Onlad karga

Onlad saray karga

Kasin Papablien Moy Libro nen Jehova?

Kasin Papablien Moy Libro nen Jehova?

“Sanen nadngel yo . . . so salita na Dios, inawat yo itan . . . bilang salita na Dios, a saya so katuaan.”—1 TES. 2:13.

KANSIONEN: 114, 113

1-3. Antoy posiblin rason na agpantatalosan di Euodias tan Sintique, tan panon ya napaliisan iratan? (Nengnengen so litratod gapo na artikulo.)

PAPABLIEN na saray lingkor nen Jehova so masanton libro to, say Biblia. Lapud aliwa tayon perpekto, kaukolan tayon amin so simbawa na Kasulatan. Kasin unoren tayo itan? Imanoen iray inmunan siglon Kristiano ya si Euodias tan si Sintique. Wala ray seryoson agpantatalosan na sayan duaran alanaan ya bibii. Anto iratan? Anggapoy ibabaga na Biblia. Balet bilang ilustrasyon, imanoen tayoy posiblin agawa.

2 Kunwari et inimbitaan nen Euodias so pigaran agagi pian mangan tan manistoryaan ed abung da. Agnaimbitaan si Sintique, balet abalitaan to ya malikeliket ira. Nayarin imbaga nen Sintique: ‘Agto ak labat inimbitaan nen Euodias! Abaloan ko sankaaro kami.’ Lapud pakalikna to et nibaliwala, binmetel so panangaro nen Sintique ed si Euodias tan pansususpetsaan to ni ingen. Kanian namprepara met si Sintique, tan inimbitaan to met iraman ya agagi—balet agto inimbitaan si Euodias! Sayan agpantatalosan nen Euodias tan Sintique et nayarin deralen toy kareenan na interon kongregasyon. Ag-ibabaga na Biblia no  antoy nansumpalan, balet nayarin dinmengel irayan agagi ed maaron simbawa nen apostol Pablo.—Fil. 4:2, 3.

3 Nayarin nagawa met so ontan ed saray kongregasyon na totoo nen Jehova natan. Balet nasolusyonan odino napaliisan iratan ya problema no iyaplika tayoy simbawan walad Salita na Dios, say Biblia. Tan no papablien tayon maong so Libro nen Jehova, unoren tayo ray instruksion to.—Sal. 27:11.

SAY LIBRO NA DIOS TAN EMOSYON NA TOO

4, 5. Antoy isisimbawa na Salita na Dios nipaakar ed pangontrol tayod emosyon tayo?

4 Aliwan mainomay ya kontrolen so emosyon tayo no say pakalikna tayo et ininsulto odino minelmelag itayo. Makapadismaya no aliway impantrato ed sikatayo lapud lahi, kolor, odino itsura tayo. Tan mas ansakit no kaagian tayo so nanggawad satan! Kasin walay simbawa na Salita na Dios ya makatulong ed sikatayon nakontrol iyan makapuy ya ugali na imperpekton too?

5 Manlapud gapo et inobserbaan nen Jehova so relasyon na totoo ed sakey tan sakey. Iimanoen toy nalilikna tan kagagawa tayo. No negatiboy iisipen tayo odino makakapasnok itayo, nayarin makapangibalikas tan makapanggawa tayoy pagbabawian tayo. Kanian makabat no iyaplika tayoy simbawa na Biblia ya kontrolen tayoy petang na ulo tan paliisay onsyodot ya tampol! (Basaen so Proverbio 16:32; Eclesiastes 7:9.) Amin tayo et kaukolan tayoy magmaliw ya agmasyadon sensitibo tan mas mabulos ya mamerdona. Importantin maong ed si Jehova tan Jesus so panamerdona. (Mat. 6:14, 15) Kasin kaukolan moy magmaliw ya mas mabulos a mamerdona odino kasin kaukolan mon kontroley emosyon mo?

6. Akin ya kaukolan tayon paliisan so magmaliw ya mapasnok?

6 Mainomay ya onsyodot iray totoon agda nakontrol so emosyon da. Kanian ag-ira labay ya nakaiba na arum. Say mapasnok a too et makapuy so impluensya tod kongregasyon. Nayarin agto ipahalatay pasnok o pambusol to, balet saray negatibon kanonotan tan karga na puso to et “niparungtal ed kongregasyon.” (Pro. 26:24-26) Posiblin natulongan na saray elder iray ontan ya agagi a natalosan ya say pasnok, pambusol, tan panem-em na sakit na linawa et agnayari ed organisasyon na Dios. Malinlinew itan ya ibabaga na mabmablin Libro nen Jehova. (Lev. 19:17, 18; Roma 3:11-18) Kasin onabobon kad satan?

