Antoy Kekerewen nen Jehova ed Sikatayo?
Onapit ed Dios
Antoy Kekerewen nen Jehova ed Sikatayo?
ONTULOK odino andi—aliwan naynay a mainomay iyan desisyonan. No say amom et masebeg odino maganggan, nayarin unonor kan tua balet ta napipilitan ka labat. Ingen, si Jehova a Dios et mabulbulos a tutuloken na saray managdayew to. Akin? Pian naebatan itan, pantongtongan tayo pa ray imbaga nen Moises a walad Deuteronomio 10:12, 13. *
Sanen susumaryoen nen Moises iray ganggan na Dios, walay balibalin intepet to: “Antoy arum a kaukolanen nen Jehova a Dios mo ed sika?” (Bersikulo 12) Walay kanepegan na Dios a kerewen ed sikatayo so antokaman a labay to. Siempre ta sikato so Soberanon Katawan, say Lapuan tan Managsustini na Bilay. (Salmo 36:9; Isaias 33:22) Kanepegan nen Jehova so katutulok tayo. Balet, agto labay ya ontulok itayo lapud napipilitan itayo labat. Natan, anto so kekerewen to ed sikatayo? Labay ton ontulok itayo manlapud puso.—Roma 6:17.
Antoy mamakiwas ed sikatayon ontulok a mabulbulos? Niay sakey a sinalambit nen Moises, “Takotan mo si Jehova a Dios mo.” * (Bersikulo 12) Aliwa iyan samay takot a resultay pankebbiew ya ompan walay nagawan mauges. Saya imay takot a manggaway agpanliketan na Dios tan kontra ed ganggan to. No baleg so respeto tayo ed Dios, paliisan tayoy manggawa na agto panliketan.
Anto balet so nepeg a manunaan a mamakiwas ed sikatayon ontulok? Inkuan nen Moises: “Say pangarom ed [Jehova], tan . . . say panlingkor mo ed Jehova ed amin a pusom tan ed amin a kamarerwam.” (Bersikulo 12) Say aro ed Dios et aliwa labat ya angangga’d liknaan. Oniay inkuan na sakey a reperensya: “Saray salitan Hebreo parad liknaan so no maminsan et ontutukoy met ed saray gawa a resulta na saratan a liknaan.” Inkuan ni na satan a say aro ed Dios et mankabaliksan na pangipanengneng ed sikatoy “maaro iran gawa.” Diad arum a salita, no talagan inaro tayoy Dios, onkiwas itayo ed paraan a makapaliket ed sikato.—Uliran 27:11.
Anggad iner so nepeg ya itulok tayo ed Dios? Inkuan nen Moises: “Manonton ka ed saray amin a daladalan [na Dios].” (Bersikulo 12) Labay nen Jehova a gawaen tayoy amin a kerewen to. Pankaugsan tayo kasi no ontan so katutulok tayo? Andin balot.
Nabendisyonan tayo no mabulos so katutulok tayo. Insulat nen Moises: “Sumpal mo so saray ganggan . . . ya iganggan ko ra natan ed sika ya onkana a kaabigan mo.” (Bersikulo 13) On, amin a ganggan nen Jehova, amin a pagagawa to ed sikatayo et parad pankaabigan tayo. Talagan imposible a pankaugsan tayo itan ta say inkuan na Biblia et “say Dios sikato so aro”! (1 Juan 4:8) Kanian say iiter to labat a ganggan et saramay parad andi-anggaan a pankaabigan tayo. (Isaias 48:17) No gawaen tayon amin so kekerewen nen Jehova, napaliisan tayoy dakel a pakadismayaan natan tan nagamoran tayo ray agnasabsabaan a bendisyon diad uley na Panarian to. *
Anto sirin so labay na Dios? Ontulok itayo o andi? No kasabi’d saray kekerewen nen Jehova ed sikatayo, saksakey so marunong a desisyon. Say sigpot tan mabulbulos a katutulok et lawas sankaabigan. No ontay gawaen tayo, lalon ombiskeg so relasyon tayo ed si Jehova, say maaron Dios a say labay to lawas et say pankaabigan tayo.
[Saray paimano ed leksab]
^ par. 4 Anggaman para iya’d karaanan ya Israel, say prinsipyo na satan et onaplika ed amin a malabay a mamaliket ed si Jehova natan.—Roma 15:4.
^ par. 6 Diad interon libro na Deuteronomio, indanet nen Moises a say nepeg a mangigiya ed bilay na saray lingkor na Dios et say takot ed Sikato.—Deuteronomio 4:10; 6:13, 24; 8:6; 13:4; 31:12, 13.
^ par. 9 Parad kaaruman nin impormasyon, nengnengen so kapitulo 3, “Anto so Gagala na Dios ed Dalin?” na libron Anto so Peteg ya Ibabangat na Biblia? ya impalapag na saray Tasi nen Jehova.