Onlad karga

Onlad saray karga

Dakel Iray Bendisyon ed Siak

Dakel Iray Bendisyon ed Siak

 Dakel Iray Bendisyon ed Siak

Unong ed salaysay nen Arthur Bonno

SAY taon ed saman et 1951. Nadngel mi nen asawak ya si Edith diad distriton kombension so pakabat ya walay miting parad saray interesadon manmisionaryo.

“Gala, mimiting ta!” so inkuan ko.

“Art, aliwan parad sikata ’tan!” so ebat nen Edith.

“Sige la Edie, ondengel ta met labat.”

Kayari miting, angiter iray application form parad Gilead School.

“Man-apply ta,” so kuan ko.

“Balet Art, panon to la ray pamilya ta ey?”

Manga sakey tan kapalduan taon kayari na saman a kombension, nanaral kami ed Gilead tan niasain kamin manserbi diad Ecuador, South America.

Nayarin naimano yo ed samay impantongtong mi nen asawak diad saman a kombension a no maminsan et mapilit ak, tan abaloan ko et sarasarag kon gawaen so antokaman a labay ko. Si Edith balet et agmasmasel tan mauyamo. Sikatoy binmaleg ed melag a baley na Elizabeth, Pennsylvania, U.S.A., tan agto nin balot asali inmarawi, ni anggan akapikabat ed foreigner. Kanian mairap parad sikato a taynan so pamilya to. Anggaman ontan, mabulbulos ton inawat so asainmin a manserbi ed arum a bansa. Nen 1954, akasabi kami ed Ecuador tan manlapu la’d saman et manseserbi kami ed sayan bansa bilang misionero. Legan min wadia, dakel iray bendisyon ed sikami. Labay yon naamtaan so arum ed saraya?

Agnalinglingwanan Iran Eksperiensya

Say sankaunaan ya asainmin mi et diad kabiseran syudad ya Quito, manga 2,850 metro so kaatagey to diad Kapalandeyan na Andes. Manlapud baybay a syudad na Guayaquil, duay agew kamin nambiahe panamegley na tren tan trak​—balet natan et 30 minutos labat a biahien panamegley na eroplano! Agmi nalinglingwanan so apat taon ya impanserbi mi’d Quito. Insan nen 1958, wala lamet so bendisyon ed sikami: Naimbitaan kamin manlingkor ed sirkito.

 Diad saman et wala labat lay duaran melag a sirkito ed interon bansa. Kanian likud ni’d pambibisita mi ed saray kongregasyon, pigay simba kami met a manpupulong ed angkelag iran baley na saray Indian ya anggapo ni Tasi. Saray ayaman diman et kuarton melag ya anggapoy bintana tan dukolan labat so wala. Walay awit min kaban ya anginan mi na kusinilya, kawali, pap-plato, palanggana, ule-ules, moskitiro, kawe-kawes, daan iran dyaryo, tan arum ni ra. Iramay dyaryo et impupulet mi’d abot pian medyo nairapan a makaloob iray utot.

Anggano ambilunget tan marutak iraman a kuarto, walaray agmi nalinglingwanan ed saray pantotongtong mi kada labi legan ya akayurong ed dukolan, tan walay simplin panangan ya inluto ed kusinilya mi. No maminsan et aanamoten nen asawak irayan pankanawnawa pian ibaga’d siak no panon kon napaaligwas so pitotongtong ko’d saray agagin bibisitaen mi ta ugalik so bengatbengat a mansalita. Dinengel koy imbaga to, kanian nagmaliw a mas makapaseseg so imbibisitak. Insan no walay nibagak ya makapuy nipaakar ed arum, sikatoy agla onesel. Kanian naaralan kon pansiansiaen a positibo so panmoriak ed saray agagi. Balet say kaslakan min pantotongtongan no labi et saray punton naaralan mi’d saray artikulo na Say Panag-Bantayan tan saray eksperiensya mi ed lawak na kimeyan ed satan ya agew. Tan talagan marakdakep iray eksperiensya mi!

No Panon Min Nalmo si Carlos

Diad baley na Jipijapa ed bandad sagur na Ecuador, walay niiter ed sikamin ngaran na interesadon too, Carlos Mejía. Balet lapud kangara-ngaran labat, agmi amtay pananapan mi. Kanian kaimbuasan et basta kami labat nanakar pian anapen iyan too. Maal-alwar kami pian agnikutep ed mapitek ya dalan ta makmaksil so uran ed samay labi. Akauna ak ya nanakar nen si asawak, kabebekta et walay biglan inmeyag na “Art!” Kalingaw ko, si Edie manaya ya nikutep anggad pueg. Makapalek so itsura to, balet ta pinigilan koy onelek ta makakaakis la.

