Onlad karga

Onlad saray karga

Uumanen na Biblia so Bilay

Uumanen na Biblia so Bilay

 Uumanen na Biblia so Bilay

AKIN et intunda na biin manedad na masulok a 60 so mandayew ed idolo? Akin et tinaynan na sakey a Shinto so inka-pari to pian magmaliw a Kristiano? Panon ya alabanan na biin impaampon so liknaan a sikatoy inabandona? Amtaen tayo pay istoryay bilay da.

“Agak La Manpapaaripen ed Saray Idolo.”​—ABA DANSOU

TAON NA INKIANAK: 1938

BANSA: BENIN

APALABAS: MANDADAYEW ED IDOLO

ISTORYAY BILAY KO: Binmaleg ak ed So-Tchahoué, sakey a baryon walad gilig na ilog. Say anapan na totoo ed sikami et panagsigay tan panag-alagay baka, kanding, karnero, baboy, tan manok. Naynay ya madanum ed baryo mi tan anggapoy karsada, kanian manbabaluto kami. Saray kaabungan et gawad tabla tan talaib, balet wala met iray gawad laryo. Maslak ed saray totoo et mairap-bilay. Pero matalag so krimen, ya aliwan singa diad syudad.

Nen ugaw ak, sikami nen atsik et impanaral nen tatay ko ed kombento, ditan imbangat ed sikami so tradisyon a pandayew ed idolo. Nen baleg ak la, inawat ko si Dudua (Oduduwa) bilang dios ko. Impagawaan koy abung-abung iyan dios tan lanang ak ya mangiyaapay na aba, larak na palma, bisukol, manok, malapati, tan arum ni ran ayep. Mabli irayan iyaapay ko kanian lanang ya nauupot so kuartak.

NO PANON YA INUMAN NA BIBLIA SO BILAY KO: Nen nanaral ak na Biblia, naamtaan kon si Jehova so alenleneg a tuan Dios. Naamtaan ko met ya kabusol toy panagdayew ed idolo. (Exodo 20:4, 5; 1 Corinto 10:14) Amoriak no antoy kaukolan kon gawaen. Kanian imbantak koy amin ya imahen ko tan inekal kod abung so anggan anton mikonektaan ed idolatriya. Intundak lay manpapalar tan agak met la mibibiang ed saray ritual tan seremonya parad inatey.

Nairapan ak ya manguman, lalo ta masulok ko lan 60. Kinontra tan inelek-elekan ak na saray amigak, kakanayon, tan kakaabay mi. Balet nampikasi ak ed si Jehova ya ikdan to ak komon na biskeg a gawaen so duga. Aligliwa ak ed imbaga na Uliran 18:10: “Say ngaran nen Jehova sikato so mabiskeg ya ilang [tore]; say maptek ombatik ya onloob ed sikato, tan nilaban.”

Akatulong ed siak so iyaatendi ed aral na saray Tasi nen Jehova. Ditan ko nalilikna so Kristianon panangaro, tan pandinayewan koy pansasagpot dan manbilay base ed atagey ya estandarte na Biblia ed moral. Saraya so akakombinsid siak ya say Tasi nen Jehova so tuan relihyon.

 MARAKEP IRAN RESULTA: Lapud uunoren ko ray prinsipyo na Biblia, marakep lay relasyon ko ed saray anak ko. Tan alemewan met so liknaan ko. Dati et uupoten koy kuartak ed andiay bilay iran idolo ya anggapo met so nitutulong dad siak. Natan balet et si Jehova lay dadayewen ko, a mangiter na permanentin solusyon ed amin a problema tayo. (Apocalipsis 21:3, 4) Malikeliket ak ta agak la manpapaaripen ed saray idolo, noagta dia lad si Jehova! Inikdan to ak na tuan kaligenan tan proteksion.

