Lawas Awaten so Panagdisiplina nen Jehova
Lawas Awaten so Panagdisiplina nen Jehova
“Agmo mudmoraen so pananusa [“panagdisiplina,” NW] nen Jehova.”—ULIRAN 3:11.
1. Akin a nepeg tayon awaten so panagdisiplina na Dios?
SI Solomon ya ari ed Israel nensaman so angiter na maabig a rason pian awaten so panagdisiplina na Dios. Oniay inkuan to: ‘Ana’ko, agmo mudmoraen so panagdisiplina nen Jehova; agka met onsawa ed panamaat to. Ta say aroen nen Jehova baaten to, singa sakey ya ama a manliket ed anak.’ (Uliran 3:11, 12) On, sika so didisiplinaen na mangatatawen ya Ama lapud inaro to ka.
2. Panon a naukeran so “panagdisiplina,” tan panon a nadisiplina so sakey a too?
2 Say “panagdisiplina” so manutukoy ed panagkastigo, panametek, panamilin, tan panangibangat. ‘Anggapo so pananusa [odino, disiplina] natan a singa sengegan na liket, noag ingen kaermenan,’ so insulat nen apostol Pablo, ‘balet kayari na satan et mangiter na bunga a mareen na inkatunong ed saray nailuam la lapu ed satan.’ (Hebreos 12:11) Makatulong so pangawat tan pangiyaplika ed panagdisiplina na Dios pian makapankurang ka ed matunong a dalan tan lalon napaapit ka ed masanton Dios, si Jehova. (Salmo 99:5) Say panametek so nayarin nagamoran diad panamegley na saray kapananisiaan, diad panamegley na saray bengatlan naaaralan ed saray Makristianon pantitipon, tan diad panagaral yo ed Salitay Dios tan saray publikasyon na “managpaga a napanmatalkan.” (Lucas 12:42-44) Agaylay pisalamat yo sano walay nipaimano ed sikayo a nakaukolan yon umanen! Balet anton disiplina so nayarin kakaukolanen no walay agawan ambelat a kasalanan?
No Akin a Walaray Nadidispelosip
3. Kapigan gawaen so panagdispelosip?
3 Aaralen na saray lingkor na Dios so Biblia tan saray Makristianon publikasyon. Saray estandarte nen Jehova so sisingbaten diad saray pantitipon, asamblea, tan kombension da. Kanian naaamtaan na saray Kristiano no anto so kakaukolanen ed sikara nen Jehova. Gawaen labat so panagdispelosip no say sakey a membro na kongregasyon et agmagbabawin manggagawa na ambelat a kasalanan.
4, 5. Anton Makasulatan ya alimbawa na panagdispelosip so nipabitar dia, tan akin a pinaseseg so kongregasyon ya ipawil da so too?
4 Konsideraen so Makasulatan ya alimbawa na panagdispelosip. Kinonsenti na kongregasyon ed Corinto so sakey a “lawanan [ya] anggapo ni ed saray Gentiles, ta sakey ed sikayo kayarianen to so asawa na ama to.” Pinaseseg nen Pablo iray taga-Corinto a “yawat komon itan a too ed Satanas a kaderal na laman, pian say espiritu [et] nilaban.” (1 Corinto 5:1-5) Sanen adispelosip tan inyawat la ed si Satanas, say nankasalanan so nagmaliw lamet a kabiangan na mundo na Diablo. (1 Juan 5:19) Lapud impakaekal to, naandi so mauges tan minumundon impluensya ed kongregasyon tan nansiansia so maridios ya “espiritu,” odino say manunan awawey na satan.—2 Timoteo 4:22; 1 Corinto 5:11-13.
5 Agnambayag kayari na satan, pinaseseg nen Pablo iray Kristiano ed Corinto ya ipawil da la imay nankasalanan. Akin? Ta pian sikara so ‘agnatalonggaringan nen Satanas,’ so inkuan na apostol. Say managkasalanan so mapatnag a nagbabawi la tan nilinisan to lay bilay to. (2 Corinto 2:8-11) No sayan magbabawin too et agla ipawil na saray taga-Corinto, sikara so talonggaringan nen Satanas lapud magmaliw ira ya andian lay pililikna tan panamerdona a singa kaliktan na Diablo a pagmaliwan da. Maseguro, sikara so tampol ya ‘amerdona tan nanligliwa’ ed saman a nagbabawin too.—2 Corinto 2:5-7.
