Onlad karga

Onlad saray karga

 MANUNAN ARTIKULO | SARAY KATILAAN NIPAAKAR ED DIOS

Katilaan 1: Anggapoy Ngaran na Dios

Katilaan 1: Anggapoy Ngaran na Dios

SAY SISIAEN NA DAKEL

“Agkami makapanpakna no kasin walay ngaran na Dios, tan no bilang wala, anto kasi itan?”—Professor David Cunningham, Theological Studies.

SAY KATUAAN MANLAPUD BIBLIA

Imbaga na Dios: “Siak si Jehova, satan so ngaran ko.” (Isaias 42:8) Say labay ya ibaga na Hebreon ngaran ya Jehova et “Pagmaliwen To.”Genesis 2:4.

Labay nen Jehova ya usaren tayoy ngaran to. Oniay ibabaga na Biblia: ‘Tawag yo so ngaran to, ipaliwawa yo so saray gawa to ed nanleleetan na balbaley, uliten yo pian say ngaran to nitandoro.’Isaias 12:4.

Inusar nen Jesus so ngaran na Dios. Oniay impikasi tod si Jehova: “Impakabat ko ed sikara [saray disipulo nen Jesus] so ngaran mo tan ipakabat ko itan.” Akin et impakabat nen Jesus so ngaran na Dios ed saray disipulo to? Intuloy to: “Ta pian nipatnag da met so aro ya impatnag mo [say Dios] ed siak tan mikasakey ak ed sikara.”Juan 17:26.

NO AKIN YA IMPORTANTIN PANNONOTAN

“Say toon agto amtay ngaran na Dios et agton talaga kabat so Dios bilang sakey a persona, tan agto naaro no say pakaamta to et sakey labat a puersa, aliwan persona,” so insulat na sakey a theologian ya si Walter Lowrie.

Si Victor et sinimban mimimisa, balet agton balot alikna ya kabat toy Dios. “Insan naamtaan ko ya say ngaran na Dios et Jehova, diad saman et singa kami pormal ya nankabat,” so kuan to. “Akabat kon siansia imay Sakey ya dakel lay arengel ko nipaakar ed sikato. Diad saman ko labat akabat so Dios bilang tuan Persona tan nagmaliw ya kaarok.”

Say pangiyamot odino pansalat ed personal a ngaran na Dios et singa pangekal ed satan diad Biblia

Onapit met si Jehova ed saray manguusar ed ngaran to. Diad ‘saramay mannononot ed ngaran to,’ oniay promisa na Dios: ‘Iyansakit ko ra naani, singa sakey a toon iyansakit toy dili ya anak to a laki a manlilingkor ed sikato.’ (Malaquias 3:16, 17) Bendisyonan met na Dios iramay ontatawag ed ngaran to. Ibabaga na Biblia ya “balang sakey ya ontatawag ed ngaran nen Jehova et nilaban.”Roma 10:13.