Siopa so Makaliktar ed Agew nen Jehova?
Siopa so Makaliktar ed Agew nen Jehova?
“Say agew onsabi, sikato so mamool a singa apoy na palbaan.”—MALAQUIAS 4:1.
1. Panon so impaneskribe nen Malaquias ed kasampotan na sayan marelmeng a sistema?
SI PROPETAN Malaquias so pinuyanan na Dios a mangikurit ed makapakebbiew iran ebento a nagawa ed asingsingger lan arapen. Sarayan ebento so mangapekta ed balang too diad dalin. Oniay ipapasakbay na Malaquias 4:1: “Nia, say agew onsabi, sikato so mamool a singa apoy na palbaan; et saray amin a mapangta, tan saray amin a manggawa na mauges sikara naani dayami; et say agew ya onsabi poolan to ra naani, kuan nen Jehova na saray ehersito, ya agto naani ikera ed sikara anggan lamot anggan sanga.” Panon kasigpot so kaderal na sayan marelmeng a sistema na bengabengatla? Singa itan kiew a saray lamolamot to et abulok la ya aglan balot ontubo lamet.
2. Panon so impaneskribe na pigaran kasulatan ed agew nen Jehova?
2 Nayarin itepet yo, ‘Anton “agew” so ipapasakbay nen propeta Malaquias?’ Mipadpara itan ed samay agew ya asaglawi ed Isaias 13:9, ya oniay inyabawag to: “Nia say agew nen Jehova onsabi, masulit, pati petang tan masebeg a sanok; pian gawaen to so dalin a kibalatar, tan bagbagen to so saray managkasalanan to a manlapu ed sikato.” Itatarya na Sofonias 1:15 iyan deskripsion, a kuanto: “Satan ya agew sikato so agew na sanok, agew na gonigon tan irap, agew na kabagbag tan pankibalatar, agew na bilunget tan uddiem, agew a malurem tan makapal a bilunget.”
‘Say Baleg a Kairapan’
3. Anto so “agew nen Jehova”?
3 Diad manunan kasumpalan na propesiya nen Malaquias, say “agew nen Jehova” et sakey a panat na panaon a tinawag nen Jesus a ‘baleg a kairapan.’ Impasakbay nen Jesus: “Wala naani baleg ya irap ed satan, ya anggapo so ontan a nanlapud gapo na mundo ya angga ed natan, anggapo, anggapo la naani.” (Mateo 24:21) Nodnonoten pa so gonigon a naeeksperiensya la ed mundo, nagkalalo la manlapud nen 1914. (Mateo 24:7-12) Agayla, say Guerra Mundial II labat et anigway na masulok a 50 milyon a bilay! Ingen, saratan a pakakagonigonan so palumbasan na saray ebenton nagawa ed ‘baleg a kairapan.’ Satan ya ebento, a mipadpara ed agew nen Jehova, so mamantok ed Armagedon, a panganggaen na satan so kaunoran iran agew na sayan marelmeng a sistema.—2 Timoteo 3:1-5, 13; Apocalipsis 7:14; 16:14, 16.
4. Sano manampot so agew nen Jehova, anto la so nagawa?
4 Diad kasampotan na satan ya agew nen Jehova, nagalpong la so mundo nen Satanas tan saray manusuporta ed satan. Say unonan naderal et say amin a palson relihyon. Insan, nipakat so panangukom nen Jehova ed saray ekonomiko tan mapolitikan sistema nen Satanas. (Apocalipsis 17:12-14; 19:17, 18) Impropesiya nen Ezequiel: “Ibantak da naani so pilak da ed saray pulong, tan say balitok da singa naani marutak a bengatla; say pilak da tan say balitok da agda naani nayarian ya ilaban ira ed agew na sanok nen Jehova.” (Ezequiel 7:19) Oniay inkuan na Sofonias 1:14 nipaakar ed satan ya agew: “Say baleg ya agew nen Jehova asingger, sikato so asingger tan masiglat a maomaong.” Lapud sasaglawien na Biblia so nipaakar ed agew nen Jehova, nepeg a determinado itayon onkiwas a mitunosan ed matunong iran kakaukolanen na Dios.