6. Anto so resulta na panagdispelosip?
6 Anto so resulta na panagdispelosip? Ekalen na satan so kabandayan ed masanton ngaran nen Jehova tan protektaan na satan so maabig a reputasyon na totoo to. (1 Pedro 1:14-16) Say pangekal ed agmagbabawin managkasalanan ed kongregasyon so mangitandoro ed saray estandarte na Dios tan pansiansiaen na satan so espiritual a kalinisan na kongregasyon. Ipamoria met na satan ed agmagbabawin too so inkaseryoso na kasalanan to.
Baleg so Nagawaan na Panagbabawi
7. Anto so epekto na ag-impangipatua nen David ed saray impakasunggay to?
7 Maslak ed saramay seryoson akapankasalanan so peteg a magbabawi tan agdidispelosipen ed kongregasyon. Siempre, say puron panagbabawi so agmainomay a nipatnag. Konsideraen pa si Arin David na Israel, ya angisulat ed Salmo 32. Ipaparungtal na sayan kanta so peryodo na panaon ya ag-impatua nen David iray seryoson kasalanan to, a maseguron mangilalanor ed si Batseba. Say epekto na satan et sikato so kinmapuy lapud pakakagonigon to ed saray kasalanan to, a singa kiew a namamagaan lapud ampetapetang a tiagew. Nanirap si David diad pisikal tan mental, balet sanen ‘impatua to iray impakasunggay to, sikato so pinerdona nen Jehova.’ (Salmo 32:3-5) Insan oniay inkanta nen David: “Mapalar so too ya agnapakasalanan ed Jehova ed kasulitan.” (Salmo 32:1, 2) Agaylan abig a naeksperiensya so panangasi na Dios!
8, 9. Panon a nipatnag so panagbabawi, tan kaunongan kaimportante itan pian nadetermina no nayari lan ipawil so sakey ya adispelosip?
8 Malinew sirin a say sakey a nankasalanan so nepeg a magbabawi ta pian nagamoran to so panangasi. Balet, say panagbabawi et aliwa a pakababaingan odino pakatatakot a naamtaan so kasalanan. Say ‘panagbabawi’ et mankabaliksan na “panguman na sakey ed kanonotan to” nipaakar ed mauges a kondukta, lapud paneermen to. Say magbabawin too et walaan na “puso a maralit tan mansisibkel” tan labay ton ‘ipetek so lingo’ no posible.—Salmo 51:17; 2 Corinto 7:11, NW.
9 Importantin tuloy so panagbabawi pian nadetermina no nayari lan ipawil ed loob na Kristianon kongregasyon so sakey ya adispelosip. Say adispelosip a too so aliwan automatikon awaten ed loob na kongregasyon kayari na inlabas na sakey a panat na panaon. Sakbay a sikatoy nipawil, say kipapasen na puso to so nepeg a manguman a maong. Nepeg a namoria to so belat na kasalanan to tan say kababaingan a ginawa to ed si Jehova tan ed kongregasyon. Say nankasalanan so nepeg a magbabawi, masimoon a manpikasi parad panamerdona, tan mangunor ed saray matunong a kakaukolanen na Dios. Sano labay to lay paipawil, nepeg a nipatnag to so ebidensya a sikato so nagbabawi la tan mamapawala na ‘saray gawa a manepeg ed pagbabawi.’—Gawa 26:20.
Akin ya Ipatua so Kasalanan?
10, 11. Akin ya agtayo nepeg ya iyamot so kasalanan?
10 Nayarin oniay ikatunongan na arum a nankasalanan: ‘No ibagak ed arum so kasalanan ko, kaukolan kon ebatan iray makapabaing a tepet tan nayarin nadispelosip ak. Balet no agko itan ipatua, agak nababaingan tan anggapon balot so makaamta ed loob na kongregasyon.’ Say ontan a panag-isip so pakasaewan ed pigaran importantin bengatla. Anto iratan?