“Ugaw Ak ni et Labay ko Lan Nakabat so Dios.”​—SHINJI SATO

TAON NA INKIANAK: 1951

BANSA: JAPAN

APALABAS: PARIN SHINTO

ISTORYAY BILAY KO: Binmaleg ak ed baley na Fukuoka Prefecture. Saray atateng ko et relihyoso. Abangonan koy panagdayew ed dirios na Shinto. Nen ugaw ak ni, lanang kon iisipen no panon ak ya nilaban tan talagan labalabay kon tulongan iray totoon maniirap. Nen elementary ak, tinepet na maestro mi no antoy labay mi no ombaleg kami la. Espisipikoy ebat na saray kaklasek, walaray angibagan labay day magmaliw ya scientist. Say kuanko balet pangarap koy manlingkor ed Dios, tan akalek iran amin.

Nen asumpal ak lad haiskul, nanaral ak ed eskuelaan na saray pari. Tan walay akabat ko ditan ya parin Shinto a kada no anggapoy gagawaen to et manbabasay libron andeket so apis to. Aminsan et tinepetan to ak, “Sato, antam no anto yan libro?” Abasak so apis na libro kanian inkuan kon, “Biblia.” Imbaga ton, “Kaukolan ya basaen na amin a malabay ya magmaliw a parin Shinto iyan libro.”

Angaliw ak ya tampol na Bibliak. Inyan ko itan ed sankaalan pasen na kabinet tan inal-alwaran ko. Balet agko lanlamang nababasa ta busy ak ed eskuelaan. Nen nangraduar ak la, nanserbi ak bilang parin Shinto diad kapilya mi. Aya la may papangarapen ko nen ugaw ak ni.

Ag-abayag et adiskobrek ya dumad iilaloan ko so pagmaliw a parin Shinto. Maslak a pari et anggapoy panangaro tan pibabali rad  arum. Tan dakel met ed sikara so anggapoy pananisia. Imbaga ni ingen ed siak na sakey ya abayag lan pari ya: “No labay moy ombayag dia, kaukolan ya say itongtong mo labat et nipaakar ed pilosopiya, aliwan pananisia.”

Lapud satan et adisdismaya ak ed relihyon ko. Anggano manseserbi ak nid kapilya mi, inusisak so arum a relihyon. Balet singa pareho met lanlamang. No kapigan dakel lay relihyon ya nauusisak, diman ak mas lalon nadidismaya. Pakaliknak et singa anggapoy tuan relihyon.

NO PANON YA INUMAN NA BIBLIA SO BILAY KO: Nen 1988, akabat koy sakey a Buddhista ya angombinsid siak ya basaen so Biblia. Anonotan ko laingen may parin Shinto ya ontan met so insimbawa to. Dinengel koy imbaga ra. Nen ginapoan koy manbasa na Biblia, agusgustoan kon tampol. No maminsan et sanlabi ak ya manbabasa ya anggad onsinag lay agew ed bintana.

Lapud nababasak, labay koy manpikasi ed samay Dios ya ibabaga na Biblia. Inalig ko may pikakasin walad Mateo 6:9-13. Kada duay oras et uuliten ko itan, anggan sano manmimisa ak ed kapilya.

Dakel so tepet kod nababasak. Diad saman et wala lay asawak, tan amtak ya ibabangat na saray Tasi nen Jehova so Biblia ta nensaman et binisita day asawak. Sanen akatongtong koy sakey a biin Tasi, tinepetan ko lan tinepetan. Mandinayew ak sanen inusar toy Biblian pangebat ed kada tepet ko. Sikatoy angibaki na lalakin Tasi a manbangat na Biblia ed siak.

Ag-abayag, inmatendi ak lad pantitipon na saray Tasi nen Jehova. Agko amta ya wadman manaya iramay Tasin ininsultok dati. Anggaman ontan, imbano tan inabrasa da ak nin siansia.

