan lalaki ed satan?

7 Nepeg met ya tandaan na asawan lalaki ya naynay ya impanengneng nen Jesus so konsiderasyon ed saray disipulo to. Sankanonot to ray limitasyon da tan saray pankaukolan da. Singa bilang, nen naksawan la ra, oniay imbaga to: “Ti’la, ta onla itayo ed sakey a nisulinek a pasen pian makapanpainawa itayon magano.” (Marcos 6:30-32) Kanepegan met na asawan bibii so maaron konsiderasyon. Ibabaga na Biblia ya singa ra “mibebetag a pananginan” kanian ingganggan ed asawan lalaki ya “pagalangan” da ra. Akin? Lapud say asawan laki tan asawan bii et parehon walay “agnaparaan a regalon bilay” da. (1 Pedro 3:7) Kaukolan a tandaan na asawan lalaki ya say katooran na sakey a too so papablien na Dios, aliwan say pagmaliw ya laki odino bii.Salmo 101:6.

8. (a) Akin a nibagan say asawan laki ya “mangaaro ed asawa to et mangaaro ed sarili to”? (b) Antoy labay ya ibaga na pagmaliw a “sakey a laman” na asawan laki tan asawan bii?

 8 Ibabaga na Biblia a say asawan laki a “mangaaro ed asawa to et mangaaro ed sarili to.” Say rason et say asawan laki tan asawan bii et “aliwa la ran duara, noagta sakey a laman” a singa imbaga nen Jesus. (Mateo 19:6) Kanian no nipaakar ed seksual ya relasyon, nepeg ya matoor irad sakey tan sakey. (Proverbio 5:15-21; Hebreo 13:4) Nagawaan itan na sanasawa no iter day pankaukolan na balang sakey imbes ya say sarili da labat so sankanonot da. (1 Corinto 7:3-5) Importante ‘yan bilin: “Anggapoy toon bubusolen toy dilin laman to, noag ingen papakanen tan papablien to itan.” Kaukolan ya aroen na asawan lalaki so asawa ra a singa dilin laman da, ya tandaan dan walay eebatan dad ulo ra, si Jesu-Kristo.Efeso 5:29; 1 Corinto 11:3.

9. Anton kualidad nen Jesus so abitlad Filipos 1:8, tan akin et kaukolan ya ipanengneng na asawan lalaki iyan kualidad ed asawa ra?

9 Imbaga nen apostol Pablo so nipaakar ed “panamabli nen Kristo Jesus.” (Filipos 1:8) Balibali itan ya kualidad nen Jesus, tan labalabay itan na saray bibiin nagmaliw a disipulo to. (Juan 20:1, 11-13, 16) Labalabay met na asawan bibii ya pablien tan aroen ira na kaasawaan da.

PANGALIGAN NA ASAWAN BIBII

10. Antoy impanengneng nen Jesus ya alimbawa ya aligen na asawan bibii?

10 Say pamilya et sakey ya organisasyon, tan kaukolan so sakey ya ulo pian mauksoy itan. Anggan si Jesus et walay pampapasakopan ton Ulo. ‘Say ulo na Kristo et say Dios, tan say ulo na bii et say laki.’ (1 Corinto 11:3) Say pampapasakop nen Jesus ed inkaulo na Dios et balibalin aligen lapud amin tayo et walay nepeg tayon pampasakopan.

11. Anton ugali so nepeg ya ipanengneng na asawan bii ed asawa to, tan antoy nayarin epekto na satan?

11 Aliwan perpekto so asawan laki kanian nalilingo met, tan no maminsan et wala ray aliwan maabig ya ulo ed pamilya. Anto sirin so nepeg a gawaen na asawan bii? Agto nepeg ya melmelagen so nagagawaan na asawa to odino samsamen  so inkaulo na asawa to. Kaukolan ya tandaan na asawan bii ya diad pakanengneng na Dios et importantin sikatoy mareen tan mauyamo. (1 Pedro 3:4) No ipanengneng to itan, mainomay toy manpasakop, anggan diad mairap iran situasyon. Sakey ni, ibabaga na Biblia: “Say asawan bii et nepeg a walaan na aralem a respeto ed asawa to.” (Efeso 5:33) Balet panon to no say asawa to et agto awaten si Kristo bilang Ulo to? Bibilinen na Biblia iray asawan bibii: “Sikayo ran asawan bibii, manpasakop kayo ed asawa yo, pian no wala ray aliwan matulok ed salita, nayarin natangguyor ira ed kagagawa yo anggano agkayo mansalita, ta nanenengneng day maabig a kagagawa yo ya atekepan na aralem a respeto.”1 Pedro 3:1, 2.

12. Akin ya agmet mauges no marespeton ibaga na asawan bii so opinyon to?

12 Mandadayew man ed si Jehova so asawa to odino andi, siansian nipanengneng na asawan bii so respeto ed asawa to no marespeto ton ibagay opinyon to anggano duma itan ed iisipen na asawa to. Ompan duga so opinyon na asawan bii, tan pankaabigan na interon pamilya no dengelen na asawa to. Anggano aglabay nen Abraham so praktikal a suhestion nen asawa ton si Sara ed problema na pamilya da, oniay imbaga na Dios ed si Abraham: “Dengel ka ed sikato.” (Basaen so Genesis 21:9-12.) Siempre, no say desisyon na asawan laki et agmet kontra ed ganggan na Dios, manpasakop so asawan bii tan suportaan to itan.Gawa 5:29; Efeso 5:24.

