1. Anto ray pigara ed saray regalo nen Jesus ed sikatayo?

 ANGGAPOY too ya makapipara ed inkamaiter nen Jesus. Nen wadiad dalin, nanggawa na saray milagro pian natulongan to ray totoo. (Luc. 9:​12-17) Say sankamablian ya inter tod sikatayo et say mismon bilay to. (Juan 15:13) Insan manlapu lad inkioli to, tuloytuloy to tayo nin tutulongan. Kinerew tod si Jehova ya ikdan to tayoy masanton espiritu ya mangibangat tan manligliwa ed sikatayo. (Juan 14:​16, 17, paimanod leksab; 16:13) Ipapasal to tayo met nen Jesus diad saray aral pian epektibo tayon nasumpal so kimey ya panagbangat diad interon mundo.​—Mat. 28:​18-20.

2. Siopa ray “regalo a lalaki” ya abitlad Efeso 4:​7, 8?

² Wala ni sakey ya regalo nen Jesus ed sikatayo. Insulat nen apostol Pablo ya kapawil nen Jesus ed tawen, “sikatoy angiter na saray regalo a lalaki.” (Basaen so Efeso 4:​7, 8.) Imbaga nen Pablo ya inter nen Jesus irayan regalo pian natulongan so kongregasyon diad nanduruman paraan. (Efe. 1:​22, 23; 4:​11-13) Diad panaon tayo, sarayan “regalo a lalaki” et ontutukoy ed saray ministeryal a lingkor, saray elder ed kongregasyon, tan saray manangasikaso na sirkito. a Aliwan perpekto irayan lalaki kanian nalilingo met ira. (Sant. 3:2) Pero uusaren ira na Katawan tayon Jesu-Kristo ya ontulong ed sikatayo. On, regalo to ra ed sikatayo!

3. Panon tayon nasuportaan iray “regalo a lalaki”? Mangiter na ilustrasyon.

³ Uusaren nen Jesus irayan “regalo a lalaki” pian pabiskegen so kongregasyon. (Efe. 4:12) Pero walay nitulong na kada sakey ed sikatayo pian nagawaan da iyan importantin responsabilidad  da. Singa onia ’tan ay: Diad panagpaalagey na Kingdom Hall, wala ray agagi ya sikaran talagay manpapaalagey. Pero wala ray onsusuporta ed sikara. Say arum ya agagi et tagalutoy naakan da, tagasaliw na materyales, tan arum ni. Ontan tayo met. Sarag tayon suportaan iray ministeryal a lingkor, elder ed kongregasyon, tan manangasikaso na sirkito. Nagawaan tayo itan diad salita tan gawa. Pantongtongan tayod sayan artikulo no panon tayon minanabang ed kimey na sarayan makukulin lalaki, tan no panon tayon nipanengneng ed sikara tan ed si Jesus ya misatsalamat tayo ed saray gagawaen da.

SARAY MINISTERYAL A LINGKOR YA ‘ONTUTULONG ED ARUM’

4. Anto ray arum ya kimey na saray ministeryal a lingkor nen inmunan siglo?

⁴ Nen inmunan siglo, wala met la ray brother ya aturon ministeryal a lingkor. (1 Tim. 3:8) Mapatnag ya sikara may binitla nen Pablo diad 1 Corinto 12:28 ya ‘ontutulong ed arum.’ Sikara so manggagawa ed arum ya importantin kimey ed kongregasyon pian makapampokus la ray elder ed panagbangat tan panagpastol. Singa bilang, ompan saray ministeryal a lingkor so nankopya na Kasulatan odino sikaray mangasaliw na saray materyales ya usaren ed panagkopya.

5. Anto ray kimey na saray ministeryal a lingkor ed kongregasyon natan?

⁵ Isip mo pa ray gagawaen na saray ministeryal a lingkor ed kongregasyon yo. (1 Ped. 4:10) Walay kanya-kanyan asainmin da. Say arum et aturon mangasikaso ed accounts o teritorya na kongregasyon. Say arum balet et taga-order na literatura o mano-operate na audio tan video equipment. Wala met iray arum ya akaasain ya attendant odino ontutulong diad panagmintina na Kingdom Hall. Importantin amin irayan gagawaen da, ta lapud satan et nagagawan mauksoy so aral na kongregasyon tan organisado so kimey ya panagpulong. (1 Cor. 14:40) Wala met iray ministeryal a lingkor ya niyaasain lan manpaliwawa ed publiko tan no midweek ya aral. Say arum ed sikara et natuturo bilang assistant group overseer. Tan no maminsan, ompan itagar na sakey ya elder so kualipikadon ministeryal a lingkor ya mila ed sikaton man-shepherding ed saray agagi.

