Onlad karga

Onlad saray karga

 ISTORYAY BILAY

Maliket a Manlingkor ed si Jehova, Anggan Iner

Maliket a Manlingkor ed si Jehova, Anggan Iner

Agko nin balot asali nampulong a bukor. Mannerbiyos ak ya maong tan manggiwgiw iray pueg ko kada ompaway ak. Sakey ni, ag-ondengel iray totood teritorya mi. Wala ray talagan palaban tan imbaga dan bugbogen da ak. Diad unonan bulan na impanpayunir ko, saksakey labat a bokleta so nipalimak!—Markus.

SATAN et nen 1949, masulok ya 60 taon lay apalabas, balet wala ni iyistoryak antis na satan. Say tatay ko et si Hendrik. Managgaway sapatos tan hardinero ed Donderen, melag a baryo ed north Drenthe, Netherlands. Niyanak ak ditan nen 1927, komapat ak ed pitoran sanaagi. Aliwan sementadoy dalan paonlad abung mi. Dumaralos so maslak a kakaabay mi, tan labalabay koy bilay ed kaumaan. Nen 1947, say edad kod saman et 19 sanen nadngelan koy katuaan ed si Theunis Been ya kaabay mi. Nen unaan kon akabat si Theunis, agko labay so ugali to, balet kayari na World War II et sikatoy nagmaliw a Tasi nen Jehova, tan nagmaliw a makaaro aliwan singa nensaman. Pankelawan koy impanguman to kanian dinengel ko sanen innabang toy sipan na Dios ya paraison dalin. Inawat kon tampol so katuaan tan nagmaliw kamin malet a sankaaro. *

Ginapoan koy nampulong nen Mayo 1948, tan kayari sakey bulan, nen Hunyo 20, abautismoan ak ed kombension diad Utrecht. Nen Enero 1, 1949, nampayunir ak tan niasain ak ed melag a kongregasyon diad Borculo, eastern Netherlands. Say kaarawi to et 130 km kanian nambisikleta ak. Say amtak et 6 oras labat so biahe, balet lapud maksil so uran tan dagem, asabik so 12 oras anggano nantren ak lad samay 90 km! Lablabi la nen  akasabi ak ed abung na pamilyan Tasi ya akiayaman ko legay impanpayunir ko.

Kayari na guerra, mair-irap so bilay. Saksakey so amerikanak ya maaw-awang tan duara labat so pantalon ko, antirikey ni! Singa imbagak ed gapo, mair-irap so unonan bulan kod Borculo, balet ta benendisyonan ak nen Jehova na dakel ya iyaaralay Biblia. Kayari siam bulan, niasain ak ed Amsterdam.

MANLAPUD PROBINSYA PAONLAD BALEG A SYUDAD

Binmaleg ak ed kaumaan, balet natan et wala ak lad Amsterdam, say sankabalegan ya syudad ed Netherlands. Mabunga so ministeryo ditan. Diad unonan bulan, mas dakel so literaturan nipalimak nen say apalabas a siam bulan. Ag-abayag, ag-onaabebad walora so iyaaralan koy Biblia. Aturo ak ya congregation servant (natan et coordinator na ulop na mamatatken), insan ko naawat so unonan asainmin ko a mangiter na publikon paliwawa. Talagan anerbiyos ak, kanian akainawa ak sanen inyalis da ak na kongregasyon antis na pampaliwawak. Agko naisip a diad ontumbok iran taon et masulok ya 5,000 beses ak ya manpaliwawa!

Si Markus (kawanan) manpupulong ed Amsterdam nen 1950

Nen Mayo 1950, niasain ak ed Haarlem. Insan, naimbitaan ak ya manlingkor ed sirkito. Taloy agew ak ya ngalngali agmakaugip. Imbagak ed si Robert Winkler a walad branch office ya agak kualipikado, balet inkuan to: “Pirmaan mo labat ‘tay forms. Naaralan mo lanlamang.” Ag-abayag kayari na satan, nan-training ak na sakey bulan insan nanlingkor ak ya circuit servant (overseer). Diad imbisitak ed sakey a kongregasyon, akabat koy Janny Taatgen, maligsan kalangweran a payunir ya inad-aro toy Jehova tan masakripisyo. Nankasal kami nen 1955. Balet antis kon ituloy so istoryak, isalaysay ni nen Janny no panon a nagmaliw a payunir tan no iner kami nanlingkor kayari kasal mi.

IMPANLINGKOR MI BILANG SANASAWA

Janny: Si nanay ko et nagmaliw a Tasi nen 1945 sanen 11 años ko. Atebek ton tampol ya kaukolan ton ibangat so Biblia ed taloran anak to, balet opposer a maong si tatay kanian babangatan kami nen nanay no anggapod abung si tatay.

