Onlad karga

Onlad saray karga

 AARALEN YA ARTIKULO 7

Anap Yoy Kauyamoan tan Paliket Yoy Jehova

Anap Yoy Kauyamoan tan Paliket Yoy Jehova

“Anap yoy Jehova, amin yon mauyamo ed dalin . . . Anap yoy kauyamoan.”​—SOF. 2:3.

KANSION 80 “Tawayan Yo tan Nengneng Yo a si Jehova et Maong”

DIAD SAYAN ARTIKULO *

1-2. (a) Panon ya adeskribe si Moises, tan anto ray ginawa to? (b) Antoy maabig ya rason no akin ya kaukolan tayoy magmaliw ya mauyamo?

DIAD Biblia, si Moises et adeskribe ya “sankauyamoan ed amin a totoo diad tapew na dalin.” (Num. 12:3) Kasin labay ya ibaga na satan ya sikatoy makapuy, agmakapandesisyon, tan natatakot no wala ray onkontra ed sikato? Ontan so nayarin ibaga na arum ed sakey ya mauyamon too. Balet aliwan tua itan. Si Moises et mabiskeg, maples ya mandesisyon, tan makpel ya lingkor na Dios. Diad tulong nen Jehova, sikatoy inmarap ed makapanyarin manuley na Ehipto, indaulo to so manga 3,000,000 ya totoo diad desierto, tan tinulongan toy nasyon na Israel ya taloen iray kalaban da.

2 Anggano agtayo naeeksperiensya iray mairap ya situasyon ya inarap nen Moises, diad kada agew et kaukolan tayoy onarap ed saray totoo odino situasyon ya mairap so magmaliw ya mauyamo. Balet walay maabig ya rason no akin ya kaukolan tayoy magmaliw ya mauyamo. Insipan nen Jehova ya “saray mauyamo et tawiren day dalin.” (Sal. 37:11) Kasin nibagam ya mauyamo ka? Kasin ontan so pakanengneng na arum ed sika? Antis tayon naebatan iratan ya importantin tepet, kaukolan tayo nin amtaen no antoy labay ya ibaga na kauyamoan.

ANTO SO KAUYAMOAN?

3-4. (a) Antoy nayarin pangikomparaan ed kauyamoan? (b) Anto so apatiran kualidad ya kaukolan tayo pian magmaliw tayon mauyamo, tan akin?

3 Say kauyamoan * et singa sakey a marakdakep ya painting. Akin ya nibagan ontan? No panon ya manguusar so pintor na nanduruman  balibali ya kolor pian makagawa na painting, kaukolan tayon ipanengneng so nanduruman balibali ya kualidad pian magmaliw tayon mauyamo. Manuna ed saratan ya kualidad so inkamapaabeba, panagpasakop, inkaulimek, tan pakpel. Akin et kaukolan tayo iratan ya kualidad no labay tayon napaliket si Jehova?

4 Saray mapaabeban totoo labat so manpapasakop ed linawa na Dios. Kaiba ed linawa na Dios ya ipatnag tayoy inkaulimek. (Gal. 5:23; Col. 3:12) No gagawaen tayoy linawa na Dios, onsasanok si Satanas. Kanian anggano mapaabeba tan maulimek tayo, bubusolen itayo na dakel ya totoon kabiangan na mundo nen Satanas. (Juan 15:18, 19) Kaukolan tayo sirin so pakpel pian nalabanan tayo si Satanas.

5-6. (a) Akin ya kabkabusol nen Satanas iray totoon mauyamo? (b) Anto ran tepet so ebatan tayo?

5 Say kabaliktaran na toon mauyamo et say toon mapaatagey, agto nakontrol so pasnok to, tan agto uunoren si Jehova. Ontan ya mismo so ugali nen Satanas. Agtayo la pankelawan ya kabkabusol to iray totoon mauyamo! Lapud maong ya ugali ra, lalon ombibitar so inkauges to. Tan mas lalo iran bubusolen nen Satanas lapud papaneknekan da ya sikatoy matila. Akin? Ta anggan antoy ibaga o gawaen to, agton balot napatunda iray mauyamon totoo ya manlingkor ed si Jehova!​—Job 2:3-5.