Naaralan ko diman ya labay na Dios ya aroen tan respetoen na asawan laki iray kapamilya to. Diad saman ko labat naisip ya apaulyanan ko manayay asawak tan ananak ko lapud subsob ak ed trabahok bilang pari. Amoriak ya madenge-dengel ak ed ibabaga na saray oonlad kapilya mi balet anggan aminsan et agko nin balot dinengel si asawak.

Legan ya ondarakel so nanaaralan ko nipaakar ed si Jehova, lalon napapaapit ak ed sikato. Apabiskeg ak na saray bersikulo a singa say Roma 10:13: “Balang sakey ya ontatawag ed ngaran nen Jehova et nilaban.” Ugaw ak ni et labay ko lan nakabat so Dios. Natan, akabat ko la!

Manlapu lad saman et agak la komportable ed kapilya. Nen unaan et panaaburidoan koy isipen na arum no taynan koy relihyon ko. Balet lanang kon ibabagad sarilik ya onekal ak no naromog koy tuan Dios. Kanian nen 1989, nandesisyon ak ya tumboken so ididiktay konsiensiak. Tinaynan koy kapilya mi tan impiak lay sarilik ed si Jehova.

Nairapan ak ya onalis ed kapilya. Nantamian ak na saray superyor ko tan agda ak paalisen. Tan say mas mairap et say pangibagad saray atateng ko. Sanen paonla ak lad abung mi, talagan apagaan ak, sinmakit ni ingen so pagew ko tan kinmakkapuy iray siklak! Aminpiga ak a tinmundad dalan pian manpikasi ed si Jehova a pabiskegen to ak komon.

Kasabik ed sikami, antakot kon ibagay rason na insempet ko. Pigay oras ni so  linmabas. Insan, kayari dakel a pikakasi, impaliwawak so amin ed si tatay ko. Imbagak ya kabat ko lay tuan Dios tan tinaynan ko lay relihyon a Shinto pian Sikatoy panlingkoran. Abigbigla tan naermenan si tatay ko. Nitan met la ray kakanayon mi tan kokombinsien da ak ya ompawil. Agko labay ya nasakitan so pamilyak, pero amtak a say panlingkor ed si Jehova so duga. Asabi panaon, nirespeto ak lanlamang na pamilyak lapud desisyon ko.

Anggano tinaynan ko lay kapilya mi, kaukolan ko nin siansia ya umaney panagnonot ko. Nipasal ak ed bilay na pari. Kanian, ginawak so anggaay nayarian kon lingwanan itan. Balet anggan iner a nengnengen ko, walan walay mangipanonot ed datin bilay ko.

Say akatulong ed siak pian nalabanan itan et, unona, inanap kod abung so amin a gamit ya mikonektaan ed datin relihyon ko. Insan ko iratan pinopoolan​—saray libro, litrato, tan anggan saray mablin souvenir. Komadua, naynay ak ya mililimog ed saray Tasi. Baleg a tulong ed siak so pikakaaro tan suporta ra. Kanian kalkalnak lan alingwanan so datin bilay ko.

MARAKEP IRAN RESULTA: Dati et napapaulyanan koy asawak tan ananak ko, kanian aliwa ran maliket. Balet nen wala lay panaon kod sikara, ya singa ibabangat na Biblia ed saray kaasawaan a lalaki, nagmaliw kamin maapit ed sakey tan sakey. Asabi panaon, nanlingkor met lad si Jehova so asawak. Natan, kaiba mi lay anakon laki, say anakon bii tan say asawa to ed dugan panagdayew.

Sano nanononotan ko may imbagak nen ugaw ak ya labay koy manserbi ed Dios tan ontulong ed totoo, amoriak ya agawaan ko itan, tan aliwa labat lan satan. Talagan agnasabsabaay pisasalamat ko ed si Jehova.

