Onlad karga

Onlad saray karga

 ISTORYAY BILAY

Benendisyonan a Maong nen Jehova so Desisyon Ko

Benendisyonan a Maong nen Jehova so Desisyon Ko

Onliliwawa la nen asumpal kamin angisuksok na saray tract diad silong na puerta na pigaran abung diad teritoryan aka-asain ed sikami. Say taon ed saman et 1939, tan binmangon kami ed pegley labi tan binmiahe kami na masulok ya sakey oras paonlad melag a syudad na Joplin diad southwestern Missouri, U.S.A. Nen asumpal mi lay kimey mi, linmugan kamin tampol ed kotse tan linma kami ed pasen ya panbanaan mi, tan ditan et inalagar mi ray arum ya kakaiba mi. Balet ompan mankelaw kayo no akin ya diad saman et palbangon so impanpulong mi, insan kami inmalis ya tampol. Istoryaen kod sikayo naani.

MALIKELIKET ak ta binmaleg ak ya walaan na Kristianon atateng, si Fred tan Edna Molohan, ya angibangat ed siak ya aroen so Dios. Sikaray aktibon Estudyante na Biblia (Saray Tasi nen Jehova) diad loob la na 20 taon antis ak nin nianak nen 1934. Nanayam kami ed Parsons, sakey a melag ya baley diad southeastern Kansas, tan wala kami ed kongregasyon ya amin lawarin agagi et alanaan ya Kristiano. Panliliketan na pamilya mi so iyaatendi ed saray aral ed kongregasyon tan pampupulong na katuaan ya walad Salita na Dios. Diad ngarem na Sabado, maslak et manpupulong kami diad gilig na karsada, ta onman so public witnessing nensaman. Makapakesaw no maminsan, balet kayari min manpulong, naynay kamin itatagar nen Tatay ya man-ice cream pian narepreskoan kami.

Melag labat so kongregasyon mi pero baleg so teritorya mi, kaiba lay pigaran angkelag ya baley tan dakel nin daralusan. No manpulong kami ed saray dumaralos, mabetbet ya isasalat mi ray literatura parad saray tanem dan pisipising, iknol (a kakkapan-ala ed ubong na manok), odino mabilay ni ingen ya manok. Lapud nandonasyon lay Tatay parad saray literatura, akaarum irayan iiter da ed saray naakan na interon pamilya mi.

SARAY PARAAN NA IMPANPULONG MI

Walay phonograph na atateng ko, ya uusaren da no manpupulong ira. Ugaw ak nid saman kanian agko amtan usaren, balet labalabay kon ibaan si Tatay tan Nanay ya paknolen so akarekord iran paliwawa nen Brother Rutherford sano man-RV tan mangiyaral ira na Biblia.

Kaibak si tatay tan nanay diad arap na sound car mi

Say 1936 Ford ya luluganan mi et ginawa nen Tatay ya sound car, tan diad tagey to et akakabit so baleg ya espiker. Baleg so nitulong na saya pian nipulong so mensahe na Panarian ed dakel ya totoo. Maslak, manpatogtog kami ni akarekord ya musika  pian naalay atension na totoo, insan mi paknolen so akarekord ya paliwawa ed Biblia. Kayari to, mangiyopresi kami na literatura ed saray interesadon totoo.

Diad melag a baley na Cherryvale, Kansas, imbaga na pulis ed si Tatay ya agnayari ed loob na parke so sound car, ta dakel so oonla ditan kada simba pian manrelaks, balet inmabuloy no diad paway na parke. Kanian tinmulok si Tatay tan inyalis toy sound car diad biek ya karsada na parke pian siansia nin narengel na totoo so mensahe, insan to intuloy so programa. Naynay ya makapaliket so miulop ed si Tatay tan ed kuyak ya si Jerry diad onman iran panagpulong.

