Onlad karga

Onlad saray karga

Sikayo ray Napanmatalkan a Manag-asikaso!

Sikayo ray Napanmatalkan a Manag-asikaso!

“Agyo kayarian so inkasikayo.”​—1 COR. 6:19.

1. Antoy panmoria na totoo ed panangaripen?

MANGA 2,500 taon lay apalabas, oniay imbaga na sakey a Griegon managsulat: “Anggapoy toon malabay ya manpaaripen.” Dakel so onabobon ed saratan a salita. No narerengel na totoo so salitan panangaripen, say nanonotan da et panamairap tan aliwan bulos, tan say nagugunggonaan labat ed kimey tan sakripisyo ra et saramay katawan da odino mangaaripen ed sikara.

2, 3. (a) Antoy panliliketan na saray aripen, odino lingkor na Kristo? (b) Anto ran tepet nipaakar ed panag-asikaso so pantongtongan tayo?

2 Balet, imbaga nen Jesus ya magmaliw a mapaabeban lingkor odino aripen iray papatumbok to. Sayan panag-aripen ed saray tuan Kristiano et agmakapabaing odino maruksa. Galangen, panmatalkan, tan respetoen irayan aripen. Singa bilang, imanoen so imbaga nen Jesus nipaakar ed sakey ya “aripen” antis na ipatey To. Impasakbay na Kristo ya ikdan to na kimey so “matoor tan makabat ya aripen.”​—Mat. 24:45-47.

3 Diad miparan salaysay, tinawag iyan aripen bilang “manag-asikaso.” (Basaen so Lucas 12:42-44.) Maslak ed saray matoor a Kristiano natan et aliwan kabiangan na satan a matoor ya aripen a klase. Balet, ipapanengneng na Kasulatan ya amin a manlilingkor ed Dios et nibaga met a manag-asikaso. Anto ray responsabilidad da? Antoy nepeg dan panmoria ed saratan? Pian naamtaan tayo, pantongtongan tayoy kimey na saray manag-asikaso nensaman.

SAY KIMEY NA SARAY MANAG-ASIKASO

4, 5. Anto ray responsabilidad na saray manag-asikaso nensaman? Mangiter na saray alimbawa.

4 Nensaman, mabetbet ya imamatalek ed sakey a manag-asikaso so pamilya odino negosyo na katawan to.  Maslak ed saray manag-asikaso et walaan na autoridad tan niasain a mangasikaso ed kayarian na pamilya, kuarta, tan arum nin lingkor na katawan to. Ontan so situasyon nen Eliezer ya angimatalekan nen Abraham na dakel a kaykayarian to. Nayarin sikato imay imbaki nen Abraham ya onlad Mesopotamia pian iyanapan na asawaen si Isaac. Talagan importante itan ya asainmin!​—Gen. 13:2; 15:2; 24:2-4.

5 Inasikaso na apo nen Abraham ya si Jose so kayarian na pamilya nen Potifar. (Gen. 39:1, 2) Ag-abayag, awalaan na manag-asikaso si Jose ya tinuron ‘mangasikaso ed abung to.’ Inasikaso toy impamarawes ed samploran agagi nen Jose. Tan unong ed ganggan nen Jose, implano toy gawaen pian ompaway a “tinakew” so pilak a kopa. Kanian, baleg so responsabilidad na saray manag-asikaso.​—Gen. 43:19-25; 44:1-12.

6. Anto ran nanduruman responsabilidad so niiter ed saray elder?

6 Kalabas na pigaran siglo, insulat nen apostol Pablo a saray Kristianon manangasikaso et magmaliw a “manag-asikaso a tinuro na Dios.” (Tito 1:7) Bilang tinuro a pastol na “pulok na Dios,” sikaray mangigigiya tan mangidadaulo ed saray kongregasyon. (1 Ped. 5:1, 2) Siempre, walaan ira na nanduruman responsabilidad. Singa bilang, maslak ed saray elder et manlilingkor ed sakey a kongregasyon. Saray ombiabiahen manangasikaso et manlilingkor ed dakel a kongregasyon. Tan saray membro na Branch Committee so mangaasikaso ed saray kongregasyon ed interon bansa. Balet antokaman so kimey da, kaukolan ya matoor dan gawaen itan lapud amin da et “walay eebatan” ed Dios.​—Heb. 13:17.

