Onlad karga

Onlad saray karga

Jesu-Kristo—Saray Ebat ed Saray Tepet Tayo

Jesu-Kristo—Saray Ebat ed Saray Tepet Tayo

 Jesu-Kristo​—Saray Ebat ed Saray Tepet Tayo

“Siopa ak, unong ed ibabaga na totoo?”​—LUCAS 9:18.

INTEPET itan nen Jesus ed saray disipulo to lapud amta ton nandurumay opinyon na totoo nipaakar ed sikato. Ingen, anggapoy rason a manduaruwa rad sikato. Ag-imbiig nen Jesus so sarili to tan agnanggaway bengatlan maamot. Imbes, sikatoy akilimog ed amin a totoo. Sikatoy nampulong tan nambangat lapud labay ton naamtaan na totoo so katuaan nipaakar ed sikato.​—Lucas 8:1.

Naamtaan tayoy katuaan nipaakar ed si Jesus diad panamegley na saray salita tan kiwas to ya akasulat ed apatiran Ebanghelyo na Biblia​—Mateo, Marcos, Lucas, tan Juan. Sarayan pinuyanan na Dios a sulsulat so pangalaan na ebat ed saray tepet tayo nipaakar ed si Jesus. *​—Juan 17:17.

 TEPET: Talaga kasin nambilay si Jesus nensaman?

EBAT: On. Imbaga na saray historian nen inmunan siglo a singa di Josephus tan Tacitus, a talagan nambilay si Jesus nensaman. Nagkalalo ed amin, pinaneknekan na saray Ebanghelyo a si Jesus et tuan persona, aliwan is-istorya labat. Espisipiko tan detalyadon akasulat ditan iray petsa tan lugar ya akagawaan na saray salaysay. Singa bilang, binitla nen Lucas, sakey ed saray nansulat na Ebanghelyo so kangaranan na pitoran opisyal​—ya pinaneknekan met na saray historian—​pian naamtaan no kapigan so inggapo nen Jesus ed ministeryo to.​—Lucas 3:1, 2, 23.

Makakombinse iray ebidensya a talagan nambilay si Jesus nensaman. Oniay ibabaga na libron Evidence for the Historical Jesus: “Aminen na maslak ya iskolar a say toon akabat bilang Jesus a Nazareno et nambilay nen inmunan siglo.”

TEPET: Kasin si Jesus so Dios?

EBAT: Andi. Ag-anggan inisip nen Jesus a sikatoy mipara ed Dios. Imbes, aminpigan impatnag nen Jesus so panagpasakop tod si Jehova. * Alimbawa, tinawag nen Jesus si Jehova bilang “Dios ko” tan “say saksakey a tuan Dios.” (Mateo 27:46; Juan 17:3) Saratan a balikas et usaren labat na sakey no say tutukoyen to et mas atagtagey nen say sikato. Say panawag na trabahador ed amo ton “boss ko” et mangipapanengneng ya bibidbiren ton mas abebay posisyon to.

Impanengneng met nen Jesus ya sikato tan say Dios et aliwan saksakey a persona. Oniay imbaga nen Jesus ed saray onsusumpad autoridad to: “Nisulat ed mismon Ganggan yo, ‘Say pantasi na duaran too et tua.’ Tatasian koy inkasiak, tan tatasian ak met na Ama ya angibaki ed siak.” (Juan 8:17, 18) Malinew sirin a si Jesus tan si Jehova et aliwan saksakey a persona. Ta no andi, panon a nibagan duara iran tasi? *

TEPET: Kasin si Jesus et sakey labat a maong a too?

EBAT: Andi, mas ni nen satan. Amta nen Jesus a sikatoy walaan na dakel ya importantin betang diad panumpal na linawa na Dios. Nia so pigara ed saratan:

“Bogbogtong ya Anak na Dios.” (Juan 3:18) Amta nen Jesus so nanlapuan to. Sikatoy abayag lan manbibilay antis nin nianak diad dalin. Imbaga ton sikatoy ‘linmeksab manlapud tawen.’ (Juan 6:38) Si Jesus so inmunan pinalsa na Dios, tan sikatoy tinmulong diad impamalsa na amin a bengatla. Lapud sikatoy alenleneg a direktan pinalsa na Dios, manepeg labat sirin a sikatoy natawag a “bogbogtong ya Anak na Dios.”​—Juan 1:3, 14; Colosas 1:15, 16.