6 Kapigan ya nayarin mairap so magmaliw ya mauyamo? Tan akin ya kaukolan tayon tuloytuloy ya anapen so kauyamoan? Pian naebatan iratan ya tepet, pantongtongan tayo so alimbawa nen Moises, say taloran Hebreo ya nibantak ed Babilonia, tan si Jesus.

KAPIGAN YA MAIRAP SO MAGMALIW YA MAUYAMO?

7-8. Antoy reaksion nen Moises sanen sikatoy agnirespeto?

7 No naikdan na autoridad: Nayarin mairap ed sakey ya walaan na autoridad so mansiansian mauyamo, lalo la no sikatoy agrerespetoen na saramay walad panangasikaso to odino kukuestionen da iray desisyon to. Kasin asalim la itan? Panon to no ontan so ginawa na membro na pamilyam? Antoy magmaliw ya reaksion mo? Imanoen no panon ya inarap nen Moises so ontan ya situasyon.

8 Si Moises so pinili nen Jehova ya mangidaulo ed Israel tan mangisulat ed saray ganggan  parad satan ya nasyon. Kanian mapatpatnag ya tutulongan nen Jehova si Moises. Anggaman ontan, sikatoy binalaw na mismon agagi to ya si Miriam tan Aaron tan kinuestion day impanpili to na asawa. No duman too so walad posisyon nen Moises, seguradon sinmanok la tan binmales ed sikara​—balet aliwan ontan si Moises. Sikatoy agmainomay ya nasakitan. Akikasi ni ingen ed si Jehova ya ekalen to la so dusa ed si Miriam. (Num. 12:1-13) Akin ya ontan so reaksion nen Moises?

Akikasi si Moises ed si Jehova ya ekalen to la so dusa ed si Miriam (Nengnengen so parapo 8)

9-10. (a) Panon ya tinulongan nen Jehova si Moises? (b) Antoy naaralan na saray ulo na pamilya tan saray elder ed si Moises?

9 Inabuloyan nen Moises ya sikatoy ipasal nen Jehova. Manga 40 taon antis na satan, sanen si Moises et sakey a prinsipe ed Ehipto, sikatoy aliwan mauyamo. Diad tua, main-inomay toy onsanok kanian pinatey to so sakey a laki ya inisip ton manmamaltrato ed arum. Inisip nen Moises ya abobonan nen Jehova so ginawa to. Diad loob na 40 taon et tinulongan nen Jehova si Moises ya natalosan ya aliwa labat ya pakpel so kaukolan to pian nidaulo to iray Israelita; kaukolan toy magmaliw ya mauyamo. Pian magmaliw ya mauyamo, kaukolan to met so magmaliw ya mapaabeba, mapasakop, tan maulimek. Atan so importantin leksion ya naaralan to tan nagmaliw ya maong ya manangasikaso.​—Exo. 2:11, 12; Gawa 7:21-30, 36.

10 Natan, nepeg ya aligen na saray ulo na pamilya tan saray elder so alimbawa nen Moises. Sano walay agmanrespeto ed sikayo, agkayo komon main-inomay ya nasakitan. Mapaabeba yon bidbiren so antokaman ya lingo yo. (Ecl. 7:9, 20) Mapasakop yon unoren iray instruksion nen Jehova no panon yon asikasoen iray problema. Tan komon ta lanang ya maulimek so ebat yo. (Pro. 15:1) No ontan so gagawaen na saray ulo na pamilya tan saray manangasikaso, napapaliket day Jehova, makakatulong ira pian niwala so kareenan, tan nipapanengneng day maong ya alimbawa no panon so magmaliw ya mauyamo.

11-13. Anton alimbawa so impanengneng na taloran Hebreo ya nepeg tayon aligen?

11 No napapasegsegang: Manlapu la nensaman, saray lingkor nen Jehova et papasegsegangen na saray totoon manuley. Nayarin aakusaan da tayo na nanduruman “krimen,” balet say talagan rason et lapud ‘uunoren tayoy Dios bilang manuley imbes a saray totoo.’ (Gawa 5:29) Nayarin balawen, ipriso, odino sakitan da tayo ni ingen ed pisikal. Balet diad tulong nen Jehova, agtayo ombabales noagta maulimek tayo nin siansia anggano nasusubok tayo.

