Walay Pag-asa ya Ondakep so Bilay Tayod Arapen
Parad sika, ondakep ni kasi situasyon tayo? Anggano wala ray mairap ya probleman aarapen tayo natan, dakel nin siansiay agnaeekalan na pag-asa ya ondakep so situasyon tayo. Pero duga kasin ontan so isipen tayo? On! Iikdan itayo na Biblia na pag-asa ya ondakep so bilay tayod arapen.
Anton pag-asa so iiter na Biblia?
Ibabaga na Biblia ya dakel so probleman arapen na totoo. Pero, isisipan na satan ya mangangga lanlamang irayan problema. Imanoen irayan alimbawa.
Problema: Anggapoy ayaman
No antoy ibabaga na Biblia: “Mangipaalagey ira na kaabungan tan manayam ira ditan.”—Isaias 65:21.
No antoy nagawad arapen: Saray totoo et nawalaan na sarili dan abung.
Problema: Anggapoy trabaho tan kairapan
No antoy ibabaga na Biblia: “Sigpot a panliketan na saray pinilik so kimey na saray lima ra.”—Isaias 65:22.
No antoy nagawad arapen: Amin ya totoo et nawalaan na makapaliket tan aga makapasawan kimey.
Problema: Ag-inkahustisya
No antoy ibabaga na Biblia: “Saray prinsipe so manuley parad inkahustisya.”—Isaias 32:1.
No antoy nagawad arapen: Anggapo lay naagrabiado lapud lahi odino kipapasen ed bilay, tan anggapo lay mairap. Patas so pantrato ed amin.
Problema: Malnutrisyon tan eras
No antoy ibabaga na Biblia: “Dakdakel so anien ya ilik diad dalin; Say toktok na kapalandeyan et napanopano.”—Salmo 72:16.
No antoy nagawad arapen: Walay dakdakel tan masustansian naakan parad amin. Anggapo lay naerasan odino onkulang ed nutrisyon.
Problema: Krimen tan inkaruksa
No antoy ibabaga na Biblia: “Onyurong so balang sakey diad silong na ubas to tan diad silong na kiew ton igos, tan anggapoy manaktakot ed sikara.”—Miqueas 4:4.
No antoy nagawad arapen: Naandi lay takot tan paga ta anggapo la ray mauges ya totoo tan “saray matunong et tawiren day dalin.”—Salmo 37:10, 29.
Problema: Guerra
No antoy ibabaga na Biblia: “Anggapo lay nasyon a mangitagey na espada sumpad sananey a nasyon, agmet la ra manaral a miguerra.”—Isaias 2:4.
No antoy nagawad arapen: Niwalay kareenan ed interon mundo. (Salmo 72:7) Anggapo lay manermen ta inatey so inad-aro tod bilay lapud guerra odino onalis-alis na ayaman lapud guerra.
Problema: Sakit tan kapansanan
No antoy ibabaga na Biblia: “Anggapoy manaayam ditan a mangibagay: ‘Mansasakit ak.’”—Isaias 33:24.
No antoy nagawad arapen: Naandi la ray sakit odino kapansanan. (Isaias 35:5, 6) Isisipan ni ingen na Biblia ya “anggapo lay patey.”—Apocalipsis 21:4.
Problema: Aderal ya kalikasan
No antoy ibabaga na Biblia: “Manliket so kalawakan tan say amagaan a dalin, tan manggayaga so patar a desierto tan manrosas a singa safron.”—Isaias 35:1.
No antoy nagawad arapen: Say interon dalin et magmaliw ya paraiso ya panayaman, ya singa inggagala na Dios parad totoo.—Genesis 2:15; Isaias 45:18.
Posible kasin nagawa iray sipan na Biblia?
