Onlad karga

Onlad saray karga

Kasin Importante no Siopay Makakanengneng ed Gagawaen Mo?

Kasin Importante no Siopay Makakanengneng ed Gagawaen Mo?

KAKKABISADO di Bezalel tan Oholiab so kimey ya panagpaalagey. Nen aripen ni rad Ehipto, anganko et agda la nabilang so laryon ginawa da lapud karakel. Balet nensaman ni man. Natan et ingganggan ira na Dios ya idaulo so pampaalagey ed tabernakulo. (Exo. 31:1-11) Anggaman ontan, daiset labat so akanengneng ed saray makapadinayew ya ginawa da. Kasin adismaya ira ta ngalngali anggapoy akaapresyad saratan? Talaga kasin importante no siopay akanengneng ed saray ginawa da? Kasin importante no siopay makakanengneng ed gagawaen mo?

MAKAPADINAYEW IRAN KIMEY YA DAISET LABAT SO AKANENGNENG

Say arum ya kagawaan ed tabernakulo et talagan obra maestra. Sakey la ditan iramay kerubin ya gawad balitok ya walad tapew na kaban na sipanan. Deneskribe iratan nen apostol Pablo ya ‘magloria.’ (Heb. 9:5) Imadyin mo pa labat so karakep na saratan ya gawad pinanday a balitok!Exo. 37:7-9.

No nadiskobre natan iramay ginawa di Bezalel tan Oholiab, seguradon i-displey iratan ed saray balibalin museum pian dakel so makanengneng. Balet diad samay panaon ya ginawa iratan nen Bezalel tan Oholiab, pigara kasi akanengneng ed karakep na saratan? Saramay kerubin et walad Sankasantosan a pasen diad tabernakulo, kanian say makakanengneng labat et say atagey ya saserdote ya onloloob ditan maminsan ed sakey taon, diad Agew na Pananakbong. (Heb. 9:6, 7) Daiset labat sirin so akanengneng ed saratan.

MALIKET ANGGANO DAISET LABAT SO MAKAKANENGNENG ED GAGAWAEN MO

No sika si Bezalel odino Oholiab ya nansagpot a maong pian gawaen iratan ya makapadinayew ya kimey, antoy naliknam no daiset labat manaya so makanengneng ed saratan? Diad panaon tayo, proud iray totoo no idayew ira na arum lapud saray agawaan da. Parad sikara, atan so sukatan ya importante so ginawa ra. Sikatayo ran lingkor nen Jehova balet et duma. Singa si Bezalel tan Oholiab, say rason no akin ya malikeliket tayo et lapud gagawaen tayoy linawa nen Jehova tan maapit so relasyon tayod sikato.

Nen wadiad dalin si Jesus, saray lider na relihyon et manpipikasi pian pandinayewan ira na  arum. Duma balet so imbangat nen Jesus. Imbaga ton kaukolan ya manpikasi tayo manlapud puso tan ag-iilaloan ya lapud satan et irayew itayo na arum. Antoy resulta? “Tumangan ka na Amam ya onnenengneng diad maamot.” (Mat. 6:5, 6) Kanian say importante sirin et aliwan say nibaga na arum ed pikakasi tayo, noagta say nibaga nen Jehova ed satan. Nonoten tayo ya makabaliksan so pikakasi tayo no abobonan to itan. Ontan met ed saray gagawaen tayon sagradon panaglingkor. Agtayo iisipen ya importante so kimey tayo lapud irarayew itayo na arum; noagta lapud naliliketan si Jehova ya “onnenengneng” ed saray gagawaen tayo.

Nen asumpal so tabernakulo, “say lurem sinakuloban to so tolda na duypo, et say gloria [nen Jehova] pinano to so tabernakulo.” (Exo. 40:34) Paneknek itan na panangabobon nen Jehova! Anto kasi alikna nen Bezalel tan Oholiab? Anggaman ag-inyukit so ngaran da ed saray ginawa da, seguradon malikeliket ira ta amta ran benendisyonan na Dios so amin ya sagpot da. (Uli. 10:22) Diad inlabas na saray taon, seguradon napapaseseg ira no nanenengneng dan uusaren nid panaglingkor ed si Jehova iray ginawa da. Sano napaoli lay Bezalel tan Oholiab diad balon mundo, seguradon malikeliket ira no naamtaan dan say tabernakulo et inusar ed dugan panagdayew diad ngalngali 500 a taon!

Anggano anggapoy toon makakanengneng ed mapaabeba tan mabulos ya panlilingkor mo, nanenengneng itan nen Jehova!

Diad organisasyon nen Jehova natan, mantratrabaho iray animator, artist, musician, photographer, translator, tan writer ya ag-ipapaamtay ngaran da. Lapud satan et singa anggapoy “makakanengneng” ed saray gagawaen da. Ontan met ed saray kimey ya gagawaen diad masulok ya 110,000 ya kongregasyon ed interon mundo. Siopay makakanengneng ed gagawaen na account servant kada sampot na bulan? Siopay makakanengneng ed sekretaryo na kongregasyon no manpaparaan na binulan ya report? Siopay makakaimano ed saray agagi ya mangaapiger ed Kingdom Hall?

Anggapoy naawat di Bezalel tan Oholiab ya trophy, medalya, odino plake lapud mararakep ya desinyo da tan impaalagey da. Balet walay mas importantin naawat da—say panangabobon nen Jehova. Segurado itayon anengneng nen Jehova so amin ya ginawa da. Komon ta aligen tayo ra ya mapaabeba tan mabulos ya manlingkor.