Panon ya impanengneng nen Sara so maong ya alimbawa parad asawan bibii?

13. (a) Antoy ibibilin na Tito 2:4, 5 ya gawaen na asawan bibii? (b) Antoy ibabaga na Biblia nipaakar ed pansian tan pandiborsyo?

13 No susumpalen na asawan bii so betang to, baleg so nagawaan to pian naasikasoy pamilya to. Singa bilang, ibabaga na Biblia ya nepeg ya ‘aroen na asawan bibii so kaasawaan da, aroen day ananak da, magmaliw a limpioy kanonotan da, masimpit ira, mankimey ira diad abung, maong ira, manpasakop irad kaasawaan da.’ (Tito 2:4, 5) No ontan so gagawaen na asawan bii tan ina, sikatoy ar-aroen tan respetoen na pamilya to. (Basaen so Proverbio 31:10, 28.) Balet, lapud anggapoy perpekton sanasawa, wala ray mair-irap ya situasyon ya nayarin  manresulta ed pansian odino pandiborsyo. Wala labat iray pigaran situasyon ya iyaabuloy na Biblia so pansian. Balet, aliwan ludlurey so pansian, ta igaganggan na Biblia: “Say asawan bii et nepeg ya agmisian ed asawa to . . . , tan say asawan laki et nepeg ya agto taynanan so asawa to.” (1 Corinto 7:10, 11) Tan ibabaga na Biblia ya say saksakey ya rason a nayarin mandiborsyo so sanasawa et say seksual ya imoralidad.Mateo 19:9.

PERPEKTON PANGALIGAN NA ATATENG

14. Panon so impantrato nen Jesus ed saray ugugaw, tan antoy kaukolan na ananak ed atateng da?

14 Impanengneng nen Jesus so perpekton pangaligan na atateng no panon dan tratoen iray ananak da. Nen babanoen na arum iray ugugaw ya onasingger ed si Jesus, oniay imbaga to: “Paulyan yo ray ugugaw ya onasingger ed siak. Agyo ra aamperen.” Insan imbaga na Biblia ya “nilalakap to ray ugugaw tan benendisyonan to ra, ya intapew toy lima tod sikara.” (Marcos 10:13-16) Inikdan nen Jesus na panaon tan atension iray ugugaw. Agta ontan met so kaukolan mon gawaen ed mismon ananak mo? Kaukolan day dakel a panaon mo, aliwa labat ya daiset. Kaukolan ya ipanaon moy pambangat ed sikara, ta igaganggan itan nen Jehova ed saray atateng.Basaen so Deuteronomio 6:4-9.

15. Antoy nagawaan na atateng pian naprotektaan iray anak da?

 15 Lapud lalon onuuges iyan mundo, kaukolan na ananak ya protektaan ira na atateng da ed saray totoon nayarin manbiktima ed sikara, singa bilang diad seksual a paraan. Imanoen pay impanprotekta nen Jesus ed saray disipulo to, ya maar-aro ton tinawag ya “ananak.” Nen inaresto tan pateyen lay Jesus, nanggaway paraan pian makabatik iray disipulo to. (Juan 13:33; 18:7-9) Bilang ateng, kaukolan ya alerto kad saray gagawaen na Diablo ya biktimaen iray ugugaw nin anak mo. Kaukolan ya natan ni labat et bilinen mo la ra. * (1 Pedro 5:8) Mas grabe natan so peligro kanian kaukolan mon protektaay pisikal, espiritual, tan moralidad da.

Antoy naaralan na atateng ed impantrato nen Jesus ed ugugaw?

16. Antoy naaralan na atateng ed ginawa nen Jesus anggano wala ray kakapuyan na saray disipulo to?

 16 Diad samay labi antis na impatey nen Jesus, naneebatan iray disipulo to no siopay sankamaongan ed sikara. Balet imbes a pampasnokan ira nen Jesus, maar-aro to ran imbangat diad salita tan gawa. (Lucas 22:24-27; Juan 13:3-8) No sakey kan ateng, naalig mo kasi alimbawa nen Jesus no bibilinen mo ray ananak mo? Tua, kaukolan day disiplina, balet nepeg ya “dugaruga labat” tan anggapoy kaiba ton pasnok. Seguradon agka bastabasta mansalitay ansakit ya “singa saray saksak na espada.” (Jeremias 30:11; Proverbio 12:18) Nepeg mon disiplinaen iray anak mo diad paraan ya natalosan da ya talagan kaukolan da itan.Efeso 6:4; Hebreo 12:9-11.