NO PANON SO PANGIGIGIYA ED SIKATAYO

7, 8. (a) Panon ya igigiya nen Jehova so kabiangan na organisasyon to diad dalin? (b) Anto ray arum ed saray bilin ya walad Salita na Dios, tan akin ya nepeg tayon unoren iratan?

7 Igigiya tan papakanen nen Jehova so kabiangan na organisasyon to diad dalin panamegley na “matoor tan makabat ya aripen” ya iwawanwan nen Kristo, say “ulo na kongregasyon.” (Mat. 24:45-47; Efe. 5:23) Singa say mananguley ya ulop nen inmunan siglo, aawaten na sayan aripen so impuyan a salita odino mensahe na Dios, tan papablien ton maong itan. (Basaen so 1 Tesalonica 2:13.) Anto ray arum ed saray bilin odino instruksion ya walad Biblia a pakagunggonaan tayo?

8 Bibilinen itayo na Biblia ya regular ya onatendid saray pantitipon. (Heb. 10:24, 25) Papasesegen itayo met na satan ya mansiansian nankakasakey ed bangat. (1 Cor. 1:10) Ibabaga na Salita na Dios ya iyuna tayod bilay tayo so Panarian. (Mat. 6:33) Idadanet met na Kasulatan ya obligasyon tan pribilehyo tayoy manpulong ed  kaabungan, diad matoon lugar, tan diad impormal ya paraan. (Mat. 28:19, 20; Gawa 5:42; 17:17; 20:20) Bibilinen na Libro na Dios iray elder ya pansiansiaen dan malinis so organisasyon to. (1 Cor. 5:1-5, 13; 1 Tim. 5:19-21) Tan igaganggan nen Jehova ya nepeg a malinis ed pisikal tan espiritual so amin a membro na organisasyon to.—2 Cor. 7:1.

9. Antoy saksakey ya uusaren nen Jesus natan pian natulongan itayon natalosan so Salita na Dios?

9 Nayarin isipen na arum ya sarag dan talosan a bukor so Biblia. Balet tinuro nen Jesus so ‘matoor ya aripen,’ bilang say saksakey ya usaren to pian iparaan so espiritual ya naakan. Manlapu la nen 1919, uusaren na nitronon ari ya si Jesu-Kristo iyan aripen pian natalosan na saray papatumbok to so Libro na Dios tan niyaplika day simbawa na satan. No unoren tayoy instruksion na Biblia, napansiansia tayoy kalinisan, kareenan, tan pankakasakey ed kongregasyon. Tepetan tayoy sarili tayo, ‘Kasin matoor ak ed sayan aripen ya uusaren nen Jesus natan?’

MAPLES YA ONAABANTE SO KARWAHE NEN JEHOVA!

10. Antoy ibabaga na libro na Ezequiel nipaakar ed kabiangan na organisasyon nen Jehova ed tawen?

10 Diad tulong na Biblia et naamtaan tayoy nipaakar ed kabiangan na organisasyon nen Jehova ed tawen. Singa bilang, akaawat na pasingawey si propetan Ezequiel ya say kabiangan na organisasyon na Dios ed tawen et irerepresenta na mangatatawen ya karwahe. (Eze. 1:4-28) Akalugan ed sayan karwahe si Jehova, tan onla itan ed anggan iner ya pangipaarapan na espiritu to. Kanian say kabiangan na organisasyon nen Jehova ed tawen so mangidadaulo ed organisasyon to diad dalin. Talagan onaabante so karwahe! Isipen pa so dakel ya pananguman ed organisasyon ed apalabas ya samploy taon—amin iratan et lapud panangigiya nen Jehova. Lapud asingger lan deralen nen Kristo tan saray masanton anghel to iyan mauges a mundo, maples ya onaabante so karwahe nen Jehova pian niyalangon so soberanya to tan napasanto so ngaran to!

Misalsalamat tayod saray dakel ya boluntaryo ed konstruksion a makulikulin mankikimey! (Nengnengen so parapo 11)

11, 12. Anto ray nagagawaan na organisasyon nen Jehova?

