1-2. (a) Anto ray panduaruwaan no maminsan na saray lingkor nen Jehova? (b) Antoy pantongtongan tayo ed sayan artikulo?

 AMIN tayon lingkor nen Jehova, anggano antoy edad tayo et wala ray panduaruwaan a tayo no maminsan. Singa bilang, ompan isipen na sakey ya kabataan ya anggapoy pibabali nen Jehova ed sikato. No ontay isipen to, ompan manalangan laingen ya manpabautismo. Isipen pa met so sakey ya brother ya nen kabataan ni et mas pinili ton iyuna so Panarian nen say pananap na dakel ya kuarta. Natan ya ontatatken la tan onkukulang so budget na pamilya to, ompan pagbabawian to may desisyon to. Isipen met so sakey ya maedad lan sister ya makapkapuy la tan limitado lay nagagawaan to. Ompan nadismaya ed sarili to ta aliwa lan singa dati so nagagawaan to parad si Jehova. Sika ey? Asalim met lay nanduaruwa tan intepet mo iraya ed sarilim: ‘Kasin naiimano ak nen Jehova? Sulit kasi so impansakripisyok parad sikato? Kasin mausar ak ni ed pakanengneng to?’

² Kaukolan tayon amtaen so ebat ed sarayan tepet, ta no andi, ompan onkapuy so pananisia tayo ed si Jehova ya anggad ontunda tayo lan manlingkor ed sikato. Pantongtongan tayo sirin ed sayan artikulo iray prinsipyo ed Biblia ya makatulong  ed sikatayo no (1) iisipen tayon anggapoy pibabali nen Jehova ed sikatayo, (2) pagbabawian tayo ray desisyon tayo nensaman, tan (3) say pakalikna tayo et agtayo la mausar ed si Jehova.

ANTOY GAWAEN MO PIAN NAEKAL SO PANDUARUWAM?

3. Antoy gawaen tayo no wala ray panduaruwaan tayo?

³ No wala ray tepet o panduaruwaan mo, marakep no diad Biblia so pananapan moy ebat. No ontan so gawaen mo, lalo kan onapit ed si Jehova, mas ontatken ka ed espiritual, tan ‘nabembenan mon malet so pananisiam.’​—1 Cor. 16:13.

4. Panon tayon ‘naseguro so amin ya bengatla’? (1 Tesalonica 5:21)

⁴ Basaen so 1 Tesalonica 5:21. Bibilinen tayo na Biblia ya ‘seguroen tayo so amin a bengatla.’ Panon tayon nagawaan itan? No agtayo segurado no kasin duga o aliway iisipen tayo, ikompara tayo itan ed ibabaga na Biblia. Singa bilang, panon to no iisipen na sakey ya kabataan ya aga inaro nen Jehova? Kasin manisian tampol ed ididikta na isip to? Andi. Kaukolan ton amtaen no antoy nibaga nen Jehova ed satan ya iisipen to. Atan labat so paraan pian naseguro to no kasin duga o aliwa so iisipen tan nalilikna to.

5. Panon tayon naalmo so ebat nen Jehova ed saray tepet tayo?

⁵ No manbabasa tayo na Biblia, singa mitotongtong si Jehova ed sikatayo. Pero pian naamtaan mo no antoy nibaga nen Jehova ed iisipen mo, aliwa labat ya pambasa na Biblia so nepeg mon gawaen. Kaukolan mon i-research iray espisipikon teksto ya makatulong pian naebatan iray tepet mo. Usar mo ray publikasyon ya intarya na organisasyon tayo. (Pro. 2:​3-6) Ipikasim ed si Jehova ya tulongan to ka ed pan-research mo tan naalmom komon iray ebat ed tepet mo. Insan mo natan anapen iray prinsipyo na Biblia tan praktikal iran suhestion ya dugaruga ed situasyon mo. Marakep met no i-personal study’m iray karakter ed Biblia ya alikna da met so naliliknam.

6. Antoy nitulong na saray aral tayo pian nalabanan tayoy panduaruwa tayo?

⁶ Singa met mitotongtong si Jehova ed sikatayo diad saray aral tayo. Kanian no lanang tayon miaral, ompan walay narengel tayon komento odino punto ed paliwawa ya eksakto ed tepet tayo. (Pro. 27:17) Pantongtongan tayo natan no antoy makatulong pian nalabanan tayo iray espisipikon panduaruwaan o iisipen tayon negatibo.

NO IISIPEN MON ANGGAPOY PIBABALI NEN JEHOVA ED SIKA

7. Anton tepet so naiisip na arum?

⁷ Ompan naisip mo, ‘Talaga kasin naiimano ak nen Jehova?’ Nayarin naisip mo ’tan ta pakaliknam et singa imposiblin nakaarom si Jehova ta sika too ka labat, sikato balet, Makapanyarin-amin a Dios ya Amalsa ed interon uniberso. Diad tua, ontan met so naisip nen Arin David. Singa aga makapanisia si David ya iimanoen nen Jehova iray totoo kanian say kuan to: “O Jehova, antoy kablian na too pian sikatoy imanoen mo, say anak na too pian sikatoy asikasoen mo?” (Sal. 144:3) No ontan met so tepet mo, iner mo naromog so ebat?