12 Imanoen pa so alimbawan impanengneng na taloran Hebreo ya nibantak ed Babilonia​—si Hananias, Misael, tan Azarias. * Ingganggan ira  na ari na Babilonia ya ondakmomo ed balbaleg a balitok ya imahen. Diad maulimek a paraan, impaliwawa da ed ari no akin ya agda labay so mandayew ed imahen. Nampasakop ni ran siansia ed Dios anggano tinaktakot ira na ari ya ibuntok to ra ed mandarlang ya hurno. Inliktar a tampol nen Jehova irayan lalaki, balet agda itan inilaloan. Imbes, mabulos dan inawat so antokaman ya iyabuloy nen Jehova ya nagawa. (Dan. 3:1, 8-28) Pinaneknekan da ya saray totoon mauyamo et talagan makpel​—anggapo so ari, panagtaktakot, tan dusa ya nayarin mamakapuy na determinasyon tayo ya “[si Jehova] labat so dayewen” tayo.​—Exo. 20:4, 5.

13 No nasusubok so katooran tayod Dios, panon tayon naalig irayan taloran Hebreo? Mapaabeba tayon manmatalek ya tulongan itayo nen Jehova. (Sal. 118:6, 7) Maulimek tan marespeto tayon onebat ed saramay mangaakusa ed sikatayo. (1 Ped. 3:15) Tan agtayon balot manggagawa na antokaman ya maneral ed maapit ya relasyon tayo ed maaron Ama tayo.

Marespeto tayon onebat no wala ray onsumpa ed sikatayo (Nengnengen so parapo 13)

14-15. (a) Antoy nayarin nagawa no nai-stress tayo? (b) Base ed Isaias 53:7, 10, akin ya nibaga tayon si Jesus so sankaabigan ya alimbawa ed pangipanengneng na kauyamoan anggano nanaaburido?

14 No nanaaburido odino nai-stress: Amin tayo et nai-stress lapud nanduruman rason. Nayarin nalikna tayo itan antis na eksamin diad eskuelaan odino no walay pagawa da ed sikatayo diad trabaho. Anggan say panisip labat ed pampatambal tayo et makapa-stress la. No nai-stress tayo, mairap so magmaliw ya mauyamo. Nayarin nasyodotan tayo ed saray situasyon ya dati et anggapo labat ed sikatayo. Nayarin makapansalita tayoy ansakit tan aliwliway pantrato tayod arum. No bilang ta nai-stress ka, nonot moy alimbawa nen Jesus.

15 Diad unor la ran bulan nen Jesus diad dalin, sikatoy naaburidon maong. Amta to ya sikatoy pateyen tan manirap ya maong. (Juan 3:14, 15; Gal. 3:13) Manga pigaran bulan antis na ipatey to, imbaga to ya agaylay pakakagonigon to. (Luc. 12:50) Tan pigaran agew labat la antis na ipatey to, imbaga to: “Nagogonigon ak.” Nanengneng tayo ya sikatoy mapaabeba tan mapasakop ed Dios nen ibabalikas toy liknaan to diad pikakasi: “Ama, ilaban mo ak ed sayan oras. Balet, saya so makasengeg no akin a sinmabi ak ed sayan oras. Ama, igloriam so ngaran mo.” (Juan 12:27, 28) Nen asabi lay oras, makpel ya inyawat nen Jesus so sarili to ed saray kabusol na Dios, ya amatey ed sikato diad ansakisakit tan makapabaing ya paraan. Anggano nanaaburido tan maniirap ya maong, mapaabeba ton ginawa so linawa na Dios. Talagan nibaga tayo sirin ya si Jesus so sankaabigan ya alimbawa ed pangipanengneng na kauyamoan anggano nanaaburido!​—Basaen so Isaias 53:7, 10.

Si Jesus so sankaabigan ya alimbawa na kauyamoan (Nengnengen so parapo 16-17) *

16-17. (a) Panon ya asubok so kauyamoan nen Jesus lapud saray kakaaro to? (b) Panon tayon naalig si Jesus?