“Anak na too.” (Mateo 8:20) Aminpigan tinawag nen Jesus so sarili ton “Anak na too,” tan inusar to itan a balikas a manga 80 danay ed saray Ebanghelyo. Ipapatnag na sayan balikas ya sikatoy peteg a too tan aliwan Dios a nagmaliw ya too. Panon a nianak bilang too iyan bogbogtong ya Anak na Dios? Diad panamegley  na masanton espiritu, inyalis nen Jehova so bilay na Anak to diad panag-anakan nen Maria, sakey ya Judion birhen. Kanian si Jesus et nianak ya perpekto.​—Mateo 1:18; Lucas 1:35; Juan 8:46.

“Managbangat.” (Juan 13:13) Impaliwawa nen Jesus a say inter na Dios a kimey to et ‘ibangat tan ipulong so maong a balita’ nipaakar ed Panarian na Dios. (Mateo 4:23; Lucas 4:43) Simpli tan malinlinew ya impaliwawa nen Jesus so Panarian na Dios tan no panon a sumpalen na satan so linawa nen Jehova.​—Mateo 6:9, 10.

“Say Salita.” (Juan 1:1) Si Jesus so nagmaliw a Pinagkasangiyan na Dios​—a diad panamegley to et impaamta na Dios so impormasyon tan instruksion ed arum. Inusar nen Jehova si Jesus pian ipasabi so mensahe To ed totoo diad dalin.​—Juan 7:16, 17.

TEPET: Kasin si Jesus imay insipan a Mesias?

EBAT: On. Impropesiya na Biblia ya onsabi so Mesias, odino Kristo, a mankabaliksay “Say Nilanaan.” Sayan Insipan a Sakey et walaan na importantin betang ed panumpal na gagala nen Jehova. Aminsan et oniay imbaga na sakey a Samaritana ed si Jesus: “Amtak ya onsabi so Mesias, a tatawagen a Kristo.” Oniay direktan inyebat nen Jesus: “Siak a mitotongtong ed sika et siak itan.”​—Juan 4:25, 26.

Kasin walay prueban si Jesus imay insipan a Mesias? Walay taloran ebidensya a no paniibaen et singa pattern ed fingerprint ya manutukoy labat ed saksakey a too. Kasin napatnagan itan ed si Jesus? Ikonsidera iray onggendan:

Nanlapuan ton poli. Impropesiya na Biblia a say Mesias et manlapud poli nen Abraham diad panamegley na linya nen David. (Genesis 22:18; Salmo 132:11, 12) Tan talagan diad satan a poli so nanlapuan nen Jesus.​—Mateo 1:1-16; Lucas 3:23-38.

Asumpal iran propesiya. Dakel iray propesiya diad Hebreon Kasulatan nipaakar ed bilay na Mesias diad dalin, kaiba la ray detalye na inkianak tan impatey to. Asumpal iratan ya amin a propesiya ed si Jesus. Arum ed saratan et: Sikatoy nianak ed Betlehem (Miqueas 5:2; Lucas 2:4-11), sikatoy tinawag manlapud Ehipto (Oseas 11:1; Mateo 2:15), tan sikatoy pinatey ya anggapoy anggan sakey a pukel ton aputer (Salmo 34:20; Juan 19:33, 36). Imposiblin inmaneobra nen Jesus iray agawad bilay to pian nasumpal irayan amin a propesiya nipaakar ed Mesias. *

Mismon testimonya na Dios. Sanen nianak si Jesus, angibaki so Dios na anghel a mangibagad saray pastol ya nianak lay Mesias. (Lucas 2:10-14) Legan na ministeryo nen Jesus, wala ray pankanawnawan nadngel a nansalitan mismo so Dios manlapud tawen pian ibalikas so panangabobon tod si Jesus. (Mateo 3:16, 17; 17:1-5) Inikdan nen Jehova si Jesus na pakayarin manggaway milagro a lalo nin amaneknek ya sikato so Mesias.​—Gawa 10:38.

 TEPET: Akin et kaukolan a manirap tan ompatey si Jesus?