8. Base ed 1 Samuel 16:​6, 7, 10-12, antoy naiimano nen Jehova ed saray totoo?

⁸ Nanengneng tayo ed dakel ya salaysay ed Biblia ya iimanoen nen Jehova iray totoo ya agmasyadon napapansin na arum. Singa bilang, nengnengen ti pa may salaysay nen imbaki nen Jehova si Samuel ed abung nen Jesse pian lanaan so sakey ed saray ananak ton lalaki ya onsublay ya man-ari ed Israel. Walora so anak ya laki nen Jesse, pero say impatawag to labat ya onarap ed si Samuel et amay pitora. Agto la impatawag may bolirek, si  David. b Anta manaya, si David so pinili nen Jehova ya onsublay ya ari. (Basaen so 1 Samuel 16:​6, 7, 10-12.) Amta nen Jehova ya sikatoy inad-aro nen David ta anengneng To no antoy walad puso to.

9. Akin et segurado ka ya naiimano ka nen Jehova? (Nengnengen met so litrato.)

⁹ Isip mo pa ray patunay ya talagan iimanoen ka nen Jehova. No kaukolan moy bilin, bibilinen to ka, amay dugaruga ed situasyon mo. (Sal. 32:8) Agto ’tan nagawaan no anggapoy pibabali to ed sika tan no agto amtay nagagawa ed bilay mo. (Sal. 139:1) No unoren moy bilin nen Jehova tan nanengneng mon mismo ya talagan parad pankaabigan mo itan, diman mo lalon napatunayan ya talagan inar-aro to ka. (1 Awa. 28:9; Gawa 17:​26, 27) Iimanoen met nen Jehova so amin ya gagawaen mo parad sikato. Amta to ray balibalin ugalim kanian labalabay to kan nakaaro. (Jer. 17:10) Seguradon malikeliket si Jehova no labay mo met so mikaaro ed sikato.​—1 Juan 4:19.

NO PAGBABAWIAN MO RAY DESISYON MO NENSAMAN

10. Antoy naiisip na arum ya agagi no pawilen da ray desisyon da nensaman?

¹⁰ No maminsan, panduaruwaan na arum ya agagi no kasin duga iray desisyon da nensaman. Ompan walay marakep ya trabaho o negosyo ra pero tinaynan da itan ta pian mas niyuna ray Jehova. Pero kalabas na dakel ya taon, ompan wala ray kabat da ya mayamyaman la tan balibali lay bilay da. Kanian ompan manhinayang ira, tan naisip da: ‘Kasin sulit so impansakripisyok parad si Jehova? Mas maong amo no nantipon ak ni pian mainaway bilay ko natan.’

11. Akin et agonigon ya maong imay nansulat ed Salmo 73?

 ¹¹ No wala ray ontan ya panduaruwam, pareho kayoy alikna na samay nansulat na Salmo 73. Imbaga to ya mas maong ni kuno ray totoon agmanlilingkor ed si Jehova ta maksil so laman da, mayaman ira, tan singa anggapoy problema ra. (Sal. 73:​3-5, 12) Inisip to laingen ya anggapoy kana na panlilingkor to ed si Jehova. Atan ya lanang so sankanonot to kanian ‘inagew-agew a nagogonigon’ tan kinmapkapuy so liknaan to. (Sal. 73:​13, 14) Antoy ginawa to pian nalabanan toy panduaruwa to?

12. Base ed Salmo 73:​16-18, antoy ginawa na samay salmista pian nalabanan toy panduaruwa to?

¹² Basaen so Salmo 73:​16-18. Linma may salmista ed santuaryo nen Jehova. Diman et akaiba to ray arum ya lingkor na Dios kanian aliwawaan so nonot to. Atalosan to ya anggano singa mainaway bilay na saray agmanlilingkor ed si Jehova, anggapo balet so ilalo da ed arapen. Kanian dinmeen so nonot to tan agla manduaruwa. Atalosan to ya duga may desisyon to ya iyunay Jehova ed bilay to. Kanian manlapud saman et mas desidido la ya mantultuloy ya manlingkor ed si Jehova.​—Sal. 73:​23-28.

13. No bilang ta panduaruwaan mo no kasin duga iray desisyon mo nensaman, antoy gawaen mo pian ondeen so nonot mo? (Nengnengen met so litrato.)

