Onlad karga

Onlad saray karga

Aligen Iray Maapit ya Kaaro nen Jehova

Aligen Iray Maapit ya Kaaro nen Jehova

“Say pikakaaro ed Jehova wala ed saray ontakot ed sikato.”​—SAL. 25:14.

KANSIONEN: 106, 118

1-3. (a) Akin et makaseguro tayo a sarag tayoy makapikaaro ed Dios? (b) Antoy pantongtongan tayo ed sayan artikulo?

AMITLON abitla ed Biblia ya si Abraham et kaaro na Dios. (2 Awa. 20:7; Isa. 41:8; Sant. 2:23) Diad tua, sayan matoor a laki labat so espisipikon atawag na ontan diad Biblia. Isipen tayo kasin si Abraham labat so toon nagmaliw a kaaro nen Jehova? Andi, ta ipapanengneng na Biblia ya sarag tayon amin so makapikaaro ed Dios.

2 Dakdakel so salaysay ed Biblia nipaakar ed matoor a lalaki tan bibii ya walaay takot ed si Jehova, angipanengneng na pananisia ed sikato, tan nagmaliw a malet ya kakaaro to. (Basaen so Salmo 25:14.) Insulat nen apostol Pablo so nipaakar ed “baleg a grupo na saray tasi,” ya amin ira et seguradon kakaaro na Dios. (Heb. 12:1) Makapalikliket ta nanduruman klase na totoo ira.

3 Aralen tayo natan so talora ed saray maapit ya kaaro nen Jehova ya abitla ed Biblia. Pantongtongan tayoy nipaakar ed si (1) Rut, say matoor ya ugaw nin balo a taga Moab; (2) Hezekias, say matunong ya ari na Juda; tan (3) Maria, say mapaabeban ina nen Jesus. Panon iran nagmaliw a kaaro na Dios, tan antoy naaralan tayod satan?

 IMPATNAG TOY MATOOR A PANANGARO

4, 5. Anton mairap a desisyon so kaukolan a gawaen nen Rut, tan akin ya mair-irap iman? (Nengnengen so litratod gapo na artikulo.)

4 Isipen pay taloran bibiin balo ya manaakar diad maragem a patar na Moab. Sarayan balo et si Noemi tan saray manugang to, si Rut tan Orpa. Nanengneng tayoy Orpa ya sinmian lad sikara, ta nandesisyon lan onsempet ed abung to diad Moab. Si Noemi balet et desidido lan onsempet ed bansa ton Israel. Kaiba toy Rut ya natan et kaukolan a manggawa na sankaimportantian a desisyon ed bilay to. Nayarian toy onsempet lad baley to diad Moab odino mila ed katulangan ton si Noemi tan manakar ira paonlad Betlehem.​—Rut 1:1-8, 14.

5 Sarag komon ya ikatunongan nen Rut a walay pamilya to ed Moab, ta wadman so ina to tan arum a kakanayon to ya nayarin mangasikaso tan ontulong ed sikato lapud abalo la. Ditan so binalegan to. Ditan met so kawalaay kultura, lenguahe, tan saray kabaleyan to. Agnipaseguro nen Noemi ya magmaliw met a maabig so kipapasen nen Rut diad Betlehem. Diad tua, binagaan toy Rut ya ontilak lad Moab. Mapaga si Noemi ta agto la naikdan na asawa odino panayaman iray manugang to. Anto kasi gawaen nen Rut? Imanoen so pidumaan tod si Orpa ya ‘pinmawil ed baley to, tan diad saray dios to.’ (Rut 1:9-15) Labay met kasi nen Rut so ompawil ed saray palson dios na saray kabaleyan to? Andi.

6. (a) Antoy makabat ya desisyon nen Rut? (b) Akin ya nibaga nen Boaz a manpapasalimbeng si Rut ed silong na saray payak nen Jehova?