Antis na 1940, akibiang kami ed espisyal a kampanya ya tatawagen ya “blitz” pian maples min nakobrian iray teritorya ya dakel so onsusumpa. Ombangon kami ed palbangon (ya singa ginawa mi ed Joplin, Missouri) tan isuksok mi ray tract odino bokleta diad silong na saray puerta na kaabungan. Insan kami manbabana diad paway na syudad pian naseguro no kasin walay narel odino inaresto na pulis.

Diad saraman ya taon, wala ni sakey ya balibalin paraan na panagpulong, say information march. Pian nipakabat mi so Panarian, angisulong kami na saray karatula tan akalinya kamin manmartsa paonlad sakey ya syudad. Nanonotan ko may impanmartsa na saray kakaaro mi diad syudad mi ya akasulong ira na karatula ya walay akasulat ya “Sakey a Patit tan Negosyo so Relihyon.” Nanakar ira na manga 1.6 kilometro paonlad syudad insan ira pinmawil ed abung mi. Maong labat ta anggapoy nabet dan antokaman ya isusumpa diad impanmartsa ra, balet dakel so akatongtong dan interesado.

SARAY KOMBENSION NENSAMAN

Mabetbet ya ombiabiahe so pamilya mi manlapud Kansas paonlad Texas pian onatendi ed saray kombension. Nantrabaho si Tatay diad Missouri-Kansas-Texas Railroad (ya tatawagen met ya M-K-T, odino Katy, Railroad), kanian sarag mi onlugan ditan ya libre no onatendi kami ed saray kombension tan no pasyaren mi ray kakanayon mi. Say kuya nen Nanay ya si Fred Wismar, tan say asawa ton si Eulalie, et nanayam diad Temple, Texas. Naamtaan nen uncle Fred so katuaan nen sikatoy kabataan ni diad gapo na 1900, sikatoy abautismoan, tan tinulongan to met iray agagi to ya naamtaan so katuaan, kaiba lay Nanay ko. Sikatoy kabkabat na saray agagi diad interon central Texas, ta ditan nanlingkor nensaman bilang zone servant (ya say tawag la natan et manangasikaso na sirkito). Sikatoy maomaong, positibon too, tan naynay ya maliket a kaiba. Sikatoy maseseg ed katuaan, tan maabig so impluensya to ed siak nen kabataan ak.

Nen 1941, nambiahe so pamilya mi panamegley na tren paonlad St. Louis, Missouri, pian onatendi ed sakey a baleg ya kombension. Amin ya kabataan et inimbitaan ya saniiban onyurong diad espisyal ya seksion ya imparaan ed sikara pian ondengel ed paliwawa nen Brother Rutherford ya say tema to et “Ananak na Ari.” Diad bandad sampot na paliwawa to, asurprisa kamin amin ya kaibad grupo ta walay naawat min regalo ya balon libro ya Children, imbunog iratan nen Brother Rutherford tan saray kakaiba  to. Malikeliket so masulok ya 15,000 ya kabataan ed saman ya bendisyon ed espiritual.

Nen Abril 1943, nanliketan mi onatendi ed melag balet agnalinglingwanan ya “Call to Action” ya asemblea diad Coffeyville, Kansas. Ditan et inyanunsio so balon eskuelaan, say Teokratikon Eskuelaan Parad Ministeryo, ya gawaen diad amin ya kongregasyon. Tan in-release so bokleta ya walay karga ton 52 ya leksion ya usaren ed satan ya eskuelaan. Diad bandad sampot na satan ya taon, naikdan ak na asainmin diad unonan pankanawnawa. Espisyal met itan ya asemblea parad siak lapud kaiba ak ed pigara ya abautismoan ed ambetel a pukok diad sakey ya asingger a daralusan.

SAY LABAY KON GAWAEN ED BILAY KO​—MANLINGKOR ED BETHEL

Asumpal ak ya nanaral nen 1951 tan kaukolan koy mandesisyon no antoy gawaen kod bilay ko. Talagan labalabay ko so manlingkor ed Bethel, ya ditan so nanlingkoran nen kuyak Jerry, kanian impawit koy application ko diad opisina ed Brooklyn. Agunggonaan ak ya maong ed espiritual lapud sayan desisyon ko. Ag-abayag, naaprobaan so application ko, tan atawag ak ya manlingkor ed Bethel nen Marso 10, 1952.

