Onlad karga

Onlad saray karga

“Siopa so Akaamta La ed Kanonotan nen Jehova?”

“Siopa so Akaamta La ed Kanonotan nen Jehova?”

 “Siopa so Akaamta La ed Kanonotan nen Jehova?”

“‘Siopa so akaamta la ed kanonotan nen Jehova, ta pian sikatoy ibangat to?’ Balet walaan itayo na kanonotan nen Kristo.”​—1 COR. 2:16.

1, 2. (a) Anto so naeeksperiensya na dakel a totoo? (b) Antoy nepeg tayon tandaan nipaakar ed panagnonot tayo tan nen Jehova?

KASIN no maminsan et mairap mon talosay panagnonot na arum a totoo? No balon kasal ka ni labat, nayarin agmo ni tanton natatalosay panagnonot na asawam. On, nandumaay panagnonot tan anggan pananalita na lalaki tan bibii. Diad arum a kultura ingen et dumay terminon uusaren na lalaki tan bibii anggano parehoy lenguahe ra! Niarum ni, lapud panduruma na kultura tan lenguahe, nanduruma met so panagnonot tan kakikiwas. Balet, no kapigan mo nakakabat so arum, diman ka nawalaay pankanawnawan gapoan a talosan so panagnonot da.

2 Agtayo nepeg a pankelawan sirin a say panagnonot tayo et duman tuloy ed panagnonot nen Jehova. Diad panamegley nen propetan Isaias et oniay imbaga nen Jehova ed saray Israelita: “Saray kanonotan ko agyo kanonotan, et saray dalan yo aliwa ra met a daladalan ko.” Insan, oniay impangiyaliling nen Jehova: “Ta unong ya atagtagey so saray tawen nen say dalin, ontan ira so saray dalan ko atagtagey ira nen saray dalan yo, tan saray kanonotan ko nen saray kanonotan yo.”​—Isa. 55:8, 9.

3. Anto so duaran paraan pian ‘makapikaaro itayo ed si Jehova’?

3 Balet, labay kasin ibaga na saya ya agti’ la anggan salien a talosan so panagnonot nen Jehova? Andi. Anggaman agtayon balot sigpot a natalosan so kanonotan to, siansia nin papasesegen itayo na Biblia ya ‘mikaaro ed si Jehova.’ (Basaen so Salmo 25:14; Uliran 3:32.) Say sakey a paraan pian onapit itayo ed sikato et diad pangipanengneng na panamabli tan pangimano ed saray ginawa to ya akarekord ed Salita to, say Biblia. (Sal. 28:5) Say sananey nin paraan et diad pangamta ed “kanonotan nen Kristo” a “kaulibay na agnanengneng a Dios.” (1 Cor. 2:16; Col. 1:15) No ipanaon tayon aralen tan dalepdepen iray salaysay ed Biblia, naamtaan tayo iray kualidad to tan natalosan tayo so panagnonot to.

Paliisan so Makapuy a Tendensia

4, 5. (a) Anton makapuy a tendensia so kaukolan tayon paliisan? Ipaliwawa. (b) Anto so negatibon ninonot na saray Israelita?

4 Legan tayon dadalepdepen iray desisyon nen Jehova, nepeg a paliisan tayoy tendensian sikatoy ukomen base ed estandarte na too. Sayan tendensia et napatnagan ed imbaga nen Jehova: “Abaloan yon singa ak sikayo.” (Sal. 50:21, Maung a Balita) Mipadpara itan ed samay inkuan na sakey ya iskolar na Biblia, masulok lan 175 a taon so apalabas: “Saray totoo et walay tendensia ran ukomen so Dios base ed estandarte ra, tan iisipen dan kaukolan ya ontulok so Dios ed saray ganggan a tutumboken da.”

5 Agtayo komon ibabase so panmoria tayo’d si Jehova ed saray dilin estandarte tan labay tayo. Akin? Lapud legan tayon aaralen so Kasulatan, ompan liknaen tayon walaray ginawa nen Jehova a singa aliwan duga, base ed limitado tan ag-ayadyarin nonot tayo. Ontan so negatibon ninonot na saray Israelita  kanian nankonklusyon ira laingen ya aliwan dugay pidedeneng nen Jehova ed sikara. Imanoen pa no antoy imbaga ed sikara nen Jehova: “Kuan yo, ‘Aliwan matunong so gagawaen na Katawan a Dios!’ Dengel yo ak, sikayo ran Israelita. Abaloan yo aliwan maptek so gagawaen ko? Saray gagawaen yo ingen so aliwan maptek.”​—Eze. 18:25, MB.