6 Nayarin akabat nen Rut si Jehova a Dios panamegley na asawa ton inatey la odino panamegley nen Noemi. Si Jehova et aliwan singa saray dios na Moab. Amta nen Rut a si Jehova so makanepegan ed panangaro tan panagdayew to. Balet aliwan magenap so amta to. Kaukolan ya mandesisyon si Rut. Kasin pilien to si Jehova bilang Dios to? Makabat so desisyon nen Rut. Inkuan tod si Noemi: “Say baley mo sikato so baley ko tan say Dios mo, Dios ko.” (Rut 1:16) Makapaligsay puso so panangaro nen Rut ed si Noemi, balet mas importante so impanengneng ton panangaro ed si Jehova. Kanian si Rut et kinomendaan nen Boaz a makankayarian na dalin lapud manpapasalimbeng ed silong na saray payak nen Jehova. (Basaen so Rut 2:12.) Nayarin nanonotan tayod satan so sakey a sibong ya manpapasalimbeng ed silong na saray payak na mabiskeg tan maasikason ina to. (Sal. 36:7; 91:1-4) Si Jehova et singa ontan ya ateng ed si Rut. Sikatoy benendisyonan to lapud pananisia to, tan agbalot nagbabawian nen Rut so desisyon to.

7. Antoy nayarin ontulong ed saramay manaalangan a mangidedika na bilay da ed si Jehova?

7 Dakel so totoon nanaaralan day nipaakar ed si Jehova, balet ag-ira manpapasalimbeng ed sikato. Manduaruwa ira ya mangidedikay bilay da tan manpabautismo bilang lingkor to. No manaalangan kan mangidedikay bilay mo ed si Jehova, kasin tinepetan mo lay sarilim no akin? Amin ya mabilay et manlilingkor ed sakey a dios odino sakey a bengatla. (Jos. 24:15) Agta duga labat ya say pampasalimbengan mo et samay Dios ya makanepegan a panlingkoran? Say pangidedikay bilay tayo ed si Jehova so sankaabigan ya paraan pian nipatnag tayoy pananisia ed sikato. Tulongan to itayon manbilay unong ed satan a desisyon tan arapen so anggan anton subok a nayarin onsabi. Ontan so ginawa na Dios parad si Rut.

SIKATOY “PINMEKET ED SI JEHOVA”

8. Deskribien pa so kipapasen na pamilya nen Hezekias.

8 Aliwan singa si Rut, say ugaw nin Hezekias et nianak lad sakey a bansa ya dedikado ed si Jehova. Balet aliwan amin ya Israelita et nansiansian matoor. Sakey lan alimbawa so ama nen Hezekias, si Arin Ahaz. Inimpluensyaan na sayan mauges a too so panarian na  Juda ya mandayew ed saray idolo, tan pinabanday da ni ingen so templo nen Jehova ed Jerusalem. Makapaermen ya isipen so mauges ya agawad pamilya nen Hezekias, ta makapasinagem so impatey na arum ed saray agagi to, ya pinoolan ira bilang bagat ed palson dios!​—2 Ara. 16:2-4, 10-17; 2 Awa. 28:1-3.

9, 10. (a) Akin et nayarin magmainomay ya ombarong ed Dios si Hezekias? (b) Akin et agtayo nepeg ya ombarong ed Dios? (c) Akin et agtayo nepeg ya isipen a say agawad apalabas tayo et onman met lay pagmaliwan tayo?

9 Walay posibilidad ya ombarong o manpasnok tan manrebelde ed Dios si Hezekias. Wala ray arum natan ya aliwan ontan kagrabe so situasyon da balet inisip da ya walay rason dan ‘onsanok sumpad si Jehova’ odino ombarong ed organisasyon to. (Uli. 19:3) Tan nononoten na arum a totoo ya lapud aliwliwan kipapasen na pamilya ra et magmaliw met lan aliwliway bilay da, odino ompan naulit da lamet iray lingo na atateng da. (Eze. 18:2, 3) Duga kasi so ontan ya kanonotan?

10 Unong ed samay agawa ed bilay nen Hezekias, say malinew ya ebat et andi! Anggapon balot so makatunongan a rason pian onsanok ed si Jehova, ta aliwan sikatoy panlalapuan na mauges a nagagawa ed totoo. (Job 34:10) Tua, baleg so impluensya na atateng ed pankaabigan odino pankaugsan na ananak da. (Uli. 22:6; Col. 3:21) Balet agto labay ya ibagan no antoy agawad kapamilya na sakey a too et onman met lay pagmaliwan na bilay to. Amin tayo et inikdan nen Jehova na mabmablin regalo​—say abilidad a manpili no antoy gawaen tayo tan pagmaliwan tayo. (Deu. 30:19) Panon ya inusar nen Hezekias itan a regalo?