7. Akin a nibagan amin a Kristiano et manag-asikaso?

7 Balet, panon to iramay matoor a Kristiano ya aliwan manangasikaso? Oniay insulat nen apostol Pedro: “Unong a say kada sakey et akaawat na langkap, usar yo itan diad panlingkor ed sakey tan sakey bilang maong iran manag-asikaso ya akaawat na agnaparaan a kaabigan na Dios a nipapatnag diad nanduruman paraan.” (1 Ped. 1:1; 4:10) Lapud agnaparaan a kaabigan na Dios inikdan to tayon amin na langkap, abilidad, odino talento a nausar tayo pian natulongan iray kapananisiaan tayo. Kanian, amin a lingkor na Dios et manag-asikaso a gagalangen, panmamatalkan, tan walaan na responsabilidad.

KAYARIAN ITAYO NA DIOS

8. Anton importantin prinsipyo so kaukolan tayon tandaan?

8 Pantongtongan tayo natan so taloran prinsipyon kaukolan tayon imanoen bilang manag-asikaso. Unona: Kayarian itayo na Dios tan walay eebatan tayod sikato. Insulat nen Pablo: “Agyo kayarian so inkasikayo, ta sikayoy sinaliw ed sakey a bili,” say bilay ya insakripisyo na Kristo. (1 Cor. 6:19, 20) Lapud kayarian itayo nen Jehova, obligado tayon mangunor ed saray ganggan to ya agmakapabelat. (Roma 14:8; 1 Juan 5:3) Ariripen itayo met na Kristo. Singa saramay manag-asikaso nensaman, bulos itayo​—balet say pagmaliw tayon bulos et walaay limitasyon. Kaukolan tayon gawaen so responsabilidad tayo unong a niganggan. Antokaman so pribilehyo tayo, aripen itayo na Dios tan na Kristo.

9. Panon ya impaliwawa nen Jesus so relasyon na katawan tan aripen?

9 Impaliwawa ed sikatayo nen Jesus so relasyon na katawan tan aripen. Aminsan, imbaga tod saray babangatan to so nipaakar ed sakey ya aripen ya anempet kayari sanagew ya impantrabaho. Kasin ibaga na katawan ya: “Gala la dia, dungo ka ed lamisaan”? Andi. Noagta ibaga ton: “Mangiparaan kay pangdeman ko, tan manpales ka tan serbian mo ak anggad nasumpal ak a mangan  tan oninum, tan kayarik et nayarian mo lay mangan tan oninum”? Panon ya impalinew nen Jesus iyan ilustrasyon? Intuloy to: “Kanian sikayo met, sano agawaan yo lay amin ya ingganggan ed sikayo, ibaga yon, ‘Ariripen kami labat ya andi-kakanaan. Say ginawa mi et nepeg mi labat a gawaen.’”​—Luc. 17:7-10.

10. Antoy paneknek ya aapresyaen nen Jehova iray sagpot tayod panlilingkor ed sikato?

10 Siempre, aapresyaen nen Jehova iray sagpot tayod panlilingkor ed sikato. Oniay ipapaseguro na Biblia: “Say Dios et aliwan agmatunong pian lingwanan to so gawa yo tan say aro ya impanengneng yo parad ngaran to.” (Heb. 6:10) Makatunongan iray kekerewen nen Jehova ed sikatayo. Ontan met, antokaman ya kekerewen tod sikatayo et parad pankaabigan tayo tan agbalot makapabelat. Balet singa ed parabolo nen Jesus, ag-iyuuna na aripen so sarilin panlabayan to. Labay ton ibaga sirin a sanen indedika tayoy bilay tayod Dios, pinili tayon iyuna so panlabayan to. Kasin onabobon ka?

NO ANTOY KAKAUKOLANEN NEN JEHOVA ED SIKATAYON AMIN

11, 12. Bilang manag-asikaso, anton kualidad so nepeg tayon ipatnag tan antoy nepeg tayon paliisan?

11 Say komaduan prinsipyo et: Bilang manag-asikaso, pareparehon estandarte so tutumboken tayo. Tua, wala ray responsabilidad a niasain ed pigara labat diad loob na Kristianon kongregasyon. Balet, wala ray responsabilidad ya parad sikatayon amin. Alimbawa, bilang papatumbok na Kristo tan Tasi nen Jehova, kaukolan ya manaaroan itayo. Inkuan nen Jesus ya say aro so pakabidbiran na saray tuan Kristiano. (Juan 13:35) Balet, aliwan saray kaagian tayo labat so aaroen tayo. Gagawaen tayoy anggaay nayarian tayon aroen iramay agtayo kapananisiaan. Sarag tan nepeg tayon gawaen itan.