Labay ko komon so mantrabaho ed printery pian makatulong ak ed pamawala na saray magasin tan literatura. Balet, inyasain ak bilang waiter insan kayari to et diad kusina, tan maliket ak ta dakel so naaralan ko ditan. Kanian agkon balot asali so nantrabaho ed printery. Agunggonaan ak ed impanguman na eskedyul na pantrabaho diad kusina lapud walay panaon kod agew ya man-personal study diad library na Bethel. Tinmulong itan pian onaligwas ak ed espiritual tan ombiskeg so pananisiak. Binmiskeg met so determinasyon kon lingkoran si Jehova diad Bethel anggad nasarag ko. Pinmaway si kuyak Jerry diad Bethel nen 1949 tan nankasal ira nen Patricia, balet nanayam ira ed asingger ed Brooklyn. Lanang iran wadtan pian tulongan tan pasesegen ak ed saray unonan taon ko diad Bethel.

Ag-abayag nen sinmabi ak ed Bethel, manaanap ira na saray brother ya iyarum ed listaan na saray Bethelite ya manpaliwawa ed publiko. Saray brother ya walad sayan listaan et inyasain ya ombisita ed saray kongregasyon ya 322 kilometro so kaarawi to manlapud Brooklyn pian manpaliwawa ed publiko tan mibiang ed lawak na kimeyan kaibay kongregasyon ya bisitaen da. Apribilehyoan ak ya magmaliw ya kaiba ed listaan. Mannerbiyos ak diad unonan paliwawak ya sakey oras so karukey to. Lanang ak ya onlulugan ed tren no ombibisita ak ed saray kongregasyon. Nanonotan ko ni may aminsan ya Simba na ngarem legan na winter nen 1954. Linmugan ak ed tren pasempet ed New York tan kaukolan koy onsabid Bethel antis ya onlabi. Balet walay sinmabin bagyo tan makmaksil so dagem ya walay kaiba ton snow. Nandeperensya so de-kuryenten makina na tren tan tinmunda. Kanian say insabi la na tren ed istasyon na New York et manga alas singko na kabuasan na Lunes. Manlapud man et linmugan ak lamet ed tren paonlad Brooklyn, insan dinmiretso ak lad kusina pian mantrabaho, anggano medyo atrasado tan naknaksawan ak lapud sanlabin akayurong ak ed tren. Balet anggano wala ray mairap iran situasyon, siansian malikeliket ak ya manlingkor ed saray agagi tan dakel so balon kakaaro ya nakakabat ko lapud ibibisitak ed saray kongregasyon.

Manpaparaan kami ya man-broadcast diad studio na WBBR

Diad saray unonan taon ko ed Bethel, naimbitaan ak ya mibiang ed programa ed radyo diad istasyon ya WBBR. Diad saman, say kawalaan na studio et diad second floor na 124 Columbia Heights. Inyasain ak bilang sakey ed saray mangipresenta na panangiyaral na Biblia ya sinimban ibro-broadcast. Si Brother A. H. Macmillan, sakey ya abayag lan membro na pamilyan Bethel, et regular ya mibibiang ed sarayan programa ed radyo. Sikatoy kabkabat ed tawag ya Brother Mac, tan sikatoy maabig ya alimbawa ed sikami ran mas ugaw ya membro na pamilyan Bethel lapud matoor ya pansusungdo to.

Manbubunog kami na saray handbill na WBBR diad ministeryo pian pasesegen so totoo ya ondengel ed satan

Insan nen 1958, naimbitaan ak ya mantrabaho ed Gilead School. Say trabahok et ibaan iray nan-graduate ya mangalay visa da tan iyuksoy so pambiahe na sarayan maseseg ya agagi. Diad saman et mabmabli so pamasahe ed eroplano kanian daiset labat ed saray nan-graduate so ombiabiahe panamegley na satan. Maslak ed saray binmiahe ed Africa tan ed Far East et linmugan ed barko. Sinmabi panaon, inmabeba lay pamasahe kanian maslak ed saray misionero et onlulugan lad eroplano paonlad saray asainmin da.