11 Si Jehova et “Dios a mapangasi tan mapaaro, mapalna ya onsanok, tan daakan ed maaro ya abig na linawa, tan katuaan; a mangigagana na maaro ya abig na linawa ed saray nilibo, mamerdona na inkauges, tan impakasumpa, tan kasalanan.” Ingen, ipepetek to so totoo to ed susto odino ‘makanan paraan.’ (Exodo 34:6, 7; Jeremias 30:11) No akapankasalanan kayo na ambelat, panon yon nagamoran so panangasi na Dios no iyamot yo itan? Amta nen Jehova itan, tan agto lambengat ibabaliwala so kasalanan.—Uliran 15:3; Habacuc 1:13.
12, 13. Anto so resulta na pangiyamot ed kasalanan?
12 No akagawa kayo na ambelat a kasalanan, makatulong so pangipatua pian nawalaan kayo na maong a konsiensia. (1 Timoteo 1:18-20) Balet say agpangipatua so manresulta ed marutak a konsiensia a mansumpal ed panggawa na dakel nin kasalanan. Tandaan a say kasalanan yo et aliwa labat a sumpad arum a too odino diad kongregasyon. Kasalanan itan ed Dios. Oniay inkanta na salmista: ‘Say trono nen Jehova wala ed tawen: saray mata to manim-imaton ira, saray lukablukab na mata to suboken to so saray anak na totoo. Si Jehova suboken to so matunong, tan say bagel.’—Salmo 11:4, 5.
13 Agbendisyonan nen Jehova so siopaman a mangiyaamot na ambelat a kasalanan tan manggunaet nin mansiansia diad loob na malinis a Kristianon kongregasyon. (Santiago 4:6) Kanian no akapankasalanan kayo tan labay yon gawaen so duga, agkayo masuyat a manggawa na masimoon a panangipatua. Ta no andi et nagonigon so konsiensia yo, nagkalalo la no nabasa odino narengel yo so simbawa nipaakar ed saratan a seryoson pamaakaran. Panon to no ekalen nen Jehova so espiritu to ed sikayo, a singa ginawa to ed si Arin Saul? (1 Samuel 16:14) No naandi lay espiritu na Dios, makapanggawa kayo na mas ambelat ni ingen a kasalanan.
Manmatalek ed Matoor ya Agagi Yo
14. Akin a nepeg a tumboken na nankasalanan so simbawa na Santiago 5:14, 15?
14 Anto sirin so nepeg a gawaen na magbabawin managkasalanan? “Patawag to so saray mamasiken na iglesia; tan sikato so ipikasi ra komon, a puyokan da na larak ed ngaran na Katawan. Et say pikakasi’ pananisia ilaban to so agmakayari, tan say Katawan bangonen to.” (Santiago 5:14, 15) Say iyasingger ed mamatatken so sakey a paraan pian say sakey a too et ‘mamawala na bunga a makana ed panagsibkel.’ (Mateo 3:8) Sarayan matoor tan maaron lalaki so ‘mangipikasi ed sikato tan puyokan da na larak ed ngaran nen Jehova.’ Singa say makapaabig a larak, say simbawa ra unong ed Biblia so makaligliwa ed siopaman a peteg a magbabawi.—Jeremias 8:22.
15, 16. Panon a tutumboken na saray Kristianon mamatatken so alimbawa ya impatnag na Dios, unong a nikurit ed Ezequiel 34:15, 16?
15 Agaylan maaron alimbawa so impatnag na Managpastol tayo, si Jehova, sanen imbulos to iray Judio manlapud impakadakep ed Babilonia nen 537 B.C.E. tan sanen imbulos to so espiritual ya Israel manlapud “Babilonia a Baleg” nen 1919 C.E.! (Apocalipsis 17:3-5; Galacia 6:16) Sinumpal to sirin so sipan to: “Siak met lanlamang so manpastol ed saray karnerok, et parukolen ko ra naani . . . Anapen ko naani so abalang, tan ipawil ko naani so pinataynan, tan bedberan ko naani so aputer, tan pabiskegen ko naani so mabeblay.”—Ezequiel 34:15, 16.