PANGALIGAN NA ANANAK

17. Panon ya angiter si Jesus na perpekton pangaligan parad saray ananak?

17 Wala kasi naaralan na ananak ed si Jesus? On, wala! Impanengneng a mismo nen Jesus no panon ya unoren na ananak so atateng da. Imbaga to: “Sasalitaen ko no anto ray imbangat ed siak na Ama.” Insan to imbaga: “Naynay kon gagawaen iray makapaliket ed sikato.” (Juan 8:28, 29) Matulok si Jesus ed Ama ton walad tawen, tan ibabaga na Biblia a nepeg ya unoren na ananak so atateng da. (Basaen so Efeso 6:1-3.) Anggano perpekton ugaw si Jesus, inunor toy aliwan perpekton atateng ton si Jose tan Maria. Kanian seguradon maliket so interon pamilya nen Jesus!Lucas 2:4, 5, 51, 52.

18. Akin et naynay ya inunor nen Jesus so Ama ton walad tawen, tan siopay manliket no unoren na ananak so atateng da?

18 Panon ya mas naalig na ananak si Jesus pian napaliket day atateng da? Tua, no maminsan et nayarin nairapan iray kabataan ya unoren so atateng da, balet atan so labay na Dios ya gawaen da. (Proverbio 1:8; 6:20) Naynay ya uunoren nen Jesus so Ama ton walad tawen, anggan diad mair-irap a situasyon. Aminsan, nen walay mair-irap ya pagagawa na Dios ed si Jesus, oniay imbaga to: “Ekal mod siak iyan kopa [sakey ya espisipikon ipapagawad sikato].” Balet, siansian ginawa nen Jesus so  ingganggan na Dios, ta kombinsidon amta na Ama to so sankaabigan parad sikato. (Lucas 22:42) No aralen na ananak so magmaliw ya maunor, napaliket dan maong so atateng da tan say Ama rad tawen, si Jehova. *Proverbio 23:22-25.

Antoy nepeg ya isipen na saray kabataan no tutuksoen da ran manggaway makapuy?

19. (a) Panon ya tutuksoen nen Satanas so ananak? (b) Antoy nalikna na atateng no manggaway mauges so ananak da?

19 Tinukso na Diablo si Jesus, kanian seguradon tuksoen to met iray kabataan pian manggawa na mauges. (Mateo 4:1-10) Uusaren nen Satanas a Diablo so mauges ya impluensya na arum, tan nayarin mairap itan. Importante sirin ya agmiuulop so ananak ed saray manggagaway mauges! (1 Corinto 15:33) Si Dina ya anak nen Jacob et akiulop ed saray agmandadayew ed si Jehova, kanian nanresulta itan ed dakel a problema. (Genesis 34:1, 2) Seguradon ansakisakit na interon pamilya no walay kapamilya dan akagaway seksual ya imoralidad!Proverbio 17:21, 25.

SEKRETO NA MALIKET YA PAMILYA

20. Pian magmaliw ya maliket so pamilya, antoy nepeg a gawaen na kada membro na pamilya?

20 Mainomay ya nasarag iray problema na pamilya no  iyaaplika day simbawa ed Biblia. Diad tua, no iyaplika iratan ya simbawa, magmaliw ya maliket so pamilya. Kanian asawan lalaki, aro yoy asawa yo, tan trato yo ra a singa ed impantrato nen Jesus ed kongregasyon to. Asawan bibii, manpasakop kayo ed inkaulo na asawa yo, tan alig yoy alimbawa na samay asawan bii ya nabasad Proverbio 31:10-31. Atateng, ipasal yo ray ananak yo. (Proverbio 22:6) Kaamaan, ‘idaulo yoy dilin sankaabungan yo.’ (1 Timoteo 3:4, 5; 5:8) Tan ananak, unor yo ray atateng yo. (Colosas 3:20) Anggapoy perpekton pamilya, ta amin et nalilingo. Kanian kaukolan ya manpaabeba tan manpeperdonaan so sakey tan sakey.

21. Anto ray balibalin nagawad arapen, tan panon a magmaliw ya maliket so pamilya tayo natan?

21 On, walad Biblia iray dakerakel a makatulong ya simbawa tan bilin parad pamilya. Sakey ni, ibabangat na satan ed sikatayo so nipaakar ed balon mundo nen Jehova a Dios tan say paraison dalin ya panayaman na maliket a totoon mandadayew ed sikato. (Apocalipsis 21:3, 4) Talagan balibali nagawad arapen! Balet natan ni labat et nayarin magmaliw lan maliket so pamilya tayo no unoren tayo ray bilin na Dios ya walad Salita to, say Biblia.

^ par. 15 Pian naprotektaan so ananak, makatulong so kapitulo 32 na libron Manaral Manlapud Sankamaongan a Managbangat, ya im-publish na Saray Tasi nen Jehova.

^ par. 18 No walay iganggan na ateng ed anak ya kontrad ganggan na Dios, diad satan labat ag-ontulok so anak ed ateng to.Gawa 5:29.

Manaral Ni

Anto Ita’y Panagdayew na Pamilya?

Amtaen no panon ya ontulong itan pian lalo kayon onapit ed Dios tan mas onapit ed sakey tan sakey.