Nayarin mairap mon panisiaan ya nagawa iray sipan na Biblia. Pero, makatulong no aralen mo nin maong no antoy ibabaga na satan ya nagawad arapen. Akin? Lapud saray sipan ya walad Biblia et duman maong ed sipan tan prediksion na totoo. Nanlapud Dios iray sipan ya walad Biblia. Nia ray rason no akin ya duma iray sipan na Dios:
Napantiwalaan so Dios. Ibabaga na Biblia ya say Dios et “agto nayarian so mantila.” (Tito 1:2) Sakey ni, say Dios labat so makapangibaga na nagawa diad arapen. (Isaias 46:10) Nabasad Biblia iray dakel ya alimbawa ya no walay imbaga na Dios et naynay iratan ya nagagawa. Parad kaaruman ya impormasyon, bantayan so video ya Panon Tayon Naseguro ya Tua so Biblia?
Walay pakayari na Dios ya solusyonan iray problema. Ibabaga na Biblia ya walay pakayari na Dios ya gawaen so “amin a panliliketan ton gawaen.” (Salmo 135:5, 6) Labay ton ibaga, anggapoy makaamper ed Dios ya sumpalen iray sipan to. Ontan met, labay itayon tulongan na Dios ta inaro to tayo.—Juan 3:16.
Nayarin nitepet mo, ‘No labay na Dios ya tulongan itayo tan walay pakayari ton gawaen itan, akin balet et dakel nin siansia iray problema tayo?’ Pian naebatan itan, bantayan so video ya Akin et Aabuloyan na Dios so Paniirap?
Panon ya nagawa iyan sipan?
Usaren na Dios so Panarian to, sakey a gobierno ed tawen, pian sumpalen iray sipan to. Tinuro ton Manuley ed satan ya Panarian si Jesu-Kristo, tan inikdan to na pakauley ya asikasoen so dalin tan saray totoo. Nen wadiad dalin si Jesus, pinaabig to iray mansasakit, pinakan to iray narasan, pinatunda toy bagyo, tan wala ray inatey ya binilay to. (Marcos 4:39; 6:41-44; Lucas 4:40; Juan 11:43, 44) Impanengneng to no antoy gawaen to bilang Ari na Panarian na Dios.
Bantayan so video ya Anto so Panarian na Dios? pian naaralan no panon kan minabang ed Panarian na Dios.
Kapigan nagawa iyan sipan?
Asingger la! Panon tayon makaseguro? Impasakbay na Biblia iray tanda ya magano lan manuley so Panarian na Dios diad interon dalin. (Lucas 21:10, 11) Nanenengneng tayo lan nagagawa iratan ya impasakbay na Biblia.
Pian naaruman ni antam, basaen so artikulon “Kapigan Uleyan na Panarian na Dios so Dalin?”
Panon ya makatulong ed sikatayo natan iray sipan na Biblia?
Inkompara na sakey ya managsulat iray sipan na Biblia ed “angkla na kamarerwa.” (Hebreo 6:19) No panon ya say angkla et pansiasiansiaen ton mareen so barko legan na bagyo, saray sipan na Biblia et ontulong ed sikatayon nasarag iray probleman aarapen tayo. Ontan met, makatulong iray sipan na Biblia pian naprotektaan tayoy emosyon, panagnonot, tan anggan say pisikal ya laman tayo.—1 Tesalonica 5:8.
Ompan Nagustoan Mo Met
SAY PANAG-BANTAYAN
Antoy Gawaen na Panarian na Dios?
Amta nen Jesus ya say Panarian na Dios labat so gobierno ya manresolbe ed saray problema diad dalin. Anto lay agawaan na Panarian pian pantiwalaan tayo itan?
ONLIING!
Say Dalan na Maliket ya Kabibilay—Ilalo
Dakel so agmaliket lapud ag-ira segurado ed arapen da tan na saray inaro dad bilay.
SAY PANAG-BANTAYAN
Ekalen La na Dios so Amin ya Paniirap
Panon tayon naamtaan ya magano lan onkiwas so Dios pian panampoten so amin ya paniirap tan ag-inkahustisya?
SAY PANAG-BANTAYAN
Panarian na Dios—Gobierno ya Anggapoy Kurapsion
Ipapaseguro na anemiran aspekto na Panarian ya anggapoy kurapsion ditan.