6. Akin et misatsalamat tayod pansasagpot na saray ministeryal a lingkor tayo?

⁶ Antoy nibagam ed gagawaen na saray ministeryal a lingkor ed kongregasyon yo? Niay komento na pigaran agagi: “Misatsalamat ak ed saray ministeryal a lingkor ed kongregasyon mi, ta lapud sikara et nai-enjoy koy aral,” so kuan nen Sister Beberly b ya tagad Bolivia. “Lapud gagampanan day kimey da, makakakansion ak, makakapankomento ak, narerengel kon malinew iray paliwawa, tan makakaaral ak ed saray video tan artwork. Panatag so loob ko ta seseguroen da ya safe kami diad aral. Tan lapud aasikasoen da so uksoyan na videoconference, makakapiaral iray agagi anggano ag-ira makaalis ed abung da. Tan kayari na aral, idadaulo day panaglinis, aasikasoen day accounts, tan iiter da ray literatura ya kaukolan mi. Misatsalamat ak ya maong ed sikara!” Onia met so imbaga nen Sister Leslie ya tagad Colombia, ya elder so asawa to: “Balbaleg so nitutulong na saray ministeryal a lingkor pian nagawaan nen asawak so responsabilidad to. No anggapo ra, ompan agto la amtay unaen to ed karakel na kimey to. Kanian misatsalamat ak ed sarayan masetseseg tan makukulin brother.” Seguradon ontan met so naliliknam ed saray ministeryal a lingkor yo.—1 Tim. 3:13.

7. Panon tayon nipanengneng ya misatsalamat tayod saray ministeryal a lingkor? (Nengnengen met so litrato.)

⁷ Komon ta aliwan anggad liknaan labat so pisasalamat tayo ed saray ministeryal a lingkor.  Bibilinen itayo na Biblia ya ‘ipanengneng tayon misatsalamat tayo.’ (Col. 3:15) Ontan kunoy gagawaen nen Brother Kristofer, sakey ya elder ed Finland. Kuan to: “Mangipapawit ak na card o text ya walay karga ton makapaseseg ya teksto. Bibitlaen koy espisipiko ya imbaga o ginawa to man ya ministeryal a lingkor ya akapasesegan ko, tan no akin ya misatsalamat ak ed saray gagawaen tod kongregasyon.” Si Pascal tan Jael, ya tagad New Caledonia, et ipipikasi da kuno iray ministeryal a lingkor. Oniay imbaga nen Pascal: “Nen agano ni labat, say karga na pikakasi mi et saray ministeryal a lingkor ed kongregasyon mi. Misatsalamat kamid si Jehova lapud panguusar tod sikara, tan kekerewen mid sikato ya lanang to ran igiya tan tulongan.” No ontan so ipikasi tayo, seguradon madengedengel si Aman Jehova tan nagunggonaan so interon kongregasyon.—2 Cor. 1:11.

SARAY ELDER ED KONGREGASYON YA “MANSASAGPOT ED LIMOG YO”

8. Akin et imbaga nen Pablo ya saray kapara ton elder nen inmunan siglo et “mansasagpot” parad kongregasyon? (1 Tesalonica 5:​12, 13)

⁸ Nen inmunan siglo, wala met la ray elder ya makulikulin “mansasagpot” parad kongregasyon. (Basaen so 1 Tesalonica 5:​12, 13; 1 Tim. 5:17) ‘Idadaulo’ da so kongregasyon—ikokondukta da iray aral tan mandedesisyon ira bilang ulop na mamatatken. Maaro dan ‘sisimbawaen’ iray agagi pian naprotektaan so espiritualidad da. (1 Tes. 2:​11, 12; 2 Tim. 4:2) Pero siempre, kaukolan da met so mananap na pambilay parad pamilya ra, tan nepeg dan pansiansiaen ya mabiskeg so mismon espiritualidad da.​—1 Tim. 3:​2, 4; Tito 1:​6-9.

9. Anto ray responsabilidad na saray elder natan?

⁹ Diad panaon tayo, bip-busy met iray elder. Ebanghelisador o managpulong ira. (2 Tim. 4:5) Makulikuli ra ed ministeryo, oorganisaen da so kimey ya panagpulong na kongregasyon, tan ipapasal da tayo pian magmaliw tayon epektibo ed panagpulong tan panagbangat. Manlilingkor met ira bilang makasi tan patas ya ukom. No walay agi ya akagaway seryoson kasalanan, tutulongan na saray elder pian ompawil so malet ya relasyon to ed si Jehova. Pero siempre, kaukolan da met ya pansiansiaen ya malinis so kongregasyon. (1 Cor. 5:​12, 13; Gal. 6:1) Tan manuna ed amin, saray elder et pastol. (1 Ped. 5:​1-3) Ipaparaan dan maong iray paliwawa ra, kakabaten da so kada sakey ed kongregasyon, tan manshe-shepherding ira. Wala met iray elder ya ontutulong ed panagpaalagey tan panagmintina na Kingdom Hall, oorganisaen day kombension, tan say arum et membro na Hospital Liaison Committee tan Patient Visitation Group. Talagan agnatawalan so kuli na saray elder!