5. Anto so naeeksperiensya na saramay ontatakot ed ngaran nen Jehova?
5 Kayari na impangipasakbay ed no anto so gawaen na agew nen Jehova ed mundo nen Satanas, inkurit na Malaquias 4:2 so imbalikas nen Jehova: “Dia ed sikayo ya antakot ed ngaran ko ompaway naani so banwa na inkatunong a pati pananambal ed saray payak to; et sikayo onla kayo naani, tan manlukso kayo naani a singa say kilaw na baka ed atotong.” Say “banwa na inkatunong” et si Jesu-Kristo. Sikato so espiritual a “silew na mundo.” (Juan 8:12) Sinminag si Jesus tekep na panamaabig, say unona et say espiritual a panamaabig, a naeeksperiensya tayo natan, insan say sigpot a panamaabig ed pisikal diad balon mundo. Unong ya inkuan nen Jehova, saray apaabig so ‘onla naani, tan manlukso naani a singa saray kilaw na baka ed atotong’ a mankulansag tan manliket a nibulos manlapud inkapukok.
6. Anton selebrasyon na panbiktorya so panggayagaan na saray lingkor nen Jehova?
6 Komusta iramay totoon mangibabaliwala ed saray kakaukolanen nen Jehova? Oniay ibabaga na Malaquias 4:3: “Sikayo [saray lingkor na Dios] igatin yo naani so marelmeng; ta sikara naani so dapodapol ed leksab na dapan yo ed agew a siak gawaen ko, kuan nen Jehova na saray ehersito.” Saray totoo a mandadayew ed Dios so agmibiang ed paneral ed mundo nen Satanas. Imbes, sikara so piguratibon ‘mangigatin ed saray marelmeng’ diad pibiang da ed nagawan baleg a selebrasyon na panbiktorya kayari na agew nen Jehova. Walay baleg a selebrasyon a ginawa kayari inkaderal na saray armada nen Faraon diad Ambalangan Dayat. (Exodo 15:1-21) Say kapagit nen Satanas tan say mundo to diad baleg a kairapan so tumbokan met na selebrasyon na panbiktorya. Oniay ikelyaw na saray matoor a makaliktar ed agew nen Jehova: “Manliket tan manggayaga itayo dia ed panangilaban to.” (Isaias 25:9) Agaylan panliliket so nagawa naani sano niyalangon so inkasoberano nen Jehova tan say dalin so nalinisan la parad mareen a panayaman!
Aaligen na Kakristianoan so Israel
7, 8. Deskribien so espiritual a kipapasen na Israel diad panaon na Malaquias.
7 Saramay nawalaan na apaboran a talindeg ed si Jehova et saramay manlilingkor ed sikato, a midumaan ed saramay agmanlilingkor. Mipadpara itan sanen insulat nen Malaquias so libro to. Nen 537 K.K.P., akapawil so nakdaan na Israel kayari na 70 taon na inkakautibo ra ed Babilonia. Balet, masulok a sakey a siglo, say nipawil ya Israel so naplag ed apostasya tan inkarelmeng. Pinabanday na karaklan a totoo so ngaran nen Jehova; imbaliwala ra so matunong iran ganggan to; dinutakan da so templo to diad impangibagat day bulag, piley, tan mansasakit iran ayep; tan indiborsyo ray orihinal a kaasawaan dan bibii.
8 Kanian oniay inkuan nen Jehova ed sikara: “Siak onasingger ak naani ed sikayo ed pangukom; et masiglat ak naani a tasi a sumpa ed saray maanito, tan sumpa ed saray mikakalugoran, tan sumpa ed saray matila a mansamba, tan sumpa ed saray manangapos ed saray miup-upa ed saray upa ra, ed balo a bii, tan ed saray ulila, tan mamikewet ed saray sankaili ed matunong to, tan ag-antakot ed siak . . . Ta siak, si Jehova, agak manguman.” (Malaquias 3:5, 6) Ingen, innatnat nen Jehova so imbitasyon ed siopaman a mangiwaklit ed saray mauges a dalan da: “Ompawil kayo ed siak, et siak ompawil ak naani ed sikayo.”—Malaquias 3:7.