12 Kakaukolanen met ed sikatayo so pangipanengneng na maong ya ugali. Labay tayon paliisan iray ugali tan kagagawan ag-aabobonan na Salita na Dios. Inkuan nen Pablo: “Anggan saray managlawan, odino saray managdayew ed idolo, odino saray managkalugoran, odino saray lalakin papausar parad agnisipor a gagala, odino saray lalakin onaakdol ed lalaki, odino saray matakew, odino saray maagum, odino saray managbuanges, odino saray manag-ayew, odino saray managkatkat et agda natawir so panarian na Dios.” (1 Cor. 6:9, 10) Amta tayon aliwan mainomay so itulok ed saray estandarte na Dios. Balet, nagunggonaan tayod itulok tayod saratan. Singa bilang, nawalaan tayoy paraan na panagbilay a manresultad maabig a bunigas, maong ya relasyon ed arum, tan abobonan itayo na Dios.​—Basaen so Isaias 48:17, 18.

13, 14. Anton responsabilidad so niiter ed amin a Kristiano, tan antoy nepeg a pangipasen tayod satan?

13 Tandaan tayon walay kimey a kaukolan a gawaen na sakey a manag-asikaso. Ontan met ed sikatayo. Inikdan itayo na mabmablin regalo​—say pikakabat ed katuaan. Iilaloan na Dios ya inabang tayo itan a pikakabat ed arum. (Mat. 28:19, 20) Insulat nen Pablo: “Komon ta ipasen kami na sakey a too bilang saray lingkor a mankikimey parad si Kristo tan saray manag-asikaso ya angimatalekan ed saray sagradon sekreto na Dios.” (1 Cor. 4:1) Binidbir nen Pablo a sayan impangimatalek et mankabaliksan na pangasikason maong ed “saray sagradon sekreto” tan matoor ya pangipaamtad saratan ed arum unong ya ingganggan na Katawan, si Jesu-Kristo.​—1 Cor. 9:16.

14 Ipapatnag tayon inaro tayo ray totoo diad pangipulong na katuaan ed sikara. Siempre, nandurumay situasyon na kada Kristiano. Aliwan parepareho so nagawaan tayod ministeryo. Natatalosan itan nen Jehova. Say importante, bilang indibidual et  gawaen tayoy amin a nayarian tayo. No ontan so gawaen tayo, ipapanengneng tayoy masakripisyon panangaro ed Dios tan ed saray totoo.

Matoor tayo komon a gawaen iray asainmin a niiter ed sikatayo

KAIMPORTANTIAN NA PANMATOOR

15-17. (a) Akin et kakkaukolan a magmaliw a matoor so sakey a manag-asikaso? (b) Panon ya inyilustra nen Jesus iray resulta na agpanmatoor?

15 Say komatlon prinsipyo et: Kaukolan tayoy magmaliw a matoor tan napanmatalekan. Nayarin dakel so marakep ya ugali tan abilidad na manag-asikaso, balet anggapoy kana na saratan no sikatoy iresponsabli odino agmatoor ed katawan to. Kaukolan so katooran pian magmaliw ya epektibo, tan matalonan manag-asikaso. Imbaga nen Pablo: “Say aanapen ed saray manag-asikaso et samay toon peteg a matoor.”​—1 Cor. 4:2.

16 No manmatoor tayo, seguradon nabendisyonan itayo. Balet no agtayo manmatoor, naandi panangabobon na Dios ed sikatayo. Indanet iya nen Jesus ed samay ilustrasyon to nipaakar ed saray talento. Akomendaan tan abendisyonan iramay matoor ya aripen ya anginegosyo na saray talenton inmatalek na katawan da. Balet, samay iresponsablin aripen ya ag-angusar ed talento et tinawag a “mauges,” “mangiras,” tan “andi-kakanaan.” Binawi ni ingen imay walad sikaton talento, tan sikatoy imbantak ed paway.​—Basaen so Mateo 25:14-18, 23, 26, 28-30.

17 Diad sakey nin ilustrasyon, indanet nen Jesus so resultay agpanmatoor. Inkuan to: “Walay sakey a toon mayaman a walaan na sakey a manag-asikaso, a pinalsaan a mandadarak ed kaykayarian to. Kanian sikatoy tinawag to tan inkuan to ed sikato, ‘Anto itay narerengelan ko nipaakar ed sika? Iter mo ed siak so kuenta na agawaan mo bilang manag-asikaso, ta agka la nayarin  mangasikaso ed abung.’” (Luc. 16:1, 2) Lapud dinarak na manag-asikaso so kayarian na katawan to, sikatoy inekal na katawan to. Talagan pakaaralan tayo iya! Seguradon labay tayoy mansiansian matoor ed saray pagagawad sikatayo.