Say sankaunaan ya naatendian kon pantitipon et samay kombension ed The Hague nen 1950. Kayari sakey simba, ginapoan koy akiaral ed Kingdom Hall diad Assen (Drenthe). Agaylay pasnok nen tatay ko tan pinalayas to ak. Imbaga nen nanay: “Antam la no iner so napiayaman mo.” Amtak a say tutukoyen to et diad saray agagi. Unona et linma ak ed pamilyan Tasi ya asingger ed sikami, balet agak tinundaan nen tatay kanian inmalis ak ed kongregasyon diad Deventer (Overijssel), manga 95 km so kaarawi  to. Balet menor de edad ak ni kanian kinuestion na gobierno so impanpalayas tod siak nen tatay. Kanian imbaga ton sarag ko lay onsempet. Anggano agbalot inawat nen tatay so katuaan, inabuloyan to ak lanlamang ya miaral tan manpulong.

Si Janny (kawanan) vacation pioneer nen 1952

Ag-abayag kasempet ko, nansakit na grabe si nanay kanian kimey kon amin ed abung. Anggaman ontan, tuloytuloy ak ya inmaligwas ed espiritual tan abautismoan ak nen 1951 diad edad ya 17. Nen 1952, inmabig si Nanay kanian akapan-vacation (auxiliary) pioneer ak na duay bulan kaibay taloran sister a payunir. Nanayam kamid baloton abung tan nampulong kamid duaran baley diad Drenthe. Nanregular payunir ak nen 1953. Kalabas na sakey taon, walay balolakin manangasikaso na sirkito ya binmisita ed kongregasyon mi, si Markus. Nankasal kami nen Mayo 1955 tan inisip min mas makapanlingkor kamid si Jehova bilang sanasawa.—Ecl. 4:9-12.

Kasal mi nen 1955

Markus: Kayari kasal mi, niasain kami bilang payunir diad Veendam (Groningen). Nanayam kamid melmelag ya kuarto ya 2 by 3 metro labat. Balet inayos nen Janny kanian dinmakep tan komportable. Kada labi, ipaliis mi lamisaan tan duaran melag a yurongan pian nipuestoy dukolan ya ipapasaral mid dingding.

Kayari anem bulan, naimbitaan kamin manlingkor bilang ombiabiahen manangasikaso ed Belgium. Nen 1955, manga 4,000 labat so manangipalapag ditan. Natan et masulok lan 24,000! Diad Flanders, a walad bandad norte na Belgium et miparay lenguahe dad Netherlands. Balet dumay tono tan panangibalikas da kanian kaukolan min aralen itan.

Janny: Talagan kaukolan so mansakripisyo diad panagbiahen kimey. Akabisikleta kamin ombisitad saray kongregasyon tan manpupundo kamid abung na saray agagi. Lapud anggapoy sarilin ayaman mi, mansiasiansia kamid kongregasyon anggad Lunes, insan kami ombiahen paonlad onsublay a kongregasyon no kabuasan na Martes. Balet lanang min ipapasen ya panamendisyon nen Jehova so panlilingkor mi.

Markus: Diad gapo, anggapoy kabat min agagi ed saray kongregasyon balet maomaong tan maparawes ira. (Heb. 13:2) Kalabas na pigaran taon, aminpiga min abisitay amin a kongregasyon ed Belgium ya mansasalitay Dutch. Dakerakel a bendisyon so naawat mi. Singa bilang, akabat mi lawarin amin so agagi ed distrito ya Dutch, tan apaapit kamid sikara. Anengneng mi imbaleg tan inyaligwas ed espiritual na nilasus a kalangweran anggad impangidedika day bilay dad si Jehova, tan say impangiyuna dad Panarian. Talagan makapaliket a naimatonan a dakel ed sikara so nansiansian full-time ed panaglingkor. (3 Juan 4) Makapaseseg so alimbawa ra kanian  apabiskeg kamin mantultuloy ed asainmin mi.—Roma 1:12.

BALEG A SUBOK TAN TUAN BENDISYON

Markus: Manlapud agew na impankasal mi, labalabay min sanasawa so onatendid Gilead School. Inagew-agew kamin manaaral na English anggan sakey oras labat. Balet aliwan mainomay so manaral na English panamegley na libro kanian nandesisyon kamin manbakasyon ed England pian nipraktis mid panagpulong. Nen 1963, akaawat kamin siansia na sobre ya nanlapud world headquarters ed Brooklyn. Duaran sulat so karga to, sansakey kami nen Janny. Say sulat ko et imbitasyon parad espisyal ya samploran bulan a klase ed Gilead. Say kurso et nipaakar ed pangipasal na agagin lalaki tan pangiter na organizational instruction. Kanian diad 100 ya estudyante, 82 so brother.