16 Pinakan nen Jehova so piguratibon karnero to, pinarukol to ra ed kaligenan, tan inanap to iray nababalang. Mipadpara, seseguroen na saray Kristianon managpastol a say pulok na Dios et napesel tan maligen ed espiritual a paraan. Aanapen na saray mamatatken so karnero ya inmarawi ed kongregasyon. Singa say ‘impamedber na Dios ed aputer,’ ‘bebedberan’ met na saray manangasikaso so karneron asugatan lapu ed saray salita na arum odino lapud ginawa ran mismo. Tan legan a ‘papabiskegen na Dios so mabeblay,’ tutulongan na saray mamatatken iramay mansasakit ed espiritual, a nayarin lapud impankasalanan dan mismo.
No Panon so Itutulong na Saray Managpastol
17. Akin ya ag-itayo nepeg a masuyat ya onkerew na espiritual a tulong na mamatatken?
17 Maliket a tutumboken na mamatatken iyan simbawa: ‘Nawalaan kayo na panangasi ya atekepan na takot.’ (Judas 23) Ambelat so kasalanan na arum a Kristiano lapud naplag ira ed seksual ya imoralidad. Balet no talagan magbabawi ira, nailaloan da so mapangasi tan maaron panagtrato na saray mamatatken a magunaet ya ontulong ed sikara diad espiritual a paraan. Oniay imbaga nen Pablo nipaakar ed saratan a lalaki, pati ed sikato: “Aliwan say uleyan mi pananisia yo, noag ingen mananulong kami ed liket yo.” (2 Corinto 1:24) Kanian, agbalot masuyat ya onkerew na espiritual a tulong da.
18. Panon a pidenengan na mamatatken so nankasalanan iran kapananisiaan?
18 No akapankasalanan kayo na ambelat, akin a napanmatalkan yo iray mamatatken? Lapud say manunan rason et managpastol ira na pulok na Dios. (1 Pedro 5:1-4) Anggapo so maaron managpastol a manduksa ed maamon kordero a manngikngik lapud asakitan itan. Sirin, sano pidenengan na mamatatken so nankasalanan a kapananisiaan, say pangiyapasakeyan da et aliwan say panusa lapud nankasalanan, noagta say agawan kasalanan tan say iyabig to ed espiritual no posible. (Santiago 5:13-20) Saray mamatatken so nepeg a mangukom tekep na inkatunong tan matamoy dan tratoen odino ‘perdonaen so pulok.’ (Gawa 20:29, 30; Isaias 32:1, 2) Singa met ed arum niran Kristiano, saray mamatatken so nepeg a ‘manggawa lambengat na inkatunong, tan mangaro na kaabigay linawa, tan manakar a mauy-uyamo ed Dios.’ (Miqueas 6:8) Importante iratan a kalidades sano manggagawa na desisyon a mangilalanor ed bilay tan sagradon serbisyo na ‘saray karnero a papastolan nen Jehova.’—Salmo 100:3.
19. Anto so nepeg ya awawey na mamatatken sano ipetek da so sakey?
19 Saray Kristianon managpastol so tinuro na masanton espiritu tan panggugunaetan day paiwanwan ed satan. No ‘wala so manasagmak na pankasalananan’ sakbay ton namoria itan—a singano agto nailaloan a nagawaan itan—panggunaetan na kualipikadon lalaki ed espiritual so ‘pangipawil ed satan a too tekep na espiritu na tayadno.’ (Galacia 6:1; Gawa 20:28) Tekep na kaumildian tan inkapekder ed saray madibinon estandarte, panggunaetan na mamatatken ya ipetek so panagnonot to, a singa say makonsideran doktor a maalwar ton ipawil so apiley, pian agtanton nasakitan tan naasikaso to so problema. (Colosas 3:12) Lapud nibase ed pikakasi tan Kasulatan so panginatnat na antokaman a panangasi, say desisyon na mamatatken so mangipatnag ed panmoria na Dios ed saratan a pamaakaran.—Mateo 18:18.