9. Panon a saray propesiya nen Malaquias so walaan na manunan kasumpalan?
9 Saratan met a salita so awalaan na kasumpalan nen inmunan siglo K.P. Sakey a nakdaan na saray Judio so nanlingkor ed si Jehova tan nagmaliw a kabiangan na balon ‘nasyon’ na alanaan na espiritun Kristianos, ya asabi panaon et pati saray Gentil. Balet say karaklan ed saray silalaman ya Israel so angipulisay ed si Jesus. Onia sirin so inkuan nen Jesus ed nasyon na Israel: “Nia, say abung yo nataynan ed sikayo ya andi lugan.” (Mateo 23:38; 1 Corinto 16:22) Nen 70 K.P., a singa nipasakbay ed Malaquias 4:1, sinmabi ed silalaman ya Israel so “agew . . . [a] mamool a singa apoy na palbaan.” Aderal so Jerusalem tan say templo to, tan nireport a walay inatey a masulok a sakey milyon a totoo lapud eras, samsaman na pakayari, tan ed inlubak na saray Romanon armada. Balet, saramay nanlingkor ed si Jehova so akaliktar ed satan a kairapan.—Marcos 13:14-20.
10. Diad anton dalan a say totoo ed inkalapagan tan saray klero so mangaalig ed inmunan-siglon Israel?
10 Aaligen na katooan, nagkalautla say Kakristianoan, so inmunan-siglon nasyon na Israel. Pinili na saray pangulo tan totoo ed inkalapagan diad Kakristianoan iray mismon relihyoson sisiaen da imbes a saray katuaan na Dios ya imbangat nen Jesus. Nagkalalon natetel iray klerigo. Agda inusar so ngaran nen Jehova, ya inekal da ni ingen itan ed nanduruman bersion na Biblia ra. Pinabanday da si Jehova lapud saray bangat ya agmakasulatan, a singa say pagano iran doktrina a magnayon a kadusa ed impiernon-apoy, say Trinidad, say ag-ipatey na kamarerwa, tan ebolusyon. Agda inter ed si Jehova so kanepegan ton dayew, a singa ginawa na saray saserdote ed panaon nen Malaquias.
11. Panon ya ipapatnag na saray relihyon ed mundo no siopan talaga so panlilingkoran da?
11 Nen 1914, sanen ginmapo so kaunoran iran agew, impatnag na saray relihyon ed sayan mundo, ya indaulo na saramay mankuan a Kristiano, no siopan talaga so panlilingkoran da. Legan na duaran sankamundoan a bakal, pinaseseg da iray membro ra a mibakal makasengeg ed siblangan na saray nasyon, ya anggan mankabaliksan ni ingen na pamatey ed totoon karelihyonan da. Malinew ya ipapabidbir na Salitay Dios iramay manguunor ed si Jehova tan saramay andi: “Dia ed saya mapatnag ira so anak na Dios, tan saray anak na diablo: anggan siopa a manggawa na agkatunongan agkien na Dios, anggan say agto aroen so agi to. Ta saya so balita a nadngel yo manlapu ed gapo, a manaaroan so sakey tan sakey ed sikatayo: aliwan singa si Cain, a betang na maramsak, tan pinatey to so agi to.”—1 Juan 3:10-12.
Nasusumpal a Propesiya
12, 13. Antoran propesiya so susumpalen na saray lingkor na Dios ed panaon tayo?
12 Diad impanampot na Guerra Mundial I nen 1918, atebek na saray lingkor nen Jehova a kinondena na Dios so Kakristianoan tan amin a kabiangan ni na palson relihyon. Manlapu la’d saman a manpatuloy, oniay ikekelyaw ed saray matuan-impanpuso: “Ompaway kayo ed sikato, baley ko, pian agkayo nalanor ed saray kasalanan to, tan agkayo manlikna ed saray bakbak to: ta saray kasalanan to sinmabi ra angga ed tawen, tan say Dios anonotan to so kaugsan to.” (Apocalipsis 18:4, 5) Saramay nampilalek a manlingkor ed si Jehova so ginmapo lan alinisan manlapud saray pakasuysoyan na palson relihyon tan inggapo da la so sankamundoan a panangipulong ed maong a balita na niletneg lan Panarian, sakey a kimey a nepeg a nasumpal sakbay ya onsabi so anggaan na sayan marelmeng a sistema na bengabengatla.—Mateo 24:14.
13 Saya so manumpal ed propesiya diad Malaquias 4:5, ya oniay kuan nen Jehova: “Nia, ibakik naani ed sikayo si Elias a propeta ed arapen ya onsabi so baleg tan makapataktakot ya agew nen Jehova.” Satan a propesiya so awalaan na inmunan kasumpalan diad kimey nen Juan a Managbautismo, ya angilitrato ed si Elias. Ginawa nen Juan so kimey a mipara’d si Elias sanen binautismoan toray Judio a nagbabawi ed saray kasalanan da sumpad Ganggan a sipanan. Sankaimportantian, si Juan so manangiparungtal ed Mesias. Balet, say kimey nen Juan et melag lambengat a kasumpalan na propesiya nen Malaquias. Diad panasaglawi nen Jesus ed si Juan bilang say komaduan Elias, impabitar to a wala so kimey ed arapen a mipara ed si “Elias”.—Mateo 17:11, 12.