Naagwat koy Edie balet atilak so sapatos to’d pitek. Walaray ugugaw a mamapbantay ed sikami kanian imbagak ed sikara, “Upaan ta kayo no naala yoy nikutep ya sapatos.” Nala ran tampol so sapatos, balet kaukolan nen Edie so manuras. Anengneng na ina na ugugaw so agawa tan pinatuloy to kami’d abung da, tan tinulongan to ni ingey asawak ya manuras legan ya lilinisan na ugugaw so mapitek a sapatos. Antis kamin inmalis, walay balibalin agawa. Tinepet ko’d samay ina no kabat toy Carlos Mejía. Mankelkelaw ton inkuan, “E, mister ko man.” Ag-abayag, nigapoy panangiyaral na Biblia, tan diad saginonor et abautismoan so interon pamilya. Kayari pigay taon, nagmaliw ya espisyal payunir si Carlos, si asawa to, tan duara ed saray anak da.

Mairap Iran Biahe, Makapaseseg a Panamarawes

Mairap so panagbiahe ed sirkiton bibisitaen mi. Onlulugan kami’d bus, tren, trak, baloto, tan melag iran eroplano. Aminsan, inibaan kami nen John McLenachan, a manangasikaso na distrito, tan say asawa ton si Dorothy, a manpulong ed saray baryo na saray sumisigay ya asingger ed ketegan na Colombia. Linmugan kami’d baloton de-motor. Kabebekta walaray pating ya singa kabaleg na baloto ya sibersiber ed sikami! Anggan samay eksperiensyadon managlayag et ataktakot ed kabaleg na saray pating kanian inyasingger to’d sakbit so baloto.

Saray naeksperiensya mi’d kimey ed sirkito balet et mas agnalinglingwanan. Akabat mi ray maomaong tan maparawes ya agagi.  Mabetbet ya ipipilit na pamilyan pampupundoan mi a mangan kami a mamitlo’d sanagew, sikara balet maminsan labat a mangan. Odino ipalugar da’d sikami so saksakey kalamor a dukolan da, sikara balet et diad datal. Lanang ya ibabaga na asawak ya, “Impamoria’d siak na sarayan agagi ya daiset labat a talagay kaukolan tayo ed bilay.”

“Agmi Labay so Ontunda”

Nen 1960, wala lamet so bendisyon ed sikami​—naimbitaan kamin manlingkor ed sangan opisina diad Guayaquil. Legan kon mankikimey ed opisina, manlilingkor si Edith ed lawak, diad asingger ya kongregasyon. Agkon balot inisip so pantrabaho’d opisina ta singa agko sarag. Balet singa ibabaga na Hebreos 13:21, say Dios so mangitatarya “na amin a maabig a bengatla pian nagawaan . . . so linawa to.” Kayari duay taon, naimbitaan ak ya manaral na samploy bulan a kurso ed Gilead diad Bethel ed Brooklyn, New York. Nensaman, saray kaasawaan a bibii et ontilak ed asainmin da. Kanian sinulatan na Brooklyn so asawak. Kinerew dan nonoten ton maong no kasin onabuloy ya makaarawi ak ed loob na samploy bulan.

Bilang ebat, oniay insulat nen Edith: “Siempre aliwa ’yan mainomay, balet amta min tulongan kami nen Jehova ed antokaman a mairap ya situasyon. . . . Agmi labay so ontunda ya mangawat ed anggan anton pribilehyo odino pankanawnawan magmaliw ya mas kualipikadon manumpal ed saray responsabilidad mi.” Legan kon walad Brooklyn, sinimba-simba ak ya susulatan nen asawak.

Nanserbin Kaiba Iray Matoor ya Agagi

Nen 1966, lapud problema’d bunigas, pinmawil kami nen Edith ed Quito, tan intuloy mi nanmisionero a kaiba ray agagi diman. Talagan matoor iraman ya agagi!

Walay sakey ya matoor a sister ya mabetbet a sasakitan na aliwan Tasin asawa to. Aminsan, diad alas sais na kabuasan et walay angibaga’d sikami ya sinakitan lamet na asawa to iman ya sister. Linma ak a tampol ed abung da. Tan agak makapanisia’d anengneng ko. Asabian kon akarukol ya say laman to et linmalarag tan asireg-sireg, ta sikatoy pinekpek lan pinekpek na asawa to na putan na panis ya anggad aputer itan. Diad saman lanlamang ya agew, asabian koy asawa to ed abung da tan inkuan kon aliwan kagagawa na laki so ginawa to. Ontan lay inkerew to na dispensa.