16 Diad samay sampot a labi na bilay nen Jesus diad dalin, asubok so kauyamoan to lapud saray sankaapitan ya kakaaro to. Isip mo pa ray pakakaaburidoan nen Jesus ed saman a labi. Kasin sikatoy mansiansian matoor anggad patey? Akadepende ed sikato so bilay na binilyon a totoo. (Roma 5:18, 19) Say mas importantin sankanonot to et say reputasyon na Ama to. (Job 2:4) Insan, diad samay sampot a pangdem ya kaiba to ray sankaapitan ya kakaaro to, saray apostol to, ‘nansasangsangan ira no siopad sikara so manunaan.’ Aminpiga la ran impetek nen Jesus nipaakar ed saya, kaiba lay impangipetek tod sikara diad asasakbay ya oras ed saman a mismon labi! Balet makapadinayew ta agsinmyodot si Jesus. Imbes, sikatoy nansiansian kalmado. Maar-aro balet mapekder ton impaliwawa lamet so ugali ya nepeg dan ipatnag. Insan kinomendaan  to ray kakaaro to lapud matoor iran nansiansia a kaiba to.​—Luc. 22:24-28; Juan 13:1-5, 12-15.

17 No nagawa itan ed sika, anto kasi reaksion mo? Sarag tayon aligen si Jesus tan mansiansia tayon kalmado anggano nanaaburido o nai-stress tayo. Mabulos tayon unoren so ganggan nen Jehova ya “itultuloy yon itepel so sakey tan sakey.” (Col. 3:13) Napakiwas itayon unoren iyan ganggan no tandaan tayo ya amin tayo et wala ray nibabaga tan nagagawaan tayo ya makapasyodot ed arum. (Pro. 12:18; Sant. 3:2, 5) Tan no walay maabig ya nanenengneng mod arum, ibagam ed sikara.​—Efe. 4:29.

AKIN A TULOYTULOY TAYON ANAPEN SO KAUYAMOAN?

18. Panon ya tutulongan nen Jehova iray mauyamon totoo ya makapandesisyon na duga, tan antoy nepeg dan gawaen?

18 Makapandesisyon tayoy duga. No nanairapan tayon mandesisyon, tulongan itayo nen Jehova ya makapandesisyon na duga​—basta mauyamo tayo. Insipan to ya dengelen to so “kerew na saray mauyamo.” (Sal. 10:17) Tan agto labat dengelen so kerew tayo. Insipan na Biblia: “Iwanwan to ray mauyamo ed no antoy duga, tan ibangat tod sikara so dalan to.” (Sal. 25:9) Iiter nen Jehova itan ya panangiwanwan diad panamegley na Biblia tan saray niimprintan publikasyon, * saray video, tan saray pantitipon ya itatarya na “matoor tan makabat ya aripen.” (Mat. 24:45-47) Balet nepeg tayon gawaen so betang tayo, ya mapaabeba tayon bidbiren ya kaukolan tayoy tulong, aralen tayo iray itatarya nen Jehova, tan mabulos tayon iyaplika so nanaaralan tayo.

19-21. Anton lingo so agawaan nen Moises diad Kades, tan anto ran leksion so naaralan tayo ed satan?

19 Napaliisan tayoy makagawa na lingo. Isipen pa lamet si Moises. Pigaran dekada ya sikatoy nansiansian mauyamo tan apaliket toy Jehova. Balet nen magano lan manampot so 40 taon ya mairap ya impanbiahe ra ed kalawakan, agnipanengneng nen Moises so kauyamoan. Say atsi to, say posiblin tinmulong pian niliktar so bilay to diad Ehipto, et kakkapatey to ed saman tan imponpon ed Kades. Tan ibabaga lamet na saray Israelita ya ag-ira naaasikason maong. Diad saya et “kinolkol na saray totoo si Moises” lapud anggapoy danum. Anggano dakdakel lay anengneng dan milagro ya ginawa nen Jehova panamegley nen Moises tan anggano abaybayag la ya masakripisyon  idadaulo ira nen Moises, nanreklamo ni ran siansia. Aglabat ira nanreklamo ya anggapoy danum noagta tinetel da met si Moises, ya singa kasalanan to no akin ya apaet ira.​—Num. 20:1-5, 9-11.