20. Kapigan a nakaukolan ya iyanunsio ed kongregasyon a say sakey a too et binaat?
20 No dakel lay akaamta ed impankasalanan odino seguradon naamtaan itan na dakel, matukoy so pangiyanunsio ed kongregasyon ta pian naprotektaan so reputasyon na satan. Gawaen met so panangiyanunsio no nakaukolan a pakabatan so kongregasyon. Diad iyaabig ed espiritual na sakey a binaat ed hudisyal a paraan, nayarin sikatoy niyaliling ed sakey a manpapaabig manlapud impakasugatan, a temporaryon manlimita ed kimey to. Diad loob na sakey a panat na panaon, maseguro a makagunggona parad magbabawin too so ondengel ni labat imbes a mankomento ed saray pantitipon. Nayarin iyuksoy na mamatatken a walay mangiyaral ed sikato na Biblia ta pian sikatoy napabiskeg ed nileteyan to tan magmaliw lamet a “maksil ed pananisia.” (Tito 2:2) Amin na saya so gagawaen unong ed aro tan ag-itan ginetma pian dusaen so nanggaway-kasalanan.
21. Panon ya asikasoen so pigaran kaso na kasalanan?
21 Nitarya na mamatatken so espiritual a tulong diad nanduruman paraan. Singa bilang, ipasen pan walay agi a namproblema nensaman nipaakar ed panag-inum insan sikatoy aminsan odino amiduan abuanges sanen bukbukor to ed abung da. Odino nayarin walay sakey ya agla mansisigarilyo balet ta sikato so aminsan odino amiduan nansigarilyo a maamot sanen sikatoy maletey. Anggaman sikato so nampikasi tan panisiaan to a sikatoy pinerdona la na Dios, nepeg ton kerewen so tulong na sakey a matatken ta pian agto la ulit-uliten itan a kasalanan. Nayarin asikasoen itan na sakey odino duaran mamatatken. Balet, ipaamta itan na matatken (odino mamatatken) ed mangidadaulon manangasikaso, lapud nayarin wala niray arum a nalalanor.
Mantultuloy ya Awaten so Panagdisiplina na Dios
22, 23. Akin a nepeg yon itultuloy ya awaten so panagdisiplina na Dios?
22 Pian nagamoran so panangabobon na Dios, nepeg a manimanon maong so kada Kristiano ed panagdisiplina nen Jehova. (1 Timoteo 5:20) Kanian talinengen so antokaman a panametek a naawat yo sano manaaral kayo na Kasulatan tan saray Makristianon publikasyon odino sano narerengel yo so simbawa a nipaparungtal diad saray pantitipon, asamblea, tan kombension na saray totoo nen Jehova. Mansiansian akabantay legan a gagawaen so linawa nen Jehova. Diad ontan, say panagdisiplina na Dios so makatulong pian napansiansia yo so espiritual a salimbeng—sakey a malet tan singa-bakor a depensa sumpad kasalanan.
23 Say pangawat ed panagdisiplina na Dios so ontulong ed sikayo pian mansiansia ed panangaro na Dios. Tua, arum so inekal ed Kristianon kongregasyon, balet saya so agla nepeg a nagawa ni ed sikayo no salimbengan odino ‘yatol yo so puso’ yo tan ‘manakar kayo a makalakal.’ (Uliran 4:23; Efeso 5:15) Balet, no adispelosip kayo natan, akin ta no gawaen iray kundang pian makapawil kayo lamet? Labay na Dios ya amin a dedikado ed sikato et matoor a mandayew ed sikato tekep na “liga na puso.” (Deuteronomio 28:47) Nagawaan yo itan ed ando lan ando no lawas yon awaten so panagdisiplina nen Jehova.—Salmo 100:2.
Panon Yon Ebatan?
• Akin a walaray eekalen ed Kristianon kongregasyon?
• Anto so lalanoren na tuan panagbabawi?
• Akin a nepeg ya ipatua iray ambelat a kasalanan?
• Diad antoran paraan a natulongan na Kristianon mamatatken iray magbabawin nankasalanan?
[Tepetepet Parad Panagaral]
[Litrato ed pahina 26]
Akin a binilin nen apostol Pablo iray taga-Corinto nipaakar ed panagdispelosip?
[Litrato ed pahina 29]
Singa saray managpastol nensaman, ‘bebedberan’ na Kristianon mamatatken so asugatan a karnero