¹³ No bilang ta panduaruwaan mo no kasin duga iray desisyon mo nensaman, ondeen so nonot mo no dalepdepen mo ray ibabaga na Biblia. Singa bilang, nabasad Biblia ya no say sakey et iyuuna toy panlilingkor to ed si Jehova, singa mantitipon na kayamanan ed tawen tan walad sikatoy pabor na Dios. Anggapoy ontan ya kayamanan na saramay totoon agmanlilingkor ed si Jehova. No antoy walad sikara natan, anggad man labat. Anggapoy ilalo  da ed arapen! Sika balet, natan ni labat et dakel lay bendisyon ya iiter nen Jehova ed sika, puera ni ray dakdakel ya bendisyon ya ipaparaan to parad sika diad arapen. (Sal. 145:16) Tan isip mo pa: No agmo inyunay panaglingkor mo ed si Jehova tan dumay nagmaliw ya desisyon mo, segurado ka sirin ya maong so bilay mo natan? Di ba, andi met. Pero niay segurado: No inyunam si Jehova ed bilay mo lapud inar-arom tan inarom met so kaparam ya too, seguroen nen Jehova ya magmaliw ya maliket so bilay mo.

NO SAY PAKALIKNAM ET AGKA LA MAUSAR ED SI JEHOVA

14. Antoy situasyon na arum ya agagi, tan antoy nalilikna da?

¹⁴ Wala ray lingkor nen Jehova ya ontatatken la, walay sakit da, odino walay kapansanan da. Lapud limitadoy nagagawaan da, ompan say pakalikna da et agla ra mausar ed si Jehova tan anggapo lay kana ra.

15. Anto lanlamang so atalosan to may nansulat ed Salmo 71?

¹⁵ Alikna met itan na samay nansulat na Salmo 71. Mapagpagan maong nen kinmapuy so laman to kanian oniay impikasi to ed si Jehova: “Agmo ak papaulyan sano makapuy ak la.” (Sal. 71:​9, 18) Pero anggan ontan so alikna to, kombinsido may salmista ya basta matoor ya manlingkor, tuloytuloy ya tulongan nen Jehova. Apatunayan to lanlamang ya naliliketan si Jehova ed saramay iiter day sankaabigan da anggano limitado lay nagagawaan da.—Sal. 37:​23-25.

16. Panon ya uusaren nen Jehova iray maedad la? (Salmo 92:​12-15)

¹⁶ Sikayo ran agagi min maedad la, agyo lilingwanan ya mabmabli kayo ed si Jehova. Anggano kinmapuy lay laman yo, tulongan to kayo pian mansiansia kayon mabiskeg ed espiritual. (Basaen so Salmo 92:​12-15.) Imbes ya  manpokus kayo ed saray agyo la nagawaan, say pampokusan yo et saray sarag yo nin gawaen. Singa bilang, napapaseseg yo ray agagi no nanenengneng dan manmamatoor kayo ed si Jehova tan no manggagawa kayoy paraan pian nakabat yo ni ran maong. Sarag yon iyistorya ed sikara no panon kayon inasikaso nen Jehova diad loob na dakel ya taon tan no anto ray tatalaranan yon nagawa ed arapen. Agyo met lilingwanan ya ipikasi so arum ta baleg so nagawaan na saray pikakasi yo. (1 Ped. 3:12) On, antokaman so situasyon tayo, walan-walay nagawaan tayo parad si Jehova tan ed saray agagi.

17. Akin et agtayo dapat ikokomparay sarili tayo ed arum?

¹⁷ No nadidismaya ka ed sarilim ta singa nakukulangan ka ed gagawaen mo parad si Jehova, tandaan mo ya papablien nen Jehova so antokaman ya gagawaen mo parad sikato. Agmo ikokompara so nagagawaan mo ed nagagawaan na arum, ta si Jehova ya mismo et agto ka ikokompara. (Gal. 6:4) Isip mo pa may ginawa nen Maria. Mabmablin larak may impuyok to ed si Jesus. (Juan 12:​3-5) Diad kabaliktaran balet, duaran angkekelag ya barya so impelag to may pobrin balo. (Luc. 21:​1-4) Pero ag-inkompara nen Jesus imay agawaan nen Maria ed samay impelag to may balo. Pambiliban to ingen so pananisia dan dua! Seguradon ontan met si Jehova. Papablien toy amin ya pansasakripisyom lapud panangarom ed sikato anggano say pakaliknam et melmelag labat so nagagawaan mo.

18. Antoy gawaen tayo pian nalabanan tayo ray panduaruwa tayo? (Nengnengen met so kahon ya “ No Manduaruwa Ka, Basam so Salita nen Jehova.”)

¹⁸ Amin tayo et manduaruwa no maminsan. Pero singa apantongtongan tayo, makatulong so Biblia pian nalabanan tayoy panduaruwa tayo. Kanian no wala ray tepet mo o negatibon liknaan mo, anap mod Biblia so ebat pian naamtaan mo no antoy nibaga nen Jehova ed naliliknam. No ontan so gawaen mo, ombiskeg so liknaan mo, pati say tiwalam ed si Jehova. Tandaan mo ya kabkabat tan iimanoen ka nen Jehova. Papablien to so amin ya sakripisyom parad sikato tan seguradon balesen to iratan. On, iikdan nen Jehova na atension so kada matoor ya lingkor to. Inar-aro to tayon amin!