Nen manga 1970’s, maabig lay bunigas ko tan nankimey kami lamet ed sirkito. Kabiangan na sirkito mi so syudad na Ibarra. Sanen binisita mi itan a sirkito nen 1950’s, duatduara ni labat so Tasi ditan, sakey a misionero tan sakey ya agin taga’d tan. Kanian, pirpirawat min nakabat iray dakel a balon agagi ed satan a kongregasyon.

Diad inmunan impiaral mi, inkondukta nen Brother Rodrigo Vaca so sakey a parte  a mankomento iray dumerengel. Kada no mantepet, imbes ya itagey na saray mankomento so lima ra, ibaga ray, “Yo, yo!” (“Siak, siak!”). Kanian mankelkelaw kamin manlinggisan nen Edith. ‘Akin et onia dia?’ so naisip ko. Insan mi naamtaan ya bulag manaya si Brother Vaca, balet ta nibiig toy boses na saray kakongregasyon to. Talagan sikatoy sakey a pastol ya kabkabat to ray karnero to! Ipapanonot met na saya imay imbaga nen Jesus a walad Juan 10:3, 4, 14 nipaakar ed Maong a Managpastol tan saray karnero ya kabkabat day balang sakey. Natan diad Ibarra, anemira lay kongregasyon ya Spanish, sakey ya Quichua, tan sakey ya sign language. Siansia nin matoor a manlilingkor si Brother Vaca bilang elder tan espisyal payunir. *

Misalsalamat ed Kaabigan nen Jehova

Nen 1974, apatnagan mi lamet so kaabigan nen Jehova sanen naimbitaan kamin ompawil ed Bethel, a ditan et niasain ak lamet a mankimey ed opisina tan ag-abayag et aturon membro na Branch Committee. Nen inmuna, niasain si Edith ed kusina, tan ag-abayag et niyalis a mantrabaho ed opisina bilang mail clerk ya angga ni’d natan.

Diad inlalabas na saray taon, dakel lay naabrasa min misioneron nanaral ed Gilead, a mamapaseseg tan mamapabiskeg ed espiritualidad na saray kongregasyon a panlilingkoran da. Napapaseseg kami met na saray agagin nanlalapud masulok a 30 bansa pian manlingkor dia. Pandinayewan mi so inkamasakripisyo ra! Inlako na arum so kaabungan tan negosyo ra pian makakar dia tan makapanlingkor ed saray pasen a baleg so pankaukolan parad saray managpulong na Panarian. Angaliw iray luluganan pian makapanpulong ed ararawin rehyon, makapangiletneg na balo iran kongregasyon, tan ontulong a manpaalagey na saray Kingdom Hall. Dakel met so mamarikit a taga arum a bansa ya nampayunir dia. Talagan maseseg tan maabilidad ira!

On, dakel iray bendisyon ed siak diad saray taon na panseserbik ed Dios. Say manuna ed saraya et say relasyon ko ed si Jehova. Ontan met, misalsalamat ak ed si Jehova ta inikdan to ak na “katulongan.” (Gen. 2:18) No iisipen koy 69 taon ya impanulop mi bilang sanasawa, nipapanonot ed siak so Probirbio 18:22 (Maung a Balita): “Say toon akalmo na maong ya asawa to akaromog na maong a bengatla.” Makapaliket ya kaibay Edith. Dakel so nitulong to’d siak. Sikatoy maad-aro met ya anak ed ina to. Manlapu la nen sinmabi kami diad Ecuador, sinimba-simban susulatan nen asawak so nanay to anggad impatey nen nanay to nen 1990, diad edad ya 97.

Nubentak la natan, tan si Edith et 89 la. Papablien mi so pribilehyon akatulong ed manga 70 totoo ya akapikabat ed si Jehova. Maong labat ta nan-apply kami ed Gilead School, 60 taon lay apalabas. Saman a desisyon mi et nanresulta’d impakaawat mi na dakel a bendisyon.

[Paimano ed leksab]

^ par. 29 Say istoryay bilay nen Brother Vaca et nabasa ed Setyembre 8, 1985, ya isyu na Awake!

[Litrato ed pahina 29]

Diad Yankee Stadium ed New York, kaibak iray kaparan misionero diad klase mi ed Gilead nen 1958

[Litrato ed pahina 31]

Diad abung na sakey a pamilyan Tasi legan kon ombibisita ed sirkito nen 1959

[Litrato ed pahina 32]

Diad sangan opisina ed Ecuador nen 2002