Onlad karga

Onlad saray karga

Tepetepet na Saray Manbabasa

Tepetepet na Saray Manbabasa

Sarag to kasi cremation ed saray Kristiano?

Anggapoy nabasad Biblia ya mangisesebel ed cremation.

Wala ray salaysay ed Biblia nipaakar ed bangkay o pukel na saray inaatey ya pinoolan. (Jos. 7:25; 2 Awa. 34:4, 5) Nayarin pakapatnagan itan ya ag-ira makanepegan na desentin ponpon. Balet aliwan ontan ya lanang so situasyon.

Say sakey ya alimbawa et samay salaysay nipaakar ed impatey nen Arin Saul tan taloran ilalak to. Inatey iran apat nen akiguerra irad saray Filisteo. Sakey ed saray ilalak nen Saul et si Jonatan ya malet tan matoor ya kaaro nen David. Nen naamtaan na saray makpel ya Israelitan taga Jabes-gilead so agawa, inala ra so apatiran bangkay, pinoolan da iratan, insan da inkotkot iray pukel. Imbaga nen David ya maabig iman ya ginawa ra.1 Sam. 31:2, 8-13; 2 Sam. 2:4-6.

Unong ed Biblia, say ilalo na sakey ya inatey et say kioli—say pangipawil na Dios ed bilay na satan a too. Balanglan say inatey et in-cremate odino andi, sarasarag nen Jehova ya ipawil so bilay to a walaan na balon laman. Agtinmakot iramay taloran matoor ya Hebreo nen ingganggan nen Arin Nabucodonosor ya ibantak irad palbaan—agda inisip ya no napoolan ira et agla ra napaoli na Dios. (Dan. 3:16-18) Ontan met so situasyon na saray matoor ya lingkor nen Jehova ya inatey tan pinoolan diad saray Nazi concentration camp. Wala ray matoor ya lingkor na Dios ya inatey ed insabog o diad arum nin paraan tan agla nalmoy bangkay da. Balet ipapaseguro na Biblia ya napaoli ira.Apo. 20:13.

Agla kaukolan ya ipawil ni nen Jehova so datin laman na too pian napaoli to. Nibaga tayo itan ta sarag ton paolien iray alanaan ya Kristiano ed tawen. Singa si Jesus ya “binilay ed espiritu,” saray alanaan ya Kristiano et paolien ya walaan na espiritun laman. Aliwan samay datin laman da so onlad tawen.1 Ped. 3:18; 1 Cor. 15:42-53; 1 Juan 3:2.

Say ilalo tayod kioli et ag-akadependid nagawa ed bangkay tayo noagta diad pananisia tayo ya sarasarag tan pipilaleken na Dios ya tooren iray sipan to. (Gawa 24:15) Siempre, agtayo sigpot ya natalosan no panon ya pinaoli na Dios iray totoo nensaman tan no panon to itan ya gawaen diad arapen. Balet manmamatalek tayod si Jehova. Say “garantiya” ya inter to et samay mismon impamaoli tod si Jesus.Gawa 17:31; Luc. 24:2, 3.

No mandedesisyon iray Kristiano nipaakar ed gawaen da ed inatey, maabig no ikonsidera da ni so kaslakan ya gagawaen ed lugar da, say nibagay totoo, tan legal iran bengatla. (2 Cor. 6:3, 4) Kayari dan ikonsidera iratan, antokaman so gawaen dad bangkay et personal a desisyon odino desisyon la na pamilya.