20 Sinmanok a maong si Moises kanian agto apansiansia so inkaulimek to. Imbes ya mansalita ed bato, ya singa ingganggan nen Jehova, nampasnokan to ray totoo tan inggloria toy sarili to. Insan, amidua ton imbasig so baston to ed baleg a bato tan pinmaway so amayamay a danum. Lapud inkamapaatagey tan sanok, balbaleg ya lingo so agawaan nen Moises. (Sal. 106:32, 33) Tan lapud temporaryon naandi so kauyamoan to, sikatoy agnaabuloyan ya onloob ed Insipan a Dalin.​—Num. 20:12.

21 Makaaral tayo na importante iran leksion ed sayan inkagawa. Unona, nepeg ya naynay tayon pansagpotan ya pansiansiaen so mauyamon ugali tayo. No agtayo nipanengneng itan anggan magano labat, nayarin magmaliw tayon mapaatagey tan ompan makapansalita tan makagawa tayo na aliwa. Komadua, mairap so mansiansian mauyamo no nai-stress tayo, kanian pansagpotan tayon ipatnag itan anggano aliwan mainomay.

22-23. (a) Akin a nepeg tayon itultuloy ya anapen so kauyamoan? (b) Antoy ipapanengneng na saray balikas ya nabasad Sofonias 2:3?

22 Naprotektaan itayo. Magano lan ekalen nen Jehova so amin ya mauges a totoo ed dalin, tan saray mauyamo labat so mansiansia. Insan niwala la so tuan kareenan diad dalin. (Sal. 37:10, 11) Kasin sakey ka ed saratan ya mauyamo? On, no gawaen mo so ibabaga nen Jehova ya insulat nen propeta Sofonias.​—Basaen so Sofonias 2:3.

23 Akin et imbaga na Sofonias 2:3 ya, “Nayarin niyamot kayo”? Aglabay ya ibaga na saratan a balikas ya agsarag nen Jehova ya protektaan iramay malabay ya mamaliket ed sikato tan saramay aaroen to. Imbes, ipapanengneng na satan ya walay nepeg tayon gawaen pian naprotektaan tayo. Posible ya makaliktar tayo ed “agew na sanok nen Jehova” tan manbilay tayo na andi-anggaan no pansasagpotan tayo la natan ya anapen so kauyamoan tan paliketen si Jehova.

KANSION 120 Aligen so Inkauyamo nen Kristo

^ par. 5 Anggapo ed sikatayo so niyanak ya mauyamo. Kaukolan tayon aralen so magmaliw ya mauyamo. Nayarin mauyamo tayo no midedeneng tayo ed saray mareen ya totoo, balet ompan mairap tayoy mansiansian mauyamo no kaarap tayo iray mapaatagey ya totoo. Pian niwala ed sikatayo iyan balibalin kualidad ya kauyamoan, pantongtongan tayo ed sayan artikulo so pigaran mairap ya situasyon ya nayarin arapen tayo.

^ par. 3 KABALIKSAN NA SALITA: Kauyamoan. Say toon mauyamo et maomaong so pidedeneng tod arum tan kalmado nin siansia anggano walay rason ton onsyodot. Inkamapaabeba. Say toon mapaabeba et aliwan malastog o mapaatagey; ipapasen ton mas atagey so arum nen say sikato. No say tutukoyen et say inkamapaabeba nen Jehova, mankabaliksan itan ya maaro tan mapangasi so pidedeneng to ed saray abeba nen say sikato.

^ par. 12 Saray taga Babilonia et nginaranan da irayan taloran Hebreo na Sadrac, Mesac, tan Abednego.​—Dan. 1:7.

^ par. 18 Singa bilang, nengnengen so artikulon “Manggawa na Saray Desisyon a Mamagalang ed Dios,” ya im-publish ed Abril 15, 2011 ya isyu na Say Panag-bantayan.

^ par. 59 DESKRIPSION NA LITRATO: Si Jesus et nansiansian maulimek, tan kalmado ton impetek iray disipulo to kayari dan nansasangsangan no siopad sikara so manunaan.