Onlad karga

Onlad saray karga

 INALAD DAAN IRAN KOLEKSION MI

Anengneng Toy Aroan Diad Cafeteria

Anengneng Toy Aroan Diad Cafeteria

PARAD saray lingkor nen Jehova, espisyal ya okasyon iray espiritual ya pantitipon lapud singa ira akarungo ed espiritual a ponsia. Tan mangaarum met ed liket da no saniiba iran mamangan na literal ya naakan.

Nen Setyembre 1919, nantitipon iray Estudyante na Biblia parad waloy agew ya kombension diad Cedar Point, Ohio, U.S.A. Wala ray hotel ya inreserba pian tuloyan tan panganan na saray onatendi, balet mas dakel nen say iilaloan so sinmabi. Lapud karakel da, ag-ira ayarian ya serbian na saray waiter tan waitress. Aburidon maong so manedyer na cafeteria kanian nantepet no kasin wala ray kalangweran ya nayarin ontulong, tan dakel so namboluntaryo. Sakey ed sikara si Sadie Green. “First time koy man-waitress,” so kuan to, “balet talagan nan-enjoy ak.”

Sierra Leone, 1982

Diad tinmumbok iran taon, wala la ray cafeteria ed kombension tan dakel so namboluntaryo pian naserbian iray agagi da. Akatulong met iya pian nawalaay espiritual a kalat iray kalangweran. Akapanboluntaryo si Gladys Bolton ed cafeteria diad kombension nen 1937. Inkuan to: “Dakel ya agagi ya nanlapud nanduruman lugar so akabat ko tan naamtaan ko no panon dan asarag iray problema da. Diman ginmapo so pilalek kon manpayunir.”

Imbaga nen Beulah Covey, sakey ed saray inmatendi ed kombension: “Makulikuli iray boluntaryo, kanian anggapoy problema ed trabaho.” Balet siempre, aliwan mainomay. Singa bilang nen 1969, kasabi nen Angelo Manera diad Dodger Stadium ed Los Angeles, California, diman to labat naamtaan ya sikato manayay niasain ya cafeteria servant. Inkuan to: “Talagan abigbigla ak!” Kaukolan da ni mangotkot na 400 metro a panginay tubo ya dalanay gas ya usaren ed kusina!

Frankfurt, Germany, 1951

Diad Sierra Leone nen 1982, nilinisan na saray makukulin boluntaryo so kaumaan tan mano-mano ran impaalagey so cafeteria. Nen 1951, diad Frankfurt, Germany et wala ray madiskarten brother ya nanrentay locomotive pian makapanpalwag ira na 40 kaldero. Diad kada oras et 30,000 so pinakan da. Pian napalemew so trabaho na 576 ya boluntaryo ed  dishwashing department, saray inmatendid kombension et angawit lay sarili dan kutsilyo tan tinidor. Diad Yangon, Myanmar, agla tanton angusar na pampaagasang iray managluto ed saray putahin ipakan ed saray agagin inmatendi ya nanlapud arum ya bansa.

“AKAALAGEY IRAN MAMANGAN”

Diad sakey a kombension ed United States nen 1950, nagmaliw a bendisyon ed si Annie Poggensee so impanalagar tod andukey ya pilad cafeteria anggano ampetapetang. Inkuan to: “Sankarengel koy istoryaan na duaran sister ya nambarko manlapud Europe.” Pantotongtongan da no panon iran tinulongan nen Jehova pian makaatendi. “Singa sikara lay sankaliketan ed amin ya inmatendi,” kuan nen Annie. “Ayos labat ed sikara anggano andukey so pila tan agaylay petang.”

Seoul, Korea, 1963

Diad dakel ya angkakabaleg ya kombension, angipaalagey iray tolda ya wala ray akahileran atagey a lamisaan tan atan so nagmaliw ya cafeteria. Saray mamangan et akaalagey tan agla ra manbabayag pian makasublay so arum. Atan lay sankaabigan ya paraan pian napakan so nilibon totoo. Oniay kuan na sakey ya aliwan Tasi: “Nikadkaduma yan relihyon. Akaalagey iran mamangan.”

Manbilib iray militar tan opisyal na gobierno ed maples tan organisadon panagtrabaho. Kayari dan ininspeksion so cafeteria ed Yankee Stadium diad New York City, imbaga na sakey ya membro na United States Army ed si Major Faulkner na British War Department ya man-inspeksion met. Kanian, sikato tan say asawa to et inmatendid “Triumphant Kingdom” ya asemblea diad Twickenham, England nen 1955. Imbaga ton anengneng toy aroan diad cafeteria.

Diad apalabas iran dekada, malikeliket ya nanserbi iray boluntaryo na simpli balet ta masustansia iran panangan parad saray onatendid kombension. Balet matrabahon maong iya kanian kaukolan so dakel ya boluntaryon mantrabahod andukey ya oras tan nasasaew da lay arum a parte odino say interon programa na kombension. Diad bandad sampot na 1970, pinasimpli so uksoyan ed pamakan ed saray onatendid kombension. Insan diad gapo na 1995, kinerew lad saray agagi ya manbalon la ray naakan. Lapud satan, saray agagi ya mangipaparaan tan manseserbi na panangan et nagugunggonaan la ed programa tan ed pipiulop ed arum. *

Talagan papablien nen Jehova iray makukulin lingkor to ya manseserbid saray agagi da! Nayarin naiiliw na arum so maliket ya impanboluntaryo dad cafeteria. Balet saya so segurado: Say panangaro so siansia nin manunan rekado ed saray kombension tayo.Juan 13:34, 35.

^ par. 12 Siempre, dakel nin siansiay pankanawnawa na saray agagi ya makapanboluntaryo ed arum nin departamento ed kombension.