10. Akin et misatsalamat tayo ed saray makukulin elder tayo?

¹⁰ Impropesiya la nen Jehova ya asikasoen ya maong na saray pastol so kongregasyon kanian ‘ag-itayo ontakot odino onggiwgiw.’ (Jer. 23:4) Apaneknekan itan nen Sister Johanna ya tagad Finland nen nansakit na grabe so nanay to. Oniay imbaga to: “Siak may toon agko bastabasta nibagad arum so naliliknak. Pero walay sakey ya elder ya anggano agko masyadon ka-close, maan-anos ya dinmengel ed siak nen labay ko lan ibalikas so naliliknak. Nampikasi ira ya kaiba ak tan impaseguro dad siak ya inar-aro ak nen Jehova. Diad tua, agko la masyadon natandaan iray imbaga ra. Basta say agko nalingwanan, kinmalmay liknaan ko kayari da ak ya kinatongtong. Amtak ya imbaki ira nen Jehova pian pabiskegen ak diad panaon ya kakkaukolan koy tulong.” Sika ey, walay nanonotan mo ya tinulongan ka na saray elder ed kongregasyon yo?

11. Panon tayon nipanengneng so pisasalamat tayo ed saray elder? (Nengnengen met so litrato.)

¹¹ Labay nen Jehova ya ipanengneng tayoy  pisasalamat tayod saray elder “lapud kimey da.” (1 Tes. 5:​12, 13) Oniay imbaga nen Sister Henrietta ya tagad Finland: “Lanang ya akaparaan ya ontulong iray elder, pero agto labay ya ibagan dakdakel so panaon tan biskeg da. Diad tua, wala pa met iray dadalanen dan subok. Kanian no maminsan, ibabagak ed saray elder mi: ‘Antam, maomaong kan elder. Labay kon naamtaan mo ya papablien mi ka.’” Onia met so imbaga nen Sister Sera ya tagad Türkiye c: “Kaukolan na saray elder so ‘gasolina’ pian tuloytuloy dan nagawaan so asainmin da. Kanian marakep no ikdan tayo ray card, itagar tayo ran mangan, o miulop tayod sikara diad panagpulong.” Diad kongregasyon yo, kasin walay elder ya talagan naapresyam so sagpot tan kuli to? Manisip ka sirin na paraan pian nipanengneng moy pisasalamat mod sikato.—1 Cor. 16:18.

SARAY MANANGASIKASO NA SIRKITO YA ‘MAMAPABISKEG ED SARAY KONGREGASYON’

12. Siopa ni ray tinuro nen Jesus ya mamabiskeg ed saray kongregasyon nen inmunan siglo? (1 Tesalonica 2:​7, 8)

¹² Wala ni ray arum ya “regalo a lalaki” ya tinuro nen Jesus pian ontulong ed saray kongregasyon diad duman paraan. Diad panangidaulo nen Jesus, imbaki na saray elder ya walad Jerusalem si Pablo, Bernabe, tan arum ni bilang ombiabiahen manangasikaso. (Gawa 11:22) Akin et wala yan uksoyan? Imbaki irayan ombiabiahen manangasikaso pian ‘pabiskegen iray kongregasyon,’ ya singa gagawaen met na saray ministeryal a lingkor tan saray elder. (Gawa 15:​40, 41) Aliwan mainomay so ombisita ed nanduruman kongregasyon nensaman kanian kaukolan day mansakripisyo. Tan diad tua, inrisga day bilay da pian labat nibangat tan napaseseg da iray agagi.—Basaen so 1 Tesalonica 2:​7, 8.

13. Antoy ray responsabilidad na saray manangasikaso na sirkito?

 ¹³ Dakel ya kongregasyon so bibisitaen na saray manangasikaso na sirkito, kanian halos sinimba ya kaukolan day ombiahe. Say arum ingen et nilasus ya kilometro so kaukolan dan biahien pian nasabi da so sakey ya kongregasyon. Kada simba, maminpigan manpaliwawa so manangasikaso na sirkito, i-shepherding to ray agagi, tan ikondukta toy miting na saray payunir, miting na saray elder, tan saray miting antis na kapapaway. Oorganisaen to met tan ipaparaan to ray paliwawa parad saray sirkiton asemblea tan kombension. Manbabangat met ed Pioneer Service School tan oorganisaen toy special meeting na saray payunir ed sirkito. Tan no maminsan, wala ni ray arum ya importantin asainmin ya ipagawad sikato na branch office ya kaukolan ton sumpalen ya tampol.