14. Anton manunan kimey so nepeg a nasumpal ni sakbay a manampot iyan sistema?
14 Impabitar na propesiya nen Malaquias a sayan baleg a kimey nen Elias so nagawa sakbay na “baleg tan makapataktakot ya agew nen Jehova.” Mansampot itan ya agew ed manasingger lan bakal na baleg ya agew na Dios a Makapanyarin-amin, diad Armagedon. Kabaliksan na saya a nagawa so anggaan na sayan marelmeng a sistema na bengabengatla tan say igapo na Milenyon Uley na mangatatawen a Panarian na Dios ya uleyan na nitronon si Jesu-Kristo kayari na sakey a kimey a mipara’d kimey nen Elias. Unong ed satan a propesiya, sakbay a deralen nen Jehova iyan marelmeng a sistema, say kaplesan ya Elias a klase, a susuportaan na minilyon a kaparan Kristianos a walaay mangaraldalin ya ilalo, so maligsan manumpal ed kimey nipaakar ed panangipawil ed puron panagdayew, panangitandoro ed ngaran nen Jehova, tan panangibangat na katuaan ed Biblia ed saray kinmarnero.
Bebendisyonan nen Jehova Iray Lingkor To
15. Panon a nodnonoten nen Jehova iray lingkor to?
15 Bebendisyonan nen Jehova iramay manlilingkor ed sikato. Oniay ibabaga na Malaquias 3:16: “Saman la saray tinmakot ed Jehova nansasalita ra ed sakey tan sakey; et si Jehova tinmalineng, tan dinmengel, et sakey a libro a pakanodnonotan so sinulatan ed arap to, nipaakar ed saray tinmakot ed Jehova, tan saray nannonot ed ngaran to.” Manlapu la’d panaon nen Abel a manpatuloy, isusulat na Dios ed sakey a libro, a singa panangibaga, so kangaranan na saramay nanodnonotan a walaan na ilalo ya andi-anggaan a bilay. Oniay inkuan nen Jehova ed sikara: “Yakar yo dia so amin a kakaplo ed kamalir, pian wala komon so tagano ed abung ko, tan salien yo ak natan ed saya . . . no siak agko naani lukasan ed sikayo so saray pinto na tawen, et ikalbok naani ed sikayo so sakey a bendisyon, ya anggapo naani so pasen a makasarag a mangawat ed sikato.”—Malaquias 3:10.
16, 17. Panon so pamebendisyon nen Jehova ed totoo to tan ed kimey da?
16 Peteg a benendisyonan nen Jehova iramay manlilingkor ed sikato. Panon? Sakey lan paraan et diad apadaak a pakatalos ed saray gagala to. (Uliran 4:18; Daniel 12:10) Sakey ni et say pangipapagamor to ed sikara na makapakelkelaw a resulta na panagpulong a kimey da. Dakerakel a matuan-impanpuson totoo so akiulop ed sikara diad tuan panagdayew, tan saraya so manugyop ed “baleg ya ulop . . . a nanlapu ed balang nasyon tan amin na saray kailalakan, tan binaleybaley, tan salita, . . . tan manakis ira ed baleg a boses, a kuanda, Say inkilaban ed Dios tayo a wala a manyurong ed trono, tan dia ed Kordero.” (Apocalipsis 7:9, 10) Sayan baleg ya ulop so nipapatnag diad makapakelaw a paraan, tan saramay aktibon manlilingkor ed si Jehova so manbilang la natan na masulok ya anemiran milyon ed masulok a 93,000 a kongregasyon ed sankadalinan!
