Onlad karga

Onlad saray karga

Tepetepet na Saray Manbabasa

Tepetepet na Saray Manbabasa

Akin et mandumaan so insulat nen Mateo tan Lucas nipaakar ed impanugaw nen Jesus?

Say insulat nen Mateo nipaakar ed saray agawa nen inyanak si Jesus tan say impanugaw to et singa midumaan ed insulat nen Lucas lapud nandumaan so nampokusan na sarayan nansulat na Ebanghelyo.

Say insulat nen Mateo et akapokus ed saray agawa ya kaibay Jose. Imbaga to so unonan reaksion nen Jose nen naamtaan ton malukon si Maria, nen akugip toy sakey ya anghel ya mangipapaliwawa ed situasyon, tan nen dinengel toy imbaga na anghel. (Mat. 1:19-25) Insalaysay met nen Mateo so nipaakar ed kugip nen Jose ya diad satan et imbagad sikato na sakey ya anghel ya ombatik irad Ehipto, say inyakar to diman kaibay pamilya to, say kugip to ya akitongtong ed sikato so sakey ya anghel ya ompawil irad Israel, say impawil to, tan say desisyon ton manayam ed Nazaret so pamilya to. (Mat. 2:13, 14, 19-23) Diad unonan duaran kapitulo na Ebanghelyo nen Mateo, say ngaran nen Jose et aminwalo ya abitla, pero si Maria et aminlima labat.

Balet say insulat nen Lucas et mas akapokus ed si Maria. Kaiba ditan so imbisita ed si Maria nen anghel Gabriel, say imbisita nen Maria ed kanayon ton si Elizabeth, tan say impangirayew nen Maria ed si Jehova. (Luc. 1:26-56) Binitla met nen Lucas iray imbaga nen Simeon ed si Maria nipaakar ed panirap nen Jesus diad arapen. Anggan sanen linma so pamilya ra ed templo nen 12 so taon nen Jesus, say insulat nen Lucas et saray imbaga nen Maria aliwan si Jose. Imbaga met nen Lucas ya akaapekton maong ed si Maria irayan agawa. (Luc. 2:19, 34, 35, 48, 51) Diad unonan duaran kapitulo na Ebanghelyo nen Lucas, say ngaran nen Maria et 13 beses ya abitla, balet si Jose et 3 beses labat. Kanian mas dakel so imbaga nen Mateo nipaakar ed saray pampapagaan tan kimey nen Jose, balet si Lucas et mas dakel so imbaga ton detalye nipaakar ed betang tan eksperiensya nen Maria.

Ontan met, say linya na kapolian ya inlista na sarayan duaran nansulat na Ebanghelyo et mandumaan. Say inlista nen Mateo et say kapolian nen Jose tan impanengneng to ya si Jesus a tagibi nen Jose so legal ya tomatawir ed inkaari nen David. Akin? Lapud si Jose et nanlapud kapolian nen Arin David panamegley nen Solomon ya anak nen David. (Mat. 1:6, 16) Balet, mapatnag ya say inlista nen Lucas et say kapolian nen Maria tan impanengneng to ya si Jesus so natural ya tomatawir, ta “niyanak bilang too manlapud ilalak nen David” diad pisikal odino natural. (Roma 1:3) Akin? Lapud si Maria et nanlapud kapolian nen Arin David panamegley nen Natan ya anak nen David. (Luc. 3:31) Balet akin et ag-impila nen Lucas si Maria ed listaan na kapolian bilang anak a bii nen Heli? Lapud saray walad opisyal ya listaan na kapolian et lalaki labat. Kanian nen inlista nen Lucas si Jose tan deneskribe ton anak nen Heli, natalosan ya say labay ton ibaga et manugang nen Heli si Jose.—Luc. 3:23.

Saray listaan na kapolian ya insulat nen Mateo tan Lucas et prueba ya si Jesus so nipasakbay ya Mesias. Say katuaan nipaakar ed kapolian nen Jesus et kabkabat, ya ag-itan nakontra na anggan saray Fariseo tan Saduceo. Natan, saray rekord na kapolian ya insulat nen Mateo tan Lucas et siansia nin kabiangan na pundasyon na pananisia tayo tan prueba ya seguradon nasumpal iray promisa na Dios.