“Amtak ya Walay Kulang.”​—LYNETTE HOUGHTING

TAON NA INKIANAK: 1958

BANSA: SOUTH AFRICA

APALABAS: LIKNAEN TON INABANDONA

ISTORYAY BILAY KO: Nianak ak ed Germiston, sakey ya mareen a baley ya panagminaan. Lapud inisip na atateng kon agda ak nalegpet, impaampon da ak. Labin-apat agew ko ni labat ed saman sanen inampon ak na maaron sanasawa ya impasen kon ama tan ina. Anggaman ontan, nen naamtaan koy agawa, agaylay irap kon labanay liknaan ya inabandona  ak. Liknaen kon duma ak ed saray angampon ed siak tan agda ak natatalosan.

Nen manga 16 ko, oonla kamin sankakaaro ed saray bar pian man-disco tan ondengel ed banda. Nen mantaon ak na 17, sinalik so mansigarilyo. Labay ko, mabeng ak ya singa saramay modelo ed patalastas na sigarilyo. Nen 19 años ko la, nantrabaho ak ed Johannesburg, tan abarkada ak a tampol. Ag-abayag, nagmaliw ak lan maayew, masigarilyo, tan kada Sabado tan Simba et manbabartek ak.

Pero mahilig ak met ed isport. Regular ak ya mane-aerobics, mansa-soccer, tan arum ni. Makulikuli tan maabilidad ak met ed trabaho kanian akabkabat ak ed saray kompanya na kompyuter. Lapud satan, yinmaman ak tan say pakanengneng na arum et wala lad siak so amin. Balet say tua, agak maliket, tan singa anggapoy direksion na bilay ko. Amtak ya walay kulang.

NO PANON YA INUMAN NA BIBLIA SO BILAY KO: Nen nanaral ak na Biblia, naamtaan kon si Jehova et Dios na aro. Naamtaan ko met ya impanengneng to itan ya aro diad impangiter tod Salita to, say Biblia. Singa to itan personal a sulat ed sikatayo pian nitonton itayo ed dugan dalan. (Isaias 48:17, 18) Amoriak a pian nagunggonaan ak ed maaron panangibangat nen Jehova, kaukolan kon umanen so kabibilay ko.

Say sakey a kaukolan kon umanen et saray piuulopan ko. Sineryosok so walad Uliran 13:20: “Miulop ka ed saray makabat a totoo, et sika naani makabat; balet say kaiba na saray maatiw manlikna na segsegang [odino irap].” Akatulong itan a prinsipyo ed siak pian paliisan iray datin kabarkadak tan mikaaro lad saray Tasi nen Jehova.

Say nanirapan kon ekalen et say panagsigarilyok ta naadik ak ya maong. Nen kalkanak lan nakal iyan bisyo, walay sinmublay ya problemak. Manlapu la nen intundak itan, naarumay 13.6 kilo so belat ko! Lapud satan et singa abebbeba lay pakanengneng kod sarilik, tan ngalngali samploy taon ak ya nansagpot pian onebeng. Balet amtak a duga so desisyon kon itunday pansigarilyo. Naynay ak ya manpipikasi ed si Jehova, tan pinabiskeg to ak ya manguman.

MARAKEP IRAN RESULTA: Natan et marakep lay laman ko. Tan kontento ak lad bilay ko, agko la natan aambisyonen so temporaryon liket ya iiter na trabaho, posisyon, tan kayamanan. Imbes, panliliketan kon ibangat ed arum so Biblia. Lapud satan, talora ed saray katrabahok so kaiba mi la nen asawak a manlilingkor ed si Jehova. Antis ya inatey iray angampon ed siak, nipaamtak ed sikara so sipan na Biblia a kiolid bilay diad paraison dalin.

Akatulong ed siak so iyapit ed si Jehova pian nalabanan so liknaan kon inabandona ak. Lapud inikdan to ak na sankamundoan a pamilya na saray kaparan mananisia, aliknak ya agko bukbukor. Awalaan ak na saray ina, ama, tan agagi.​—Marcos 10:29, 30.

[Litrato ed pahina 12]

Aliknak so panangaro na saray Tasi nen Jehova

[Litrato ed pahina 13]

Kapilya na Shinto a datin pandadayewan ko