6. Anto so kaukolan a naaralan nen Job, tan panon itayon nagunggonaan ed eksperiensya to?

6 Pian aghusgaan si Jehova base ed saray dilin estandarte tayo, nepeg ti’n awaten ya limitado so panmoria tayo tan dakel so kalilingoan tayo. Saya so kaukolan a naaralan nen Job. Legan na paniirap to, sikatoy nagmaliw ya desperado tan makasarili. Alingwanan to ray mas importantin isyu. Balet, sikatoy maaron tinulongan nen Jehova pian onlaknab so panmoria to. Sikatoy tinepetan nen Jehova na 70 tepetepet, tan anggapoy anggan sakey a naebatan to, diad ontan et impabitar nen Jehova a dagdaiset so amta nen Job. Kanian, nampaabeba si Job, tan impetek toy panmoria to.​—Basaen so Job 42:1-6.

Amtaen so “Kanonotan nen Kristo”

7. Akin a no usisaen tayo ray ginawa nen Jesus et natulongan itayon talosan so kanonotan nen Jehova?

7 Perpektoy impangalig nen Jesus ed Ama to, diad salita tan gawa. (Juan 14:9) Kanian, say pangusisa ed saray ginawa nen Jesus so ontulong ed sikatayon natalosan so kanonotan nen Jehova. (Roma 15:5; Fil. 2:5) Usisaen tayo pa natan sirin so duaran salaysay na Ebanghelyo.

8, 9. Unong ed Juan 6:1-5, anto so situasyon no akin et tinepetan nen Jesus si Felipe, tan akin et ontay ginawa nen Jesus?

8 Isipen pa iyan eksena. Asingger la’d saman so Paskua nen 32 C.E. Kasabisabi na saray apostol nen Jesus a nampulong ed interon Galilea. Lapud naksawan ira, intagar ira nen Jesus ed nisulinek a pasen diad amianen-bukig a gilig na Dayat na Galilea. Balet, tinumbok ira na nilibon totoo. Kanian, tinambal tan imbangat nen Jesus iraya, ingen ta walay problema. Iner so pangalaan na sarayan totoo na naakan da ed sayan nisulinek a pasen? Lapud amta nen Jesus a narasan la ra, oniay intepet to’d si Felipe, a taga ed saman ya lugar: “Iner so panaliwan tayo na saray tinapay ya ipakan ed sikara?”​—Juan 6:1-5.

9 Akin et tinepetan nen Jesus si Felipe? Kasin aburidoy Jesus no antoy gawaen to? Andi. Anto siri’ nononoten to? Oniay impaliwawa nen apostol Juan, a wadman met: “Imbaga [nen Jesus] iya pian suboken toy Felipe, ta amta to lan mismo no antoy gawaen to.” (Juan 6:6) Susuboken nen Jesus ed saya so espiritual ya iyaaligwas na saray disipulo to. Lapud impantepet to, nannonot ira tan inikdan to ray pankanawnawan ipatnag so panagmatalek da ed sarag ton gawaen. Balet ta sinmaew ira tan apatnagan ya aliwa nin ontan kalaknab so panmoria ra. (Basaen so Juan 6:7-9.) Insan, impanengneng nen Jesus a sarag ton gawaen so sakey a bengatlan agdan balot naisip. Mamilagro ton pinakan iramay nilibon narasan a totoo.​—Juan 6:10-13.

10-12. (a) Akin et agtampol inter nen Jesus so kerew na bii? Ipaliwawa. (b) Anto so aralen tayo natan?

10 Natulongan itayo na satan a salaysay pian natalosan so kanonotan nen Jesus diad sananey nin inkagawa. Ag-abayag kayari impamakan ed saman a nilibon totoo, si Jesus tan saray apostol to et ama-amianen, a lampas na ketegan na Israel, diad Tiro tan Sidon. Leleg dan wadman, nabet day sakey a biin Griego a mikakasi’d si Jesus a paabigey anak to. Nen unaan, sikatoy ag-inimano nen Jesus. Balet, sanen aminpigan akikasi so bii, inkuan nen Jesus ed sikato: “Paulyan a napesel nin unona so ananak, ta agmanepeg ya alaen so tinapay na ugugaw insan ibuntok itan ed saray angkekelag nin aso.”​—Mar. 7:24-27.

11 Akin et agtampol tinulongan nen Jesus so bii? Agkasi susuboken labat nen Jesus so bii, a singa ginawa to’d si Felipe, pian nanengneng so reaksion to, tan naikdan na  pankanawnawan ipatnag so pananisia to? Say tonada na boses nen Jesus, anggaman agnisulat ed Biblia, et ag-anismaya ed bii. Say terminon “angkekelag nin aso” ya angiyalilingan nen Jesus et ag-ansakit a dengelen. Kanian, si Jesus et mipara’d sakey ya ateng ya anggaman gagala ton iter so kerew na anak to, agto nin tampol impalikna pian nanengneng no talaga kasin determinado so ugaw. Antokaman so agawa, sanen impatnag na bii so pananisia to, mabulos ya impagamor nen Jesus so kerew to.​—Basaen so Marcos 7:28-30.