Aayosen ko ray diploma parad Gilead antis na programa

 IMPANBIAHE PAONLAD SARAY KOMBENSION

Naaruman so kimey ko nen 1960, angiyuksoy ak na saray biahe panamegley na eroplano, manlapud United States paonlad Europe parad internasyonal iran kombension nen 1961. Kaiba ak saramay nanlapud New York ya linmad Hamburg, Germany, parad satan ya kombension. Kayari na kombension, siak tan say taloran brother diad Bethel et nanrenta kami na luluganan pian onlad Italy, pian ombisita ed sangan opisina diad Rome. Manlapud Italy, linma kami ed France, tan adalanan mi ray Palandey na Pyrenees, tan linma kami met diad Spain, ya ditan et sebel so panagpulong a kimey. Akapangawit kami na pigaran literatura, ya binalkot mi iratan ya singa regalo parad saray agagi ed Barcelona. Talagan makapalikliket ya nanengneng ira! Kayari to et linma kami ed Amsterdam, insan kami la linmugan ed eroplano pasempet ed New York.

Kalabas na sakey taon, kaiba ed asainmin kod Bethel so pangiyuksoy na biahe parad saray apilin delegado ya onatendi ed sakey a serye na internasyonal iran kombension diad interon mundo. Atan may “Everlasting Good News” ya asemblea nen 1963. Walay ginawan uksoyan parad 583 iran delegado ya onlad nanduruman parte na mundo pian onatendi ed saray kombension diad Europe, Asia, tan diad South Pacific, insan diad Honolulu, Hawaii, tan say sampot et diad Pasadena, California. Kaiba ed biahe so ipasyar ed Lebanon tan Jordan parad espisyal ya tour nipaakar ed saray lugar ya abitlad Biblia. Likud ed impangiyuksoy na saray flight tan hotel ya napanayaman, say department mi ed Bethel et akala na amin ya visa ya kaukolan parad pambiahe diad nanduruman bansa.

SAY BALON KAIBAK ED PAMBIAHE

Say taon ya 1963 et espisyal parad siak lapud sakey nin rason. Nen Hunyo 29, nankasal kami nen Lila Rogers ya taga Missouri, ya nagmaliw met ya membro na pamilyan Bethel nen 1960. Sakey simba kayari na kasal mi, akila kami nen Lila ed around-the-world tour tan binmisita kami ed Greece, Egypt, tan Lebanon. Manlapud Beirut et nan-eroplano kami paonlad melag ya airport diad Jordan. Lapud pepegetan so kimey tayo ed Jordan tan walay angibagad sikami ya agnaabuloyan iray Tasi nen Jehova ya makalay visa pian makaloob ditan, nononoten mi no antoy nagawa kasabi mi diman. Balet asurprisa kami ta nen sinmabi kami, walay grupo na totoon akaalagey diad tagey na melag ya airport tan walay awit dan banner ya akasulat “Welcome Jehovah’s Witnesses”! Malikeliket kami ta anengneng min mismo iray lugar ya abitla ed Biblia! Pinmasyar kamid saray lugar ya nanayaman na saray patriarka nensaman, no iner so nampulongan nen Jesus tan saray apostol, tan no iner ginmapo so Inkakristiano ya akasabi anggad saray sampot na dalin.​—Gawa 13:47.

Diad loob na 55 taon, si Lila so matoor ya kaibak diad amin ya asainmin mi. Aminpiga kamin akakar diad Spain tan Portugal sanen sebel so kimey ed saratan ya bansa. Papasesegen mi ray agagi tan iyaawitan mi ray literatura tan arum ni ran kaukolan da. Abisita mi ni ingen iray arum ya agagi ya impriso ed sakey ya daan lan kampo na saray sundalo diad Cádiz, Spain. Malikeliket ak ta apabiskeg ko ra diad sakey ya paliwawa ya base ed Biblia.

