Onlad karga

Onlad saray karga

Asawan Lalaki—Gawaen ya Maligen so Abung Yo

Asawan Lalaki—Gawaen ya Maligen so Abung Yo

ANTON seguridad so nepeg ya itarya na laki ed asawa to? Iisipen na dakel a totoo ya say manunan responsabilidad na asawan laki et gawaen ya mainaway bilay na pamilya to. Balet wala ray asawan bibii ya anggano dakel so materyal ya kayarian da, siansia nin aliwan maligen so liknaan da, natatakot ni ra ingen. Oniay inkuan na sakey ya biin Spanish ya si Rosa nipaakar ed lakin akiasawaan to: “No diad arum et maomaong, diad abung balet et mapaspasnok ya asawa.” Oniay inamin nen Joy ya tagad Nigeria, “No agak mipaknad asawak bagaan to ak ya, ‘Gawam so amin ya ibagak ta asawa mo ak.’”

Panon ya nagawaan na laki so papel to bilang asawa diad maaron paraan? Antoy kaukolan ya gawaen na asawan laki pian say abung to et magmaliw ya maligen, ya ‘pakaromogay painawa’ na asawa to?Rut 1:9.

NO ANTOY IBABAGA NA BIBLIA ED AUTORIDAD NA ASAWAN LAKI

Anggaman diad pakanengneng na Dios et anggapoy mas atagey ed sanasawa, ibabaga na Biblia ya walay nandumaan ya papel dad pamilya. Ibabaga na Roma 7:2 ya say biin walaay asawa et nepeg ya onunor ed “ganggan na asawa to.” Singa met ed dakel ya organisasyon ya walay pipilien dan mangidaulo ed kimey da, pinili na Dios so asawan laki ya magmaliw ya ulo na asawa to. (1 Corinto 11:3) Nepeg ya idaulo na asawan laki so pamilya to.

Bilang asawan laki, panon mon usaren so autoridad ya inter na Dios ed sika? “Itultuloy yon aroen so kaasawaan yo,” so kuan na Biblia, “no panon a say Kristo et inaro to met so kongregasyon.” (Efeso 5:25) Anggaman ag-angasaway Jesu-Kristo, makatulong so alimbawa to pian magmaliw kan maong ya asawa. Nengnengen tayo no panon.

BILAY NEN JESUS—PERPEKTON ALIMBAWA PARAD ASAWAN LALAKI

Niligliwa tan tinulongan nen Jesus so arum. Insipan nen Jesus ed amin ya nalalames tan nabebelatan ed saray problema da: “Dago kayod siak, . . . tan pampainawaen ta kayo.” (Mateo 11:28, 29) Tinulongan to ran nainawaan ed saray paniirap da tan tinulongan to ran onapit ed Dios. Agla pankelawan no akin ya dakel so inmapit ed si Jesus ta seguradon nalemewan ira!

 No panon ya naalig na asawan lalaki si Jesus. Mananap na paraan pian nalemewan so asawam ed saray kimey to. Wala ray asawan bibii ya say liknaan da et singa ed si Rosa, ya maermen ya angibagan: “Singa ak labat katulong nen asawak.” Duma balet ed si Kweku, ya asawan laki ya maliket so bilay dan sanasawa: “Tetepetan kon naynay so asawak no panon kon natulongan. Lapud inarok, mabetbet ya siak lay manboboluntaryon ontulong ed saray kimey ed abung.”

Makonsidera tan makasi si Jesus. Walay sakey a bii ya 12 taon lan papairapen na sakit to. Nen arengelan toy pakayari nen Jesus ya mantambal, “naynay ton ibabaga: ‘No nadiwit ko labat so kawes to, onabig ak la.’” Ag-alingo! Inmasingger tan diniwit toy saloy na kawes nen Jesus, insan inmabig ya tampol. Nayarin inisip na arum ya akanengneng ya ag-onuunor ed ganggan iyan bii, balet amta nen Jesus ya say labay to labat et onabig. * Maaro ton imbagad  bii ya: “Ana’ko, . . . onabig ka la ed makapairap a sakit mo.” Agto pinabaingan o nampasnokan tan impanengneng ton natatalosan toy paniirap to. Pinaneknekan ton sikatoy mapangasin laki.Marcos 5:25-34.

No panon ya naalig na asawan lalaki si Jesus. No aliwliway liknaan na asawa yo, ipanengneng yoy konsiderasyon tan magmaliw ya maanos. Talosan yoy liknaan tan reaksion to. Singa bilang, impaliwawa nen Ricardo, “No naimanok ya masyadon sensitiboy asawak, maal-alwar ak pian agak makapangibaga na antokaman ya mamaloor ed nalilikna to.”

Akitongtong si Jesus ed saray disipulo to. Naynay ya mitotongtong si Jesus ed saray kakaaro to. “Impaamtak lad sikayo so amin a nadngel kod Amak,” so kuan to. (Juan 15:15) Tua ya no maminsan et labay nen Jesus so manbukbukor pian manisip tan manpikasi. Balet mabetbet ton ibabagay nalilikna tod saray disipulo to. Diad samay labi antis dan pinatey a singa sakey a kriminal, imbaga tod sikara ya sikatoy ‘maer-ermen.’ (Mateo 26:38) Anggan nen adismayad ginawa ra, siansia nin akitongtong si Jesus ed sikara.Mateo 26:40, 41.

Say pannonot ed alimbawa nen Jesus et makatulong ed sakey a laki ya magmaliw a mas maong ya asawa tan ama

No panon ya naalig na asawan lalaki si Jesus. Ibagam ed asawam iray iisipen tan naliliknam. Nayarin manreklamoy asawan bii ya say asawa to et maong ya mitongtong ed arum, balet diad abung da et ag-oneesel. Duma balet ed si Ana, ya oniay kuan to no ibabaga na asawa to so nalilikna tan iisipen to: “Naliliknak ya talagan inar-aro to ak, tan maap-apit ak ed sikato.”

Agmanpapareen pian dusaen so asawam. “No mamapasnok ed siak so mister ko,” so kuan na sakey a bii, “pigay agew ya agto ak katongtongen. Ipalikna tod siak ya walay kasalanan ko tan singa kabkabusol to ak.” Si Edwin balet et pansasagpotan ton aligen so alimbawa nen Jesus. “No nasyosyodotan ak, agak ni mansalitan tampol, balet manaanap ak na dugan panaon pian makapantongtong kami.”

Anengneng nen Joy ya abitlad gapo so impanguman na asawa to nen iyaaralan lay Biblia na saray Tasi nen Jehova. Imbaga to ya, “Anguman la tan talagan mansasagpot ya magmaliw ya maong ya asawa diad pangaalig tod si Jesus.” Minilyon ya sanasawa so minanabang ed saray bilin ed Biblia. Labay mo met so minabang? Sarag mon ibaga ed sakey ya Tasi nen Jehova ya iyaralan da kay Biblia ya libre.

^ par. 10 Diad Mosaikon Ganggan, marutak imay bii lapud kipapasen to, tan siopaman ya diwiten to et magmaliw ya agmalinis.Levitico 15:19, 25.