Dakel a kabataan so mangaawat ed katuaan antokaman so situasyon na pamilya ra (Nengnengen so parapo 9, 10)

11. Akin a nagmaliw ya sakey ed saray sankaabigan ya ari na Juda si Hezekias?

11 Anggano si Hezekias et anak na sakey ed saray sankaugesan ya ari na Juda, sikatoy nagmaliw a sakey ed saray sankaabigan ya ari. (Basaen so 2 Arari 18:5, 6.) Agto inalig so mauges ya ginawa na ama to. Imbes, dinengel ton maong iray propeta nen Jehova a singa si Isaias, Miqueas, tan Oseas. Inimanon maong nen Arin Hezekias iray apuyanan a mensahe na saratan ya matoor a lalaki, tan impapuso toy simbawa tan panangipetek nen Jehova. Kanian impetek nen Hezekias iray mauges a ginawa na ama to. Nilinisan  toy templo, angiyapay na pananakbong ed saray kasalanan na totoo, tan dineral to ray paganon idolo diad interon nasasakopan to. (2 Awa. 29:1-11, 18-24; 31:1) Nen nipaarap ed makapataktakot ya subok, a singa say planon pangataki ed Jerusalem nen Senakerib ya ari na Asirya, impanengneng nen Hezekias so nikadkaduman inkakpel tan pananisia. Sikatoy nanmatalek ed panangiliktar na Dios tan pinabiskeg to ray totoo to panamegley na salita tan alimbawa. (2 Awa. 32:7, 8) Nen asabi panaon ya kaukolan ya ipetek si Hezekias lapud impatnag ton panagpaatagey, sikatoy nampaabeba tan nagbabawi. (2 Awa. 32:24-26) Malinew sirin ya ag-inabuloyan nen Hezekias so apalabas to ya maneral ed peles a bilay to odino arapen to. Imbes, impatnag to ya sikatoy kaaro nen Jehova, tan maabig ya ehemplon aligen tayo.

12. Singa si Hezekias, panon ya prinuebaan na dakel a Kristiano natan a kaaro ira nen Jehova?

12 Lapud manbibilay tayo ed mundo ya maruksa tan anggapoy panangaro, agla pankelawan a dakel ya ananak so binmaleg ya agda aliknay panangaro tan panangasikaso na atateng da. (2 Tim. 3:1-5) Dakel ed saray Kristiano natan et ansakisakit so naeksperiensya rad pamilya ra, balet pinili day magmaliw a malet ya kaaro nen Jehova. Singa si Hezekias, prinuebaan da ya say nagawad arapen na sakey a too et ag-akadepende ed agawad apalabas to. Pinagalangan itayo nen Jehova ed impangiter toy regalo ya makapandesisyon parad sarili tayo, tan pribilehyo tayon usaren itan a regalo pian ompeket a malet ed sikato, tan igalang tan igloria tayo, a singa ginawa nen Hezekias.

INKUAN TO: “NIA! SIAK SO BIIN ARIPEN NEN JEHOVA!”

13, 14. Akin a nayarin mairap a maong parad si Maria so pribilehyon naawat to, balet antoy inyebat tod imbaga nen Gabriel?

13 Pigaran siglo kayari na panaon nen Hezekias, awalaay espisyal a pikakaaro ed si Jehova so sakey ya mapaabeban marikit ya Judio ya tagad Nazaret. Anggapo lay arum a too ya akaawat na ontan a nikadkaduman pribilehyo. Sikatoy mangilukon, mangiyanak, tan mamabaleg ed bogbogtong ya Anak na Dios! Nonoten pa so panagmatalek nen Jehova ed marikit nen Heli ya si Maria, kanian sikatoy angiteran to ed satan ya nikadkaduman pribilehyo. Balet anto so nayarin unonan reaksion nen Maria nen niiter itan ya pribilehyo ed sikato?

“Nia! Siak so biin aripen nen Jehova!” (Nengnengen so parapo 13, 14)

14 Ompan say naisip tayo labat et say makapadinayew ya pribilehyo nen Maria, balet ta nibaliwala tayoy arum ya pampapagaan to. Imbaga ed sikato na anghel na Dios a si Gabriel ya sikatoy mamilagron manlukon balet ta agmiakdol ed sakey a laki. Ag-inyopresi nen Gabriel ya sikato lay mangipaliwawa ed pamilya nen Maria tan ed kakaabay da no akin a sikatoy malukon. Antoy nayarin isipen da? Nayarin mapaga si Maria ed nobyo ton si Jose. Panon to kasin kombinsien, ya anggano malukon et sikatoy nanmatoor ed sikato? Sakey ni, talagan baleg ya responsabilidad so  pamabaleg, pangasikaso, tan pangipasal ed bogbogtong ya Anak na Sankatagyan a Dios! Agtayo amta no anto ni ray nampagaan nen Maria legan ya mitotongtong ed sikato si Gabriel. Balet amta tayo ya say inyebat to et: “Nia! Siak so biin aripen nen Jehova! Nagawa komon ed siak so unong ed imbagam.”​—Luc. 1:26-38.