Kaiba mi si Patricia tan kuya Jerry Molohan diad 1969 “Peace on Earth” a Kombension

 Manlapu la nen 1963, apribilehyoan ak ya ontulong pian niyuksoy iray tour parad internasyonal iran kombension diad Africa, Australia, Central tan South America, Europe, Far East, Hawaii, New Zealand, tan Puerto Rico. Nanliketan mi nen Lila iray dakel ya agnalinglingwanan a kombension, sakey lad ’tan imay agawa diad Warsaw, Poland, nen 1989. Dakel ya agagi ya nanlapud Russia so inmatendi ed satan ya baleg a kombension​—say sankaunaan ya inatendian da! Dakel ya agagi so akabat mi ya pigay taon ya impriso diad Soviet Union lapud pananisia ra.

Say ibisita ed saray sangan opisina diad interon mundo pian pabiskegen tan pasesegen iray pamilyan Bethel tan saray misionero et talagan makapalikliket ya pribilehyo parad siak. Say sampot ya binisita mi et say sangan opisina diad South Korea. Ditan et akabat mi so 50 ya agagi tayo ya nipriso ed Suwon. Positibo irayan agagi tan labalabay day mibiang lamet ed ministeryo. Talagan apaseseg kami ed sikara!​—Roma 1:11, 12.

MAKAPALIKET SO IYAALIGWAS

Naimatonan ko no panon ya benendisyonan nen Jehova iray totoo to diad inlabas na panaon. Say 100,000 ya manangipalapag nen abautismoan ak nen 1943 et nagmaliw la natan ya masulok ya 8,000,000 diad 240 ya bansa. Baleg so agawaan na impanpulong ya indaulo na saray nan-graduate ed Gilead. Talagan makapaliket so mikimeyan ed sarayan dakel ya misionero diad dakel ya taon tan diad itulong ed sikara pian makaonla rad saray asainmin da ed arum ya bansa!

Malikeliket ak lapud desisyon ko nen kabataan ak ni ya palaknaben so ministeryok diad impan-apply kod Bethel. Talagan benendisyonan nen Jehova so amin ya desisyon ko. Likud ed liket ya naliliknak lapud panlilingkor kod Bethel, nanliketan mi met nen Lila so pribilehyon mankimey diad ministeryo kaiba iray kongregasyon diad Brooklyn, ya no iner et dakel so nagmaliw ya tuan kakaaro mi.

Tuloytuloy ak nin manlilingkor ed Bethel diad suporta nen Lila kada agew. Anggano masulok lan 84 so taon ko natan, maliket ak ta siansian makakatulong ak ni diad pangasikaso na saray sulat ed branch.

Siak tan si Lila natan

Talagan makapalikliket so magmaliw ya kabiangan na makapadinayew ya organisasyon nen Jehova tan nanengneng so baleg ya pidumaan na saramay manlilingkor ed si Jehova tan ed saramay agmanlilingkor ed sikato. Mas natatalosan tayo imay nabasa ed Malaquias 3:18: “Nanengneng yo lamet so pandumaan na matunong a too tan mauges a too, samay manlilingkor ed Dios tan samay agmanlilingkor ed sikato.” Diad kada agew ya onlalabas, nanenengneng tayoy iloloor na kipapasen na sayan sistema na mundo nen Satanas, tan dakdakel so totoon anggapoy ilalo da tan ag-ira maliket ed bilay da. Balet saramay mangaaro tan manlilingkor ed si Jehova et maliket so bilay da​—anggan diad sayan mair-irap ya panaon—​tan walay seguradon ilalo da ed arapen. Talagan baleg ya pribilehyo so pangipulong ed maong a balita na Panarian! (Mat. 24:14) Asingsingger lan salatan na Panarian na Dios iyan daan a mundo tan magmaliw lan paraiso. Seguradon labalabay tayo lan onsabi itan! Diad satan et panliketan na saray matoor a lingkor nen Jehova diad dalin so bilay ya andi-anggaan.