12 Sayan duaran salaysay na Ebanghelyo et pakalaan tayo na makanakanan aralem a pakatalos ed “kanonotan nen Kristo.” Nengnengen tayo pa natan no panon itayon natulongan na sarayan salaysay pian mas natalosan so kanonotan nen Jehova.

Impideneng nen Jehova ed si Moises

13. No natebek tayoy panagnonot nen Jesus, panon itan ya ontulong ed sikatayo?

13 No natebek tayo so paraan na panagnonot nen Jesus, natalosan tayo iray teksto ed Biblia a mairap a talosan. Alimbawa, imanoen pay imbaga nen Jehova ed si Moises sanen saray Israelita et nanggawa na balitok a kilaw a baka pian dayewen: “Anengneng ko la so katooan, et nia, so sakey a katooan ya anawet so impantenger to. Kanian taynan mo ak natan, ta ompetang so sanok ko ed sikara, tan pian upoten ko ra, et sika naani gawaen ko a baleg a nasyon.”​—Exo. 32:9, 10.

14. Antoy reaksion nen Moises ed imbaga nen Jehova?

14 Oniay katuloyan na salaysay: “Et si Moises nankerew ed kinen Jehova a Dios to, tan inkuan to, Jehova, akin et ompetang so sanok mo ed katooan mo ya inagwat mo ed dalin ya Ehipto ed sankabalgan a biskeg tan lima a makapanyari? Diad ontan salitaen naani laingen na saray Ehipsios, a kuan da, Nipaakar ed mauges so angaonan to ed sikara, ta pian pateyen to ra manaya’d man ed palpalandey, tan pian upoten to ra dia ed tapew na dalin? Paliisan mo so sebeg na sanok mo, tan babawim pa so mauges a makapairap ed katooan mo. Nonot mo ra di Abraham, Isaac, tan Israel, ya ariripen mo, a sikara so angisipanan mo a malet nisengeg ed sika lanlamang, tan inkuan mo ed sikara, Parakelen ko naani so ilalak yo a singa saray bibitewen ed tawen, tan amin na sayan dalin ya asalitak iter ko ed saray ilalak yo, et tawiren da a magnayon. Et si Jehova binabawi to so pananusa a gawaen to wari ed saray totoo to.”​—Exo. 32:11-14. *

15, 16. (a) Anto so pankanawnawa nen Moises lapud samay imbaga nen Jehova? (b) Antoy labay ya ibaga na ‘nanbabawi’ si Jehova?

15 Talaga ta’n kaukolan nen Moises ya ipetek so kanonotan nen Jehova? Siempre andi!  Anggaman imbalikas nen Jehova so iisipen ton gawaen, aliwa nin pinal so desisyon to. Noagta, susuboken to si Moises, a singa samay ginawa ed saginonor nen Jesus ed si Felipe tan ed Griegon bii. Naikdan si Moises na pankanawnawan ibagay iisipen to. * Tinuro nen Jehova si Moises a mamegley ed Israel tan ed Sikato, tan nirespeto nen Jehova itan a betang nen Moises. Manpaapekto kasi si Moises ed situasyon? Anamoten to la kasi iyan pankanawnawa pian kombinsien si Jehova a lingwanan lay Israel tan gawaen a baleg a nasyon iray ilalak to?

16 Apatnagan ed reaksion nen Moises so pananisia tan panagmatalek to ed inkahustisya nen Jehova. Nanengneng a sikatoy aliwan makasarili, noagta iyaansakit toy ngaran nen Jehova. Agto labay a naderal itan. Impanengneng sirin nen Moises a natatalosan toy “kanonotan nen Jehova” nipaakar ed saya. (1 Cor. 2:16) Antoy resulta? Lapud aliwa nin pinal so desisyon nen Jehova, imbaga na pinuyanan a salita a sikatoy ‘nanbabawi.’ Diad Hebreo, sayan balikas et mankabaliksan labat ya agto ginawa imay iisipen ton paneral ed interon nasyon.