DUGA KASIN IKOMPARAY SARILI TAYOD ARUM?

18. Akin et agnepeg ya ikomparay sarili tayod arum?

18 Oniay nayarin itepet tayod sarili tayo: ‘Antoy panmoriak ed kimey ko bilang manag-asikaso?’ Nayarin onlesa iray problema no ikompara tayoy sarili tayod nagagawaan na arum. Oniay simbawa na Biblia: “Paneknekan komon na kada sakey so kimey ton dili, tan kayari na satan et sikatoy makapanliket nipaakar ed sikato lambengat, ya agto ikokomparay inkasikato ed arum a too.” (Gal. 6:4) Imbes ya ikomparay sarili ed arum, say kaukolan ya panpokusan tayo et saray kimey a sarag tayon gawaen. Ontulong iyad sikatayon agmagmaliw a mapaatagey tan napaliisay pakadismaya. Diad pangusisa tayod sarili tayo, nepeg tayon nonoten a manguuman iray kipapasen. Nayarin lapud ikakapuy na laman, itatatken, odino arum nin responsabilidad et agtayo la nagawaan iramay datin nagagawaan tayo. Balet, ompan mas dakel lay nagawaan tayo natan. Agta marakep no palaknaben tayoy kimey tayo?

19. Akin ya agtayo nepeg a nadismaya no agtayo naawat so iilaloan tayon pribilehyo?

19 Say sakey nin ikonsidera tayo et no anto ran responsabilidad so walad sikatayo odino labay tayon niwalad sikatayo. Singa bilang, labay na sakey a brother so manlingkor bilang elder ed kongregasyon odino nawalaay parte ed saray asemblea tan kombension. Maabig no gawaen toy anggaay nayarian ton onkualipika ed sarayan pribilehyo. Balet, agkomon nadidismaya no agniiter irayan pribilehyo diad panaon ya iilaloan to. Wala ray agtayo amtan rason no akin ya agniiter ed sikatayo so arum a pribilehyo. Ontan so agawad si Moises. Sikatoy singa akaparaan lan mangidaulo ed saray Israelita papaway ed Ehipto, balet kaukolan to ni manalagar na 40 taon antis ton nagawaan itan. Saya so angiter ed sikato na pankanawnawan nabayuboan iray kualidad a kakkaukolan to pian idaulo iray benger tan rebelyoson totoo.​—Gawa 7:22-25, 30-34.

20. Antoy naaralan tayod alimbawa nen Jonatan?

20 No maminsan, wala ray pribilehyon talagan agniiter ed sikatayo. Ontan so agawad si Jonatan. Sikatoy anak nen Saul, kanian sikatoy makanepegan ya onsublay bilang ari na Israel. Balet say pinili na Dios a magmaliw ya ari et si David a mas ugaw nen say sikato. Antoy reaksion nen Jonatan? Inawat to itan, tan sinuportaan toy David anggan niiyan ed peligroy bilay to. Inkuan tod si David: “Sika so manari ed Israel, tan siak so saginonor ed sika.” (1 Sam. 23:17) Antoy kabaliksan na saya? Inawat nen Jonatan so situasyon to, agto inalig so ama ton nanimon ed si David. Imbes ya manimon ed pribilehyon niiter ed arum, mas marakep no amin tayo et manpokus ed pribilehyon walad sikatayo. Naseguro tayon diad balon mundo, peneken nen Jehova iray dugan pilalek na amin ya lingkor to.

21. Antoy nepeg a panmoria tayod kimey tayo bilang manag-asikaso?

21 Tandaan tayo a bilang napanmatalkan ya manag-asikaso et agtayo naeeksperiensyay maruksan panag-aripen a sengegay irap tan ermen. Imbes, panliliketan tayoy baleg a pribilehyon mibiang ed aglan balot naulit ya kimey a panangipulong na maong a balita diad sayan kaunoran iran agew. Legan tayon mibibiang ed satan, maliket itayo ta bulos tayon gagawaey responsabilidad tayo. Magmaliw tayo komon a matoor a manag-asikaso. Tan pablien tayoy pribilehyon panlingkoran so Sankatagyan ed uniberso!