15. Akin a makapadinayew so pananisia nen Maria?

15 Agta makapadinayew so pananisia nen Maria? Say sakey a biin aripen et walad panangontrol na katawan to. Sirin, matalek si Maria ya sikatoy asikasoen tan protektaan na Katawan to, si Jehova. Labay ton panlingkoran si Jehova anggan antoy pagawa Tod sikato. Panon ya awalaan na ontan a pananisia? Agnisipor ed too so pananisia. Resulta itan na sagpot na too tan panamendisyon na Dios. (Gal. 5:22; Efe. 2:8) Wala kasi ebidensyan nansagpotan nen Maria ya pabiskegen so pananisia to? On, wala. Usisaen tayo no panon ya dinmengel tan nansalita si Maria.

16. Antoy mangipapanengneng ya dinmengel a maong si Maria?

16 No panon ya dinmengel si Maria. Papasesegen itayo na Biblia ya “aliston ondengel, agbengatbengat a mansalita.” (Sant. 1:19) Kasin dinmengel a maong si Maria? Mapatnag ya ontan. Amiduan impanengneng na Ebanghelyo nen Lucas ya dinengel a maong nen Maria iray salitan walaan na aralem a kabaliksan ed espiritual, tan impanaon toy pandalepdep ed saratan. Nen iyanak lay Jesus, impakabat na saray mapaabeban managpastol ed si Maria so mensahe na anghel. Kayari manga 12 a taon, walay imbaga nen Jesus ya makabkabaliksan ya espiritual a bengatla anggano ugaw ni. Diad saratan ya inkagawa, si Maria et dinmengel, tinandaan to, tan dinalepdep ton maong iray nadngelan to.​—Basaen so Lucas 2:16-19, 49, 51.

17. Antoy naaralan tayo ed paraan na impansalita nen Maria?

17 No panon ya nansalita si Maria. Daiset labat so nisulat ed Biblia ya imbaga nen Maria. Diad tua, say sankarukeyan ya imbaga to et samay walad Lucas 1:46-55. Napatnagan ed saratan ya imbaga nen Maria ya kabisado ton maong so apuyanan a Kasulatan. Singa mipara iray imbaga to ed pikakasi nen Hana, say ina nen propeta Samuel. (1 Sam. 2:1-10) Ompatnag a manga 20 beses ya inusar nen Maria so Kasulatan diad saray imbaga to. Malinew sirin a sikatoy sakey a biin naynay a mangibabalikas na espiritual iran bengatla. Mabulbulos ton imbalikas iray kayamanan a papablien tod puso to, ya kawalaan na saray mabmablin katuaan a naaralan tod sankamaongan a Kaaro to, si Jehova a Dios.

18. Panon tayon aligen so pananisia nen Maria?

18 Singa si Maria, no maminsan et makaawat tayo na saray pribilehyo manlapud si Jehova a singa mairap a gawaen. Singa sikato, komon ta mapaabeba tayon awaten itan, tan manmatalek ed saray gawaen nen Jehova parad pankaabigan tayo. Sarag tayon aligen so pananisia nen Maria no dengelen tayon maong iray nanaaralan tayo nipaakar ed si Jehova tan saray gagala to, dalepdepen iray espiritual a bengatla, tan maliket ya ibagad arum iray nanaaralan tayo.​—Sal. 77:11, 12; Luc. 8:18; Roma 10:15.

19. No aligen tayo iray alay abig iran alimbawa na pananisia a walad Biblia, antoy seguradon naawat tayo?

19 Singa si Abraham, kaaro met nen Jehova si Rut, Hezekias, tan si Maria. Sikara tan say amin a kabiangan na “baleg a grupo na saray tasi” tan dakel ni ran matoor a totoo manlapu nensaman ya anggad natan, et manggagayaga ed alay abig a pribilehyon magmaliw a kakaaro na Dios. Komon ta itultuloy tayon aligen iratan ya alimbawa na pananisia. (Heb. 6:11, 12) No ontan so gawaen tayo, seguradon naawat tayoy balbaleg a bendisyon​—say pagmaliw a maapit a kakaaro nen Jehova diad andi-angga!