11 Isipen pay nagagawaan na kabiangan na organisasyon na Dios ed dalin diad sayan kaunoran iran agew. Konstruksion. Nilasus ya agagi so makulikulin mangipapaalagey ed balon headquarters na Saray Tasi nen Jehova diad Warwick, New York, U.S.A. Diad panangigiya na Worldwide Design/Construction Department, nilibon boluntaryo manlapud nanduruman bansa so impasyan mantratrabaho pian mangipaalagey na saray balon Kingdom Hall tan mangapiger ed saray pasilidad na branch. Misalsalamat tayod saray dakel a boluntaryo ya makulikulin mankikimey ed sarayan proyekto! Tandaan ya bebendisyonan nen Jehova iray mapaabeba tan matoor ya mandodonasyon  pian nasumpal irayan proyekto.—Luc. 21:1-4.

12 Edukasyon. Imanoen pa ray nanduruman eskuelaan ya mangibabangat nipaakar ed Dios. (Isa. 2:2, 3) Wadtan so Pioneer Service School, School for Kingdom Evangelizers, Gilead School, Bethel Entrants’ School, School for Circuit Overseers and Their Wives, School for Congregation Elders, Kingdom Ministry School, tan say School for Branch Committee Members and Their Wives. Talagan labalabay nen Jehova ya ibangat iray totoo to! Nipapaseseg met so panaral na Biblia diad website tayon jw.org ta available ditan iray publikasyon tayo ed nilasus iran lenguahe. Diad satan ya site et wala ray espisyal a seksion parad ugugaw, pamilya, tan wala met iray balita. Kasin uusaren yoy jw.org diad ministeryo yo tan diad panagdayew na pamilya yo?

MANMATOOR ED SI JEHOVA TAN SUPORTAAY ORGANISASYON TO

13. Antoy responsabilidad tayo ran matoor ya mandadayew ed si Jehova?

13 Baleg a pribilehyo so magmaliw a kabiangan na organisasyon nen Jehova! Amta tayo ray kakaukolanen tan estandarte to, kanian responsabilidad tayon gawaen no antoy duga tan suportaay soberanya to. Lapud onuuges lan onuuges so mundo, kaukolan tayon ‘busoley kaugsan’ ya singa pangipapasen nen Jehova ed satan. (Sal. 97:10) Agtayo mipakna ed saray totoon anggapoy takot dad Dios ya mangibabagan: “Say maong et mauges tan say mauges et maong.” (Isa. 5:20) Lapud labay tayon napaliket so Dios, pansasagpotan tayoy mansiansian malinis ed pisikal, moral, tan espiritual. (1 Cor. 6:9-11) Inaro tayoy Jehova tan manmamatalek tayod sikato; nandesisyon tayon manmatoor ed sikato diad pangunor ed saray estandarte to ya malinew a nabasad mabmablin Libro to. Tan gagawaen tayoy anggaay nayarian tayon unoren iratan no wala tayod abung, kongregasyon, trabaho, eskuelaan, tan inerman ya kawalaan tayo. (Pro. 15:3) Imanoen ni pigaran paraan ya nipanengneng tayoy katooran tayod Dios.

14. Panon ya nipanengneng na saray Kristianon atateng so katooran dad Dios?

14 Panagpabaleg na ananak. Nipapanengneng na saray Kristianon atateng ya matoor irad si Jehova no ipapasal da iray anak da base ed Salita to. Saray atateng ya walay takot dad Dios et ag-ira manpapaimpluensyad kultura na bansa ra nipaakar ed panagpabaleg na ananak. Agmanpapaimpluensya ed espiritu na mundo iray Kristianon pamilya. (Efe. 2:2) Ag-isipen na bautismadon ama ya, ‘Diad bansa mi saray bibii so manbabangat ed ananak.’ Malinew so ibabaga na Biblia ya: ‘Sikayo ran kaamaan, itultuloy yon pabalegen iray anak yo diad disiplina tan panamilin [simbawa; panangigiya] nen Jehova.’ (Efe. 6:4, paimanod leksab) Labay na saray Kristianon atateng ya saray anak da et magmaliw ya singa si Samuel, a nansiansiay Jehova ed sikato diad ibabaleg to.—1 Sam. 3:19.

15. Panon tayon nipanengneng so katooran tayod si Jehova no manggagawa tayoy importantin desisyon?

15 Panagdesisyon. No manggawa tayoy importantin desisyon, nipanengneng tayoy katooran tayod Dios no konsultaen tayoy Salita tan organisasyon to. Pian natalosan tayoy kaimportantian na satan, iyilustra tayod sakey ya akaugalian na dakel ya atateng. Apasalan na dakel ya mantratrabahod arum a bansa ya ipaasikasod kapamilya da iray kapangiyanak ya ananak da pian nituloy day mantrabaho tan makalmoy kuarta ed abroad. Tua, personal iyan desisyon, balet nepeg tayon tandaan ya  eebatan tayod Dios iray desisyon tayo. (Basaen so Roma 14:12.) Duga kasin mandesisyon tayo nipaakar ed pamilya tan pananap na pambilay ya agtayo ni inkonsidera so ibabaga na Biblia? Andi! Kaukolan tayoy panangigiya na Ama tayod tawen lapud agtayo kanepegan ya ‘igiya so kupbang’ tayo.—Jer. 10:23.