Impideneng nen Jehova ed si Abraham

17. Panon ya impanengneng nen Jehova so agaylan inkaanos to ed si Abraham?

17 Say sakey nin alimbawa a mangipapanengneng ya iikdan nen Jehova iray lingkor to na pankanawnawan ipatnag so pananisia tan panagmatalek da et say kerew nen Abraham nipaakar ed Sodoma. Diad satan a salaysay, impanengneng nen Jehova so agaylan inkaanos to. Inabuloyan toy Abraham a maminwalon mantepet. Wala ni ingey pankanawnawan makpel ya inkuan nen Abraham: “Arawi pa komon a gawaen mo so ontan, a pipapatey mo so saray matunong ed saray bagel. Arawi komon ed sika, a saray matunong et singa saray bagel. Agta gawaen na ukom na amin a dalin so maalas?”​—Gen. 18:22-33.

18. Antoy naaralan tayo diad impideneng nen Jehova ed si Abraham?

18 Diad sayan salaysay, antoy naaralan tayo ed panagnonot nen Jehova? Kaukolan ni kasin onkonsulta si Jehova ed si Abraham pian makapandesisyon na duga? Andi. Nayari pa met a basta labat la ibaga nen Jehova no akin ya onman so desisyon to. Balet lapud inabuloyan Ton mantepet, atalosan nen Abraham so panmoria nen Jehova tan naawat toy desisyon. Atebek met nen Abraham so kaaralem na panangasi tan inkahustisya nen Jehova. On, impasen nen Jehova a kaaro si Abraham.​—Isa. 41:8; Sant. 2:23.

No Antoy Naaralan Tayo

19. Panon tayon naalig si Job?

19 Antoy naaralan tayo nipaakar ed “kanonotan nen Jehova”? Nepeg a say Salita na Dios so pangalaan tayo na dugan pakatalos ed kanonotan nen Jehova. Agtayon balot komon uukomen si Jehova base ed limitadon panmoria, estandarte, tan panagnonot tayo. Inkuan nen Job: “[Say Dios et] aliwa a sakey a too, a singa siak, pian sikato so ebatan ko, tan onloob kami a bansag ed pangukoman.”  (Job 9:32) Singa si Job, sano natatalosan tayo la so kanonotan nen Jehova, napakiwas tayon mangikelyaw na: “Melag labat irayan kabiangan na pakayari to; esaes labat so nadngel tayo. Siopay makapikabat no kaunongay kabaleg na pakayari Dios?”​—Job 26:14, MB.

20. Antoy gawaen tayo no walay nabasa tayo ed Biblia a mairap a talosan?

20 Sano babasaen tayo so Biblia, antoy gawaen tayo no walaray tekston mairap a talosan, lalo la no nipaakar ed panagnonot nen Jehova? No nan-research itayo balet ta siansia nin agmalinew, ipasen tayon nasusubok ed saya so panagmatalek tayo’d si Jehova. Tandaan, diad saray nababasa tayo no maminsan et naiikdan itayo na pankanawnawan ipanengneng so panagmatalek ed saray kualidad nen Jehova. Komon ta mapaabeba tayon bidbiren ya agtayo natalosan so amin a gagawaen to. (Ecl. 11:5) Diad ontan et napakiwas itayon miabobon ed inkuan nen apostol Pablo: “O agaylay kaaralem na kaykayamanan tan karunongan tan pikakabat na Dios! Agaylan agnausisa iray panangukom to tan agnatonton iray dalan to! Ta ‘siopay akaamta ed panagnonot nen Jehova, odino siopay nagmaliw a mananimbawa to?’ Odino, ‘Siopay inmunan angiter ed sikato, ta pian sikatoy bayaran to?’ Ta say amin a bengatla et nanlapud sikato tan wala iratan lapud sikato tan parad sikato. Sikato so nigloria komon ed andi-anggaan. Amen.”​—Roma 11:33-36.

[Saray paimano ed leksab]

^ par. 14 Walay piparaan na sayan salaysay ed Numeros 14:11-20.

^ par. 15 Unong ed arum ya iskolar, say Hebreon salita ya impatalos a “taynan mo ak” diad Exodo 32:10 et nayarin mankabaliksan a tatangguyoren odino aabuloyan si Moises a magmaliw a manamegley odino singa “bakor” ed baetan nen Jehova tan nasyon na Israel. (Sal. 106:23; Eze. 22:30) Antokaman so situasyon, mapatpatnag ya agnatatakot si Moises a mangibaga na opinyon to’d si Jehova.

Nanonotan Mo Ni?

• Panon tayon napaliisan so tendensian ukomen si Jehova base ed saray estandarte tayo?

• Akin a no usisaen tayo ray ginawa nen Jesus et ‘makapikaaro tayo ed si Jehova’?

• Antoray naaralan mo diad impitongtong nen Jehova ed si Moises tan Abraham?

[Tepetepet Parad Panagaral]

[Saray litrato ed pahina 5]

Antoy naaralan tayo ed panagnonot nen Jehova diad impideneng to’d si Moises tan Abraham?