Onlad karga

Onlad saray karga

Natalosan Kasi so Biblia?

Natalosan Kasi so Biblia?

 Natalosan Kasi so Biblia?

“Kada Simba, manbabasa so pamilya mi na Biblia. Diad tua, agak tanto naliliketan ed satan. Panisiaan kon Salita na Dios so Biblia, balet ta ngalngali anggapoy natatalosan ko’d saray nababasak.”​—Steven, taga Britanya.

“Sanen mantaon ak na 17, sinalik a basaen so Biblia. Balet dagdaiset so atalosan ko, kanian tinundaan ko la.”​—Valvanera, taga España.

“Binasak ya aminsan so Biblia ta Katoliko ak lanti, kanian pakaliknak et kaukolan kon basaen itan. Asabik so taloy taon antis kon asumpal itan! Balet dagdaiset so atalosan ko.”​—Jo-Anne, taga Australia.

SIANSIA nin say Biblia so kabkabat ed amin a libro. Saya so sankasaliwan a libro. Amin lawarin totoo et sarag day makala ed satan ta walad mas dakel a lenguahe tan wala met ed CD, DVD tan arum ni ra. Balet, dakel so walaay Biblia a mairap dan talosay karga na satan. Ontan met kasi situasyon mo?

Labay Kasi na Dios a Natalosan Tayoy Salita To?

“Amin a sulat [et] impuyan na Dios,” so kuan na Biblia. (2 Timoteo 3:16) On, say nanlapuan na Biblia et si Jehova a Dios. Labay to kasin natalosan tayoy Salita to? Odino ginagala ton wala labat so partikular a totoon makatalos ed satan, a singa saray lider na relihyon tan iskolar na Biblia?

Imanoen pa irayan ibabagay Biblia a mismo:

“Saya a bilin ya ibilin ko ed sika ed saya ya agew aliwa a mairap a tuloy ed sika nisay arawi.”​—Deuteronomio 30:11.

“Say kilulukas na saray salitam mangiter na liwawa; mangiter na pakatalos ed saray andi-amta.”​Salmo 119:130.

“Diad saman lanlamang ya oras [si Jesus so] linmiket ed espiritu santo, et inkuan to, Misalamat ak ed sika, O Ama, Katawan na tawen tan dalin, ta inyamot mo so sarayan bengatla ed saray makabat tan makatalos, et sikara so impasingawey mo ed saray ugugaw.”​—Lucas 10:21.

On, talagan labay na Dios a natalosan tayo so Salita to! Anggaman ontan, dakel nin siansiay totoon mairap dan talosan so Biblia. Anto kasi makatulong? Diad onsublay iran artikulo, walay taloran suhestion ya ontulong ed sikayon talosan so Biblia.