16. Nen nananak so sakey ya bii, antoy kaukolan ton desisyonan tan antoy akatulong ed sikaton gawaen so duga?

16 Walay sakey ya biin nananak nen mantratrabahod arum a bansa tan plano ton ipaasikasoy anak tod atateng to diad bansa ra. Pero nen nananak, walay Tasi nen Jehova ya angiyaral ed sikato na Biblia. Tuloytuloy so impanaral to tan naamtaan ton obligasyon ton pabalegan so anak to ya mandayew met ed si Jehova. (Sal. 127:3; Pro. 22:6) Nampikasi tan imbaga tod si Jehova so amin a walad puso to, ya singa ibibilin na Biblia ya gawaen tayo. (Sal. 62:7, 8) Imbaga to met so problema to ed samay mangiyaaral ed sikato tan diad saray kakongregasyon to. Anggano pipiliten na saray kapamilya tan kakaaro to ya ipaasikasoy ugaw ed atateng to, amoria ton aliwa itan. Lapud pandinayewan na asawan laki so suporta na kongregasyon ed asawa to tan anak to, nampaiyaral na Biblia tan inmatendi met lad saray aral kaibay asawa tan anak to. Kasin parad sayan ina et inebatan nen Jehova so impapuson pikakasi to? Seguradon atan so alikna to.

17. Antoy instruksion ed sikatayo nipaakar ed saray iyaaralan tayoy Biblia?

17 Pangunor ed instruksion. Say sakey ya paraan a nipanengneng tayoy katooran tayod Dios et diad pangunor tayod instruksion na organisasyon to. Singa bilang, imanoen iray suhestion nipaakar ed saray iyaaralan tayo na Biblia. Irerekomenda ya no regular tayo lan iyaaralan na libron Anto so Peteg ya Ibabangat na Biblia? so sakey, mangigana tayo na pigaran minuto kada kayari na panagaral pian sikatoy magmaliw ya pamilyar ed organisasyon. Sarag tayon usaren so video ya Antoy Gagawaen Diad Kingdom Hall? tan say brosyur ya Siopa ray Manggagawa na Linawa nen Jehova Natan? Irerekomenda ya no asumpal ti lan inyaral so libron Ibabangat na Biblia ed progresibon estudyante, isublay tayon iyaral so libron Mansiansia Kayo ed Panangaro na Diosanggano abautismoan la. Inter na organisasyon iyan instruksion pian saray balon disipulo et “mansiansian malet ed pananisia.” (Col. 2:7) Kasin uunoren mo irayan suhestion na organisasyon nen Jehova?

18, 19. Anto ray rason ya pisalamatan tayoy Jehova?

18 Dakel so rason tayon pisalamatan si Jehova! Utang tayod sikatoy bilay tayo, ta no anggapoy Jehova et anggapo tayo met. (Gawa 17:27, 28) Inikdan to tayoy mabmablin regalo—say libro to, say Biblia. Maliket tayon aawaten itan ya mensahe na Dios, a singa saray Kristiano ed Tesalonica ya inawat da itan bilang Salita to.—1 Tes. 2:13.

19 Lapud walad sikatayo so Salita na Dios, inmapit tayod si Jehova tan sikatoy inmapit ed sikatayo. (Sant. 4:8) Inikdan itayo na Ama tayod tawen na balibalin pribilehyon magmaliw ya kabiangan na organisasyon to. Talagan aapresyaen tayo iratan ya bendisyon! Oniay marakdakep ya inkansion na salmista: “Misalamat kayo ed si Jehova, ta sikatoy maomaong; say matoor a panangaro to et mansiansia ya anggad angga.” (Sal. 136:1) Diad Salmo 136 et 26 beses ya binitla a say “matoor a panangaro to et mansiansia ya anggad angga.” No manmatoor tayod si Jehova tan ed organisasyon to, napruebaan tayon tua iratan ya makapaseseg ya imbaga na salmista lapud manbilay tayo ya anggapoy anggaan!