14. Anto ray rason akin et papablien tayo iray makukulin C.O. tayo?

¹⁴ Panon ya minanabang iray kongregasyon ed pansasagpot na saray manangasikaso na sirkito? Oniay imbaga na sakey ya brother ed Türkiye: “Kada no bisitay kongregasyon mi, napapaseseg ak ya gawaen ni anggaay nayarian ko ya tulongan iray agagi. Dakdakel lay akabat kon C.O., tan amin da et mainomay ya asinggeran. Agdan balot impaliknad siak ya bip-busy ra.” Si Johanna, ya abitla nen niman, et asali to kunoy aki-partner ed manangasikaso na sirkito pero anggapon balot so akatongtong da. Balet apaseseg nin siansiay Johanna, kuan to: “Agkon balot nalinglingwanan man ya agew. Diad saman et kakkalipat na samay duaran atsik ed arum ya lugar tan nanailiw ko ran maong. Pinaseseg to ak may C.O. tan imbaga rad siak ya anggano arawi tayo natan ed saray kapamilya tan kakaaro tayo, ayos labat ta diad balon mundo, nakaiba tayo la ra ed andi-angga.” Seguradon amin tayo et walay agtayo nalinglingwanan  ya imbaga o ginawa na sakey ya C.O. ya amaseseg ed sikatayo.​—Gawa 20:37–21:1.

15. (a) Base ed 3 Juan 5-8, panon tayon nipanengneng so pisasalamat tayo ed saray manangasikaso na sirkito? (Nengnengen met so litrato.) (b) Akin et nepeg tayo met ya ipanengneng so apresasyon ed asawa na saray aturon lalaki, tan panon tayo itan ya nagawaan? (Nengnengen so kahon ya “ Agyo Lilingwanan Iray Kaasawaan Da.”)

¹⁵ Pinaseseg nen apostol Juan si Gayo ya parawesen o patuloyen to iray ombibisitan brother tan ‘pasipoten to ra komon diad paraan ya manepeg ed Dios.’ (Basaen so 3 Juan 5-8.) Panon tayo met itan ya nagawaan natan? Say sakey ya paraan et no suportaan tayoy uksoyan ed pamakan ed C.O. Say sakey met et no suportaan tayoy kapapaway legan na bisita. Si Leslie, ya abitla nen niman, et wala ni kunoy arum ya gagawaen to pian nipanengneng toy pisasalamat to. Kuan to: “Ipipikasik ed si Jehova ya iter to ray pankaukolan da. Susulatan mi met ira nen asawak. Ibabaga mid sikara ya balbaleg so nitutulong ed sikami na ibibisita ra.” Tandaan ya wala met iray dadalanen ya subok na saray C.O. tan nakekesawan met ira ya singa sikatayo. No maminsan, mansakit met ira, mapagpaga ran maong, tan onkakapuy met so liknaan da. No komendaan tayo ra o ikdan tayo ray simplin regalo, agtayo amta ompan atan so ebat ed pikakasi ra!​—Pro. 12:25.

KAKKAUKOLAN TAYO IRAY “REGALO A LALAKI”

16. No sakey kan brother, antoy marakep ya itepet mod sarilim? (Proverbio 3:27)

¹⁶ Kakkaukolan na organisasyon tayo so mas dakel nin brother pian manlingkor bilang “regalo a lalaki.” No sakey kan bautismadon brother, kasin “walay pakayarim ya ontulong”? (Basaen so Proverbio 3:27.) Kasin pansasagpotan moy magmaliw ya ministeryal a lingkor? No ministeryal a lingkor ka la, kasin pankikimeyan moy manlingkor bilang elder pian mas napanserbian mo ni ray agagi? d Kasin sarag moy mansakripisyo pian makapan-aplay ka parad School for Kingdom Evangelizers? Ipasal ka na satan ya eskuelaan pian mas nausar ka ni nen Jesus. No say pakaliknam et agka kualipikado, manpikasi kad si Jehova. Kerew moy masanton espiritu to pian nagawaan mo so antokaman ya asainmin ya niiter ed sika.​—Luc. 11:13; Gawa 20:28.

17. Antoy prupruebaan na pansasagpot na saray “regalo a lalaki”?

¹⁷ Say pansasagpot na saray brother ya tinuro nen Jesus bilang “regalo a lalaki” et prueba ya idadaulo to tayo legan na sayan kaunoran iran agew. (Mat. 28:20) Misatsalamat tayo ed maar-aro tan maite-iter ya Ari tayo ta inikdan to tayo na saray brother ya mangasikaso ed sikatayo. Kanian manisip ka sirin na paraan pian nipanengneng moy pisasalamat mo ed sarayan makukulin brother. Tan agmo met lilingwanan ya pisalamatan si Jehova, say panlalapuan na “amin a maong tan sankaabigan a regalo.”—Sant. 1:17.