Janny: Diad samay sulat ko, imbaga da ya kaukolan koy mandesisyon no kasin labay koy mansiansiad Belgium legan a manaaral si Markus ed Gilead. Aminen ko ya adismaya ak. Singa agbenendisyonan nen Jehova so sagpot ko. Balet ninonot kon maong so gagala na Gilead School—pian tulongan iray manaral ditan a nagawaay kimey a panangipulong na maong a balita ed interon mundo. Kanian inmabobon ak ya natilak tan niasain ak ya espisyal payunir ed syudad na Ghent diad Belgium kaiba iray eksperiensyadon espisyal payunir ya si Anna tan Maria Colpaert.

Markus: Lapud kaukolan ko ni manaral na English, naimbitaan ak ya onlad Brooklyn, limay bulan antis ya onggapo so klase. Nantrabaho ak ed Shipping tan Service department. Diad impanlingkor kod world headquarters tan intulong ed pangipawit na saray literatura ed Asia, Europe, tan South America, mas atalosan koy internasyonal ya impanaagi tayo. Agko nalingwanay Brother A. H. Macmillan ya pilgrim (ombiabiahen manangasikaso) diad panaon nen Brother Russell. Masiken lad saman tan medyo telek la, balet aatendian ton amin iray pantitipon ed kongregasyon. Apaseseg ak ed saman tan naaralan kon agtayon balot nepeg a paulyan iray Kristianon pantitipon tayo.—Heb. 10:24, 25.

Janny: Maminpiga kamin mansusulatan nen Markus kada simba. Naiiliw min maong so balang sakey! Balet malikeliket si Markus ed training tod Gilead, tan maliket ak met ed ministeryo. Sanen anempet si Markus, 17 so iyaaralan koy Biblia! Talagan mairap so nanarawian ed loob na 15 bulan, balet benendisyonan nen Jehova iray sakripisyo mi. Diad samay agew ya insempet nen Markus, naatrasado na pigaran oras so eroplano, kanian nen sinmabin siansia, nanlakapan tan nanakisan kami. Manlapud saman, saniba kami lan lanang.

PISALSALAMATAN MI KADA PRIBILEHYO MI

Markus: Sanen sinmempet ak manlapud Gilead nen Disyembre 1964, niasain kamin manlingkor ed Bethel. Balet, amta min aliwan diman so permanentin asainmin mi. Kalabas labat na taloy bulan, niasain kamid distrito na Flanders bilang ombiabiahen manangasikaso. Sanen nibakin misionero ed Belgium si Aalzen tan  Els Wiegersma, sikaray sinmalat a manangasikaso na distrito. Pinmawil kamid Bethel tan diad Service Department so asainmin ko. Manlapud 1968 anggad 1980, aminpigan anguman so asainmin mi—diad Bethel tan panagbiahen kimey. Tan manlapud 1980 anggad 2005, nanlingkor ak lamet bilang manangasikaso na distrito.

Anggano naynay a manguuman so asainmin mi, lanang min sankanonot ya indedika mi so bilay mi pian interon kamarerwan panlingkoran si Jehova. Talagan nanliketan mi kada asainmin ya naawat mi, tan matalek kami ya parad Panarian so kada pananguman ya naawat mi.

Janny: Malikeliket ak ed pribilehyon akaibay Markus ya linmad Brooklyn nen 1977 tan diad Patterson nen 1997 sanen sikatoy akaawat na kaaruman ya training bilang membro na Branch Committee.

AMTA NEN JEHOVA IRAY KAUKOLAN MI

Markus: Nen 1982, naoperaan si Janny tan maples so inyabig to. Kalabas na taloy taon, inyopresi na kongregasyon ed Louvain a manayam kamid apartment a walad tagey na Kingdom Hall da. Walan siansiay sarilin ayaman mi kalabas na 30 taon. Kada Martes, sano man-impake kami la pian ombisita ed kongregasyon, maminpiga ak ya onlasur-onsegep ed 54 balitang a takayan pian iyepas iray bagahe mi! Misalsalamat kami ta nen 2002, inyalis da kamid apartment diad ground floor. Nen 78 lay edad ko, niasain kami ya espisyal payunir ed baley na Lokeren. Malikeliket kami ed sayan asainmin mi ta makakapanpulong kami ni ya inagew-agew.

“Parad sikami, ag-importante no iner kami manlilingkor odino antoy pribilehyo mi, noagta no siopay panlilingkoran mi”

Janny: No pan-aruman, masulok ya 120 taon kami lad full-time! Naeksperiensya min mismoy katuaan na sipan nen Jehova ya ‘agto kamin balot taynan’ tan no manmatoor kamid sikato, ‘anggapoy onkulang’ ed sikami.—Heb. 13:5; Deu. 2:7.

Markus: Nen kalangweran kami ni, indedika mi bilay mi ed si Jehova. Agmin balot inisip ya unaey sarili mi. Mabulos min inawat so antokaman ya asainmin lapud parad sikami, ag-importante no iner kami manlilingkor odino antoy pribilehyo mi, noagta no siopay panlilingkoran mi.

^ par. 5 Diad inlabas na taon, nagmaliw met a Tasi si tatay, nanay, atsik, tan duaran agagik.