EBAT: Bilang perpekton too, agmanepeg a manirap si Jesus, ni say nipasak ed panamairapan a kiew ya singa kriminal tan ompatey ed makapabaing a paraan. Mabulos ya tinmulok si Jesus anggaman amta ton sagmaken to iratan.​—Mateo 20:17-19; 1 Pedro 2:21-23.

Unong ed saray propesiya nipaakar ed Mesias, kaukolan ya sikatoy manirap tan ompatey pian naperdonay kasalanan na totoo. (Isaias 53:5; Daniel 9:24, 26) Imbagan mismo nen Jesus a sikatoy linma diad dalin pian “iter toy kamarerwa to a panondon ed amayamay.” (Mateo 20:28) Saramay manisia ed dondon et nawalaay pankanawnawan niliktar manlapud kasalanan tan ipapatey, tan manbilay ya andi-anggaan diad Paraison dalin. *​—Juan 3:16; 1 Juan 4:9, 10.

TEPET: Talaga kasin napanisiaan tayon inmolid bilay si Jesus?

EBAT: On, talagan inilaloan nen Jesus a sikatoy onolid bilay. (Mateo 16:21) Balet, tandaan tayon agbalot imbaga nen Jesus, odino na saray managsulat na Biblia a sikatoy basta labat onolid bilay. Mairap itan a panisiaan. Imbes, oniay ibabaga na Biblia: “Sikatoy pinaoli na Dios diad impangukbar to ed saray balor na patey.” (Gawa 2:24) No manisia tayon wala so Dios tan sikatoy Amalsa ed amin a bengatla, manisia tayo met sirin a sarag ton paolien so Anak to.​—Hebreos 3:4.

Kasin walay mabiskeg ya ebidensyan inmolid bilay si Jesus? Nengnengen tayo iray paneknek.

Testimonya na saray mismon akanengneng. Manga 22 taon kayari impatey nen Jesus, insulat nen apostol Pablo a walay masulok a 500 ya akanengneng ed apaolin Jesus tan maslak ed sikara et mabilay ni sanen insulat to iya. (1 Corinto 15:6) Mainomay ya ibaliwala so testimonya na sakey odino duaran testigo, balet mairap itan a gawaen no masulok a 500 so akanengneng.

Napanmatalkan iran akatasi. Atasian a mismo na saray disipulo nen Jesus nensaman so tuan agawa, kanian makmakpel dan imbagan inmolid bilay si Jesus. (Gawa 2:29-32; 3:13-15) Diad katuaan to, impasen dan say panisia ed inkioli to et importantin kabiangan na Kristianon pananisia. (1 Corinto 15:12-19) Mas pilien ni na sarayan disipulo to so ompatey nen say ikainday pananisia rad si Jesus. (Gawa 7:51-60; 12:1, 2) Seguradon anggapoy malabay ya ompatey parad sakey ya katilaan!

Naamtaan tayoy ebat na Biblia ed anemiran importantin tepet nipaakar ed si Jesus. Ipapanengneng na saratan ya ebat no siopan talaga si Jesus. Balet, talaga kasin importante iratan ya ebat? Kasin importante no antoy papanisiaan mo nipaakar ed si Jesus?

[Saray paimano ed leksab]

^ par. 4 Pian naamtaan so pidumaan na saray Ebanghelyo na Biblia ed tila iran sulsulat nipaakar ed si Jesus, nengnengen so artikulon “Saray Apokripal ya Ebanghelyo​—Inyamot Iran Impormasyon Nipaakar ed si Jesus?” diad pahina 18-19.

^ par. 9 Nabasa ed Biblia a say ngaran na Dios et Jehova.

^ par. 10 Parad mas detalyadon impormasyon, nengnengen so artikulon “Tongtongan Nipaakar ed Saray Topic Diad Biblia​—Kasin si Jesus so Dios?” diad pahina 20-22.

^ par. 21 Pian nanengneng ni arum a propesiyan asumpal ed si Jesus, nengnengen so pahina 200 na libron Anto so Peteg ya Ibabangat na Biblia?

^ par. 25 Parad kaaruman ya impormasyon nipaakar ed dondon, nengnengen so kapitulo 5 na libron Anto so Peteg ya Ibabangat na Biblia?