17 Nanengneng met so panamendisyon nen Jehova diad pangipapalapag na saray Tastasi nen Jehova na saray nibase’d-Biblia a publikasyon a sankalaknaban a nibubunog diad interon awaran. Diad kaplesan et 90 milyon a kopya na Panag-Bantayan tan Awake! a magasin so napapawala ed kada bulan, say Panag-Bantayan et diad 144 a lenguahe tan say Awake! et diad 87 a lenguahe. Say libro parad panagaral na Biblia a Say Katuaan a Mangitonton ed Bilay ya Andi-Anggaan, a nipalapag nen 1968 et asabi toy impangibunog na masulok a 107 milyon diad 117 a lenguahe. Say Makapambilay Kayo na Ando lan Ando ed Paraiso Diad Dalin, ya impaway nen 1982, et masulok ya 81 milyon diad 131 a lenguahe. Say libron Pikakabat a Mangitonton ed Andi-Anggaan a Bilay, ya impaway nen 1995, so niimprinta ed masulok ya 85 milyon diad 154 a lenguahe. Say brosyur ya Anto so Kakaukolanen na Dios ed Sikatayo?, a nipalapag nen 1996, so nibunog la ed 150 milyon a kopya diad 244 a lenguahe ed kaplesan.
18. Akin a panggagayagaan tayo so espiritual ya iyaaligwas anggaman ed isusumpa?
18 Sayan espiritual ya iyaaligwas so panggagayagaan anggaman ed sankagrabian tan abayag lan isusumpa na mundo nen Satanas. Ipanengneng na saya so katuaan na Isaias 54:17: “Anggapo so ayura ya agawa a sumpa ed sika ya onaligwas naani; tan balang sakey a dila ya onsumpa ed sika ed pangukom dusaen mo naani. Saya sikato so tawir na saray ariripen nen Jehova, tan say inkatunong da a manlapu ed siak, kuan nen Jehova.” Agaylan makapaligliwa itan ed saray lingkor nen Jehova a naamtaan dan say Malaquias 3:17 et walaan na baleg a kasumpalan ed sikara: “Sikara naani so kien ko, kuan nen Jehova na saray ehersito, salanti dili a kayarian ko, dia ed agew a gawaen ko.”
Magayagan Manlilingkor ed si Jehova
19. Panon a miduma iramay manlilingkor ed si Jehova diad saramay agmanlilingkor?
19 Say pandumaan na saray matoor a lingkor nen Jehova tan saramay walad mundo nen Satanas so lalon ompapatnag diad ilalabas na panaon. Oniay impasakbay na Malaquias 3:18: “Mangibiig kayo naani na matunong tan marelmeng, say manlingkor ed Dios tan say agmanlingkor ed Dios.” Sakey ed dakel iran pandumaan et saramay manlilingkor ed si Jehova so manggagawa ed satan tekep na baleg a gayaga. Arum ed saray rason parad saya et say alay abig ya ilalo ra. Walaan ira na sigpot a kompiyansa ed si Jehova sanen inkuanton: “Nia, mamalsa ak na saray balo a tawen tan balo a dalin; ta saray inmuna a bengatla ag-ira la nanonotan, ag-ira la onla ed nonot. Balet manggayaga tan manliket kayo ed ando lan ando ed saman a palsaen ko.”—Isaias 65:17, 18; Salmo 37:10, 11, 29; Apocalipsis 21:4, 5.
20. Akin a maliket itayon totoo?
20 Panisiaan tayo so sipan nen Jehova a saray matoor a totoo to so makaliktar ed baleg ya agew nen Jehova tan makaloob ed balon mundo. (Sofonias 2:3; Apocalipsis 7:13, 14) Tan anggaman ompatey so arum antis na satan lapud itatakken, sakit, odino aksidente, ipapaseguro ed sikatayo nen Jehova a paolien to ira tekep na ilalon andi-anggaan a bilay. (Juan 5:28, 29; Tito 1:2) Kanian anggaman walaan itayo na saray problema tan angat, diad panasingger tayo ed satan ya agew nen Jehova, walaan itayo na amin a rason pian magmaliw a sankamaliketan a totoo ed tapew na dalin.
Panon Yon Ebatan?
• Anto so “agew nen Jehova”?
• Panon ya aaligen na saray relihyon ed mundo so kadaanan ya Israel?
• Antoran propesiya so susumpalen na saray lingkor nen Jehova?
• Panon so pamebendisyon nen Jehova ed totoo to?
[Tepetepet Parad Panagaral]
[Litrato ed pahina 21]
Say inmunan-siglon Jerusalem so ‘apoolan a singa apoy na palbaan’
[Saray litrato ed pahina 23]
Tataryaan nen Jehova iramay manlilingkor ed sikato
[Saray litrato ed pahina 24]
Lapud alay abig ya ilalo ra, peteg a magayaga iray lingkor nen Jehova